Juan 4 - Nuevo Testamento Toba Maskoy

Jesús kanhan ngkelvana ko Samaria

¹ Apiave lhta Jesús apkellengai'o ania'a fariseos aplhamekamok apkeltamesaikamok apankok kanhan aplhamakma enenlhet'avok apkellavkesaikamok iemmen ma'a, aselhtek noka m'a Juan.

² Koka have niekhe Jesús apkellavkesaikamok iemmen enenlhet'avok, vanlha lhtoka niekhe apkeltamesaikamok ma'a.

³ Lhta ngkanek asongkek etiepok Jesús iokhalhma Judea m'a, aptaqho lhta neptamen akieto iokhalhma Galilea,

⁴ nietave lhta nhan nalhet amai lhema iokhalhma akvesai'a Samaria.

⁵ Apvakme lhta m'a na temma akvesai'a Sicar, nengaqte lhta lhepop apankok Jacob annenga apkaikokho lhnak nanek apketka José.

⁶ Nheklhe lhta mokhom akietnemo m'a iamelket apankok nak nanek Jacob annenga, apnakme lhta nekha Jesús ma'a aniem'o apiampai'a aplhengama nalhepop, malha lhta la 12 katelho m'a.

^7-8 Koka apkeltamesaikamok apkenmeiakhe lhta apnakha temma apteniaikamok aptekamok. Ka akvai'o lhna lhta lhema ngkelvana ko Samaria neptamna'ak ma'a akiaiam iemmen, lhna lhta aptemak Jesús apkanemo m'a: —Heiamok no ko lha ketsek iemmen ankok —lhna lhta aptemak.

⁹ Koka ma lhta elteteskaiakmok Judios ko Samaria m'a, ka nkeniemai'ak aktemo akpaivoma ngkelvana hengke'e, lhna lhta ntemak: —¿Se lha ntak apkelto nak angvangkok iemmen lheiap ke, he? Judio lheiap, ko Samaria ko'o —lhna lhta ntemak anemo m'a.

¹⁰ Ka apkatemmoiangka lhna lhta Jesús ma'a, lhna lhta aptemak: —Mangheiekpelkak lheia', mankoihek na apmak'akha eniangkok hata lheia' Eniapom Neten. Ko lhtema nak heiekpelkema lheia', henmalhnama nlho lhkek iemmen kakpo lhkek na angvangkok iemmen aktaqmanma akmases anko ie' —lhna lhta aptemak.

¹¹ Koka lhna lhta ntemak mokhom ngkelvana: —¿Se lha eiavok iemmen aktaqmanma nak ke, he? Mamma iemmen alhankok apankok lheiap apieniekha la konne iamelket anak, tavanne'.

¹² Nengelieihengka Jacob annenga lhnak na nek hengellaikokha hengke'e iamelket anak, apienaiangkek nak na nek apketkak kakpota nhan apnaqtoskama. Neten apanke Jacob annenga, melhnok lheiap —lhna lhta ntemak ma'a.

¹³ Ka apkatemmoiangka lhna lhta mokhom Jesús, lhna lhta aptemak: —Apienkek hata nkek enenlhet iemmen aniem'o iamelket anak, eimak hata mokhom.

¹⁴ Koka enenlhet apiama nak iemmen askaikamok anak ko'o, meimakiek hata mokhom. Nkotepangkok hata mota iemmen konne apvalhok, ngkankok hata nhan akiennaktema apneniek mankotnengvaianlha nnelha —lhna lhta aptemak Jesús.

¹⁵ Koka lhna lhta ntemak mokhom ngkelvana: —Heiamok iemmen aplheno nak lheiap kakpota moimekhek mokhom, moiakvongvataniek hata mokhom iemmen hengke'e iamelket anak —lhna lhta ntemak ma'a.

¹⁶ Koka lhna lhta aptemak mokhom Jesús apkanemo m'a: —Koiantengvakha' atava.

¹⁷ Ka atemmoiangka lhna lhta m'a: —Mamma ko etava' —lhna lhta ntemak. Lhna lhta aptemak Jesús mokhom apkanemo: —Hai, have niapak aktakha nak aklheianma,

¹⁸ asiavek ko'o 5 lhta anakteiangka'a lheia, koka kolhvave nak have nhan atava akiantemaiangka nak —lhna lhta aptemak.

¹⁹ Mpelapkeskankek na lhta aklengai'a ngkelvana, lhna lhta ntemak: —¿Se lha ntak apioho nak astemakha ie, he? Have na niapak anke apto apkeltennasemmap ania'a lheiap.

²⁰ Asmak'ak apenesok askeltennaskama askeltavek hepeiveskasekha, nelieiehengka ko Samaria lhnak na nek apkaknekhak hengke'e metaimog akhaiam anak kakpota ellasennama Eniapom Neten ma'a, koka ketlhengkap judios apketlheianme mota aktaqmanma ellasennama Eniapom Neten vanlha m'a akieto Jerusalen —lhna lhta ntemak.

²¹ Ka apkatemmoiangka lhna lhta Jesús ma'a: —Nkanketakmek aknem menmeiakhek hata metaimong akhaiam anak kanhan Jerusalen apkenmahai'a ellasennama Eniapom, have niapak ankek astakha nak.

²² Lheia annemolhema ko samaria meliamok selha ellasennama ie', koka ennengko'o judios nengeliavek ngkanek nengelvongkasemmalhka tep anak aniem'o m'a judios.

^23-24 Eniapom Neten apto malha eniempehek, ngva'ak aknem kolhvave nak akto have niapak ankek aktemakha apkellasennaikama Eniapom. Nkoltemeskesek hata iokhalhmek ankek apkellasennaikama m'a aniem'o Espíritu apankok ma'a, ka apkeltemak etnangkok Eniapom ma'a —lhna aptemak Jesús.

²⁵ Koka lhna lhta ntemak mokhom ngkelvana: —Asiavek ko evak hata Mesias, mo'ok nema ltema Cristo, hata hengelpeiveskasekha lhamakho qaselha m'a —lhna lhta ntemak.

²⁶ Koka lhna lhta aptemak Jesús apkanemo m'a: —Ko'o m'a, hepaqmetkesangka nak lheia' —lhna lhta aptemak ma'a.

²⁷ Mpelapkaske lhta apkelvaktamo apkeltamesaikamok ma'a, akpelapkeso lhta nhan apkelvetai'a apaqmetkesaikama Jesús lhema ngkelvana, koka nkelennavengke lhta apkenmahai'a elelmalhnama aktakha aklheianma ngkelvana.

²⁸ Ka akpekkenakho lhta ietangvalhva m'a, akmeiakho lhta na temma aleltennaskakho enenlhet'avok, lhna ntemak allanemo:

²⁹ —¡Enenlhet lhek ha'e, apiavek lhek lhamakho astemakha, nok noho, Cristo kelhaha! —lhna lhta ntemak ma'a.

³⁰ Ka apkenmeiokmo lhta enenlhet apkeliokmo apnakha Jesús.

³¹ Koka apkeltamesaikamok Jesús apkeliatengke lhta m'a, lhta aptangkok: —¡Etavekha apketse! —lhta aptangkok.

³² Koka lhta aptak Jesús apkellatemmongka: —Nietnek ko'o astoma meliehek ketlhengkap —lhta aptak ma'a.

³³ Apkelpaqmetkesakpe lhta mok apankave apkeltamesaikamok ma'a, lhta aptangkok: —Nne nlho ka la aksantengkaso aptoma ha'e —lhta aptangkok.

³⁴ Koka lhta aptak Jesús: —Askasekhai'o ko'o apto heiapaskama, apenaksek hata asmakmekama apkeltemo lhta alanak ma'a, koka malha astoma ko'o m'a.

³⁵ Ka aptangko mota ketlhengkap apketlheno 4 pelten nelailhema nenganma kakpota annaklhek akielhna. Koka stak ko askellano ellanhono aniep akiavai'a la'a, nnakmetke akielhna m'a, nennaklhemakha ntahak.

³⁶ Etlhevangkok hata akianmoma apkellelto la apkenmakmekama apnaklhekamok akielhna. Ka akielhna nak enenlhet ma'a ngkoitek hata aliennaktema apnenio'ok nkotnengvaianlha nnelha m'a. Nkolpaihekhak hata apvalho'ok lhemek ma'a apkellelto apkenaikamok kakpota nhan apnaklhekamok.

³⁷ Have niapak ma'a aktakha nema altennaikama, napokha apkenaikamok aktek, napokha nhan apnaklhekamok akielhna.

³⁸ Ko'o koka askellapaskama ketlhengkap enaklhangkok akielhna akietemelha lhta akientalhnema apkenmakmekama apkenaikokhelha po'ok enenlhet ma'a. Koka ketlhengkap nkelietakhek aktaqmelakha nkek apkenmekha apnaklhekamok akielhna —lhta aptak apkellano Jesús ma'a.

³⁹ Aplhanie panke lhta enenlhet'avok ko Samaria meliaskeiam Jesús, lhta ngkanek ngkelvana altennangvekho aktemakha aniemhaikama apiamo Jesús ma'a.

⁴⁰ Ka apkelvo'o lhta enenlhet apnakha Jesús, apkellelto lhta nhan elhnekhak sekhek ma'a, ka apnakho lhta hanet aknem ma'a.

⁴¹ Tep anke lhta ntemengvakmok meliaskeiam Jesús enenlhet'avok ma'a apkelleng'o aktakha apaivoma.

⁴² Netamen alhta aptangkok apkellano ngkelvana lhta m'a: —Man lhek angeliaskakmok Jesús aktakha lhkek aklheianma lheia, koka kolhvave nak mangeliaskakmok ngkanek nelleng'ak aptakha apaivoma, kolhva neliavek apto hengvongkeskama tep ma'a aplhamakho enenlhet'avok lhmankek ham —lhta aptangkok enenlhet'avok.

Aptaqmelkasekha Jesús apketka lhema capitan

⁴³ Hanet aknem alhta ntak akiekai'a m'a, apkempakho mokhom aplhengama Jesús akieto Galilea.

⁴⁴ Aplheianme lhta Jesús mamma apkeltennasemmap ania'a emakpok takha apkavakha apankek la'a.

⁴⁵ Koka apkenme lhta takha apvakmo Jesús Galilea m'a ngkanek nketlheianvakhe lhta apvalho'ok enenlhet qaselha hempelapkeskama apkelanei'o alhta Jesús akieto Jerusalen neksa aktaqmelaikama lhma Pascua lhta m'a.

⁴⁶ Ka apkempakho lhta mokhom Jesús aplhengama, apvakho lhta na temma Cana akieto Galilea, aptemeskasekhelha lhta nhan iemmen vino m'a. Aplomaka lhta m'a lhema capitan apkennengkasekama apiav'akha apveske, akmaska apiempek alhta apketka akieto m'a na temma Capernaum.

⁴⁷ Apleng'a lhta capitan apvo'o Jesús apkempai'o Judea apvaiakmo Galilea, ka apmeiakho lhta apkeltennaskakho etnek aplhelhma apnemakha apkapiosema lhta m'a. Apkaskeske lhta nhan ame' apkeltemo etaqmelkasekha apketka nkama lhta apketsepma m'a.

⁴⁸ Lhta aptak Jesús: —Lheiap kakpota nhan apkennemolhema nak vanlha apkeleltemo elvetak qaselha mongenatkeskama, qaselha hempelapkeskama nhan kakpota meliaskame —lhta aptak apkano m'a.

⁴⁹ Apkapema lhta capitan ma'a, lhta aptak: —Apveske, nok, eniakhetamok angenmeiakha asnemakha amanie apmahai'a enietsepok eietka —lhta aptak capitan.

⁵⁰ Ka apkatemmongka lhta Jesús: —Etaqhekha apnemakha, etaqmelekhak hata apketka —lhta aptak ma'a. Ma lhta ei'askakmok aptakha apkano apaivoma Jesús, ka aptaqhakho lhta nhan ma'a.

⁵¹ Neksa aptaqhekha lhna lhta m'a, nalhet amai, apkeltanieiakmo lhna lhta apkenmakmesaikama m'a, lhna lhta aptaiangkok apkellanemo m'a: —Aptaqmelakhek lhek apketka —lhna lhta aptaiangkok.

⁵² Koka lhna lhta aptemak apkelelmalhneiangka capitan: —¿Se lhkek hora aptaqmelakho ie, he? —Aknem alhta, la 1 katelho lhta mmaskak akmelhanma apiempek ma'a —lhna lhta aptaiangkok ma'a.

⁵³ Nlheianvekhek nak apvalhok capitan nietemavek anke nak hora aptemakha apaivoma Jesús etaqmelekhak hata apketka. Mang nak ei'askeiakmok apveske kakpota nhan akvakho apketkak.

⁵⁴ Koka heng hanet alhta ntak apkellanai'a Jesús qaselha mongenatkeskama akieto m'a Galilea neksa aptaqhemo Judea.