Juan 2 - Nuevo Testamento Toba Maskoy

Aptemeskasekha Jesús iemmen vino

¹ Hanetolhem'a aknem alhta ntak akiekai'a m'a, ka akmeiakho lhta Jesús angken na temma Cana akieto iokhalhma Galilea kakpota nkopasengvomok aliemhapma m'a.

² Nne lhta nhan ano Jesús epasengvomok ma'a kakpota nhan apkeltamesaikamok.

³ Nkeliemaselhke lhta vino m'a, lhta ntak akpaqmetkaso ngken Jesús: —Nkeliemankek lhek vino —lhta ntak.

⁴ Ka apkatemmongka lhta Jesús: —Lheia, manghengelietok ennengko'o m'a, mankovakmok aknem ehenkok mokhom —lhta aptak Jesús.

⁵ Koka lhta ntak ngken Jesús alpaqmetkaso nema allennengkasekama: —Etlheng nak hengke'e, etnamok hata apkeltakha la etnangkok Jesús —lhta ntak.

⁶ Apnangke lhta nhan 6 ietangvalhva m'a, malha 100 litro lhta moklhem'a. Apkenmaiangka lhta mota neksa apkeltemakha judios kakpota elalhnasekhak apiempeiok napaqtek Eniapom Neten.

⁷ Lhta aptak Jesús apkellano nema allennengkasekama: —¡Ellanesamo ta iemmen ietangvalhva nak! —lhta aptak. Apkellasekhave lhta m'a, ka apkeliatmengko lhta iemmen allaneiangko.

⁸ Netamen lhta aptak Jesús apkano mokhom: —Eiavo ta tketsek, esakhes hata apto apkemhama apmanie aktaqmelaikama lhma apto apankok kakpota eiepkonek na m'a —lhta aptak.

⁹ Ka apiepkono lhta m'a, ma lhta eihok iemmen aktaiekha vino, vanlha lhta apkelioho m'a nema allennengkasekama. Kolhvave kanke lhta apkavema apokkenammap aliemhapma m'a,

¹⁰ lhta aptak apkano: —Aptaiangkolha apankavek mota enenlhet ellangkok amanie vino aktaqmanma, koka melleso la apienangko apkellelto apkelpasengvai'a, netamen ellangkok mokhom mo'ok vino iama aktaqmanma. Koka alpeivekha aptak lheiap, alhaie apkellangkok vino neten ankek aktaqmanma —lhta aptak apkemhama apmanie nema allennengkasekama.

¹¹ Ka heng ampai'akhasekha lhta Jesús apkelanai'a qaselha mongenatkeskama kakpota elvetaskesek akietnema apmopvana. Ma lhta eliaskakmok apkeltamesaikamok ma'a.

¹² Netamen Jesús kanha ngken, apkelialheng'a kakpota nhan apkeltamesaikamok, apkenmeiakho lhta natemma Capernaum, apkakhengvakho lhta akiakvatakho m'a.

Malha apkalhnasekha Jesús Eniapom Neten apnemakha

¹³ Ketse lhta nkaimelhkak aknem apanko'ok judios aktaqmelaikama lhma akvesai'a Pascua, ka apmeiakho lhta Jesús akieto Jerusalen.

¹⁴ Aptalhno lhta Eniapom Neten apnemakha. Apkelvetangvakho lhta nhan enenlhet apkelhaikamok vakka nema alhakkeskama apopok, nepkesek, konemmaktek, apteniaikamok akianmoma m'a. Apkakhangke lhta m'a nekhav'ak asota apanko'ok enenlhet apkeliaqmongkasekha mo'ok patakkom aniem'o mo'ok nekha.

¹⁵ Ka apkelan'o lhta vakka aiempek neliakpelhketma ankok, apkelentepkaso lhta nhan enenlhet apkelhaikamo lhta vakka nema alhakkeskama apopok kakpota nhan nepkesek, apkelho lhta nhan nalhepop patakkom aliaqiema. Apkeliaqnengkaso lhta nhan asota apanko'ok enenlhet apkeliaqmongkasekha mo'ok patakkom.

¹⁶ Lhta aptak Jesús apkellano apkelhaikamok konemmaktek: —¡Elentepkes konemmaktek anak, have alhammalhkelha qaselha hengke'e, Tata apnemakha ngke'e! —lhta aptak Jesús apkellano enenlhet ma'a.

¹⁷ Neksa apkelvetai'a lhta apkeltamesaikamok ma'a, atlheianvakho lhta apvalho'ok aktalhesammalhka Vakkahak Eniapom Neten apaivoma, lhna ntemak: «Nietnokhasavek evalhok asvetangvaktamo apkellanengko qaselha ngkolatsekama apnemakha lheiap», ntemak ma'a.

¹⁸ Netamen ma'a apkelemhama apmaniaie' judios apkelelmalhnengka lhta Jesús, lhta aptangkok apkellano: —¿Selha akto aptonak lheiap hengka ie, he? ¡Ngva'! Elana no qaselha mongenatkeskama kakpota hengelvetaskesek apientalhnemo lheiap aptakha lhkek apkelentepkaso enenlhet'avok Eniapom Neten apnemakha lhkek —lhta aptangkok ma'a.

¹⁹ Ka apkellatemmongka lhta Jesús, lhta aptak: —Hata apnaqtevasakho la ketlhengkap Eniapom Neten apnemakha nak, hanetolhem'a aknem hato ka ngkotnek alanekhak mokhom alhnankok ham —lhta aptak Jesús.

²⁰ Ka apkellatemmongka lhta mokhom judios, lhta aptangkok: —¡Ieee, 46 iantelhkapa lhna lhta ngvaiakmok apkelpeneskamo apkellanekamok enenlhet Eniapom Neten apnemakha nak, lheiap koka aplhenak hanetolhem'a aknem epenaksek apkelanekha alhnankok! —lhta aptangkok ma'a.

²¹ Koka Jesús have lhta niekhe aplheianma Eniapom Neten apnemakha nak, aplhenammakpe lhta panke niekhe apiokha nak ma'a.

²² Lhta nkeniemai'ak ma'a atlheianvekho lhta apvalho'ok apkeltamesaikamok aptemakha lhta apaivoma Jesús neksa aplhatekhangveiam alhta m'a. Ma lhta nhan eliaskeiakmok aktemakha aklheianma Vakkahak Eniapom Neten Apaivoma, aptemakha lhta nhan aplheianma Jesús.

Jesús apkeliekpelkemo apvalho'ok enenlhet'avok

²³ Apne lhta Jesús ma'a aktaqmelaikama lhma Pascua m'a Jerusalen, ma lhta eliaskakmok enenlhet ngkanek apkelvet'a lhta qaselha mongenatkeskama apkellanai'a m'a.

^24-25 Koka ma lhta eltemeskeskamak na iokhalhmek Jesús ma'a ngkanek apiamave lhta nhan apvalho'ok aplhamakho enenlhet'avok ma'a, mankaimommalhkak na nema altennaskama la ania'a apkeltemakha enenlhet.