Lucas 1 - Nuevo Testamento Toba Maskoy

Nema altennasekama ania'a Teofilo

¹ Askeltavek altennaksek ania'a lheiap aktemakha lhta hengellanei'o Eniapom Neten nenieseksa ennengko'o. Mantek na enenlhet apnaktalhesaikamok aktemakha ania'a nak ma'a,

² apkellengai'a lhta aniem'o apatno'ok apkellelto lhta apkelvetaiangko ampai'akhasekha lhta akvetammalhka m'a qaselha nak. Netamen nemo lhta nhan allapaskamo m'a elpaiaksek ania'a nak halhmankek ham.

³ Teofilo, ko'o lhta nhan astaqmelkasavek asteniaikama ania'a nak ampai'osekha akvetammalhka m'a qaselha nak. Askeltavek kolhva atalhaksek angvempak hata alhenkesek akvakmo aktakha nnelha akvetammalhka lhnak ma'a kakpota elietsetek lheiap,

⁴ eihangvomhok nahan akto have niapak anke lhamakho nemo nak na aklhekmoskamo lheiap.

Aklhenammalhka etiemok hata Juan

⁵ Koka m'a lhennenga aptemo lhnak Herodes apiav'akha apveske iokhalhma Judea, apnengkek nak na m'a lhema sacerdote apvesai'a Zacarias, aptava lhnoka akvesai'a Isabel, Aarón aptaven neptamen nak ma'a. Zacarias apto lhnak apmakmekama lhemek apkelpasmekha apveske sacerdote Abías.

⁶ Alpeivomo lhnak napaqtek Eniapom Neten, alleliehekho lhnak na lhamakho apkellanemakha nkotnangkok kanhan henganemakha Apveske.

⁷ Mamma lhnak atka Isabel, akiennaktema naie' lhnoka m'a, alvaneiam ankek na ntaiangkok ma'a.

⁸ Lhema knem na ntemak akietekho apkenmakmekamo lhemek apkelpasmekama Zacarias ma'a kakpota enmakmama Eniapom Neten apnemakha.

⁹ Ka apnaqtevaseiangko lhnak lhema nennaqtevaskama aptaiangkelha apankavek na mota m'a, apnaksepmek nak Zacarias kakpota eklhek Eniapom Neten apnemakha, apvanlhemo lhnak panaktema ava' akmases aimes akvesai'a incienso m'a.

¹⁰ Neksa apvanlhemo lhnak ma'a, lhamakho enenlhet nak na apkelanmak avhak pa'at ma'a apkelelmalhnongkomo.

¹¹ Mpelapkeskankek nak apteiapvei'o lhema ángel apkapaskama Apveske akieto konne akiennakha alvanlhemmalhkelha panaktema ava' akmases aimes akvesai'a incienso.

¹² Apkenmenai'ak nak Zacarias apvetai'o m'a, avanhek nak na apkai'a m'a.

¹³ Koka ángel lhna aptemak apkanemo m'a: —¡Meniaga Zacarias! Aplengai'a mota Eniapom Neten apkenmalhnonkoma lheiap. Nkotak hata atka Isabel aptava nak lheiap, etneskes hata apvesai'a Juan.

¹⁴ Epaieskasekhak hata apvalhok lheiap kakpota nhan aplhamakho enenlhet'avok nematka ta m'a.

¹⁵ Neten ankek hata ngkotnek apiaspommap napaqtek Eniapom Neten, meinek hata vino m'a kakpota nhan iavhan anmen. Elanok hato ka apvalhok Espíritu Santo neksa apietnema konne av'alhok angken ma'a.

¹⁶ Eltok hata nhan enenlhet'avok ko israel elpengkamok apvalho'ok akieto apnakha Eniapom Neten Apveske apanko'ok ma'a.

¹⁷ Ka nematka nak evak hata apmanie m'a Apveske ta, nkolhok hata nhan ma'a apvalhok aktemo lhnak na nek apvalhok Elias kakpota nhan aknema apmopvana. Ellasekhaskesekhok hata apiapma'ak apketkak, etlhekmosangkok hata apkellelto meleliehekho nak kakpota eleliehekhok ma'a. Elpeneskasok hata nhan enenlhet'avok kakpota enmankok takha m'a Apveske ta —lhna aptemak apkanemo ángel Zacarias.

¹⁸ Ka apkatemmoiangka lhnak Zacarias ángel, lhna aptemak: —Motneskasak ko'o iokhalhmek akmak'akha nak nkotnehek, asvaneiam astahak, etava nhan. Nkaimelhke nak heteskesek lhema qaselha mongenatkeskama la'a kakpota atneskesek iokhalhmek ma'a —lhna aptemak.

¹⁹ Ka apkatemmoiangka lhnak mokhom ángel ma'a, lhna aptemak: —¡Se lha kto hei'askakmo nak lheiap ke! Gabriel ko'o Eniapom Neten hennenkasekama, apto nhan heiapaskama kakpota altennaskatak ania'a aktaqmanma nak.

²⁰ Koka kolhvave nak lheiap etnek hata metka apaivoma akvakmo akvetalhko qaselha nak askeltennaskama, ngkanek hei'askakmek lheiap —lhna aptemak ma'a.

²¹ Apkellailhengkek nak avhak pa'at enenlhet'avok Zacarias kakpota etiapvetak iokhalhma m'a. Apkelpaqmetkesammakpek nak mok apankavek ma'a apketlheianmo lhnak metiapma kolhvavek konne Eniapom Neten apnemakha.

²² Lhennenga lhna ntemak apiephongvektamo Zacarias ma'a, mamma lhna ntemak apaivoma, mok apophek nak aptemak ma'a. Ka atlheianmo lhnak apvalho'ok enenlhet'avok apvetai'a lhema qaselha m'a konne Eniapom Neten apnemakha.

²³ Ka akvaiakmo lhna nnelha apmakmekama Zacarias ma'a, aptaqhekho lhnak apnemakha.

²⁴ Ngvenaktenkek nak aknem ma'a, aktemo lhna nlosek aptava Zacarias. Ngvaiakmek nak 5 pelten aknema konne aknemakha metka akteiapma m'a, nlhenaikama lhnoka av'alhok ma'a, lhna ntemak:

²⁵ —Apveske hetaqmelkeskeskakmok askaniemhaikama kakpota mangheltaknevkek mokhom enenlhet'avok —lhna ntemak Isabel.

Aklhenammalhka etiemok hata Jesús

²⁶ Ngvaiakmek nak 6 pelten ma'a, apkapaskamo lhnak Eniapom Neten ángel Gabriel natemma Nazaret akieto Galilea.

²⁷ Apsakheskamo lhnak ania'a lhema ngkelvana atkok metka ngkolhek akmangvakmo akvesai'a María, akpokkanma lhnak lhema enenlhet apvesai'a José kakpota ngkotnek atava m'a, apveske David aptaven neptamen nak ma'a José.

²⁸ Aptalhnengvaiakmek nak ángel aknakha María, lhna aptemak apkanemo: —¡Lheia nak María, apnengkek lhemek lheia' Apveske, apkeltavek na engkesek ngkeskama aktaqmanma aniemhaikama lheia'! —lhna aptemak ma'a.

²⁹ Niemaskangkek nak av'alhok aklengai'o apaivoma apaiveskama ángel María, mannoka nkoihamok ma'a aptemakha apkanemo m'a.

³⁰ Lhna aptemak mokhom apkanemo ángel: —Mongvaga' María, Eniapom Neten apkeltavek engkesek ngkeskama aktaqmanma aniemhaikama.

³¹ Nlosek hata ngkotnek lheia', nkotak hata atka, kotneskes hata nhan apvesai'a Jesús ma'a.

³² Nkovak hata aknem aptema neten apankek apiaspommap ma'a nematka nak, eleltangkok hata enenlhet'avok Apketka apto Apveske netne kanke nak. Apveske Eniapom Neten hata nhan eniangkok aptanema apveske aptanmo lhnak nanek na apiata nnenga David.

³³ Etnek hata nhan apveske apanko'ok ko Israel mankotnengveianlha nnelha, have niapak ankek ma'a —lhna aptemak ángel.

³⁴ Ka atemmoiangka lhnak María ángel ma'a: —¿Niehe ngkotnek atak eietka, mamma etava ko'o? —lhna ntemak.

³⁵ Koka lhna aptemak mokhom ángel: —Evaiventak hata takhalhet Espíritu Santo lheia', nkapvetak hata nhan apmopvana Apto m'a apnema netne kanke nak. Ka ngkanek nematka nak apiamolhma ta kakpota nhan ngkolhek altangko Eniapom Neten apketka.

³⁶ Ka aktema mo'ok anak lheia Isabel aktakho akvaneiam, nkotak hata nhan atka m'a. Apketlheianme mota enenlhet'avok akiennaktema naie' m'a, koka ngvakmek ma'a 6 pelten aktema nlose'.

³⁷ Ngkanek Eniapom Neten apvankek elanak lhamakho qaselha apmak'akha la etnehek —lhna aptemak ma'a.

³⁸ Ka atemmoiangka lhnak mokhom María m'a, lhna ntemak: —Hai', ntase nak, hata ngkotnek aptakha nak lheiap, ko'o nak heiasennama Apveske —lhna ntemak. Netamen nak ma'a, aptaqhemo lhnak ángel.

Aktema amaika'a María, Isabel

³⁹ Netamen nak mo'ok aknem ma'a, akhetaiangka lhnak akmeiekho María natemma Judea akieto metaimong akhaiam.

⁴⁰ Ka aktalhnengvekho lhnak Zacarias apnemakha m'a, akpaiveskekho aptava Isabel.

⁴¹ Apkaktemmakpek nak atka av'alhok Isabel neksa aklengai'a lhnak akpaiveskama María, aplanei'avek nak na av'alhok Espíritu Santo m'a,

⁴² lhna ntemak akiennakteskamo akpaivoma: —¡María, Eniapom Neten apvetaskasak akiavai'a aktaqmanma aniemhaikama lheia' kakpota nhan atka nak, mangkolhnok altemo lhemek ngkelvana'ak!

⁴³ Have ko'o asto neten ankek asiaspommalhka hetno nak amaika'a lheia', lheia ta etnek ngken Apveske ehenkok.

⁴⁴ Neksa aslengai'a lhkek hepaivaskama lheia, apkaktekpek lhek eietka evalhok aniem'o apketsevaskamo.

⁴⁵ Aktaqmelakho nke ntak lheia ngkanek mankoi'askeiakmok nkopeneskaksek hata aktemakha apkanemo Apveske lheia —lhna ntemak.

⁴⁶ Koka lhna ntemak María: —Hai, altangko ta apiavai'a panke Apveske ngkanek nietnek apmopvana.

⁴⁷ Mpaihakhek evalhok aniem'o Eniapom Neten apto hevongkeskama tep.

⁴⁸ Heiangkek na akiavai'a aktaqmanma askaniemhaikama, niekhe astema koneng ankek hennenkasekama. Kolhva hetlhenama ta aplhamakho enenlhet'avok heleltangkok hata mota aktaqmelakho nkek askaniemhaikama.

⁴⁹ Ngkanek Eniapom Neten aknema apmopvana apanke heiangkek na akiavai'a aktaqmanma askaniemhaikama, apvesai'a nhan Apokkenammap memangveiam ngkolatsekama.

⁵⁰ Nietnek apkelietnai'o napaqta'ak apkellelto nak apkellai'o m'a,

⁵¹ apnaqtevaskek na m'a apkellelto nak apkellammakpoho akieplomo apoktong aknema akmovana nkoie.

⁵² Apkeliengke' apkeliav'akha apkelveskai'e akieplomo apkeltanema, neten koka apkeliasakhak ma'a nalhep'ave nak apvalho'ok.

⁵³ Mek ato'ok anak apkellangkokhek qaselha aktaqmanma, mok apmeiok koka apteskasokhak ma'a nema nak apkeletsekama.

⁵⁴ Apkelpasmek apkellanemmakpo israelitas apkellelto nak apkellennengkasekama, apkelietnave mota napaqta'ak ma'a.

⁵⁵ Apeneskamavek nak na nek apkeltennaskama Eniapom Neten elpasmok nengelieihengka'a Abraham, kakpota nhan aplhamakho aptavana'ak neptamen —lhna ntemak María m'a.

⁵⁶ Nnaiakmek nak lheme María m'a malha apqanetolhem'a pelten Isabel aknemakha, netamen aktaqhemo lhnak mokhom netamen ma'a.

Apteiam Juan apkellavkeskama iemmen aniapom

⁵⁷ Ngvaiakmek nak aknem akmahai'a etiemok atka Isabel ma'a,

⁵⁸ apkelvaiakmek nak annemolhema kakpota nhan aktema aklhamakha la'a ngkanek apkellengai'ak nak ania'a apkaikamok Eniapom Neten akiavai'a aktaqmanma aniemhaikama m'a.

⁵⁹ Netamen ma'a, apvaiakmek nak 8 aknem apteiam nematka nak, akiantemekho lhnak kakpota ngkolhek akiaqtemenkaso nekhatkok apkammelhakha. Koka enenlhet apkellelto apkelvetaiangko m'a, lhna aptaiangkok: —Koltemeskes hata apvesai'a Zacarias ham, ka kto nak apvesai'a apiapom anak —lhna aptaiangkok ma'a

⁶⁰ Koka lhna ntema ngken allatemmoiangka m'a: —¡Mma'! Juan hata apvesai'a hengke'e —lhna ntemak Isabel.

⁶¹ Koka enenlhet lhna aptaiangkok mokhom: —Mamma aknemolhema la apvesai'a Juan lheia —lhnak aptaiangkok ma'a.

⁶² Mok apopheio'ok noka aptaiangkok enenlhet'avok apkelelmalhneiangka Zacarias aktemakha apmahai'a etneskesek apvesai'a apketka m'a.

⁶³ Koka Zacarias apkeltemavek nak ngkolhek akmeso iamet akpaihema kakpota etalhaksek apvesai'a Juan ma'a. Nkeliemaskangkek nak apvalho'ok apkelvetai'a enenlhet'avok ma'a.

⁶⁴ Ka akpelapkeskamo lhnak na mokhom aktepekho apaivoma Zacarias, apiavenkaskesaiangka lhnak na apvesai'a Eniapom Neten ma'a.

⁶⁵ Nkelpelapkeskangkek nak aplhamakho enenlhet'avok ma'a, nketkaikama lhnak ania'a aklhamakho akhaiam metaimong akieto iokhalhma Judea.

⁶⁶ Koka apkellelto lhnak apkellengai'a ania'a nak ma'a, apkelvetai'o lhnak Apveske apto aptaqmelkeskama nematka nak, ka apkelpaqmetkesammakpo lhnak mok apankavek ma'a, lhna aptaiangkok: —¿Ko la ta etnek apvanemo ta nematka nak, he? —lhna aptaiangkok ma'a.

Aplheianma Zacarias nkotnek hata qaselha apmanie

⁶⁷ Aplanei'avek nak apvalhok Zacarias Espíritu Santo, ka apkelientemongkeskamo lhnak aplheianma qaselha akmak'akha ta ngkotnek ma'a, lhna aptemak ma'a:

⁶⁸ —Ntasek eliavenkaskesama apvesai'a nak Eniapom Neten Apveske ko Israel, ngkanek aptek amaika'a, el·hatsoskakhak na apkennemolhema neksa nema anmaikama.

⁶⁹ Apkapaskangkek na hengvongkeskama tep aknema apmopvana apanke. Apveske David aptaven neptamen, apto lhnak nanek na apkasennaikama Eniapom Neten ma'a.

⁷⁰ Aplheianmek nak nanek na aniem'o apkenmaikama apkeleltennasemmap ania'a apankok apkelpokkanma,

⁷¹ hengelvongkesek na lhta tep napaqtavek apkellelto hengellammelhmakha la'a kakpota nhan hengeltaknongkomakha nak.

⁷² Apkelietnai'avek nak nanek na napaqta'a m'a nelieihengka, mang nak nanek na nkomahai'ak elvangkamok annemo mo'ok apvalho'ok apkenmahai'akha etnangkok ma'a.

⁷³ Aptemo nhan juramento napaqtek Abraham,

⁷⁴ hengel·hatsoskakhak na lhta nhan neksa nema hengellammelhma kakpota envanka'ak hata hengellasennama metka nengellai'a m'a.

⁷⁵ Angellanangkok na lhta nhan qaselha altaqmelo, akpeivomo nhan lhamakho aknem.

⁷⁶ Lheiap eietka ngkolhek hata aktemeskaso apkeltennaskama ania'a apankok apto apnema netne kanke nak. Lheiap hata evomok apmanie m'a Apveske, epeneskasok hata nhan amai apankok ma'a.

⁷⁷ Eleltennasama ta enenlhet'avok ko Israel Eniapom Neten hata etneskesama apankek meleliehekho apkellaskamakha m'a, elvongkesek hata nhan tep ma'a.

⁷⁸ Avanhek ankek apkelietnai'o nengaqta'a Eniapom Neten, hengellangkek sekha akteiapma aknem

⁷⁹ kakpota nkapommetek apkellelto apkelloma akiavai'a ienaqtesakha lhma kanhan nengetsepma peskeska nkok. Apmahai'a nhan hengelvetaskesek amai akvesai'a aktaqmelaikama engvalho'ok —lhna aptemak Zacarias.

⁸⁰ Apvanekaniek nak nematka nak, niennaqtenkek nak apvalhok ma'a. Aplomaka lhnak na m'a iokhalhma metkelha temma akvakmo aknem apvetaskesakpo enenlhet'avok ko Israel.