Juan 5 - Nuevo Testamento Toba Maskoy

Jesús aptaqmelkaskeiam metka aptapno'ok akieto Betesda

¹ Netamen alhta m'a apmeiakho lhta Jesús akieto natemma Jerusalen kakpota epasengvomok aktaqmelaikama lhma judios apanko'ok ma'a.

² Nengaqte lhta atong nentalhnemakha Jerusalen akvesai'a nepkesek, nietnengke lhta lhema pa'at metaimong alanemmalhka akhalhtemommalhka nekhav'ak, 5 lhta nhan atno'ok ma'a. Pangkalhva koka alanemmalhka metaimong konne m'a akvesai'a Betesda, hebreo apaivoma.

^3-4 Apnaiangke lhta lhamakho aktemakha anmaska apiempeiok ma'a, metka apaqto'ok, apkeliakteikama, metka aptapno'ok.

⁵ Apietnengke lhta nhan lhema enenlhet ma'a, 38 iantelhkapa lhta ngvaiakmok aplengaiangko akmaska apiempek.

⁶ Ka apvetangvakmo lhta Jesús ma'a, aplengai'o nhan ania'a aplhenammap akmaska apiempek alhta ma'a, lhta aptak apkano: —¿Apkeltave nlho etaqmelekha lheiap, he? —lhta aptak.

⁷ Ka apkatemmongka lhta enenlhet: —Apveske, mongvapvanak aklhek emanie iemmen neksa nema akhaposkekta la iemmen, nne mota hepoktengkaso ko'o, mamma ko enenlhet hepasmok kakpota aklhek iemmen emanie —lhta aptak enenlhet.

⁸ Koka lhta aptak apkano Jesús: —Etnemekha neten, ema nema aktangkeskama nak, elheng ma'a —lhta aptak Jesús apkano.

⁹ Kolhvavek ankek alhta apkenmakhak neten, aplhengo nhan, apmo lhta nhan nema aktankeskama m'a. Koka nietavek anke lhta aktakha aknem nennekhelha' sabado m'a,

¹⁰ lhna lhta nkeniemai'ak na apkelemhama apmaniaie' judios aptaiangkok apkellanemo aptaqmalveiam enenlhet ma'a, lhna lhta aptaiangkok: —Sabado aknem anak nennekhelha, mankoltemak ley ampatmok nema hentangkeskama la'a —lhna lhta aptaiangkok ma'a.

¹¹ Koka lhna lhta aptemak enenlhet: —Apto lhkek hetaqmelkasekha apkeltemo apatmok nema hethangkeskama nak hengke'e kakpota nhan alhong —lhna lhta aptemak ma'a.

¹² Apkelelmalhnekhavek na lhta mokhom apkelemhama apmaniaie' judios, lhna lhta aptaiangkok: —¿Se lhkek enenlhet apkeltemo lhnak lhek epatmok aptanema ntanema nak kakpota nhan elhong, he? —lhna lhta aptaiangkok ma'a.

¹³ Mang noka eihamok enenlhet apto aptaqmelkasekha m'a ngkanek mannak etekhok mokhom Jesús, aplhaniek na lhta enenlhet ma'a.

¹⁴ Netamen alhta m'a apvetakho lhta mokhom Jesús enenlhet konne Eniapom Neten apnemakha, lhta aptak Jesús apkano: —Aptaqmelakhave i'e lheiap, melanekha nkek mokhom ngkolatsekama, ngkotnekhak kelha mokhom akiavai'a akmaska apiempek —lhta aptak apkano.

¹⁵ Netamen apmeiakho lhta mokhom akieto neptamen enenlhet, apkakhangkolha apkelemhama apmaniaie' judios, lhna lhta aptemak apkellanemo m'a: —Kolhva asiavek apto lhkek hetaqmelkaseha', Jesús lha iek —lhna lhta aptemak ma'a.

¹⁶ Apkelempai'avek na lhta apkelemhama apmaniaie judios apkenmahai'a emenlhenama Jesús ma'a, lhta songke apmakmeiangka aptaqmelkeskaiakmo akmaska apiempek aknem sabado nennekhelha.

¹⁷ Koka lhta aptak Jesús apkellano m'a: —Ko'o Tata apmakmema lhamakho aknem, ko'o nhan asmakmema —lhta aptak Jesús.

¹⁸ Apkellavke lhta apkelemhama apmaniaie judios ma'a, apkenmak'ave lhta ennapok Jesús ngkanek apmakmeiangka aknem sabado nennekhelha, aplhenakpe lhta nha apankek apto Eniapom Neten apketka, apnemo nhan Eniapom Neten.

Eniapom Neten Apketka akietnema apientalhnemo

¹⁹ Koka lhta aptak Jesús apkellano m'a apkelemhama apmaniaie judios: —Have niapak anke, apto Apketka mankapvankek elana apmak'akha la elana. Vanlha elanak apvet'o la apkelan'o qaselha Eniapom, lhamakho qaselha apkelanai'a Eniapom, kakpota nhan elanak ma'a Apketka.

²⁰ Eniapom apkamelaiam Apketka, apvetaskaskek aptakha la apkelanai'a. Netamen eteskesek hata mokhom qaselha mongvetai'o nkek ma'a, nkolpelapkesek hata apvalho'ok ketlhengkap apkelvet'o ta m'a.

²¹ Eniapom anak apnaklhatekhaskakmek apkenmaskengvaiakmo nak, Apketka nhan ma'a apkellangkek aliennaktema apnenio'ok apkenmak'akha la ellangkok enenlhet.

²² Eniapom anak meliekpelkak aptaiangkolha enenlhet aktaqmanma nlho ka la ngkolatsekama, apkankek Apketka akiavai'a apmopvana kakpota elanak ma'a.

²³ Kakpota ellahok aplhamakho enenlhet Apketka, nnavek na ellahok Eniapom. Mang hata nkek ellahok na Apketka nak, mang na ellak'ok Eniapom apto lhta apkapaskama Apketka.

²⁴ Apto la enenlhet aptaqmelkeskamo apkailhemo astakha alheianma, mei'askakmo la nhan apto heiapaskama, have niapak ankek enenlhet anak ngkoitek hata akiennaktema apneniek nkotnengvaianlha nnelha, meselhnanakpe hata nhan. Malha apketsepma lhta aptemak, kolhva koka aptakhak aphalhnankok.

²⁵ Have niapak ankek astakha nak, ngva'ak aknem kolhvave nak apkellelto nak apkeletsepma elleng'ak hata apaivoma Eniapom Neten Apketka, ngkoitek hata nhan aptaikamok aphalhnanko'ok.

²⁶ Eniapom anak nietnek apmopvana kakpota ellangkok aliennaktema apnenio'ok enenlhet'avok, apkanke lhta nhan Apketka apmopvana kakpota ellangkok hata aliennaktema apnenio'ok enenlhet.

²⁷ Apkankek na Apketka apientalhnemo kakpota eliekpelkok apkellanekamok ngkollatsekama, nlho ka la aktaqmanma enenlhet'avok lhmankek ham ngkanek Apketka nak apto Enenlhet Apketka.

²⁸ Molpelapkesangkek apkellengai'a astakha nak alheianma, nkovak hata aknem apkellenganveiam apaivoma Eniapom Neten Apketka apkellelto apnangkongvaiam ma'a nemakha aknengkanveianlha enghapak,

²⁹ enaklhatekhangvomok hata nhan ma'a. Koka apkellelto lhta apkellanekamok qaselha altaqmelo neksa aptaikamo lhta aphalhnanko'ok, etlhevangkok hata aliennaktema apnenio'ok ma'a. Koka apkellelto lhta apkellanekamok ngkolatsekama, ngkolhek hata akiaqmongkasakho apkeltemakha m'a.

Jesús apkelvetaskeskama apientalhnemo

³⁰ Mongvapvankek alanak asmak'akha la alana ehenkok ehenke', Eniapom anak ma'a helhekmoskek atnek askeliekpelkemo aktemakha apkellanekamok enenlhet. Ka ngkanek atnek aktaqmelo askeliekpelkemo motaha aniem'o askeliehekho Eniapom anak ma'a, apto nhan heiapaskama.

³¹ Aqhemo ta ngkotnek alhenammalhko ehenkek ko'o asiamolhma, hetlhenek hata ketlhengkap asmopvana ania'a.

³² Apnek koka po'ok enenlhet apto have niapak ankek helheianma, asiave ko'o aplheianma mota apto have niapak anke'.

³³ Apkellapaske lhta ketlhengkap apkelennengkasekama m'a apnakha Juan kakpota helpeivesekhok ko'o, helhenke lhta ko'o Juan akto have niapak anke.

³⁴ Ko'o koka melaimekpok enenlhet hetlheianma la asvesai'a, asiamolhma napaqtavek alhenkek mota qaselha nak kakpota elvongkasakpok tep ketlhengkap.

³⁵ Juan alhtoka malha talha alhankok alaivoma atsaskama lhma, nkelpaiesakhe lhta apvalho'ok ketlhengkap atsaskama lhma lhta m'a, iakvatakho nke lhtoka.

³⁶ Helhenke lhta ko'o Juan napaqtavek ketlhengkap astemakha, kotlheianvom koka apvalho'ok apkelvet'ak lhamakho aktemakha aspeneskama lhta aniem'o apkeltemo Eniapom alanak, kakpota eliangvomhok asto heiapaskama Eniapom anak.

³⁷ Eniapom na helheianma ko'o astema asiamolhma, ketlhengkap koka mamma nkek apkellengai'a aptakha apaivoma m'a, melvetai'ak na napa'at ma'a.

³⁸ Mang na eleliehekhok apaivoma m'a ngkanek apkeliaskeiakmek ma'a apto apkapaskama.

³⁹ Apkeltakmelkasavek niekhe apkelietsatekamok Vakkahak Eniapom Neten Apaivoma ketlhengkap, ngketlheianmek apvalho'ok elvetangvomok hata m'a aliennaktema apnenio'ok mankotnengveianlha nnelha, koka helheianme' ko'o vakkahak anak aktalhesammalhka.

⁴⁰ Man koka helketamak ketlhengkap kakpota allangkok aliennaktema apnenio'ok.

⁴¹ Moteniak ko'o apkeltemeskeskama la akiavai'a asvesai'a enenlhet'avok.

⁴² Askeliavek ko aptaiangkolha ketlhengkap, asiavek na mankolhnaiangkok nengasekhai'o nak aniem'o Eniapom Neten.

⁴³ Ko'o Tata apto lhta heiapaskama, koka manghenmak takha ketlhengkap. Koka apvo'o la po'ok enenlhet apvesai'a apanke', enmankok kelha takha m'a.

⁴⁴ Mankollapvankek nkolhnangkok meliaskeiam ketlhengkap ngkanek vanlha mota apteniaikamok eleltangko mota enenlhet apkeliamolhma ketlhengkap. Meteniaiangkok na apketlheianma la Eniapom Neten apto apveske vanlha lhema aphapak apanke etlhenek apkeliamolhma ketlhengkap ma'a.

^45-47 Apketlhengke mota meliaskeiam ley Moises ketlhengkap, have koka iokhalhme' ngkanek Moises helheianmek ko'o aptalheskama. Ka apkeliaskakmo la ketlhengkap Moises, heliaskakmek na ko lha'. Mankaimelhkak ko'o atlheianvakhak apkelvesai'a meliamolhma ketlhengkap napaqtek Eniapom ma'a, Moises hato ka etlheiangvakhak apkelvesai'a ketlhengkap ma'a —lhta aptak Jesús apkellano apkelemhama apmaniaie judios ma'a.