Juan 12 - Nuevo Testamento Toba Maskoy

Ngkelvana altelhnaikamok aimenek akmases aimes Jesús

¹ 6 aknem alhta nkaimelhkak mokhom aktemakha aktaqmelaikama lhma' akvesai'a Pascua, apvakhe lhta Jesús na temma akieto Betania, apnemakha lhta nhan Lazaro m'a apto lhta aplhatekhaskeiam apieseksek apkenmaskengvaiakmo m'a.

² Pelhasep alhta aptak ma'a, nno lhta alaneskaso aptoma Jesús, apne lhta nhan Lazaro m'a, Marta lhtoka apialho' Lazaro nkennaskema lhta nentoma m'a.

³ María lhtoka nsantak lhema alhankok atkok akmases aimes akvesai'a nardo, metka alpalhkammalhka m'a, akmennave nke lhta nhan ma'a. Nkeltelhnangke lhta apmanko'ok Jesús, ka altelhnangko lhta nhan ava' kakpota nkoliemekha apmanko'ok ma'a, mpaiha lhtoka nhan aimes konne pa'at ma'a.

⁴ Apne lhta nhan ma'a lhema apkeltameskama Jesús apvesai'a Judas Iscariote, apto lhta nhan apselhnanekha aptaiangkolha aplhelhma nengaqtek Jesús ma'a, lhta aptak:

⁵ —¡Ntase niekhe nkoteniak akianmoma akmases aimes anak! Avanhe ngkotnek patakkom malha 300 denarios kakpota nkolpasmok metka nak apkelletsekamaha —lhta aptak.

⁶ Koka apmopvana ania'a lhta Judas aptakha apaivoma aplheianma m'a, ma lhta ellanei'ok metka apkelletsekama m'a. Apmenielhmek na lhta mota nekha atkok patakkom ma'a, apmakmekama lhta nhan apkellanekama patakkom Judas ma'a.

⁷ Netamen alhta aptak Jesús apkano Judas: —¡Melaptengkasama lheiap ngkelvana nak! Nkatseskese nke' eiempek ham amanie atonnammalhka ta asiokha nak.

⁸ Nheklhek hato ka mota ngkotnek metka apkelletsekama apieseksek anak ketlhengkap kakpota elpasmok na m'a, koka ngkovomok hato ka aknem akmaskema aspalhkaikama ketlhengkap —lhta aptak.

Nema alanekha ania'a kakpota ematong Lazaro

⁹ Ma lhta ntek judios apkellengai'a ania'a apnema Jesús na temma Betania, ka apkenmeiokmo lhta apkenmahai'a elvetak Jesús ma'a kakpota nhan Lazaro, apto lhta aplhatekhaskeiam Jesús apieseksek apkenmaskengvaiakmo.

¹⁰ Koka apkelemhama apmaniaie sacerdotes apkellanekhek na lhta nhan ania'a apkenmahai'a ellaqhek na Lazaro.

¹¹ Lhna lhta songke apkelieniekho apkelieplekama apanko'ok judios ma'a aniem'o meliaskeiakmok Jesús ma'a.

Aptalhnengvekha Jesús Jerusalen aptekho neten apankek

¹² Lhema aknem alhta ntak akiekai'a m'a, ma lhta ntek apkenmeiekha enenlhet'avok apiav'akha temma Jerusalen, ngvakme lhta aknem aktaqmelaikama lhma akvesai'a Pascua. Ntepema lhta ania'a apieseksek enenlhet'avok aplheiam Jesús amai.

¹³ Kolhvavek anke lhta nhan apkeliaqtemenangkok alha ava' m'a, apkelentepke lhta na temma enenlhet'avok apkeltaniakme lhta m'a, apkelvenema lhta nhan, lhta aptangkok: —¡Hosana, ntasek anko ie, eletsevasoho, nema aktaqmelkeskeskama apkaniemhaikama hengke'e aplhekmo nak apkapaskama Apveske, apto nhan apiav'akha Apveske apanko'ok israel! —lhta aptangkok ma'a.

¹⁴ Ka apvet'o lhta malekka tkok Jesús ma'a, apkananto nhan, nte lhta aktemakha nhan aktalhesammalhka Vakkahak Eniapom Neten apaivoma, ka ntemak:

¹⁵ «Mellaga nko ie atkak Sion, aplhekmek apveske apanko'ok, apkanantema malekka tkok», lhnak nane ntemak ma'a.

¹⁶ Koka apkeltamesaikamok ma lhta nkotlheianvakho apvalho'ok aktemakha aklheianma ania'a aktalhesammalhka vakkahak. Koka netamen nemo aktemeskeskamo neten apankek Jesús ma'a, atlheianvekho nhan apvalho'ok aktemakha aklhenammalhka qaselha nak ma'a.

¹⁷ Koka apkellelto lhta apkelvetaiangko aplhatekhangveiam Lazaro, apteiapmo nhan ma'a nemakha akpekkanveianlha enghapak metaimong alhva, apkeleltennasengka lhta ania'a aplhamakho apkellelto apkelvaiam ma'a.

¹⁸ Lhta ngkanek apkeltaniakmo enenlhet'avok apkenmangko takha Jesús ma'a ngkanek apkeliave lhta qaselha mongenatkeskama apkelanai'a.

¹⁹ Koka ma lhta nkollekok apvalho'ok fariseos, lhta aptangkok apkelpaqmetkasekpok mok apankavek ma'a: —Mamma antemeskesangkok angelienieskasekhak enenlhet'avok apkelieplekama nak ma'a, aplhamengkek na m'a —lhta aptangkok.

Moklhem'a griego apkelketansema Jesús

²⁰ Apkakhangke lhta nhan ma'a moklhem'a griegos apkelpasengvaiam aktaqmelaikama lhma Pascua m'a kakpota elteklhengkok aptapno'ok, el·halhentamok na napaqtek Eniapom Neten ma'a.

²¹ Ka apkeltetesko lhta Felipe m'a ko Betsaida lhta m'a akieto iokhalhma Galilea, lhta aptangkok apkellano: —Nengelmak'avek angelvetak Jesús —lhta aptangkok.

²² Ka apmeiakho Felipe apnakha Andres kakpota etnek aplhelhma eleliama Jesús, apkelvetakho lhta m'a, lhta aptangkok apkellano: —Griego lhkek apkelketamak lheiap —lhta aptangkok ma'a.

²³ Ka apkatemmongka lhta Jesús, lhta aptak: —Kolhva ngvakmok aknem Enenlhet Apketka nak ngkolhek hata aktemeskeso neten apanke'.

²⁴ Have niapak ankek lhema aktek anak analhko la konne lhepop, nkaimelhkek sekhe malha atsepma la'a kakpota nkotektepok nkolhamekhak na akielhna, koka mangkotno la malha atsepma m'a, mankotalhkek na akielhna.

²⁵ Enenlhet apto la apkamelaiakmo neten ankek apkaniemhaikama apanke, emaskengvomok hata m'a. Koka enenlhet meniamelaikama apankek apkaniemhaikama, eloka ta m'a mankotnengvaianlha nnelha apkaniemhaikama.

²⁶ Apkenmak'ak hata nkek etnangkok askellasennaikama, nkaimelhkek helieploma asmangkelha la'a, alhelhma koka motaha. Ko'o Tata ta nhan eltemeskasangkok neten apankavek ma'a.

Aplheianma Jesús ematong hata

²⁷ Nientelhe ko'o, aslengangkek na akmaiose evalhok, asmak'a niekhe altennaksek Eniapom kakpota mangkotnek aktakha nak akientalhnema. Koka moltennaksek hata, ka ngkanek asva'ak ko'o kakpota ngkotnek akmak'akha na ngkotnek askaniemhaikama.

²⁸ ¡Eniapom, elvetaskes enenlhet'avok anak akietnema apmopvana lheiap! —lhta aptak. Kolhvavek anke lhta nlengalhka nema aliatekama aniem'o neten, lhta ntak: —Askelvetaskeskangkek asmopvana, alvetaskesek hata mokhom —lhta ntak nema aliatekama.

²⁹ Koka akto lhta apkellengai'a m'a, lhta aptangkok: —¡Ngva', kelhtenievke nak! —lhta aptangkok. Koka po'ok alhta aptak na: —Have', lhema ángel apaqmetkasak Jesús —lhta aptangkok ma'a.

³⁰ Koka lhta aptak Jesús: —Ka nema aliatekama apkelleng'o lhkek ketlhengkap have ko'o, ketlhengkap koka apkelleltakpok elleng'ak ma'a.

³¹ Ngvakmek aknem lhmanke nak ham nkoiekpelkalhkak hata ngkollatsekama kanhan aktaqmanma nak. Ngkolhek hata nhan aktepkeso aktemo nak aveske lhmankek ham.

³² Hato ka kno ta heklheno neten, nkolienioskamok hata aplhamakho enenlhet'avok asiokha nak nkolaqlantak asnakha —lhta aptak Jesús.

³³ Apketsepma lhtoka niekhe aplhenak Jesús ma'a.

³⁴ Lhta aptangkok enenlhet'avok: —Nlheianmek ley engankok anak menietsepek Cristo, ¿se lha ntak aptonak lheiap ngkolhek aklheno neten Enenlhet Apketka, he? ¿Se lha Enenlhet Apketka ie, he? —lhta aptangkok ma'a.

³⁵ Ka apkellatemmongka lhta Jesús ma'a, lhta aptak: —Iakvatakho nkek ketsek mokhom tep ngkolhek apommatma apieseksek ketlhengkap, elloka ta lhemek ma'a kakpota mankollapvetek ienaqteskama lhma akpelapkeskama, nkonmaskeskesek na apkelvetai'a lhma amai apkenmangkolha la'a.

³⁶ Meliaskem koka apommatema nak neksa aknema mokhom apieseksek anak ketlhengkap, etnangkokhak hata atkak ketlhengkap ma'a —lhta aptak. Netamen aplheianma lhta Jesús ma'a, apielhakpo lhta aptepo apmeiakho mo'ok nekha' kakpota eilhanmok ma'a.

Apkeliaskeiam judios Jesús

³⁷ Ma lhta ntek apkellanai'a qaselha mongenatkeskama Jesús napaqtavek enenlhet'avok ma'a, nheklhek koka apkeliaskeiam ma'a.

³⁸ Apkelientemongkeskamavek nak nanek aplheianma apkeltennasemmap ania'a Isaias annenga ngkotnek hata akvetammalhka m'a, lhnak na ne ntemak ania'a: «Apveske, ¿se lha enenlhet mei'askame ania'a netlheianma nak, he? ¿Se lha nhan enenlhet apvet'o aniem'o apvetaskeskama Apveske apmopvana apankek, he?» lhna ntemak ania'a.

³⁹ Ka nkeniemai'ak enenlhet'avok apkeliaskeiakmo nak Jesús ma'a, aktemo nhan aklheianma aptalheskama lhnak nanek Isaias, lhna aptemak:

⁴⁰ «Nnengkek allapkesekhok apaqto'ok enenlhet'avok kakpota melvetie lhma, nnengkek na altemeskeskamo metka atlhenaikama apvalho'ok kakpota meliangvomhek ma'a, ka nkeniemai'ak na meliaqmongkasekho mo'ok apvalho'ok ma'a kakpota moltaqmelkeskamek neksa anmaska apiempeiok ma'a» —lhnak nane ntemak aptalheskama.

⁴¹ Aplheianmo lhnak nanek Isaias annenga Jesús ma'a aniem'o apvetai'a apaqtek apmanie' Jesús, ngkoitek hata apmopvana.

⁴² Koka moklhem'a lhta nhan judios meliaskeiakmok Jesús ma'a kakpota nhan apkelemhama apmaniaie, koka apkelmaleniosemmakpe lhta apketlheianma meliaskeiam aniem'o apkellai'a Fariseos elentepkesek apkaqnekhelha mota m'a.

⁴³ Apkeleltave lhta nhan eliaspama aptangkolha m'a, man koka eteniaiangkok eliaspama aptaiangkolha Eniapom Neten ma'a.

Apaivoma Jesús nkoliekpelkok hata enenlhet'avok

⁴⁴ Lhta aptak mokhom Jesús apiennakteso apaivoma: —Mang hata nkek heliaskakmok moklhem'a enenlhet, meliaskakmo la nhan Apiapom apto lhta heiapaskama.

⁴⁵ Apkellelto helvetai'a ko'o, apkelvet'ak na apto lhta heiapaskama.

⁴⁶ Ko'o asto apommatma, asva'a lhta ko'o kakpota alapommatkesek apkellelto mangheliaskeiam, melloka ta ienaqtesakha lhma m'a.

⁴⁷ Asvai'o nak ko'o asmahai'a alvongkesek tep enenlhet'avok, have asmahai'a anaktevaksek meleliehekho la aspaioma.

⁴⁸ Hato ka enaqtevasakpok ma'a meleliehekho la aspaioma akvakmo ta nnelha aknem.

^49-50 Have nhan aniem'o ehenkok ehenke asketlhekmoskama nak, Eniapom apto lhta heiapaskama apkeltemo atlhekmoksek. Asiavek ko'o nkolhnangkok hata aliennaktema apnenio'ok mankotnengvaianlha nnelha apkellelto la apkeliehekho henganemakha apankok Eniapom —lhta aptak Jesús.