Juan 18 - Nuevo Testamento Toba Maskoy

Apathetammap Jesús

¹ Netamen alhta apeneskama apkenmalhnonkoma Jesús ma'a, aphalhtepelhketo lhta iemmen atamnek ma'a akvesai'a Cedron, apmeiakho lhta aniep akvesai'a Olivos, apketlhelhma'ak alhta moklhem'a apkeltamesaikamok.

^2-3 Apvakhe lhta nhan Judas ma'a, apketlhelhma'ak alhta aptangkok kempokhakmek soldados romanos kakpota nhan apkellanekama Eniapom Neten apnemakha. Apketsokme lhta nhan pelettav alvenaktema, talha alhankok apkellapommatkesaikamok apmaniaie' kakpota nhan iamet nav'a talha, apkellapaskama lhtoka m'a apkelemhama apmaniaie' sacerdotes kanhan fariseos. Judas alhta aplaqloiam ma'a kakpota eselhnanak Jesús, ngkanek apiave lhta nhan iokhalhma nak ma'a, apkaqnekhelha lhta mota lhemek apkeltamesaikamok ma'a.

⁴ Neksa apkelvetai'a lhta Jesús apketlheiam ma'a, apkellanielhangko lhta m'a, apiave lhta nhan apkenmak'akha etnangkok, lhta aptak apkelelmalhnengka: —¿Se lha enenlhet apkelketamo ie, he? —lhta aptak ma'a.

⁵ —Jesús ko Nazaret nelketamak —lhta aptangkok apkellatemmongka. —Ko'o m'a —lhta aptak Jesús.

⁶ Mpelapkaske lhta apkelletsekhantamo nalhepop enenlhet'avok ma'a neksa apkellengai'a apaivoma Jesús ko'o hengke'e.

⁷ Ka apkelelmalhnengka lhta mokhom Jesús, lhta aptak: —¿Se lha enenlhet apkelketamo ie, he? —Jesús ko Nazaret —lhta aptangkok mokhom apkellatemmongka m'a.

⁸ Koka lhta aptak mokhom Jesús: —Askeleltennaskek lhaiek ko'o hengke'e, hata helpatheto ta ko'o, ellangko ta eltaqhok asketlhelhma'ak anak —lhta aptak.

⁹ Ngvakme lhta aptemo lhta apaivoma Jesús, lhta aptemak: —Eniapom, mamma lhema aplheneiam apkellelto lhta hellaikamok lheiap —lhta aptak ma'a.

¹⁰ Ka aplekvakho lhta pelettav akvenaktema apankok Simon Pedro, apiaqtemenkaske lhta akiennakha apaikok Malco, apkasennaikama apankok alhto ka m'a apiav'akha sacerdote.

¹¹ Koka lhta aptak Jesús apkano Pedro: —Eniaqlhengkasekha alhankok pelettav akvenaktema nak, apkeltavek Eniapom atnek lhema asnaqsepma asiama aimenek akmaska ta, askasekhavek ko'o apmak'akha etnek ma'a —lhta aptak Jesús.

Nema akiantemekha Jesús napaqte apiav'akha sacerdote

¹² Kolhvave lhta apkelpathetak Jesús soldados kakpota nhan apkellanekama Eniapom Neten apnemakha, ka apkennakteto nhan apmeio'ok ma'a.

¹³ Apkeliantemakhe lhta apnakha Anas, Caifas apepiata, aptemo lhta nhan apiav'akha sacerdote iantelhkapa lhta m'a.

¹⁴ Koka Caifas apkeleltennaskangke lhta mota apkelemhama apmaniaie' judios aktaqmanma enietsepok lhema enenlhet akiaqmekha apkellavakha judios.

Aplheianma Pedro meiekpelkema Jesús

¹⁵ Apkelieplakhe lhta nhan Simon Pedro m'a kakpota nhan po'ok apkeltameskama Jesús, ka apkelentalhnengvakho lhta konne akhalhtemommalhka soldados apkeliantemekha Jesús ma'a. Aptalhne lhta nhan apkeltameskama lhta ngkanek apiekpelkemelha lhta apiav'akha sacerdote m'a.

¹⁶ Akieto atong alhto ka apkenengva'ak Pedro m'a, ka apvet'o lhta apkeltameskama m'a apakmetkeso lhta ngkelvana alanekama atong nkankok eklhek ma'a.

¹⁷ Ka almalhnengka lhta Pedro m'a, lhta ntak: —¿Have nlho nhan lheiap apto lhema apkeltameskama Jesús, he? —lhta ntak. —Have —lhta aptak apkatemmongka Pedro m'a.

¹⁸ Ka aptetesko'o lhta nhan nekha talha apkelvatnekamok apkellanekama Eniapom Neten apnemakha kakpota nhan apkellasennaikama Anas, ngkanek semange lhta m'a.

Apiav'akha sacerdote apkenmalhnekama Jesús

¹⁹ Netamen apiav'akha sacerdote apkelmalhnengka lhta Jesús ma'a aktemakha apketlhekmoskama mota, kakpota nhan ma'a aptaiangkolha apkeltamesaikamok.

^20-21 Ka apkatemmongka lhta Jesús ma'a, lhta aptak: —Se lha ntak helmalhnengka nak, elelmalhnengvakha koka enenlhet'avok apkaqnekhelha na mota, kakpota nhan Eniapom Neten apnemakha nak. Koka apkeliavek ma'a se lha asketlhekmoskama ie, have asielhammalhko asketlhekmoskama nak, napaqtavek koka astemak ma'a —lhta aptak Jesús.

²² Kolhvave lhta aptekpongak apmalhempenek lhema apkelanekama atong Eniapom Neten apnemakha, lhta aptak apkano: —Have nentemakha angatemmoma apiav'akha sacerdote aptakha nak —lhta aptak.

²³ Koka lhta aptak Jesús: —¿Se lha ntak hetekpomo nak ke, mai'e ngkolatsema aspaioma lhkek, he? Aktaqmelokha lhkek la aspaioma —lhta aptak.

²⁴ Ka apkelto lhta ngkolhek aknakteto Anas apmeio'ok Jesús ma'a, ngkolhek na akiantemakho apnakha apiav'akha sacerdote Caifas.

Pedro aplheianma mokhom meiekpelkema Jesús

²⁵ Nheklhe lhtoka apno Pedro m'a nekha talha, ka akno lhta anmalhnengka m'a: —¿Lheiap anlho nhan apto lhema apkeltameskama enenlhet anak, he? —lhta aptak. —Ma, have ko'o m'a —lhta aptak mokhom Pedro.

²⁶ Netamen lhema apkennengkasekama apiav'akha sacerdote, apaivomo lhema lhta enenlhet apiaqtemengkeskama lhta apaikok Pedro m'a, lhta aptak apkano: —Malha nak asvet'o lhta lheiap aniep apathetakpelha lhta Jesús —lhta aptak.

²⁷ Koka aplhengke lhta mokhom Pedro meiekpelkema Jesús ma'a. Ka akpaivo lhta nhan tape'e m'a.

Nema akiantemekha Jesús apnakha Pilato

²⁸ Apkelentepkaske lhta Jesús apkelemhama apmaniaie judios apnemakha Caifas ma'a, ka apkeliantemakho lhta apnemakha ko Roma apveske apvesai'a Pilato. Ma lhtoka elentalhnak konne m'a, ngkanek nkanketke lhta atsai'akha m'a kakpota nkovak aknem aktaqmelaikama lhma ankok Pascua, ma lhta nkonmak'ak elpaisengkesek apvalho'ok napaqtek Eniapom Neten ma'a, kakpota mankollapvankek kelha elpasengvomok nentavekha aktaqmelaikama lhma nak ma'a.

²⁹ Lhta ngkanek Pilato apiephongvaktamo iokhalhma, lhta aptak apkellano: —¿Se lha ntak apkeliantemanto nak enenlhet anak, se lha ngkolatsekama apkelanei'o ie, he? —lhta aptak.

³⁰ Koka lhta aptangkok apkellatemmongka m'a: —Meihamolhma enenlhet anak ham —lhta aptangkok.

³¹ Koka lhta aptak Pilato apkellano m'a: —Eliekpelkok koka aptemakha apankek ham akieplomo ley apanko'ok anak ketlhengkap, eliantemekha —lhta aptak. Koka lhta aptangkok mokhom apkelemhama apmaniaie judios: —Ketlhengkap romanos manghengellaiangko angaqhek emmo'ok —lhta aptangkok.

³² Nietemavek lhta nhan aktemakha lhta aplheianma Jesús enietsepok apkeltemakha mota romanos.

³³ Ka aptalhnakho lhta mokhom Pilato av'alhok pa'at, apkavengka lhta Jesús ma'a, lhna aptemak: —¿Lheiap anlho niekhe apiav'akha apveske judios apanko'ok, he? —lhna lhta aptemak Pilato.

³⁴ Koka lhna lhta aptemak apkatemmoiangka Jesús: —¿Se lha altennaskama lheiap maie, nlho ka la aplheianma pankek lheiap, he? —lhna lhta aptemak.

³⁵ Ka apkatemmoiangka lhna lhta mokhom Pilato: —Have judio ko'o, lheiap apaivomo lhema nak kanhan apkelemhama apmaniaie sacerdotes apkeliantementa hengke'e. ¿Se lha apkelanei'o ngkolatsekama lheiap ke, he? —lhna lhta aptemak.

³⁶ Koka lhna lhta aptemak mokhom Jesús: —Koka have aveske nkok ko'o hengke'e nalhepop anak, ko lhtema nak astema apveske hengke'e, elvaklhek kempokhakme ehenkok kakpota helvongkesek tep apieseksek anak apkelemhama apmaniaie judios —lhna lhta aptemak.

³⁷ Koka lhna lhta aptemak mokhom Pilato apkanemo: —Ia', tokha nak kelha apiav'akha apveske lheiap —lhna lhta aptemak. Koka lhna lhta aptemak mokhom Jesús: —Lheiap aplhenak ma'a, ko'o koka asva'ak kakpota atlhekmoksek akto have niapak, hellailhavek na enenlhet'avok aptengiaikamo mota akto have niapak anke —lhna lhta aptemak.

³⁸ Ka apkelmalhneiangka lhna lhta mokhom Pilato: —¿Se lha akvesai'a have niapak ankek ke, he? —lhna lhta aptemak. Ka aptepakho lhta mokhom Pilato av'alhok pa'at, lhta aptak apkellano judios: —Mamma lhkek aptemakha ngkolatsekama enenlhet lhek ha'e.

³⁹ Koka nietnek apkeltemakha ketlhengkap apkelpaqnemekha lhema apkaklhengkasemmap la'a neksa aktaqmelaikama lhma nak Pascua. ¿Apkeleltave nlho apaknemekha enenlhet anak apiav'akha apveske apanko'ok judios, he? —lhta aptak.

⁴⁰ Koka apkelvenema lhta enenlhet'avok ma'a, lhta aptangkok: —Ma', have ham, Barrabas koka epaknemekha' —lhta aptangkok enenlhet'avok ma'a. Koka Barrabas apto lhta enenlhet apmenielhma.