Hechos 7 - Nuevo Testamento Toba Maskoy

Apmatnama Esteban

¹ Apkenmalhnekama lhnak apiav'akha sacerdote Esteban ma'a, lhnak aptemak: —¿Have nlho niapak apketlheno nak ha'e, he? —lhna aptemak.

² Ka apkatemmoiangka lhnak Esteban ma'a, lhna aptemak: —Hellailhono eliapma'ak kanhan elialheng'a, Eniapom Neten aknema apmopvana panke apvetaskesammakpo lhnak nanek nelieihengka Abraham akieto Mesopotamia, amanie lhnak apmahai'a elhnemok iokhalhma Harán,

³ lhnak nanek aptemak Eniapom Neten: "Eieniekha ta apkavakha ka nhan apaivomo lhema lheiap, ko'o ta ateskesek lhema iokhalhma kakpota elhnemok ma'a", lhnak nanek aptemak Eniapom Neten.

⁴ Apteiapmek nak Abraham ma'a iokhalhma Caldea, apnaiakmo lhnak ma'a iokhalhma Harán. Netamen nak ma'a apketsepmo lhnak apiapom Abraham ma'a, apiantementamo lhnak nanek Eniapom Neten apieseksek enenlhet anak hengke'e.

⁵ Aplomaka lhna apanke Abraham hengke'e, mang noka eltemok etnek apankok lhepop Eniapom Neten ma'a. Koka apkeltennaskangkek nak lhema apaivoma aktemakha qaselha nkovak hata. Netamen apketsepma ta Abraham lhnoka aplheianmak Eniapom neten ellangkok lhepop hengke'e aptavana'ak neptamen, koka mamma lhnoka apketka mokhom ma'a.

⁶ Aplheianmek nak na Eniapom Neten Abraham elloka mo'ok lhepop aptavana'ak neptamen, kakpota nhan etnangkok nema allasennaikama nema apkelianmoma akvakmo 400 iantelhkapa apkellengaiangko apkenmakmekama m'a.

⁷ Apkeltennaskangkek nak nanek Eniapom Neten Abraham, lhna aptemak: "Ko'o hato ka aiaqmongkasekha apkeltemakha enenlhet apkeltemeskeskama apkellasennaikama nema apkelianmoma ketlhengkap, netamen elentepok hata m'a kakpota hellasennama hengke'e, iokhalhma nak", lhnak nanek aptemak Eniapom Neten apkanemo Abraham.

⁸ Neksa apkellanai'a lhnak nanek annemo mo'ok apvalho'ok Eniapom Neten kanhan Abraham apkenmahai'akha etnangkok, apkanemo etneskesangkok eliaqtemenkeskasangkok nekha atkok apkellammelhakha aplhamakho apkennemolhema. Netamen apvetai'o lhnak apketka Abraham ma'a apvesai'a Isaak, ngvaiakmek nak 8 aknem apteiam ma'a, ka aptemeskeskamo nhan apiaqtemenkeskama nekha atkok apkammelhakha m'a. Aptemengkek nak na m'a Isaak apkelanei'o apketka Jacob, netamen aptemo lhnak na Jacob ma'a apkellanei'o 12 apketkak, apkellelto apiapma'ak ma'a 12 aknema apkennemolhema.

⁹ José lhnak apvesai'a lhema apketka apieseksek 12 nak ma'a, akietnemo lhnak apkeliasepkeskama apkelpetma'ak ma'a, lhna nkeniemai'ak apkelhakhamo lhnak patakkom akianmoma kakpota ngkolhek akiantemakho iokhalhma Egipto. Koka Eniapom Neten noka mota aplhelhma José m'a,

¹⁰ aptaqmelkeskangkek nak na neksa akientalhnema apnema m'a kakpota nhan aptemeskeskamo lhnak na aknema apiamo napaqtek apiav'akha apveske Faraon. Nleklemavek nak apvalhok apvetai'o m'a José, ka aptemeskeskamo lhnak na gobernador apkellavakha nak ma'a kakpota nhan apkemhama apmanie lhnak na lhamakho qaselha apanko'ok ma'a.

¹¹ Netamen aksavhommalhko lhnak aptekamok ma'a iokhalhma Egipto kakpota nhan Canaán, ngvai'ak nak aknem akientalhnema apkakhaikamok ma'a, metka aptekamok na aptaiangkok nelieihengka m'a.

¹² Aplengai'ak nak Jacob ania'a akietnema nentoma alena apaqtek akieto Egipto, ka apkellapaskamo lhnak apketkak ma'a kakpota elteniangvomok aptekamok ma'a, lhema lhna ntemak apkelteniangveiam aptekamok ma'a.

¹³ Netamen ma'a apkenmeiekho lhnak mokhom hanet apkeltaqhemo akieto Egipto apkelteniangvekha aptekamok, ka apkeltemo lhnak José eliekpelkekhok mokhom apkelpetma'ak ma'a, apkeliantemekho nhan napaqtek apiav'akha apveske ko Egipto kakpota eliekpelkok na m'a.

¹⁴ Ka apkeltemo lhnak José eliantementak na apiapom Jacob kakpota nhan aplhamakho aptema aplhamakha akieto Egipto, 75 enenlhet nak ma'a.

¹⁵ Apkakhengveiakmek nak ma'a akvaiakmo apketsepmo Jacob kakpota nhan lhamakho nelieihengka m'a.

¹⁶ Ka aknemo lhnak aksekho aphapak Jacob akieto m'a Siquem, nemo nhan akpekkanvekho nemakha akpekkanveianlha enghapak, Abraham lhnak nanek apmama apanko'ok Hamor apketkak neptamen.

¹⁷ Aplhameiangkek nak israelitas ma'a akieto Egipto, nkanketvaiakmek nak aknem apkeltennaskamo lhnak nanek lhema apaivoma Eniapom Neten Abraham aktemakha nkotnek hata m'a.

¹⁸ Koka aptemo lhnak na mokhom po'ok apiav'akha apveske ko Egipto, mankotno apiekpelkemelha José m'a.

¹⁹ Koka m'a apkeliennengkaseiangka lhna mota nelieihengka, apkeltekpoiangka nhan, kakpota nhan apkeliennai'o apkellanei'o kakpota mangkolhek allan'o apketkak kolhva la apalleiam kakpota eletsepo pankavek ma'a.

²⁰ Ka apteiaiakmo lhnak Moises ma'a, nleklemavek nak apvalhok Eniapom Neten ma'a, 3 pelten nak ngvaiakmok altakmelkeskama ngkana'ak ma'a.

²¹ Netamen aliamasangveiakmo lhnak ngkana'ak Moises apketkok ma'a, koka akvetekho lhnak na apveske Faraon apketka, akvanengkeskamo lhnak malha atka nkek na ntemak ma'a.

²² Ka aknemo lhnak atlhekmoskamo m'a lhamakho aptaiangkolha kakpota nhan aktemakha apkeliangveiakmo ko Egipto. Ngvaiakmek nak aknem aptema neten apankek apiaspommap Moises ma'a, kakpota nhan apmopvana apaivoma ka nhan apmopvana elanak qaselhaha.

²³ Ka akvaiakmo lhnak 40 iantelhkapa pankok Moises ma'a, apkeltemo lhnak eltenengvakhok apaivomolhema ko Israelitas.

²⁴ Apvetangvekho lhnak aptekpoiangka lhema enenlhet Egipcio enenlhet Israelita, apmasveiakmek nak Moises enenlhet ko Israelita, ka apkaqhemo enenlhet Egipcio.

²⁵ Nlheianmek nak apvalhok Moises apaivomolhema ko Israelitas nkotlhenek apvalho'ok emama Eniapom Neten Moises kakpota el·hatsoskakhak apaivomolhema m'a akieto Egipto, mang noka niekhe nkotlheianma apvalho'ok ma'a.

²⁶ Mo'ok aknem nak ntemak ma'a apvetangvekho lhnak mokhom Moises apkennapommap po'ok apankek ko israelitas, ka apmahai'o lhnak emaskeskamok apkennapommap ma'a, lhna aptemak: "Apaivomo lhema pankek apkennapekpok ¿se lha kto ie, he?", lhnak aptemak.

²⁷ Koka apto lhnak aptekpoikama po'ok apanke, apiengangkek nak Moises ma'a, lhnak aptemak: "Manghengennaveska, have apveske engankok lheiap, have nhan hengiekpelkemo niapom.

²⁸ Apmak'ak kelha heiaqhek lheiap ka aptakha lhta knem alhta apkaqho enenlhet Egipcio", lhna aptemak.

²⁹ Ka apkeniemo lhnak Moises ma'a apmaiangko mo'ok apkellavakha akvesai'a Madian, apnaiakmo nhan ma'a, apqanet nak aptemongveiakmok apketkak ma'a apvaianlha'.

³⁰ 40 iantelhkapa lhnak ngvaiakmok ma'a, apteiapvei'o lhnak lhema ángel akieto metkelha temma, nengaqtek nak metaimong akhaiam Sinai, apkenengvai'o lhnak aiseksek ava' panaktema m'a neksa aleivoma talha.

³¹ Mpelapkeskankek nak apvetai'a Moises ma'a, aptetesaiangkek nak kakpota elanhok nengaqte, ka aplengai'o lhnak apkeliatekama Apveske m'a, lhnak aptemak:

³² "Ko'o asto nak Eniapom Neten apanko'ok apkelieihengka'a lheiap, Abraham, Isaak, kakpota nha Jacob", lhna aptemak. Apkelpelhiennongkek nak apkai'a Moises ma'a, man na nkomahai'ak elhengkesek apkelanei'o m'a.

³³ Ka aptemo lhnak mokhom Apveske apkanemo Moises: "El·hatsos apnakteto apmankok lheiap ngkanek lhepop akpokkenammalhka apkelteionlha nak.

³⁴ Asvet'ak ko'o apkellengaiangko enenlhet ehenko'ok akieto m'a Egipto, asleng'ak na apkelleklhangvekama, ka asvaivantamo nak kakpota alvongkesek tep. ¡Epeneso ta nhan lheiap Moises! Angvapaksek hata lheiap iokhalhma Egipto", lhna aptemak ma'a.

³⁵ Koka m'a apkeltaknongvekhek nak nanek apaivomo lhema m'a Moises, lhnak nanek aptaiangkok ma'a: "Manghengennaveska, have apveske engankok lheiap, have nhan hengiekpelkemo niapom", lhnak nanek aptaiangkok ma'a. Koka apkapaskangkek nak nanek Eniapom Neten lhema ángel ma'a, apiephongvei'o lhnak nanek aiseksek panaktema ava, kakpota eniapaksek Moises etneskesek na apkel·hatsoskekha niapom kanhan Apveske.

³⁶ Koka m'a Moises nak nanek apkel·hatsoskekho lhnak apaivomolhema iokhalhma Egipto, apkelanei'o lhnak na ngkeskama qaselha mongenatkeskama kanhan qaselha hempelapkeskama akieto m'a Alvata iemmen Akielhvasema ka nhan ma'a akieto iokhalhma metkelha temma akvakmo 40 iantelhkapa.

³⁷ Koka m'a Moises lhnak nanek aptemak apkellanemo Israelitas: "Eniapom Neten hata etepkesek lhema aphapak enenlhet apieseksek anak apkelialheng'a ketlhengkap kakpota etnek apkeltennaskamo ania'a apanko'ok, ka stonak ko'o", lhnak aptemak.

³⁸ Koka m'a Moises apaqmetkeskangkek nak nanek lhema ángel akieto metaimong akhaiam Sinai, ka apkelletsantengkeskamo nhan nema akpaivoma akmovana nkoltaqmelkeskesek apkellaniemhaikama nelieihengka nnenga apkellelto apkaknaikama m'a akieto iokhalhma metkelha temma, hengellangkongvai'o nhan ennengko'o.

³⁹ Koka nelieihengka mang nak eleliehekhok ma'a, apkelleltaknonvekhek nak, apkelmahai'o lhnak eltaqhok mokhom akieto Egipto.

⁴⁰ Lhna aptaiangkok enenlhet apkellanemo Aarón: "Hengellaneskes no qaselha akiokha alanemmalhka dioses kakpota henlaqlomaha nenmangkolha la'a. Mangeliohok aktemakha apkaniemhaikama Moises alhta, apto lhta nhan hengel·hatsoskekha iokhalhma Egipto", lhnak aptaiangkok enenlhet'avok ma'a.

⁴¹ Apkellaneiangkek nak apkelietkeskamo toro apketkok, ka apkennapeiangko lhnak apnaqtoskama kakpota eliavenkeskasama apvesai'a toro apkellanekamok apankavek ma'a. Ka apkellaneiangko lhnak na aktaqmelaikama lhma m'a, avanhek anke nak apkeletsevaskeskama apkellanekamok toro apketkok apkelietkeskama.

⁴² Koka apkelieniekhek nak Eniapom Neten enenlhet'avok ma'a, apkellaiangkavek nak apkeliavenkaskesaiangka apkelvesai'a iav'a m'a. Ka aktemo lhnak apnaktalhesaikamok vakkahak apkeleltennasemmap ania'a hengke'e: «Enenlhet'avok ko Israel, ngvaiakmek niekhe 40 iantelhkapa apkelloma iokhalhma metkelha temma, man koka hellaiangkok apnaqtoskama apkennapekamok kakpota nhan qaselha apankok hellaikamok la'a.

⁴³ Koka apkelletsekama mota neplatanha ketlhengkap akpaklhenammalhka atkok kaselha aiempek aknaikamok konne qaselha akiokha alanemmalhka Moloc kakpota nhan iav'a apiokha apveske Refan apankok apkellanekamok apankave ketlhengkap, kakpota elelteklhengkok aptapno'ok naqtavek ma'a apkellai'o nhan, ka ngkanek alapaksek hata mokhek ankek ketlhengkap ma'a tep Babilonia», lhnak ntemak aptalheskama vakkahak sekama ania'a nnenga.

⁴⁴ Ka m'a iokhalhma metkelha temma nelieihengka nietnengkek nak nanek akpaklhenammalhka kaselha aiempek. Nnankek ma'a nekha'ak metaimong alkasemmalhka apkelpeneskama lhnak nanek apkelpaqmetekama aknemo mo'ok apvalho'ok Eniapom Neten kanhan Israel, apaklhanma lhnak na nek Moises ma'a kaselha aiempek anak, Eniapom Neten nak apvetaskeskama pankek ma'a apkeltakha la etnehek.

⁴⁵ Netamen na m'a apkellaiangko nhan nelieihengka pa'at anak, Josue lhnak nanek apvesai'a apkemhama apmanie m'a. Apkelletsomavek nak na m'a pa'at anak apkenmaiangko mo'ok iokhalhma apkel·hatsoskaseikokha metnangko nak judios aniem'o apkennapommap, apkelpasmoma nhan Eniapom Neten. Nietnaiakmek nak pa'at ma'a akvakmo aknem aptaiekho apveske David.

⁴⁶ Avanhek ankek nak nanek akleklemo apvalhok Eniapom Neten aptemakha m'a David, ka apkenmalhneiangka lhnak David epaklhenkesek kaselha aiempek kakpota aplhamakho Israelitas eliavenkaskesama Apvesai'a m'a.

⁴⁷ Koka apketka neptamen David apvesai'a Salomón apaklhanmo m'a kaselha aiempek anak.

⁴⁸ Koka neliavek ennengko'o apto apnema nak netne kankoie melhek akieto konne akpaklhenammalhka kaselha aiempek apto enenlhet apaklhanma m'a. Ka aktemo nak na aklheianma vakkahak aptalheskama apkeltennasemmap ania'a:

⁴⁹ «Ka aptemak Apveske: Neten akto malha astanema, nalhepop koka askelteioiam emankok. Mankapvankek enenlhet helaneskesek asnemakha asiamposammalhkelha la'a,

⁵⁰ ko'o askelanai'a emeiok ehenke lhamakho qaselha lhmankek ham» lhna aptemak ma'a.

⁵¹ Aplhengkeskangkek nak mokhom Esteban apkeltennaikama m'a, lhna aptemak: —¡Mamma apqatko'ok ketlhengkap, mang na nkomak'ak ellailhok, mankolatsema nhan apvalho'ok! Apkelnavek apkelieihengka nnenga, apkeltaknevakke mota Espíritu Santo.

⁵² Mang nak nanek na eltaqmelkeskamak apkeleltennasemmap ania'a annenga apkelieihengka'a ketlhengkap, kakpota nhan apkennapeiangkek enenlhet aplheianma la ania'a apvai'a ta apto apeivomo. Netamen apvai'o hengke'e nenvanlha nak apto apeivomo panke, apkeltaknongvekhek na m'a, apkellaqhemo nhan ketlhengkap.

⁵³ Apketlhevaiangkek ketlhengkap ley aniem'o apkellaikamok ángeles, koka meleliehekhok na ketlhengkap nenvanlha nak —lhnak aptemak Esteban.

⁵⁴ Apkeltaklheiangkek nak apmo'ok apkelemhama apmaniaie m'a aniem'o annatheskama.

⁵⁵ Koka Esteban aplanei'avek nak apvalhok Espíritu Santo m'a, apkammelhmo lhnak neten, apvetai'o apkapommatema Eniapom Neten ma'a kakpota nhan Jesús nak apkenmaiangka napokha akieto iennakha.

⁵⁶ Lhnak aptemak Esteban: —Asvet'ak anmaihakho neten, asvet'ak na Enenlhet Apketka apkenmangka akieto napokha akiennakha Eniapom Neten —lhnak aptemak ma'a.

⁵⁷ Apkellapeiangkek nak apaiko'ok ma'a kakpota nhan ngkelpaihekama lhnak apatno'ok, apkelketameiangko apkelpathetmo nhan Esteban ma'a.

⁵⁸ Ka apkellentepkeskamo lhnak ma'a apiav'akha temma m'a, apkel·hatsosaiangko nhan apkelaqlammap apkellelto apkelvetaiangko aplheianma apkammelhma Eniapom Neten ma'a, apkellangkongvaiakmo m'a lhema apketkok ma'a apvesai'a Saulo, ampai'o lhna apkeliaqnekamok metaimong Esteban ma'a.

⁵⁹ Neksa apkeliaqnemmap nak, lhna aptemak apkenmalhnongkomo Esteban ma'a: —Apveske Jesús, ema ta takha ehengok —lhnak aptemak.

⁶⁰ Ka apkelteklheklhemo lhnak aptapno'ok nalhepop Esteban ma'a, lhna aptemak apiennakteskamo apaivoma: —Apveske, etneskesama ta apankek lheiap henaqtevaskama hellanei'o enenlhet'avok anak —lhnak aptemak. Ka apketsepmo lhnak ma'a.