Juan 3 - Nuevo Testamento Toba Maskoy

Jesús kanhan Nicodemo

^1-2 Pelhasep nak aptemak ma'a, apmaiangko lhema fariseo apnakha Jesús, Nicodemo lhnak apvesai'a m'a, apkemhama apmanie lhta apieseksek judios ma'a, lhna aptemak apkanemo: —Hengetlhekmoskama, neliavek ennengko'o Eniapom Neten apkapaskama lheiap kakpota hengetlhekmoksek. Nelvet'ak na ennengko'o qaselha mongenatkeskama apkellanai'a lheiap, neliavek na Eniapom Neten aplhelhma lheiap —lhna aptemak.

³ Koka lhna aptemak Jesús apkatemmoiangka: —Have niapak anke, apmak'o la etengvomok lheiap aptemakha nak Apveske Eniapom Neten nkaimelhkek amanie etiemok mokhom, malha nematka sekha apteiam la'a —lhna aptemak.

⁴ Mpelapkeskankek nak aplengai'o Nicodemo m'a, ka apkenmalhneiangka lhnak, lhna aptemak: —¿Niehe ngkotnek lhema enenlhet neksa aptema apvaneiam etiemok mokhom, he? ¿Ntase nlho etalhnekhak mokhom av'alhok angken, he? —lhna aptemak.

⁵ Ka apkatemmoiangka lhnak Jesús: —Nkaimelhke' nak etiemok aniem'o Espíritu kakpota nhan iemmen, kakpota etalhnengvomok ma'a aptemakha nak apveske Eniapom Neten, akto have niapak ankek ma'a.

⁶ Enenlhet apto la apteiam apkeniem'o ngkana'ak, enenlhet apankek nan ma'a, koka apto la nhan apteiam aniem'o Espíritu, espíritu nhan ma'a.

⁷ Motlapkes aplengai'a astakha lhkek alheianma nkaimelhkek etiemok malha mokhom.

⁸ Nkelhkakme mota alhkaiam akmak'akha la nkolhkama, nenleng'a niekhe alhkakmo, mang koka aniohok aktepakha alhkaiam, mangiohok na akmangkelha. Ngkotnek nan ma'a enenlhet apteiakmo la aniem'o Espíritu —lhna aptemak Jesús.

⁹ Ka apkenmalhnekho lhnak mokhom Nicodemo m'a: —¿Niehe ngkotnek ma'a aplheno nak, he? —lhna aptemak.

¹⁰ Ka apkatemmoiangka lhnak mokhom Jesús ma'a: —¿Ma nlho eihok lheiap, he? Tokha la niekhe hengetlhekmoskama apanko'ok Israel.

¹¹ Ennengko'o koka neliave', nelvetai'ak na m'a, ketlhengkap koka hengeliaskakme'.

¹² Heliaskakmek alheno aktakha qaselha hengke'e nalhepop anak, heliaskamok hata nhan alheno ta qaselha aktakha m'a neten.

¹³ Mamma enenlhet apvaiakmo neten, vanlha koka apto m'a apvaiventamo nak nalhepop, apvesai'a nak Enenlhet Apketka'.

^14-15 Ka Enenlhet Apketka nak ma'a ngkolhek hata nhan alhno neten, apkellelto la meliaskeiam ma'a ngkoitek hata aliennaktema apnenio'ok mankotnengvaianlha nnelha. Ka aptemo lhnak na nek Moises annenga apkelhanmo neten menasma apkelanai'a tavapak iamet apkenengkeskama akieto iokhalhma metkelha temma.

Eniapom Neten akiavai'a nkek apkellamelaiam enenlhet'avok

¹⁶ Avanhek ankek apkellamelaiam Eniapom Neten enenlhet'avok alhma nkek ham, ka ngkanek eniapaksek lhema phapak apanke' apketka kakpota melhnanme' apkellelto la meliaskeiam ma'a, ngkoitek hata nhan aliennaktema apnenio'ok mankotnengvaianlha nnelha'.

¹⁷ Apkapaskek Apketka Eniapom Neten hengke'e nalhepop anak kakpota elvongkesek tep enenlhet'avok, have apmahai'a etlhenek apketselhnanemmap ma'a.

^18-19 Meliaskakmo la Eniapom Neten Apketka m'a, mangkolhek hata atlheno apketselhnanemmap ma'a. Koka nnak atlheno m'a aptangko apketselhnanemmap apkellelto la apkeliaskeiam ma'a. Ngkanek apvai'o nak apto lhema aphapak apankek Eniapom Neten Apketka. Apto nhan malha apommatema atsaskeskama lhma, mang koka eleliehekhok ma'a. Koka apteniaiangkok ma'a ienaqtesakha lhma nak ngkanek apkellaneiangkek qaselha ngkollatsekama m'a.

²⁰ Lhamakho apkellelto nak apkellanekamok ngkollatsekama, apkeltaknevakkek apommatma nak. Melteteska'ak na atsai'o lhma kakpota melvetakpek neksa apkellanekamok qaselha ngkollatsekama m'a.

²¹ Koka apkellelto nak apkellanekamok qaselha altaqmanma, apkelteteska'ak atsai'o na lhma, apkeleltemo elvetakpok apieseksek enenlhet apkellasekhai'o lhamakho henganemakha apankok Eniapom Neten —lhta aptak Jesús.

Aplhenekho mokhom Juan apvesai'a Jesús

²² Netamen nak ma'a Jesús kakpota nhan apkeltamesaikamok apkenmeiakho lhta iokhalhma Judea, apkakhengvakhe lhta m'a iama akiakvatakho, ka apkellavkesangko lhta nhan konne iemmen enenlhet'avok ma'a.

²³ Apkellavkesaiangkek nak na iemmen Juan po'ok temma akvesai'a Enon, nengaqtek ma'a na temma Salim, avanhe lhta songkek iemmen ma'a. Ka apkelketansemo lhta nhan enenlhet'avok apkeleltemo ellavkesangkok iemmen ma'a.

²⁴ Ntemenke lha akvetammalhka m'a amanie apmahai'a eniaqlhengkasakpok nenmammalhkelha Juan ma'a.

²⁵ Apkelempai'o lhnak apkellatemommap moklhem'a apkeltamesaikamok Juan lhema judio m'a apkeltemakha lhta mota elalhnasekhak apiempeiok.

²⁶ Netamen nak ma'a apkenmeiekho lhnak apnakha Juan apkeleltennaskekho, lhnak aptaiangkok: —Hengetlhekmoskama, nlheianvakhave nlho apvalhok enenlhet aplheno lhta lheiap aptaqmanma apanke, aptemo lhna lhta aplhelhma lheiap nekha alvata Jordán na alhta. Kolhva koka apkellavkesangkek konne iemmen enenlhet'avok ma'a, apkelieplakhek na apentalhnema apanke enenlhet ma'a —lhna aptaiangkok ma'a.

²⁷ Ka apkellatemmoiangka lhnak Juan, lhna aptemak: —Ntasek ankek ma'a, Eniapom Neten apkeltemo nkotnehek.

²⁸ Apkelleng'a lhta aktakha alheianma ketlhengkap alhnakho nke have ko'o Cristo, vanlha nema heiapaskama apmanie m'a.

²⁹ Neksa aktaqmelaikama lhma aliemhapma la'a, neten ankek apiaspommap apokkenammap anak aliemhapma, nkoliemhapok apmahai'akha. Apketsevasavek na m'a apto aptaiangkolha la aplhelhma nengaqte, mpaihakhek na apvalhok apleng'o apkeltennaikama m'a. Nnavek na ko'o lha, mpaihakhavek ankek evalhok kolhvave nak,

³⁰ nkoiavangkok hato ka m'a apiaspommap ma'a, ko'o toka nkaselhtekha —lhna aptemak Juan.

Apto apkeniem'o neten

³¹ Apto apkeniem'o neten, neten apankek apiaspommap ma'a mangkolhnok ennengko'o nengelelto nak nenloma nalhepop anak, netlhenke mota aktakha nelvetai'a nalhepop.

³² Koka apto apkeniem'o neten, aplhengke mota aktakha apvetai'a, aplengai'a nhan neten anak, apkeliaskakmek koka enenlhet ma'a.

³³ Koka apto la enenlhet mei'askeiam m'a, apiavek Eniapom Neten aplheianma mota iokhalhme.

³⁴ Apto apkapaskama Eniapom Neten aplhengke mota aptakha apaivoma m'a, ngkanek apkankek na aplanei'o apvalhok Espíritu m'a.

³⁵ Ka Eniapom anak ma'a apkamelaiam Apketka, apkankek apmopvana takhalhet'ok qaselha lhmankek ham.

³⁶ Mang hata nkek eliaskakmok Apketka nak, ngkoitek hata aliennaktema apnenio'ok mankotnengvaianlha nnelha. Koka apkellelto la apkeliaskeiam ma'a, mangkolhek hata aliennaktema apnenio'ok, hato ka eliaqmongkaskesekhak apkeltemakha Eniapom Neten ma'a.