Judas 1 - Nuevo Testamento Toba Maskoy

Aklheianma apvalhok Judas

¹ Ko'o Judas, Santiago nhan apialheng ko'o, asto nhan heiasennaikama Jesucristo. Nlhenkek evalhok apkellelto apkeliekieskama Eniapom Neten aniem'o apkellamelaiam, apkellelto nhan apkeltakmelkeskama m'a Jesucristo.

² Askeltavek na evaivesentak takhaplhet'ok akiavai'a nke nenietnai'o nenga'at anak, aktaqmelaikama envalhok kanhan nengasekhai'o nak ham.

Ngkolatsekama aptemakha hengetlhekmoskama

³ Ketlhengkap elialheng'a askellamelaiam, avanhe skeltema anaktalheskesek aktemakha m'a nengelvongkasemmalhka nak tep. Kolhva koka asmak'ak allasnama askeleltemo eliavenkasok apkeltakmelkeskama meliaskeiam anak nema allaikamok alhta aplhamakho apkellelto nak apkelpokkenammap.

⁴ ¡Ellaho toka m'a enenlhet'avok meliamolhma nak apkelvai'o lhna lhta mota ham apieseksek anak ketlhengkap! Apkelpasmekhek na lhta ketlhengkap ma'a, apkeliennengkeskamo lhna lhta nhan. Apkellaneiangkek na lhta lhamakho aktemakha qaselha ngkollatsekama atlheianmo apvalho'ok metka apiaqmongkasekha Eniapom Neten aniem'o aktaqmanma nke nak aptemakha, menmaiangkok na takha m'a apto lhema aphapak Apveske engankok Jesucristo. Tep nak nanek nlheianmek Eniapom Neten apaivoma etlhevangkok hata nema aliaqmongkaskesekha apkeltemakha m'a.

Aklhenammalhka nkovak nema aliaqmongkasekha apkeltemakha

⁵ Smak'ak atlhenkeskeskakhok na apvalho'ok ketlhengkap ma'a apnaqtevasekho lhnak nanek Eniapom Neten Israelitas apkellelto la apkeliaskeiam neksa apkel·hatsoskekha lhnak nanek ma'a akieto Egipto.

⁶ Apkakhaiangkek nak nanek na ángeles meleliehekho Eniapom Neten, melietemo lhnak nanek apkellanemmakpelha etnangkok ma'a, apkelieniekho lhnak nanek na apkellomakha. Ka ngkanek Eniapom Neten apkelhakhamo lhnak nanek aiseksek ienaqtesakha lhma apnaktamo. Apkakhangkek mokhom ma'a nenvanlha nak akvaiakmo ta nhan aknem akientalhnengvaiam aliekpelkammalhkelha nhan nentaiangkolha.

⁷ Apkellengaiangkek nak nek na akientalhnema enenlhet'avok ma'a ko Sodoma kanhan Gomorra kanhan mo'ok apkellavakha nekhav'ak apkennemolhema. Apkellaneiangko lhnak na ne mota apkellanaktema manganemmalhkelha nak antangkok, apkenmekho lhnak nanek na apkenno lhemek ma'a. Lhnak na nek na nkeniemai'ak ma'a apketlhevaiangko nema aliaqmongkasekha aptaiangkolha akieplomo talha metka aksepanai'a kakpota nhan ngkotnek nema allaskama aplhamakho enenlhet'avok ellanangkok aktemo nak ma'a.

⁸ Nkaqhok koka apkellengai'a niekhe ania'a, apkellaneiangkek apankavek ngkollatsekama enenlhet'avok apkakhangko nak apieseksek anak ketlhengkap ham. Apketlhenakpave mota apankavek apkellelto apkelientalhnemo aniem'o alvanmeskama mota qaselhaha. Koka malha apkelpaisengkeskama apiempeiok mokhom aptaiangkok ma'a aniem'o meliamolhma, man na nkonmahai'ak eleliehekhok apkelientalhnemo, apkeltaknongkongkek na m'a alientalhnemo nak ma'a aknaiangko nak neten.

⁹ Koka Miguel apto lhnak apveske ángeles, ngvai'ak nanek na akvannammalhka apvalhok eimatkesek ma'a aveske keliaqhameio neksa apkeliamenammap ma'a apkenmeiommap apiempek apketsepma Moises, lhnak nanek aptemak ma'a: "Apveske toka etakneva lheia", lhna aptemak.

¹⁰ Koka apkeltaknevakkek enenlhet'avok anak ma'a qaselha nak melioho mokhom, mankollapvanka'ak na nkolketamama apvalho'ok malha aktonak kaselha nevhak la'a aktevasemmalhko nkek aniem'o aktekhanekamok qaselha.

¹¹ ¡Aii enenlhet'avok la ie! Aptaiangkek ma'a aptemakha lhnak nanek Cain. Apkeliennengkeskangkek enenlhet aniem'o apteniaikamok patakkom ka aptemo lhnak nanek na Balaam ma'a. Eletsepok hata m'a aniem'o meleliehekhok ka aptemo lhnak nanek na Core m'a.

¹² Henmankaskama ankek ma'a apkellanekamok anak qaselha ngkollatsekama neksa apkelpasmekha ketlhengkap ma'a aktaqmelaikama lhma apanko'ok anak ma'a akvesai'a nentaiangkolha nenlhelhma ankok anak. Mamma apkellai'akha la'a aptavengko la aptekamok, vanlha aptengiaikamo mota apanko'ok apankavek. Malha nhan aptangkok ma'a iephopai'a la metka akmamai'a aksenta, nsavke mota alhkaiam ma'a akmak'akha la nkosvok. Malha nha kto nak iamet metka akielhna neksa akvekha aknem akielhnemakha nak, nkolhek na al·hatsoso aikapmenok, nkotsepok akiokho nkek ma'a.

¹³ Apkellanengke mota nhan qaselha henmankaskama, malha kto nak akiaqmopai'a nak alakhaiam iemmen alvata akiennaktema nkek atsenta nak qaselha apavok alhammalhka la'a. Malha nha aptangko nak apiav'a la apkeliaqmongkasekha mo'ok amai apanko'ok apkenmeiekhelha la'a. Ngkolhek hata nhan altaknongvakho, ngkolhek na allapaso akiav'akha nkek ienaqtesakha lhma mangkotnengvaiam annelha.

¹⁴ Enok koka apto lhnak 7 apkeniem'o Adan aptavana'ak neptamen, apaiesaiangka lhnak ania'a sekhek ankek elvakha ta m'a enenlhet'avok meliamolhma nak, lhna aptemak: «Ngvet'ak lhek ehaqtek Apveske apkelhiakmo m'a, apketlhelhma'ak koka apentalhnema apanke apkelpokkanma

¹⁵ kakpota ellanhok aptemakha apkelanai'a aktaqmanma, ngkollatsekama aplhamakho enenlhet'avok, etlhenek apketselhnanemmap apkelelto nak apkellanekamok ngkollatsekama, apkeltaknongkongkek apvesai'a m'a», lhna ntemak akvetai'a apaqtek Enok ma'a.

¹⁶ Ka enenlhet'avok anak apkellelto m'a apkeliematkesaikama po'ok, apkeltaqnevaikama, kanhan aptengiaikamo mota qaselha aleklemelha la apvalho'ok. Apkellammakpo pankavek, altakmanma niekhe apkelpaqmeiasma ellanhok po'ok napaqtek la'a, koka akhemo malha apkenmopvanka ania'a, vanlha koka mota nhan apteniaikamok qaselha apanko'ok apankavek.

Nema allaskama qaselha

¹⁷ Elialheng'a askellasekhai'o, kotlheianvakho ta apvalho'ok apketlheianmo lhta sekhe ankek apkellapaskama, apkellasennaikama nhan apveske engankok Jesucristo.

¹⁸ Neksa akmahai'a lhna lhta nkovak ma'a aptemongvanlha ta nnelha aknem, elvak hata enenlhet'avok apkeliematkesaikama mota, nkonmama ta nhan aliaspongkomakha nak apvalho'ok ma'a.

¹⁹ Apkellelto nak apkelhpankeskama ketlhengkap aniem'o anmaikama aliaspongkomakha apvalho'ok ma'a, mamma songkek Espíritu Santo apvalho'ok ma'a.

²⁰ Elvaskap hato ka aktaqmanma nke nak meliaskeiam ketlhengkap elialheng'a askellamelaiam, elelmalhna ta mota aniem'o apkelpasmoma Espíritu Santo.

²¹ Etlhengkes hata mota apkellamelaiam Eniapom Neten, elel·halhen hata aknem nkovak hengellaikamok aliennaktema ennenio'ok nkotnengvaianlha nnelha aniem'o m'a apveske engankok Jesucristo apmapiose nhan hengellanhok ma'a.

²² Elietnaho ta napaqta'a m'a apkeliaskeiam anak,

²³ elvongkes hata nhan tep eleiveskakhak apkellelto nak apkakhaikamo nak aiseksek talha, ellapioso ta nhan ellanhok ma'a meliamolhma nak. ¡Koka ellaho'! Melpasengvom ankek ma'a apkellanengko la ngkollatsekama ngkanek akvakho apkelentalhnema malha aliepetkai'a la meliamolhma m'a.

²⁴ Apvankek Eniapom Neten elpasmok ketlhengkap kakpota mellanankek qaselha ngkollatsekama, elalhnaskesek na apvalho'ok neksa apkeliamolhma. Eliantemakhek na akieto napaqtek aktaqmelakha nkek ma'a akieplomo akiavai'a alpaihekha apvalho'ok.

Judas apiavenkaskesaikama apvesai'a Eniapom Neten

²⁵ Hai, angelvenkesama ta kolhvave nak emmanie ta nhan metka nnelha apto lhema phapak apveske, Eniapom Neten, hengvonkeskama tep nahan aniem'o Jesucristo. Apientalhnemo, apkapommatema apankek nahan, neten apankek, aknema apmopvana apankek na m'a. Amen.