Juan 1 - Nuevo Testamento Toba Maskoy

Apaivoma aktaiekho enenlhet apanke

¹ Tep nak nanek ampai'osekha apnengkek nak nanek ma'a Apaivoma. Apnengkek nak na napokha Eniapom Neten, apnemo pankek nak na m'a.

² Tep nak nanek ampai'osekha apnengkek lhemek Eniapom Neten.

³ Apkellanei'akhasekha lhnak na nek lhamakho qaselha Eniapom Neten apmaikama lhnak ma'a Apaivoma kakpota elanak na m'a. Man nak elanai'a qaselha Eniapom Neten metko nlho apmaikama Apaivoma nak ma'a.

⁴ Koka heng Apaivoma nak nietnengkek nak akiennaktema enneniek mankotnengvaianlha nnelha. Ka akiennaktema enneniek anak akto apommatma apieseksek enenlhet'avok lhmankek ham.

⁵ Ka apommatma nak nketsaskeskangkek na lhma aiseksek apienaqtesakha la lhma, mang nak na nkomovanak nkospankesek ienaqtesa lhma m'a apommatema nak ma'a.

⁶ Lhema enenlhet nak na apnemak ma'a apvesai'a Juan, apkapaskama lhnak na Eniapom Neten

⁷ kakpota etlhekmoksek aktemakha apvetaiangko m'a apommatema nak, meliaskame ta nhan enenlhet'avok ma'a.

⁸ Juan koka have apto apommatema, koka apto lhta nema apaskama m'a kakpota eleltennasangkok enenlhet'avok aktemakha apommatema nak ma'a.

⁹ Lhna nkeniemai'ak ma'a anketaiakmo akvai'akha nalhepop apommatema nak akto have niapak ankek atsaskeskama lhma ta aplhamakho enenlhet'avok.

¹⁰ Nnengkek nak nanek tep nak nanek hengke'e nalhepop anak, nkelanei'ak nak nanek lhamakho qaselha nalhepop anak aniem'o Eniapom Neten apmaikama m'a, koka menmaiangkok na takha enenlhet'avok lhmankek ham.

¹¹ Akvai'o lhnak ma'a apieseksek annemolhema ankek ma'a, koka apkeltaknongkek noka m'a.

¹² Koka apkellelto lhta apkenmaikamok takha kakpota nhan meliaskeiam ma'a, aptaiangke lhta Eniapom Neten apketkak ma'a.

¹³ Malha lhna lhta ntemak apalleiam alhnankok aniem'o Eniapom Neten, have m'a aniem'o apkeltemakha apankave nak enenlhet.

¹⁴ Apaivoma nak aktaiekho lhnak enenlhet apanke, apnengke lhta nhan nenieseksa ennengko'o m'a. Nelvetai'a lhta nhan apmopvana ka nhan apientalhnemo ngkanek apto lhta vanlha lhema Eniapom Neten Apketka m'a, akiavai'a nke lhta hengamelaiakmo kanhan akto iokhalhmek ankek ma'a.

¹⁵ Neksa apvetaiangko lhnak Juan m'a, lhna aptemak apkellanemo enenlhet'avok: —Apva'ak hengke'e alheianmo lhta ko'o eva, neten na nkek apto apiaspommap hengke'e, molhnok ko'o, ngkanek lhennenga tep nak nanek apnema m'a, ko'o koka molhnemak ma'a —lhna aptemak ma'a.

^16-18 Apmaikama lhnak Eniapom Neten Moises kakpota hengellangkok na ley apankok. Apmaikama koka nhan Jesucristo kakpota hengelvetaskesek hengamelaiam kakpota nhan apto have niapak ankek. Mamma enenlhet apvetai'o Eniapom Neten, vanlha koka apto Apketka apankek apvetai'o m'a. Apto nhan nengaqtek ankek ma'a, apnemo apankek na m'a. Hengetlhekmoskangke lhta nhan aptemakha Eniapom, avanhek anke lhta nhan hengeltaqmelkeskeskama nellaniemhaikama m'a.

Juan aplhenammakpo panke metno Cristo

^19-20 Apkelanma apmaniaie ko Jerusalen apkellapaso lhta sacerdotes kakpota nhan levitas kakpota elelmalhnengvomok Juan. Apkenmahai'a eliohok aptemakha m'a, ka apkatemmongka lhta iokhalhme kankek Juan ma'a, lhta aptak: —Have ko'o asto Cristo —lhta aptak.

²¹ Ka apkelelmalhnengka lhta mokhom: —¿Lheiap anlho Elias annenga, he? —lhta aptangkok. —Ma', have ko'o Elias —lhta aptak apkatemmongka Juan. —Netamen, lhta aptangkok mokhom: —¿Lheiap anlho apkeltennasemmap ania'a aplheianmo lhnak nanek eniapaksek Eniapom Neten, he? Ka apkatemmongka lhta mokhom Juan: —Have' —lhta aptak.

²² Ka apkelelmalhnakho lhta mokhom ma'a: —¿Se lha enenlhet lheiap ke, he? ¡Elhennoho, nemmak'ak angeletsakhesek ania'a apkellelto lhkek hengellapaskama! —lhta aptangkok.

²³ Ka apkellatemmongka lhta Juan ma'a aptemakha aplheianmo lhnak nanek apkeltennasemmap ania'a Isaias annenga: —Ko'o koka asto nak askelpalhnemaikama iokhalhma metkelha temma, ntemak ma'a: «¡Elpeiveso ta apkellanekamok amai apankok Apveske!», lhnak na nek aptemak ma'a.

²⁴ Koka apkellelto lhta apkellapaskama Fariseos,

²⁵ lhta aptangkok mokhom apkellanemo Juan: —Have nak lheiap Cristo, have nhan Elias, have nhan apkeltennaskamo ania'a apankok aplheianmo lhnak nanek eniapaksek Eniapom Neten lheiap. ¿Sok aktemo apkellavkesaiangko na mota iemmen enenlhet ke, he? —lhta aptangkok.

²⁶ Ka apkellatemmongka lhta mokhom Juan ma'a, lhta aptak: —Askellavkaskek ko'o konne iemmen enenlhet'avok, koka apieseksek anak ketlhengkap apnek po'ok, mang koka eliekpelkak ketlhengkap mokhom.

²⁷ Asva'ak ko'o niekhe emanie apmanie m'a, koka apto m'a avanhek ankek apientalhnemo, molhno ko'o, mangheietok na niekhe al·hatsoskesek alhato'ok apnakteto apmankok ma'a enenlhet anak —lhta aptak Juan.

²⁸ Koka lhamakho akvetammalhka lhta qaselha m'a natemma akvesai'a Betania, akieto tep alvata Jordán, apkellavkeskamakha lhta iemmen enenlhet Juan ma'a.

Jesús malha apto nepkesek apketkok apkeniem'o Eniapom Neten

²⁹ Lhema aknem alhta ntak akiekai'a m'a, apvet'o lhta Juan aplhekmo Jesús ma'a, lhta aptak apkellano enenlhet'avok: —Ellammelhono ha'e, aplhekmek apto Nepkesek Apketkok apkapaskama Eniapom Neten, apto apkel·hatsoskama ta malha akientalhnema apkelpatmekama enenlhet lhmankek ham aniem'o meleliehekho apkellaskamakha Eniapom Neten.

³⁰ Alhenke lhta netamen ko'o evak hata po'ok apto apiennaktema molhno ko'o, ngkanek lhennenga tep nak nanek apnema m'a, ko'o koka molhnemak ma'a.

³¹ Moihamok sekhe lhta selha enenlhet kelhaha, askellavkeskangkek koka iemmen enenlhet'avok ko Israel kakpota eliekpelkangvomok ma'a —lhta aptak.

³² Lhta aptak na Juan: —Asvet'a lhta ko'o apvaivantamo Espíritu takhaplhet ma'a, malha konemmaktek alhta aptak ma'a, apienakvo'o lhta takhaplhet ma'a.

³³ Ma lhta ko aihamok enenlhet ma'a, koka apto lhta heiapaskama allavkesangkok konne iemmen enenlhet'avok ma'a, lhta aptak heiano: "Hata apvet'o ta lhema enenlhet apvaiventak takhaplhet Espíritu, eienakvak nahan, koka apto ta malha apkellavkesaikamok akieplomo Espíritu Santo enenlhet'avok ma'a", lhta aptak heiano m'a.

³⁴ Koka asvet'o lhta ko'o m'a, alheno nhan apto Eniapom Neten Apketka m'a —lhta aptak Juan ma'a.

Apmaniaie aptaikamok apkeltamesaikamok Jesús

³⁵ Lhema aknem alhta ntak akiekai'a m'a, apkakhengvakho lhta lheme Juan apqanet apkeltamesaikamok ma'a.

³⁶ Ka apvet'o lhta Juan Jesús apieko m'a, lhta aptak apkellano apkeltamesaikamok: —Ellammelhono ha'e, ka apmankok Nepkesek Apketkok apkapaskama Eniapom Neten ha'e —lhta aptak Juan.

³⁷ Neksa apkellengai'a lhta apqanet apkeltamesaikamok aptemakha aplheianma Juan, apkelieplakho lhta Jesús ma'a.

³⁸ Ka apengkakpo lhta Jesús neksa aplhengama m'a, apvet'o lhta apkelieplokmo m'a, lhta aptak: —¿Se pteniangko ie, he? —lhta aptak. —Hengetlhekmoskama, ¿ko la akieto apnemakha? —lhta aptangkok ma'a.

³⁹ Ka apkatemmongka lhta Jesús: —Nok, helieplakha, elvetangvakhak hata ha'e —lhta aptak. Ka apkelieplakho lhta ma'a, apkelvetangvakmo nhan apnemakha Jesús. Ienaqteskangkek na songkek ma'a, malha la 4 lhta ntak ma'a, ka apkakhengvakmo lhta nhan ma'a.

⁴⁰ Apqanet alhta enenlhet apkelleng'o apaivoma Juan aplheianmo Jesús, apkelieplekho nhan ma'a, lhema apvesai'a Andres, Simon Pedro apetma.

⁴¹ Apkelientemongkasave lhta apmeiekha Andres apiantengvakho nhan apialheng Simon, lhta aptak apkano: —¡Nelvet'ak lhek Mesias ha'e, mo'ok nema altema koka Cristo! —lhta aptak.

⁴² Ka apiantemakho lhta Andres Simon apnakha Jesús ma'a, lhta aptak Jesús apkano Simon: —Lheiap anak Simon Juan apketka, koka kolhvave nak etnekhak hata apvesai'a Cefas, mo'ok nemaltema toka Pedro —lhta aptak Jesús.

Apkellavekama Jesús Felipe ka nhan Natanael

⁴³ Lhema aknem na ntemak akiekai'a m'a, Jesús apmahai'o lhnak eniakhak iokhalhma Galilea, apvetai'o lhnak Felipe m'a, lhna aptemak apkanemo: —¡Nok, heieplakha! —lhna aptemak.

⁴⁴ Ko Betsaida koka m'a Felipe, kanhan apkellavakha m'a Andres kakpota nhan Pedro.

⁴⁵ Netamen apmeiakho lhnak Felipe apiantengvekho Natanael, lhna aptemak apkanemo: —¡Nelvetakhek lhek ennengko'o aklheianmo ley Moises anak kakpota nhan vakkahak apkeleltennasemmap ania'a annenga, Jesús ko Nazaret lhaiek, José apketka! —lhna aptemak Felipe.

⁴⁶ Ka apkatemmoiangka lhnak Natanael ma'a: —¡Ieee! Mankapvankek etiepok enenlhet apiamo la lhma m'a na temma Nazaret —lhna aptemak. Ka apkatemmoiangka lhnak Felipe m'a, lhna aptemak: —¡Elheng, nok kakpota etengvakha apankek lheiap! —lhna aptemak

⁴⁷ Ka apketlhengamo lhnak ma'a, apvetai'o lhnak Jesús aplheiakmo Natanael, lhnak aptemak Jesús: —Ka enenlhet aplhekmo nak ha'e apto Israelita apanke, mamma aptaikama nhan apmopvana ania'a —lhna aptemak Jesús.

⁴⁸ Aplengai'ak nak Natanael ma'a, lhna aptemak: —¿Sek la kto heiekpelko nak lheiap ke, he? Ka apkatemmoiangka lhnak Jesús, lhna aptemak: —Asvet'ak lhek apno lheiap apiamposakpo koneng peskeska nkok iamet higuera, amanie apmahai'a lhkek niavama Felipe —lhna aptemak.

⁴⁹ Niemaskangkek nak apvalho'ok Natanael aplengai'o m'a, lhnak aptemak apkanemo: —¡Hengetlhekmoskama, lheiap apto Eniapom Neten Apketka, apto nhan apiav'akha apveske Israel! —lhna aptemak.

⁵⁰ Koka lhna aptemak Jesús apkanemo: —¿Se kto mei'askakmok lheiap ke, he? ¿Aniem'o kelha nhan askeltennaskama lhkek asvetai'a koneng iamet higuera, he? Koka nkolhamongvomok hata qaselha akiemaskama apvalhok lheiap apvetai'a —lhna aptemak.

⁵¹ Ka aptemo lhnak na apkellanemo Jesús aplhamakho m'a: —Akto have niapak anke, elvetak hata ketlhengkap akmaihekha neten, ángeles apkenmeiekha neten, apkelvaiventa nhan takhaplhet ma'a Enenlhet Apketka nak —lhna aptemak Jesús.