Hechos 9 - Nuevo Testamento Toba Maskoy

Iaqmongkasekha mo'ok apvalhok Saulo

¹ Aplomavek nak Saulo apmahai'avek nak ennapok aplhamakho apkeltamesaikamok Apveske, ka apmeiekho lhnak ma'a akieto apnakha apiav'akha sacerdote.

² Apkeltemo lhnak ellangkok vakkahak kakpota etso'ok moklhem'a apkaqnekhelha judios akieto Damasco kakpota elpathetek aplhamakho apkelennava'ak kanhan ngkelvana'ak apkelpasmekama akvesai'a Alhnankok Amai, kakpota eliantemekhak ma'a nengaqlhengkasemmalhkelha akieto Jerusalen.

³ Aplhengangkek nak amai Saulo, nengaqtek nak apkeiakmok natemma Damasco, ka akpelapkeskamo lhnak al·halhiengkaiam apkelienmoma aniemai'o lhnak neten.

⁴ Ka apteiaiakmo lhnak nalhepop, aplengai'o nhan nema aliatekama, lhna ntemak: —¿Saulo, Saulo, sek la kto lheiap heiaqmasengka nak ke, he? —lhna ntemak nema aliatekama m'a.

⁵ Ka apkenmalhneiangka lhnak Saulo, lhna aptemak: —Apveske ¿se lha lheiap ke, he? —lhna aptemak. Ka atemmoiangka lhna nema aliatekama m'a, lhna ntemak: —Jesús ko'o ka heiaqmasengka nak lheiap,

⁶ etnemekha neten, etalhnengvom hata ha'e apnakha natemma, hata ngkolhek altennaso ania'a lheiap ma'a —lhna aptemak ma'a.

⁷ Avanhek nak apkellai'a apkellelto apketlhelhma'ak Saulo ngkanek apkellengai'o lhnak nema aliatekama m'a, mamma lhnoka apkelvetai'o m'a.

⁸ Ka apkenmekho lhnak neten Saulo m'a, mang noka etai'a lhma, ka apkenmaikokho lhnak apmek apketlhelhma'ak ma'a, apkeliantemekho akieto Damasco.

⁹ Apnaiakmek nak hanetolhem'a aknem ma'a, metka aptavekha, metka apiama iemmen, aptema metka apaqto'ok nahan.

¹⁰ Aplomaka lhnak na m'a lhema nema altameskama apvesai'a Ananias, ka aktemeskeskamo lhnak akvetai'a apaqtek aniem'o apvetaskeskama Apveske, lhna aptemak apkanemo: —Ananias, Ananias —lhna aptemak. —Hai ko'o, se lha ania'a ie Apveske —lhna aptemak apkatemmoiangka Ananias.

¹¹ Lhna aptemak mokhom Apveske: —Eniakha ta amai apvalhok temma nak ma'a akvesai'a Akiennakha apnemakha Judas, eliama ta m'a lhema enenlhet apvesai'a Saulo ko Tarso, apkenmalhnakkek kolhvave nak ma'a.

¹² Nietnek lhek akvetai'a apaqtek lheiap kakpota enengkenek apmeiok takhaplhet, kakpota etekha lhma mokhom ma'a —lhna aptemak.

¹³ Ka apkatemmoiangka lhnak Ananias, lhna aptemak: —Apveske, aslengai'ak ko'o apvesai'a enenlhet anak ma'a, avanhek apnaqtevaskama apkellelto lheiap apkelpokkanma akieto m'a Jerusalen.

¹⁴ Kolhva koka apva'ak hengke'e aplhevai'ak ania'a aniem'o apkelemhama apmaniaie sacerdotes kakpota elpathetek, eliantemok na nengaqlhengkasemmalhkelha m'a aplhamakho apkellelto apketlheianma mota apvesai'a lheiap —lhnak aptemak Ananias ma'a.

¹⁵ Koka lhnak aptemak mokhom Apveske apkanemo: —Eniakha ta panke, ko'o askeliekieskama m'a enenlhet anak kakpota elhenek asvesai'a apieseksek metnangko nak judios, kakpota nhan apieseksek apkeliav'akha apkelveskaie apanko'ok, kakpota nhan apieseksek israelitas.

¹⁶ Ataskesek hata m'a akiavai'a aplengaiangko akientalhnema aniem'o apaiesaikama asvesai'a —lhnak aptemak Apveske.

¹⁷ Ka apmeiekho lhnak Ananias apnakha Saulo, apnengkanvekho lhnak apmeiok takhaplhet ma'a, lhnak aptemak apkanemo: —Eialheng Saulo, Apveske Jesús alhta m'a apvetai'o nak lheiap nalhet amai neksa apmeienta nke'e Damasco, ka heiapaskama ko'o hengke'e kakpota etekha lhma lheiap, elanok na apvalhok Espíritu Santo lheiap —lhnak aptemak Ananias apkanemo Saulo.

¹⁸ Kolhvavek ankek nak mpalleiakmok alielhaqlhema apaqto'ok, malha lhnak kelasma aiempeiok ma'a, ka apvetekho lhna lhma mokhom, nemo nhan aklavkeskamo konne iemmen ma'a.

¹⁹ Ka aptavekho lhnak na aptoma m'a, akiennaiekho mokhom apiempek, apnemo nhan ma'a Damasco moklhem'a aknem aptaiekho nhan apketlhelhma'ak nema altamesaikamok ma'a.

Apkeltennaikama Saulo ania'a aktaqmanma akieto Damasco

²⁰ Apkempai'akha lhnak kolhvavek anke apkeltennaikama Saulo apkaqnekhelha judios Jesús apto Eniapom Neten apketka.

²¹ Nkeliemaskangkek nak apvalho'ok enenlhet apkellengai'o m'a, lhnak aptaiangkok: —Have nlho enenlhet alhta ha'e, apmenlhenaiangka lhta kakpota nhan apnaqtevaskamo lhta Jesús apkennemolhema akieto m'a Jerusalen. Lhna alhta niekhe apmahai'a evak hengke'e kakpota elpathetek, elaqlakhak na akieplomo apkelpelhketekamok apmeio'ok apkakhangkelha apkelemhama apmaniaie sacerdotes akieto m'a Jerusalen —lhnak aptaiangkok enenlhet'avok.

²² Koka Saulo nheklhek nak apkeltennaiangka ania'a aktaqmanma metka apkenmenai'a, apketlhekmoskangkek nak Jesús apto Cristo, man noka eliamok na m'a judios apkakhaiangko m'a akieto Damasco.

Apkeniema Saulo aniem'o apkenmahai'a ennapok judios

²³ Netamen nlhaniek na ntemak aknem akiekai'a m'a, apkellanekho lhnak aptangkolha apkelemhama apmaniaie apkenmahai'a ellaqhek Saulo m'a.

²⁴ Apkelielhanengkeskamo lhnak akiav'akha atong apkellavakha nak ma'a aknem ankek kakpota nhan pelhasep, apkenmahai'a elpathetek ma'a, koka aplengai'ak nak ania'a Saulo m'a.

²⁵ Koka apkellelto nema altamesaikamok apkellaklhengkeskamo lhnak konne iamaposak akiavai'a, apkelvaivesentamo lhnak nekhav'ak akhalhtemommalhka ietaphaimakkok apiav'akha temma m'a.

Apvaiam Saulo Jerusalen

²⁶ Ka apvekho lhnak Saulo akieto m'a Jerusalen, apkeliaiangka lhnak ma'a nema altamesaikamok kakpota eltekhak apketlhelhma'ak. Koka apkellai'ak nak ma'a, apkeliaskeiakmek nak ania'a aplhenammap Saulo aptaiekho nhan nema altameskama m'a.

²⁷ Koka Bernabe lhnak apiantemekhak Saulo napaqtavek nema allapaskamo m'a, ka apkeleltennaseiangka lhnak aktemakha apvetai'a Saulo Apveske neksa apmeiekha lhnak amai akieto Damasco. Apaqmetkeskamo lhna lhta Apveske Saulo m'a, netamen ma'a apkeltennaiangka nhan Saulo ania'a aktemakha aplhenammap Jesús metka apkenmenai'a akieto m'a Damasco.

²⁸ Apketlhelhma'ak na mota aptaiangkok kolhva Saulo nema alapaskamo akieto m'a Jerusalen. Apkelentalhnengvekhek na mota m'a, apkelentepekho nhan natemma nak ma'a.

²⁹ Metka apkai'akha lhnak na aplheianma apvesai'a Apveske m'a, Apkellatemmommakpek nak na m'a griegos, apkellanekhek nak na niekhe apkenmahai'a ennapok ma'a.

³⁰ Apkellengai'ak nak ania'a apkelialheng'a m'a, ka apkeliantemekho lhnak akieto m'a Cesarea, netamen ma'a apkellapaskamo nhan natemma Tarso.

³¹ Metka akmaska lhna ntemak apkakhaikamok ma'a apkellelto iglesias akieto iokhalhma Judea, Galilea, kakpota nhan Samaria. Ntepeiangkek nak apkeliangveiakmo aptemakha Eniapom Neten, aplhameiangkek nak enenlhet ma'a aniem'o apkelpasmoma Espíritu Santo, apkellai'avek na mota Apveske m'a.

Aptaqmelkasekha Pedro enenlhet apvesai'a Eneas

³² Aptemengkek nak amaika'a Pedro aplhamakho apkelialheng'a m'a, ka nhan nema alpokkanma apkakhaiangko m'a Lida.

³³ Ka apvetangveiakmo lhnak lhema enenlhet apvesai'a Eneas, 8 iantelhkapa lhna ntemak apietnema neten nema aktankeskama, metka aptapno'ok nak ma'a.

³⁴ Lhna aptemak Pedro: —Eneas, Jesús hata etaqmelkasekha kolhvave nak, etnemekha neten, eliaqsasekha nema aktankeskama nak —lhna aptemak. Kolhvavek ankek nak apkenmekhak neten ma'a.

³⁵ Apkelvetai'o lhnak na enenlhet'avok ma'a ko Lida kakpota nhan ko Saron, ka apkelpengkaiakmo lhnak apvalho'ok akieto apnakha Apveske m'a.

Nema aklhatekhaskeiam atsepma Dorcas

³⁶ Nnengkek nak ma'a akieto na temma Jope lhema ngkelvana nema altameskama akvesai'a Tabita, nemaltema koka Dorcas griego apaivoma, vanlha lhnak alanai'a aktaqmanma kakpota nhan alpasmoma metka nak apkeletsekama.

³⁷ Ka akvai'o lhnak akmaska aiempek ma'a, atsepmo lhnak na m'a. Nnengkek nak akienieskamo apak atsepma, ka aknemo lhnak aklhengkeskaiakmo lhema av'alhok pa'at akieto neten mo'ok av'alhok.

³⁸ Netamen apkellelto nema altamesaikamok ko Jope apkellapaskamo lhnak apqanet enenlhet kakpota eliantengvakhak Pedro apnemo m'a akieto Lida, nengaqtek nak Jope m'a, lhna aptaiangkok apkellanemo m'a: —Eniakhetamok nak lhek eniakhak na temma Jope lheiap Pedro —lhna aptaiangkok.

³⁹ Apkelieplekhek nak Pedro m'a, ka apkelvekho lhnak ma'a akietnakha apak ngkelvana. Mang na ntek lhentampak'ak aliepqalhemo m'a, ka alvetaskeskamo lhnak Pedro ietamopai'a kakpota nhan apkelvenaktema ngkelvana'ak allentalhnema allanai'a lhnak Tabita neksa aktema alhnankok ma'a.

⁴⁰ Netamen Pedro m'a apkeltemo lhnak elentepok aplhamakho enenlhet ma'a, ka apkelteklheklhemo lhnak aptapno'ok nalhepop, apkenmalhnongkomo m'a, ka apkelanei'o lhnak atsepma m'a, lhna aptemak apkanemo: —¡Tabita, kolhnekha no neten! —lhna aptemak. Ka anmaiesekho lhnak aqto'ok ma'a akvetai'o Pedro, ka aknemo lhnak neten takhalhet aktanema.

⁴¹ Ka apmamo lhnak amek Pedro m'a, apkenengkasekho lhnak neten, apkellaveiangka nhan apkellelto apkelpokkenammap ma'a kakpota nhan lhentampak'ak, apkelvetaskeso aktaiekha alhnankok mokhom Tabita.

⁴² Nketkaikama lhnak ania'a alhma nkek ham natemma Jope, man nak na ntek enenlhet aptaikamok meliaskeiam Apveske m'a.

⁴³ Nlhaniek nak aknem apnema Pedro m'a apnemakha Simon, apto apmakmekama apkeltakmelkeskama kaselha aiempeiok.