Juan 15 - Nuevo Testamento Toba Maskoy

Jesús apto malha iamet uva

¹ —Ko'o asto malha iamet uva anko ie, Tata koka apto aptaqmelkeskama.

² Apkeliaqtemenke mota aktengok metkelha la akielhna m'a, apkelalhnaskaskek na aktengok ngkeskama la akielhna kakpota nkoielhnangkok ma'a.

³ Apkelalhnai'o ketlhengkap aniem'o aspaioma askeleltennaskama.

⁴ Etlhengkes aktemakha nelpasmommalhko nak, lhema aktong la iamet mankoielhnema, nkoiaqtemenalhkak ma'a. Nnavek na ketlhengkap ma'a, mankotiepek na apkellanekamok altaqmelo qaselha helieniakho la nentaikamok nelpasmekha.

^5-6 Ko'o asto iamet uva, ketlhengkap koka m'a malha aktengok anak. Mang hata nkek helieniakhak helpasmekama ketlhengkap, ngkotnek hata ngkeskama akielhna. Koka helieniakho la helpasmekama, ngkotnek hata metka akielhna, ngkolhek hata nhan aliaqtemeno m'a, nkoliemak hata, ngkolhek na ankesakho kakpota nkoklhalhkak aiseksek talha.

⁷ Apketlhengkaso la helpasmekama ketlhengkap, apkelleliahakho la nhan aspaioma, elelmalhnama nhan apkenmak'akha la'a, ngkolhek hata allangko m'a.

⁸ Akietno la ketlhengkap ngkeskama akielhna, etnangkok hata have niapak ankek askeltamesaikamok, elvetak hata enenlhet'avok apmopvana ko'o Tata.

⁹ Askellasekhai'o ketlhengkap ka kto nak Eniapom heiamelaiam ko'o, hellasekho ta nhan ketlhengkap.

¹⁰ Eleliehekhok na askanemakha etnangkok kakpota elvetak enenlhet ma'a hellasekhai'o. Ka stonak ko'o askeliehekhek apkanemakha atnek Tata, apkelvetai'ak na enenlhet askasekhai'o ko'o Tata.

¹¹ Ka astakha nak alheianma askeltemo nkolpaihekho mota apvalho'ok akiokho nkek lhemek ko'o.

¹² Ka ntak na henganemakha ehenkok ko'o aspaioma, ¡ellasekhakpo ta mota apieseksek ketlhengkap, ka astemakha nak ko'o askellasekhai'o ketlhengkap!

¹³ Akiav'o la apkasekhai'o aptema po'ok nengaqte, ntasek enietsepok apiaqmoiekha la m'a.

¹⁴ Heleliahakho la ketlhengkap, atneskesangkok hata askeltema emo'ok nengaqte.

¹⁵ Nkomaskok hata nhan aptaikamok nema allasennaikama nak nema apkelianmoma, ka allasennaikama nak have nengaqtek apveske apankok ma'a. Ketlhengkap koka apkellelto askeltema emo'ok nengaqtek, askeleltennaskek na aktakha Tata apaivoma.

¹⁶ Ma lhta heliekiesangkok ketlhengkap, ko'o koka nkeniemai'ak askeliekiesaiangko ehenke, ka askellapaso lhma nkek ham kakpota nkolhnangkok ngkeskama akielhna metka aktemongvaiam annelha. Netamen hata nhan ellangkok hata Tata apkelelmalhnengka la'a qaselha, akieplomo koka asvesai'a nak.

¹⁷ Alhenekhok hata mokhom, ¡ellasekhakpo ta mota apieseksek anak ketlhengkap! —lhta aptak Jesús.

Enenlhet'avok apkellanekamok ngkollatsekama eltaknevak hata apkelieplekama Jesús

¹⁸ —Eltakneva ta enenlhet apkellanekamo mota ngkolatsekama ketlhengkap, nkotlheianvakho toka apvalho'ok emanie lhta heltaqnongkoma ko'o m'a.

¹⁹ Aptangko la apkellanekamok ngkollatsekama ketlhengkap, ka enenlhet anak apkellanekamok ngkollatsekama ellasekho ta nhan ketlhengkap ma'a, ka akto nak apkellasekhai'elha la mota apkeltaiangkolha apketlhelhma'ak. Ko'o koka askeliekieskama ehenkek ketlhengkap apieseksek anak ma'a, mmaskek aptangko m'a aptaiangkolha nak ma'a, ka ngkanek eltaknevak ketlhengkap ma'a.

²⁰ Kotlheianvakho no apvalho'ok astakha lhta askellano, nema asennaikama nak have apto neten apankek apveske apankok. Heliaqmasema lhta ko'o enenlhet, hata nhan ngkotnek ketlhengkap ma'a. Koka moklhem'a lhta nhan apkelleliehekho lhta aspaioma, eleliehekhok hata nhan aptangkolha la apketlhekmosekamok ketlhengkap ma'a.

²¹ Nkotnek hata akvai'a m'a nema akmenlhenaikama nak ko'o songkek askeltamesaikamok ketlhengkap, enenlhet meliamolhma nak ma'a meliekpelkak apto heiapaskama ko'o.

^22-24 Lhta molan'o la lhamakho qaselha nak napaqtavek ma'a, mankolhe lhta apketselhnanemmap, koka nietnek apketselhnanemmap ma'a ngkanek apkelvetai'ak askelanai'a qaselha hempelapkeskama napaqtavek ma'a, koka nkaqhok hengeltaqnongkongkek Tata, ko'o nhan.

²⁵ Koka heng lhamakho aktakha nak askaniemhaikama asvetai'a, ka akietno nak na aktalhesammalhka ley Eniapom Neten, ka ntemak ma'a: «Heltaknevakke' enenlhet metkelho astakha» ka ntemak ma'a aktalhesammalhka.

²⁶ Ko'o ta allapaskesek apto Hengiatekho niapom ketlhengkap, Espíritu apto have niapak anke niapom apkeniem'o nhan ma'a Eniapom, hata etlhekmoksek lhamakho qaselha aniem'o ko'o.

²⁷ Ketlhengkap hata eleltennaksek enenlhet'avok lhamakho qaselha aktemakha apkelvetai'a askelanai'a ngkanek helieplekama lhta askempai'akhasekha lhta asmakmekama —lhta aptak Jesús.