Juan 6 - Nuevo Testamento Toba Maskoy

Jesús apkellaikamok aptekamok tep cinco mil enenlhet'avok

¹ Netamen alhta m'a, apmeiakhe lhta Jesús mo'ok nekha alvata akvesai'a Galilea, mo'ok akvesai'a Tiberia.

² Ma lhta ntek enenlhet apkelieplekha m'a ngkanek apkelvetai'ak aklhamakma qaselha mongenatkeskama apkellanai'a m'a. Apkeltakmelkeskaiam na enenlhet anmaska apiempeiok ma'a.

^3-4 Nkanketvakme lhta nhan ma'a aknem aktaqmelaikama lhma akvesai'a Pascua, ka apmeiakho lhta Jesús kakpota nhan apkeltamesaikamok metaimong akhaiam, apkakhengvakmo lhta nhan ma'a.

⁵ Ka apkammelho lhta Jesús ma'a, ma lhta ntek enenlhet apketlheiam ma'a, apkenmalhnengka lhta Jesús Felipe, lhta aptak: —¿Ko la angvetangvomok nenmama la nentoma m'a aptekamok la enenlhet anak ha'e he? —lhta aptak Jesús.

⁶ Apkenmalhnema lhta apankek Jesús Felipe eniatemmoma kelhaha, koka apiave lhta niekhe Jesús apmak'akha etnehek.

⁷ Ka apkatemmongka lhta Felipe, lhta aptak: —Nkaqhok anmakmama 7 pelten la'a akianmoma patakkom, mankovakhek kakpota angellangkok ketsek la pan enenlhet'avok anak —lhta aptak ma'a.

⁸ Apne lhta nhan po'ok apkeltameskama Jesús ma'a apvesai'a lhta Andres, Simon Pedro apetma, lhta aptak apkano Jesús:

⁹ —Ka lhema apketkok hengke'e, vanlha 5 pan akiepetkai'a cebada, hanet na kelasma, mankovakhe koka nennasko la'a —lhta aptak Andres.

¹⁰ Koka lhta aptak Jesús apkellano apkeltamesaikamok: —Eleltennasamok enenlhet'avok anak eniakhangko ta takhalhet pa'at alielsellemo nak —lhta aptak Jesús. Tep 5 mil alhta apkelennava'ak ma'a.

¹¹ Ka apkenmo lhta Jesús pan, apto lhta nhan gracias Eniapom Neten, apkellangko enenlhet'avok ma'a, nnavek alhta nhan kelasma. Aptavengke lhta lhamakho enenlhet'avok ma'a

¹² akvakmo apkeliaqkanakmo lhta m'a. Netamen alhta aptak apkellano Jesús apkeltamesaikamok: —Eleliaqhekho ta apkelaimommap anak kakpota monnaqtevakse —lhta aptak Jesús.

¹³ Ngvakme lhta 12 iama posak alaimommalhka apkeliakhekha m'a 5 lhta niekhe pan akiepetkai'a cebada m'a.

¹⁴ Nkeliemaske lhta apvalho'ok enenlhet'avok apkelvet'o qaselha mongenatkeskama m'a, lhta aptangkok: —Have na niapak enenlhet anak apto apkeltennasemmap ania'a aplhenammakpo lhnak nanek lhennenga kakpota evak hengke'e —lhta aptangkok ma'a.

¹⁵ Apiempeiok apankave lhta apteniangkok enenlhet kakpota eltemeskesek apiav'akha apveske' Jesús ma'a, koka apkanetvakhe lhta netne kanke metaimong akhaiam Jesús ma'a kakpota elhek aplhepkennenga m'a.

Jesús aplhengama takhalhet iemmen

^16-17 Apkelienaktesema lhta lhma m'a, ma lhta ev'aktak Jesús mokhom ma'a. Ka apkelkanetvakho lhta loma nemmen mok apankavek apkeltamesaikamok kakpota el·halhtepelhketek alvata, enmeiakhak na temma Capernaum.

¹⁸ Kolhvave lhta nkelhkakmok alhkaiam akiennaktema m'a, aliokho lhta nha ntak alakhaiam iemmen ma'a.

¹⁹ Apkelvakme lhta malha 5 nlho ka la 6 kilometros apketlhengama loma nemmen, ka akpelapkeso lhta apkelvetai'a Jesús aplheiam takhalhet iemmen, apkellak'a lhta nhan ma'a.

²⁰ Koka lhta aptak Jesús: —¡Manghellaga, ko'o hengke'e! —lhta aptak.

²¹ Nkeltaqmelakhe lhta apvalho'ok apkeltamesaikamok ma'a, ka apkelkanetkaso lhta loma nemmen, apkelvakmo nhan kolhvavek ankek ma'a apkenmak'akha lhta elvomok ma'a.

Enenlhet apkelketansema Jesús

²² Lhema aknem alhta ntak akiekai'a m'a, koka enenlhet'avok alhta apkakhaikokha tep alvata neptamna'ak ma'a, nketlheianmek nak apvalho'ok ma'a apketlhengamo mok apankavek apkeltamesaikamok Jesús loma nemmen ma'a, meltema apketlhelhma'ak Jesús.

²³ Ka apkelvetai'o lhna lhta nhan atlheiakmo aklhamakha loma nemmen alleniemai'o m'a na temma Tiberias, nengaqte lhta aptemakha lhta gracias Eniapom Neten Jesús ma'a, apkellaiangkelha lhta nhan aptekamok enenlhet'avok apentalhnema m'a.

²⁴ Koka mang na lhta elvetai'ak Jesús kakpota nhan apkeltamesaikamok neten loma nemmen ma'a. Ka apkelkanantemo lhna lhta loma nemmen ma'a, nlhaniek na lhta loma nemmen ma'a, apkel·halhtepelhketmo lhna lhta nhan alvata akmaiangko na temma Capernaum aniem'o apkelketansema Jesús ma'a.

Jesús apto malha nentoma hengaikamok neniennaktema

²⁵ Ka apkelvakmo lhta enenlhet'avok mo'ok nekha alvata, apkelvetakho lhta Jesús ma'a, apkelelmalhnengka lhta, lhta aptangkok: —Hengetlhekmoskama, ¿se lha akto aknem apvai'a lheiap hengkaie, he? —lhta aptangkok ma'a.

²⁶ Koka lhta aptak Jesús apkellatemmongka m'a: —Helketangke mota ketlhengkap ngkanek askellangke lhta aptekamok akvakmo apkeliaqkanakmo lhta, koka meliamok mokhom aktemakha aklheianma m'a qaselha mongenatkeskama askelanai'a nak ko'o.

²⁷ Moltama nkek apkelvalho'ok apteniaikamok aptekamok, nkosavhalhka mota m'a. Koka ntase eliavenkaso apkelketansema mo'ok aktemakha nentoma akto mankosavhommalhka, allaikamok na apkeliennaktema mankotnengveianlha nnelha apkellangiemhaikama. Koka Enenlhet Apketka nak apvankek ellangkok ma'a qaselha nak, ngkanek nietnek apmopvana m'a aniem'o Eniapom Neten —lhta aptak Jesús apkellano m'a.

²⁸ Koka lhta aptangkok enenlhet apkelelmalhnengka m'a: —¿Ko la apkeltakha antangkok Eniapom neten ennengko'o m'a, he? —lhta aptangkok.

²⁹ Ka apkellatemmongka lhta Jesús ma'a, lhta aptak: —Eniapom Neten apkeltavek meliaskamek apto apkapaskama —lhta aptak.

³⁰ Lhta aptangkok mokhom enenlhet apkellano Jesús: —Elana no qaselha mongenatkeskama kakpota mangeliaskamek ennengko'o lheiap.

³¹ Ka aptemo lhnak nanek nengelieihengka Moises annenga akieto iokhalhma metkelha temma, apkellaiangko lhnak nanek nengelieihengka aptekamok nentoma mana, ka ntemak aktalhesammalhka m'a Vakkahak Eniapom Neten apaivoma hengke'e: «Apkellangkek pan apkelleniemai'o neten kakpota etavangkok ma'a».

³² Ka apkatemmongka lhta mokhom Jesús ma'a, lhta aptak: —Have niapak ankek ma'a, have apto Moises apkellaikamo lhnak nanek pan apkelleniem'o m'a neten, koka kolhvave nak ko Tata apkellangkek apto haveniapak ankek pan apkeniem'o neten.

³³ Hai', koka apto pan ma'a apkellaikamok Eniapom Neten apvaiventamo nhan neten, eltemeskesek na aliennaktema apkellangiemhaikama enenlhet'avok lhmankek ham —lhta aptak Jesús.

³⁴ Koka lhta aptangkok mokhom enenlhet'avok: —Apveske, hengellamok hata mota pan aplheno lhkek —lhta aptangkok.

³⁵ Koka lhta aptak Jesús apkellano mokhom: —Ko'o asto nak pan askellaikamok aliennaktema apnenio'ok enenlhet'avok. Apto la heieplekama, mangheiaskeiam nahan, mankaqhekhek ankek hata mek kakpota meimakiek hata nhan.

³⁶ Helvet'a niekhe ketlhengkap askelanai'a lhamakho qaselha napaqtave, mokhom koka heliaskeiam.

³⁷ Lhamakho apkellelto lhta Eniapom hellaikamok apkeltemo altakmelkesek, helioktanie lhta ko'o, moltaqhesehek hata nhan ma'a.

³⁸ Asvaivantanie lhta ko'o koneng anak have asmak'akha atnehek ehenkok ehenke, vanlha asma aliehekho Eniapom apto lhta heiapaskama.

³⁹ Apkeltemo altakmelkesek enenlhet'avok anak hellaikamo lhta, netamen akvakmo ta nnelha lhmankek ham, anaklhatekhaskamok hata apieseksek apkenmaskengvaiakmo.

⁴⁰ Apkeltavek apto lhta heiapaskama ellanhok aptemakha Apketka nak, meliaskamek nahan kakpota m'a etlhevangkok aliennaktema apnenio'ok nkotnengvaianlha nnelha', anaklhatekhaskamok hata nhan ma'a akvakmo ta nnelha aknem alhma nkek ham —lhta aptak Jesús.

⁴¹ Koka m'a moklhem'a apkelemhama apmaniaie judios apkelpaqmetkesakpave lhta mok apankavek ma'a apkeliemetkasengka aptakha Jesús ma'a, ngkanek aplhenakpe lhta apanke aptema pan apkeniem'o neten.

⁴² Lhta aptangkok ma'a: —¡Apmopvana ania'a apkeniem'o neten, neliavek ennengko'o Jesús ha'e, José apketka ham, neliavek na ngken! —lhta aptangkok.

⁴³ Ka apkellatemmongka lhta Jesús ma'a, lhta aptak: —¡Elvatesamok apkelmaleniosemmap mok apankavek!

⁴⁴ Mankotlhenap apvalho'ok ketlhengkap sek la ko'o enenlhet ke', vanlha Eniapom apto heiapaskama apvanke eliangveskeskamhok hata, netamen anaklhatekhaskamok hata akvakmo ta nnelha alhma nkek ham.

⁴⁵ Nietnek apnaqtalheskama vakkahak apkeleltennasemmap ania'a annenga, ka ntak hengke'e: «Eniapom Neten hata etlhekmoksek lhamakho enenlhet'avok», ka ntemak ma'a. Ka ngkanek enenlhet'avok la apkellailhemo, apkellasekhai'o la nhan Eniapom anak, hata etnangkok helieplekama ko'o m'a.

⁴⁶ Mamma enenlhet apvetai'o m'a Eniapom anak, vanlha koka apto apkeniem'o m'a Eniapom Neten apvetai'o m'a.

⁴⁷ Have niapak anke, apto la mei'askeiam, ngkoitek hata akiennaktema apneniek mankotnengveianlha nnelha.

⁴⁸ Ko'o asto nak pan apkeltemeskeskama apkeliennaktema enenlhet'avok.

⁴⁹ Apkelieihengka ketlhengkap aptoiangkek nak nanek nentoma mana akieto m'a iokhalhma metkelha temma, koka nkaqhok apkeletsepmek ma'a.

⁵⁰ Koka aptavengko la asiokhoho malha pan apkeniem'o neten, meletsepek hata.

⁵¹ Ko'o asto nak pan apkeliennakteskama apnenio'ok apkeniem'o neten. Aptavengko la moklhem'a, nkolhnangkok hata aliennaktema apnenio'ok mangkotnengvaiam annelha. Asiokha nak askellaikamok malha pan kakpota nkolhnangkok aliennaktema apnenio'ok aplhamakho enenlhet'avok lhmankek ham —lhta aptak Jesús.

⁵² Apkelempave lhta mokhom apkelpaqmetkesakpo mok apankavek judios ma'a, lhta aptangkok: —Niehe ngkotnek hengellangkok aphapetek anak kakpota antavangkok —lhta aptangkok ma'a.

⁵³ Koka lhta aptak mokhom Jesús: —Have niapak ankek ma'a, mang hata nkek etavengkok ketlhengkap aphapetek Enenlhet Apketka nak, meinanko la nhan ema apankok ma'a, mangkoitek hata aliennaktema apnenio'ok.

⁵⁴ Koka aptavengko la ehepetek anak, apienangko la nhan ema ehenkok ma'a, nkoite ta aliennaktema apnenio'ok, netamen akvo'o la nnelha aknem lhmankek ham, ko'o ta anaklhatekhaskamok na m'a.

⁵⁵ Ko'o ehepetek anak akto have niapak ankek nentoma, ko'o ema ehenkok anak nahan, akto nhan have niapak ankek neniama.

⁵⁶ Aptavengko la enenlhet ehepetek anak, apienangko la nhan ema ehenkok anak, nelpasmommalhko nentangkok ma'a.

⁵⁷ Eniapom apto alhta heiapaskama nietnek apiennaktema, heiangkek na ko'o apiennaktema m'a, enenlhet aptavo la ehepetek anak, ngkoitek hata nhan apiennaktema.

⁵⁸ Ka pan anak apkeniem'o neten, have aptonak ma'a nentoma mana aptoiangko lhnak nanek apkelieihengka ketlhengkap, nkaqhok koka apkeletsepmek lhnak nanek ma'a. Koka aptavengko la pan alheno lhkek, ngkoitek hata aliennaktema apnenio'ok mankotnengveianlha nnelha —lhta aptak Jesús.

⁵⁹ Koka lhamakho apketlhekmoskama nak Jesús, lhta nietok ma'a konne apkaqnekhelha judios na temma Capernaum.

Apaivoma hengaikamok akiennaktema enneniek

⁶⁰ Ka apkelleng'o lhta apkellelto apkeltamesaikamok Jesús ma'a, lhta aptangkok: —Nientelhek ankek ammok takha hengetlhekmoskama nak, mankapvankek enenlhet eliehekhoho —lhta aptangkok.

⁶¹ Koka apiave lhta Jesús apkelmaleniongka apkeltamesaikamok, lhta aptak: —¿Nkellavkaske nlho ketlhengkap astakha lhkek alheianma, he?

⁶² ¿Ko la ta etnangkok ketlhengkap apkelvet'o ta Enenlhet Apketka nak apmeiakho ta mokhom neten, he?

⁶³ Espíritu akto apkellaikamok aliennaktema apnenio'ok ketlhengkap, koka enhapetek anak mankolienna'ak ma'a. Ka aspaioma lhkek akto Espíritu kanhan nenganiemhaikama,

⁶⁴ koka moklhem'a ketlhengkap apkeliaskakmek mokhom —lhta aptak Jesús ma'a. Apiave lhta Jesús apkellelto apkeliaskeiam ma'a, apiave lhta nhan enenlhet etnek hata apselhnanongkoma, ka nkeniemai'ak aplheianmo m'a qaselha nak.

⁶⁵ Netamen alhta aptak mokhom Jesús: —Mankapvankek enenlhet heieploma melto la Eniapom anak —lhta aptak.

⁶⁶ Kolhvavek anke lhta apkelvatesangkok napokha apkeltamesaikamok Jesús ma'a,

⁶⁷ ka apkelelmalhnengka lhta Jesús 12 apkeltamesaikamok, lhta aptak apkellano: —¿Ketlhengkap anlho nhan apkenmak'ak elvatesangkok helieplekama, he? —lhta aptak.

⁶⁸ Ka apkatemmongka lhta Simon Pedro m'a, lhta aptak: —Apveske, mamma apno enenlhet lheiap, vanlha lheiap apaivoma nak avankek hengankok akiennaktema ennenio'ok nkotnengvaianlha nnelha.

⁶⁹ Mangeliaskeiakmok na ennengko'o lheiap, neliavek na apto apokkanma Eniapom Neten lheiap —lhta aptak Pedro.

⁷⁰ Koka lhta aptak Jesús: —Ko'o lhta askeliekieskama 12 nak ketlhengkap, koka apnek lhema apieseksek malha aveske keliaqhameio —lhta aptak Jesús ma'a.

⁷¹ Koka apieseksek alhta 12 apkeltamesaikamok, lhta aplhena niekhe lhema aphapak ma'a. Judas Iscariote lhta apvesai'a m'a, Simon apketka aptemo apselhnanongkoma m'a aptakho niekhe aptaiangkolha aplhelhma nengaqtek ma'a.