Hechos 6 - Nuevo Testamento Toba Maskoy

Apkeliekiesammap 7 diaconos

¹ Aplhameiangkek nak apkellelto nema altamesaikamok ma'a, ka ampai'akha lhnak apkeliaskama apatno'ok griegos apkellelto hebreos, apketlheianmo griegos lhentampak'a apanko'ok ketsek atlhevaikamo mota alpasmoma aktekamok lhamakho knem ma'a.

² Netamen nak ma'a, 12 nema alapaskamo nak apkellankesekho lhnak aplhamakho meliaskeiam ma'a, lhna aptaiangkok: —Mangkolatsema ennengko'o angelieniekhak netlheianma ania'a aplhenammap Eniapom Neten kakpota angelhpankesek ma'a aptekamok.

³ Ntasek eliekiesangkok apieseksek anak ketlhengkap 7 enenlhet altaqmanma la apkeltemakha, nema la nhan apkeliamo, allaneiangko la nhan apvalho'ok Espíritu Santo kakpota etnangkok apkelhpankesaikamok ma'a.

⁴ Angetlhengkesek hato ka mota ennengko'o nelpaqmetkeskama Eniapom Neten, angeltennasangkok na ania'a aplhenammap Jesús —lhnak aptaiangkok ma'a.

⁵ Nkelleklemavek nak apvalho'ok enenlhet'avok ma'a, ka apkeliekiesaiangko lhnak lhema enenlhet aklanei'o apvalhok Espíritu Santo kanhan mei'askeiam apvesai'a lhnak Esteban, kakpota nhan po'ok Felipe, Procoro, Nicanor, Timon, Parmenas kakpota nhan Nicolas apkeniem'o m'a Antioquia, aptemongvai'a lhnak na judio m'a.

⁶ Ka apkeliantemekho lhnak napaqtavek nema allapaskamo m'a, apnengkenaiangko nhan apmeio'ok takhaplhet'ok ma'a, apkelelmalhneskeskamo nhan.

⁷ Niangveiakmek nak nema alhpankeskama apaivoma Apveske, aplhameiangkek nak na nema altamesaikamok natemma Jerusalen, aplhaniek nak na sacerdotes meliaskeiam ania'a aplhenammap Jesús.

Akiennaktema nkek apathetammap Esteban

⁸ Avanhek ankek nak aplhevai'a akmases apvalhok Esteban kanhan aknema apmopvana aniem'o Eniapom Neten, apkelanai'ak na mota qaselha hempelapkeskama kanhan qaselha mongenatkeskama napaqtavek enenlhet'avok apkellavakha nak ma'a.

⁹ Lhema aknem na ntemak ma'a apkelvai'o lhnak enenlhet apkelleniem'o apkaqnekhelha judios akvesai'a Esclavos nema alpaqnemekha, apkelvai'o lhnak na enenlhet ko Cirene, Alejandria, Cilicia kakpota nhan ko Asia, ka ampai'akha lhnak apkellatemommap Esteban ma'a.

¹⁰ Mang noka nkonmopvanka'ak ellammelhek Esteban ma'a ngkanek avanhek nak apiangveiakmo aniem'o Espíritu.

¹¹ Ka netamen nak ma'a apkellaiangko lhnak patakkom moklhem'a enenlhet meliamolhma kakpota etnangkok apkenmopvanka ania'a etlhenek Esteban apkammelhma Moises kakpota nhan Eniapom Neten.

¹² Apkelvankeskangkek nak enenlhet'avok apkellengai'o ania'a, annatheskamo nhan metno apketko'ok, escribas kakpota nhan lhamakho enenlhet'avok na temma m'a. Kolhvavek ankek nak apkelketameiangkok, apkelpathetmo Esteban, apkeliantemekho nhan ma'a akieto apkaqnekhelha mota apkelientalhnakha apkelveskaie'.

¹³ Apkelleliaiangka lhnak na m'a enenlhet kakpota etnangkok apkenmopvanka'a ania'a ellammelhek Esteban, lhna aptaiangkok: —Ka enenlhet anak ham melvateskaiakmo mota aplheianma apkammelhma pa'at akpokkenammalhka nak kakpota nhan ley engankok anak.

¹⁴ Aplhengkek lhek Jesús ko Nazaret ma'a etvasekhak nak lhek pa'at akpokkenammalhka nak kakpota nhan eiaqmongkasekhak mo'ok nentemakha nentaiangkolha hengaikamok alhta Moises annenga —lhna aptaiangkok ma'a.

¹⁵ Netamen apkellanei'avek nak Esteban ma'a aplhamakho apkellelto apkakhaikamok akieto konne apkaqnekhelha mota apkelientalhnakha apkelveskaie, nkapommatmek nak na napa'at ma'a, malha lhnak aptaiekha lhema ángel.