Juan 16 - Nuevo Testamento Toba Maskoy

¹ —Askelientemongkasavek lhek askeleltennaskama ketlhengkap akvo'o ta akientalhnema apkellangiemhaikama kakpota m'a melvatesankek aptaikamok mangheliaskeiam akvo'o ta m'a.

² Nkolhek hata nhan alentepkaso konne apkaqnekhelha nak judios, etekio'ok hata nhan ketlhengkap, nkotlhenek hata apvalho'ok ma'a enenlhet'avok anak aniem'o apkellasennaikama Eniapom Neten.

³ Koka nkeniemai'ak mangheliekpelkemak ko'o m'a kakpota nhan Eniapom enenlhet meliamolhma nak ma'a.

⁴ Askelientemongkasavek askeleltennaskama kolhvave nak, hata akvo'o ta m'a, nkotlheianvakhok hata apvalho'ok astemakha aspaioma askellanemo. Ma lhta ko aleltennasak ketlhengkap sekhek lhta qaselha alheno lhkek nkanek asnengke lhta mota apieseksek anak ketlhengkap.

Aktemakha ta apkelanai'a Espíritu Santo

⁵ Kolhva koka ataqhok hata mokhom apnakha apto heiapaskama, ma nak helelmalhnema ketlhengkap asmak'akha amhangkok,

⁶ aiosak'a na ntak apvalho'ok ketlhengkap apkelleng'o aspaioma nak.

⁷ Ntasek hato ka ngkotnek apkellangiemhaikama ketlhengkap netamen ko'o astaqhakhok hata, ngkanek evak hata apto Hengiatekho niapom, koka moniakho la m'a, mongvapaksek na m'a.

⁸ Hata apvo'o ta m'a apto Henmasmo niapom, etlhenkeskeskakhok hata apvalho'ok enenlhet'avok apkellelto meleliehekho apkellaskamakha Eniapom Neten, apkellelto apkelpeivomo, apkellelto nhan aliekpelkammalhka apkeltemakha.

⁹ Enenlhet hei'askeiam la'a, koka apto meihamolhma m'a.

¹⁰ Ko'o koka asto aspeivomo panke ngkanek aniakhak hata apnakha Eniapom, manghelvetekhek hata mokhom ketlhengkap.

¹¹ Aktemo nak aveske lhmankek ham, nnek akiekpelko aktemakha m'a, nlhenalhkek na akto akselhnanemmalhka m'a.

¹² Nlhanie niekhe ania'a asmahai'a aleltennaksek mokhom, koka mankollapvankek kelha elvaskapok aniem'o akientalhnema.

¹³ Hata apvo'o ta Espíritu apto have niapak anke na niapom, hato ka eliangveskeskamhok ketlhengkap akto have niapak anke. Melhenek hata apankok apankek qaselha, vanlha ta elhenek aktemakha aplengai'a aniem'o Eniapom Neten apaivoma, eleltennaksek hata nhan akmak'akha ta nkovak qaselha apmaniaie ketlhengkap.

¹⁴ Eliangveskeskamhok hata nhan ko'o asto asientalhnemo, eleltennaksek na astakha aspaioma aplengai'a m'a.

¹⁵ Lhamakho apanko'ok anak Eniapom, ko'o nhan ehenko'ok ma'a, ka ngkanek ko'o asto lhkek aspaivoma aplengai'a ta Espíritu astakha ta alheianma, netamen na eleltennaksek hata nhan ketlhengkap ma'a.

Akmaiose envalhok akiaqmoiekha akpaihekha envalhok

¹⁶ Ketse nkaimelhkak manghelvetekhek hata ketlhengkap, koka alhaiek hata helvetekhak mokhom —lhta aptak apkellano Jesús apkeltamesaikamok.

^17-18 Ka apkelpaqmetkesakpo lhta mok apankave apkeltamesaikamok ma'a, lhta aptangkok: —¿Se lha aplheno nak Jesús ke, he? Aplhengkek lhek ketsek nkaimelhkak aknem mangelvetekhek hata ennengko'o m'a ngkanek eniakhak hata m'a apnakha Eniapom anak, koka netamen na lhta tep atketsek ma'a angelvetekhak hata mokhom. ¡Mangeliohok aktakha nak aplheianma! —lhta aptangkok ma'a.

¹⁹ Apiave lhta Jesús apkenmahai'a elelmalhnama m'a, lhta aptak apkellano m'a: —Askeleltennaskek lhek ketsek nkaimelhkak manghelvetekhek hata ketlhengkap, netamen tep atketsek helvetekhak hata mokhom, koka meliohok ketlhengkap.

²⁰ Have niapak anke ketlhengkap nkoliepvamangkok hata, nkaksek hata nhan apiapqalhema, koka enenlhet anak meliamolhma nkolpaihekha ta mota apvalho'ok, alhaie hato ka nkolpaihekhak na apvalho'ok ketlhengkap ma'a.

²¹ Nnavek ngkelvana apmahai'a la etiemok atka av'alhok, aske nkotnehek, koka netamen apteiakmo la atka m'a, nkopaihekhak av'alhok ma'a.

²² Nnavek na ketlhengkap, nkeliepvamengkek kolhvave nak, koka helvetakho ta mokhom nkolpaihekhak hata apvalho'ok, mamma ta nkomaskeksek alpaihakho ta apvalho'ok ma'a.

²³ Hata akvo'o ta aknem anak ma'a, nkomaskok hata helelmalhnengka ko'o, hato ka m'a elelmalhnama Eniapom akieplomo asvesai'a nak, ellangkok hata lhamakho qaselhaha m'a, have niapak ankek ma'a.

²⁴ Melelmalhnekama mokhom ketlhengkap akieplomo asvesai'a nak, elelmalhnama toka, nkolhe ta allangko m'a, avanhek hata nhan ngkotnek alpaihekha apvalho'ok ketlhengkap ma'a.

Aptemeskasenta koneng Jesús mangiamolhma

²⁵ Asietkaske ko'o mota aptemakha Eniapom, koka nkotnengvomok hata alhnakho nkek asketlhekmoskama nak, molhenek hata mokhom asietkeskama la'a.

²⁶ Molelmalhneskasangkek hata nhan mokhom ketlhengkap Eniapom, elelmalhnama ta apankavek ketlhengkap ma'a akieplomo asvesai'a nak.

²⁷ Apkellamelakmek Eniapom ketlhengkap ngkanek hellasekhai'o na ketlhengkap, meliaskeiakmok na apto Eniapom Neten heiapaskama lhta.

²⁸ Ka askempai'a ko'o m'a apnakha lhta Eniapom, asvai'o hengke'e nalhepop anak, ataqhok hatoka kolhvave nak apnakha m'a —lhta aptak Jesús.

²⁹ Koka lhta aptangkok apkellano apkeltamesaikamok: —¡Kolhva nak neliavek aptakha nak apaivoma lheiap, melhe nak apietkeskama!

³⁰ Mankaimelhkak angelelmalhnekho kakpota elpeivesekhak lheiap, apiavek lhamakho qaselha lheiap ka ngkanek mongeliaskamek lheiap apto Eniapom Neten apkapaskama —lhta aptangkok.

³¹ Koka lhta aptak mokhom Jesús apkellano: —¿Meliaskame nlho niekhe, he?

³² Have niapak ankek ngva'ak kolhvave nak enieniangkok hata ketlhengkap. Enielhpaqnekha ta nhan, helieniekhak hata elhepkennenga. Koka molhek hata elhepke, Eniapom hato ka alhelhma m'a.

³³ Nkollengaskesangkok hata akientalhnema ketlhengkap hengke'e nalhepop anak aniem'o maniamolhma nak, koka mellaga nkoie ngkanek astemeskesakhek ko koneng aveske nalhepop anak, elvetak hata nhan altaqmelaikama apvalho'ok aptangko la helpasmekha mota —lhta aptak Jesús.