Juan 20 - Nuevo Testamento Toba Maskoy

Aplhatekhangveiam Jesús apieseksek apkenmaskengvaiakmo

¹ Ampakhasekha nke lhta ntak aknem semana m'a, mokhom nak apkelienaktesekama lhma m'a, akmeiekho lhna lhta María Magdalena nemakha aklhengkeskaiakmo Jesús aphapak metaimong alhva. Mpelapkeskankek na lhta akvetai'a nemo akteskeskamo atong metaimong alhva.

² Ka atkentamo lhna lhta apnakha Simon Pedro kakpota nhan po'ok apkeltameskama apkamelaianlha lhta Jesús, lhta ntak heng: —Nnek kelha aktalhnengvakmo nemakha akpekkanveianlha aphapak Apveske, nnek aksakho, mongeliohok na aknakha akpekkanvanlha' —lhta ntak.

^3-4 Ka apkeletkakho lhta akieto nemakha akpekkanveianlha enghapak Pedro kakpota nhan po'ok apkeltameskama Jesús, amose lhta apkeniema po'ok, ma lhta elhnok Pedro, apmanie lhta apvakhak ma'a.

⁵ Koka ma lhta etalhnak konne metaimong alhva m'a, vanlha lhta apkelteionnengka m'a, ka apvet'o lhta vanlha ietamopai'a apelhketemmap alhta Jesús.

⁶ Ka apvo'o lhta nhan Simon Pedro m'a, koka aptalhno lhta konne nemakha akpekkanveianlha enghapak metaimong alhva, apvet'o nhan ietamopai'a napokha'a nema akpelhketma lhta m'a.

⁷ Apvet'o nhan ietamopai'a napokha'a nema akpelhketkeskama lhta apqatek Jesús, nema aktaqmelkeskamo nhan aliaqsasekha akieto nekha apietnemakha lhta.

⁸ Ka aptalhno nhan po'ok apkeltameskama Jesús konne metaimong alhva, apvet'o lhta nhan, mei'askakmo lhta nhan ma'a.

⁹ Koka ma lhta eliangveiakmok aktemakha aklhenammalhko lhta mota Eniapom Neten apaivoma aktemakha aplhennammap Jesús elhatekhangvomok hata apieseksek apkenmaskengvaiakmo.

¹⁰ Netamen ma'a, apkeltaqhakho lhta apkeltamesaikamok apkakhaiangkolha m'a.

Jesús apvetaskesammap María Magdalena

¹¹ Nkenenvekhek na lhta María akieto nekha atong nemakha akpekkanveianlha enghapak, mang na lhta ngkeskamak na akvenemo m'a, ka alteionneiangka lhna lhta konne altemo nkotak ma'a.

¹² Akvetai'o lhna lhta apqanet ángeles apkenmopai'a lhna lhta apkelentalhnema m'a. Apkakhaiangkek na lhta nemakha akpekkanveianlha aphapak Jesús ma'a, lhema lhna lhta apnemak akieto nepvahe, po'ok na lhta nhan akieto nepmankok.

¹³ Lhna lhta aptaiangkok apkellanemo: —Ngkelvana, ¿se lha ntak akveno nak ke, he? —lhna lhta aptaiangkok. Ka atemmoiangka lhna lhta ma'a: —Nnek akvo'o aphapak Apveske ehenkok, moihok aknakha akpekkanvanlha' —lhna lhta ntemak ma'a.

¹⁴ Ka akpengkammalhko lhna lhta akmahai'a nkotaqhekhak ma'a, akvetai'o lhna lhta lhema enenlhet apkenmaiangka m'a, Jesús na lhtoka niekhe nhan ma'a, koka mang nak nkoiekpelkemak ma'a.

¹⁵ Lhna lhta aptemak apkanemo: —Ngkelvana, ¿se lha ntak akveno nak ke, se lha enenlhet atamo nak ke? —lhna lhta aptemak ma'a. Koka lhna lhta ntemak atemmoiangka: —Lheiap kelha apsekhak Apveske ehenkok aphapak, heltennes no ko la apekkanveianlha' kakpota avakhak ko'o —lhna lhta ntemak ma'a. Mang na lhta nkoihamok mokhom Jesús noka nhan niekhe m'a, lhna lhtelha nkanemak enenlhet aptaqmelkeskama aniep ma'a.

¹⁶ Netamen lhna lhta aptemak Jesús apkanemo m'a: —María —lhna lha aptemak. Ntaqmelkeskamavek na lhta alanei'o María, aklheianvekho lhna lhta av'alhok Jesús ma'a, lhna lhta ntemak: —¡Hengetlhekmoskama! —lhna lhta ntemak. Ka akmangveiakmo lhna lhta nhan m'a,

¹⁷ koka Jesús lhna lhta aptemak apkanemo: —Mma', manghemangva', movakhak mokhom ko'o apnakha Tata. Koniakha koka koleltennaskakha askeltamesaikamok alhta, aniakhak hata apnakha Tata, ka Apiapma'ak na m'a, Eniapom Neten ehenkok, Eniapom Neten apanko'ok na m'a —lhna lhta aptemak.

¹⁸ Ka akmeientamo lhna lhta María Magdalena, aleltennaskakho apkeltamesaikamok akvetai'o Apveske m'a, nkeleltennasema lhta nhan lhamakho aktemakha akpaqmetkesaikama Jesús ma'a.

Jesús apteiapvekha apieseksek apkeltamesaikamok

¹⁹ Pelhasep alhta aptak ma'a, apkaknakho lhta apkeltamesaikamok konne pa'at, apkellapakhave lhta atong ngkanek apkelemhama apmaniaie' judios alhta apkellak'ak ma'a. Mpelapkaske lhta aptalhnengvo'o Jesús ma'a, apkenengvakmo apieseksek apkaknakhelha, lhta aptak apkellano: —¡Altaqmelaikama apvalho'ok hata ketlhengkap hengke'e! —lhta aptak.

²⁰ Apkelvetaskaske lhta eskepok apmeiok kakpota nhan napokha apkeltamesaikamok ma'a, nkelpaihakhe lhta apvalho'ok apkelvetakho mokhom apveske m'a.

²¹ Lhta aptak mokhom Jesús apkellano: —¡Altaqmelaikama apvalho'ok hata ketlhengkap hengke'e! Allapaksek hata ketlhengkap ka kto nak ko'o heiapaskama Eniapom —lhta aptak.

²² Ka apkelvatepnapo lhta takhaplhet'avok ma'a, lhta aptak: —Apketlhevangkek Espíritu Santo kolhvave nak ketlhengkap,

²³ apkeltemeskesangka la apankavek ketlhengkap qaselha ngkollatsekama apkellanai'a po'ok, ngkolhek hata nhan aktemeskesangkankek ma'a. Koka meltemeskesangka la apankavek ketlhengkap qaselha ngkollatsekama apkelanai'a po'ok, mangkolhek hata nhan aktemeskesangkankek ma'a —lhta aptak Jesús.

Apvetai'a Tomas Jesús

²⁴ Tomas apto lhta nhan apkeltameskama Jesús, nema ltema lhta apqanet apalleiam, ma lhta elhnemak apieseksek apketlhelhma'ak aptalhnengvakho lhta Jesús ma'a.

²⁵ Alhaie lhtoka apvakhak ma'a, lhta aptak apkellano apkeltamesaikamok apketlhelhma'ak: —¡Nelvet'ak lhek ennengko'o apveske! —lhta aptangkok ma'a. —Ieeee, asiaskakmek apketlheno nak, koka asvet'o la eskepok apmeiok kakpota nhan napokha', asmangvakmo la m'a, netamen moi'askamek hata ko lha' —lhta aptak Tomas.

²⁶ Netamen ocho knem alhta nieka'ak ma'a, apkaknakho lhta mokhom apkeltamesaikamok Jesús lhema konne pa'at, Tomas alhta nhan kolhva m'a, apkellapakhave lhta mokhom atong ma'a. Koka aptalhne lhta Jesús konne m'a apkenenvakme lhta apieseksek ma'a, lhta aptak apkellano: —¡Altaqmelaikama apvalho'ok hata ketlhengkap hengke'e! —lhta aptak.

²⁷ Koka lhta aptak apkano Jesús Tomas: —Elanho no emeiok kakpota nhan neheqha, emangvom no eskepok ehenkok anak, mei'askakmok heto'o astema ehalhnankok mokhom —lhta aptak.

²⁸ Lhta aptak Tomas: —¡Apveske ehenkok anak lheiap, Eniapom Neten ehenkok nahan! —lhta aptak.

²⁹ Koka lhta aptak Jesús apkano: —Mangheiaskakmok lheiap ngkanek heto'o nak, koka aktaqmelakho nke ta nhan enenlhet'avok apkellelto mangheliaskeiam metka helvetai'a nak —lhta aptak.

³⁰ Ma lhta ntek qaselha mongenatkeskama apkellanai'a Jesús napaqtavek apkeltamesaikamok ma'a, aklhamakha koka mankonaktalhesammalhkak vakkahak anak.

³¹ Koka aklhamakho qaselha akietno vakkahak anak, nema aktalheskama kakpota meliaskamek hata ketlhengkap Jesús apto Cristo Eniapom Neten apketka, hata nkoniema' aliennaktema apnenio'ok mankotnengvaianlha nnelha ketlhengkap ma'a aniem'o apvesai'a m'a.