Hechos 5 - Nuevo Testamento Toba Maskoy

Ananias kanhan aptava Safira

¹ Apnengkek nak na lhema enenlhet apvesai'a Ananias kakpota nhan aptava Safira, apiamasmek nak lhepop apankok ma'a.

² Koka nketlheianmek nak av'alhok nkolielhalhkok nkonmokhak nekha patakkom, kakpota nkollankongvakhak na alaimommalhka nema allapaskamo m'a.

³ Koka lhnak aptemak Pedro apkanemo Ananias ma'a: —¿Se lha ntak apkangko nak akmangka lheiap Satanas, he? ¡Apiennengkaskek Espíritu Santo lheiap, apkel·hatsosakhek na nekha patakkom akiaqmoiekha alhta lhepop apankok apiamasma!

⁴ Lheiap apmahai'a apankek eienio'ok lhepop apankok, lheiap na apmahai'a hengellangkok patakkom kakpota angennaskekhak. ¿Se lha akto hengeliennengkaso nak ke, he? Koka have ennengko'o hengeliennengkeskama, Eniapom Neten koka apiennengkasak lheiap —lhna aptemak apkanemo Pedro.

⁵ Neksa aplengai'a lhnak Ananias ma'a, apiaqnanmo lhnak, apketsepmo nhan ma'a. Avanhek nak apkennelhtengama neten enenlhet'avok apkellengai'o ania'a nak.

⁶ Netamen moklhem'a apketko'ok nak apkelpelhketeiangko ietamopai'a apketsepma aphapak ma'a, ka apketsomo lhnak apkelkatonnemo nhan ma'a.

⁷ Malha tres hora lhnak ngvaiakmok ma'a, akvai'o nhan aptava, mang nak nkoihamok aktemakha apkaniemhaikama atava m'a,

⁸ ka apkenmalhneiangka lhnak Pedro m'a, lhna aptemak: —¿Have nlho niapak aplheno lhkek atava aktengvanlha akianmomakha lhepop anko'ok ketlhengka, he? —lhna aptemak ma'a. —Hai, have niapak —lhna ntema atemmoiangka m'a.

⁹ Koka lhna aptema mokhom Pedro: —¡Mangkolatsema allanekamok ketlhengka, nkeliepkonkek Espíritu apankok Apveske! Apkelelhiakmek apkelkatonnema lhkek atava apketsepma, lheia ta nhan elkatonnek ma'a kolhvave nak —lhna aptemak Pedro.

¹⁰ Mpelapkeskankek nak na akiaqnanmo m'a atsepmo nhan Safira. Ka apkeleltalhnemo lhnak mokhom konne pa'at apketko'ok, apkelletsekho lhnak na apak kakpota elkatonnanvakha akieto nekha apietnakha atava lhkek.

¹¹ Avanhek ankek nak apkellai'a aplhamakho iglesia kakpota nhan aplhamakho enenlhet'avok ma'a aktemakha akvetammalhka.

Aklhamakma qaselha hempelapkeskama apkellanai'a nema alapaskama

¹² Apkellaiangko lhnak apkenmopvanka'a Eniapom Neten nema allapaskamo kakpota ellanangkok nkeskama qaselha mongenatkeskama kanhan qaselha hempelapkeskama apieseksek enenlhet'avok. Lhamakho aknem nak ma'a apkaqnekha meliaskeiam Jesús akieto malamong avhak pa'at akvesai'a Salomón.

¹³ Apkelleliehekhavek na mota enenlhet'avok ma'a, koka mang na nkoliakvaiakmok elteteskamok ma'a.

¹⁴ Aplhameiangkek nak apkelennava'ak kakpota nhan ngkelvana'ak aptaikamok meliaskeiam Apveske m'a,

¹⁵ lhna songkek apkelpetkangvekho lhnak anmaska apiempeiok akieplomo nema altankeskama akieto amai apmak'akha eiekak Pedro, apkeleltemo akmak'akha la ngkotnek nkapvomok peskeska apankok ma'a.

¹⁶ Apkelletsekho lhnak na anmaska apiempeiok kakpota nhan aknaqtevaskama kasekapok av'alho'ok alpaiseiam apkelleniem'o apkellavakha aktakha nengaqtek Jerusalen, apkeltakmelekhek nak na aplhamakho m'a.

Nema akmenlhenaikama nema alapaskamo

¹⁷ Avanhek ankek nak apkeliasepkeskama apiav'akha sacerdote kakpota nhan apketlhelhma'ak saduceos apkelvetai'o nema alapaskamo m'a,

¹⁸ ka apkelpathetmo lhnak ma'a apkellaqlhengkeskamo nhan nengaqlhengkasemmalhkelha m'a.

¹⁹ Ka aptemo lhnak pelhasep ma'a apvai'o lhema ángel apkapaskama Apveske, apmaiesekho lhnak atong nengaqlhengkasemmalhkelha m'a, apkelentepkeskamo nhan ma'a, lhnak aptemak apkellanemo:

²⁰ —Enmeiakha Eniapom Neten apnemakha, eleltennasama ta m'a ania'a aktaqmanma hengaikamok nenganiemhaikama akiennaktema —lhnak aptemak apkellanemo ángel.

²¹ Lhema aknem na ntemak akiekai'a m'a, sosekhe ankek apkenmeiekho lhnak Eniapom Neten apnemakha, apketlhekmoskekho lhnak ma'a ania'a aktaqmanma. Koka apiav'akha sacerdote kakpota nhan apketlhelhma'ak apkellavei'o lhnak aplhamakho metno apketkok ko israel elpasengva lhema apkaqnekha apkelientalhnakha apkelveskaie'. Netamen ma'a apkellapaskamo lhnak apkellasennaikama kakpota eliantementamok mokhom nema alapaskamo akieto m'a nengaqlhengkasemmalhkelha.

²² Ka apkelvekho lhnak ma'a, man nak elvetangvekhak ma'a, kolhvavek ankek nak apkeltaqhemok neptamna'ak, apkeleltennaskekho lhnak apkelemhama apmaniaie, lhna aptaiangkok:

²³ —Nelvetangvakhek lhek ennengko nema apekha niekhe atong nema aliennakteskamo, apkakhaiangke niekhe nhan guardias ma'a, koka nenmaieso lhkek ennengko'o atong, mamma lhkek enenlhet'avok alhta konne m'a —lhna aptaiangkok.

²⁴ Ka apkellengai'o lhnak apkemhama apmanie guardia Eniapom Neten apnemakha kakpota nhan apkelemhama apmaniaie sacerdotes, apkennelhtengangkek nak neten ma'a, apkelpaqmetkesammakpo lhnak mok apankavek ma'a akmak'akha ta ngkotnek apkakhaikamok.

²⁵ Kolhvavek ankek nak na apvai'ak lhema enenlhet ma'a apsenta ania'a, lhnak aptemak: —Ka apkelaklhengkaso lhta ketlhengkap nengaqlhengkasemmalhkelha, askelvet'ak lhek apketlhekmoso Eniapom Neten apnemakha m'a —lhnak aptemak.

²⁶ Kolhvavek ankek nak apmeiekhak apkemhama apmanie guardia kakpota nhan apketlhelhma'ak, apkelpathetvekho mokhom nema alapaskamo m'a metka apnaqtevaskama aniem'o apkellai'ak enenlhet nkonnathaksek kakpota eliaqnangkok na metaimong ma'a.

²⁷ Ka apkeliantemekho lhnak akieto konne apkaqnekhelha mota apkelientalhnakha apkelveskaie, lhna aptemak apkellanemo apiav'akha sacerdote:

²⁸ —¡Nellaske lhta niekhe ketlhengkap sekhe lhta metlhekmosangkek mokhom ania'a etlhenek apvesai'a m'a enenlhet alhta, koka manghengeleliehekhok ma'a! Apkeleltennasema koka mokhom ania'a lhamakho akieto Jerusalen, hengetlhenke lhta nhan ennengko'o nengelelto neliankenkeskama ema apankok ma'a enenlhet alhta —lhna aptemak.

²⁹ Koka apkatemmoiangka lhnak Pedro kakpota nhan aptemo lhemek nema allapaskamo, lhna aptaiangkok: —Ntasek ennengko'o angelleliehekhok apmanie nkek ma'a Eniapom Neten, netamen na enenlhet'avok.

³⁰ Apkennapke lhta ketlhengkap Jesús neten iamet aktenneskama, koka Eniapom Neten apto Apveske apanko'ok nelieihengka'a aplhatekhaskeiakmok mokhom apieseksek apkenmaskengvaiakmo m'a.

³¹ Ka nhan aptemeskeskamo apto neten apankek ma'a, apneskekho nhan akieto akiennakha apoktong, kakpota nhan etneskesek apto Aplaqlekama niapom kakpota nhan Elvongkesek tep enenlhet'avok ko Israel. Kakpota eliaqmongkasekhak na mo'ok apvalho'ok, etneskesama apankek na meleliehekho apkellaskamakha m'a.

³² Ennengko'o nhan nelvetaiangko m'a lhamakho qaselha nak, apvetaiangkek na Espíritu Santo m'a apkellaiangko lhta Eniapom Neten aplhamakho enenlhet apkelleliehekho la'a —lhna aptaiangkok nema alapaskamo m'a.

³³ Nkennatheskangkek nak apkelemhama apmaniaie apkellengai'o m'a, apkenmahai'ak nak ennapok ma'a.

³⁴ Koka apkenmekho lhnak neten lhema fariseo m'a apvesai'a Gamaliel akieto konne apkaqnekhelha mota apkelientalhnakha apkelveskaie. Apto lhnak na hengetlhekmoskama ley Moises ma'a, avanhek ankek nak na apkelleliehekho enenlhet'avok ma'a, apkeltemo lhnak ngkolhek alentepkaso sekhe konne iaqvatakho nema alapaskamo.

³⁵ Lhnak aptemak apkellanemo apkelemhama apmaniaie: —Ketlhengkap apkelennava'ak ko israel, eltaqmelkaso ta atlheianma apvalho'ok apmak'akha ta etnangkok apkellanei'o enenlhet'avok anak ham.

³⁶ Kotlheianvakho no apvalho'ok lhema enenlhet nak lhennenga tep apvesai'a Teudas, apmahai'a etnek apveske neten apankek, apvaiakmek nak 400 enenlhet apkankesaikama kakpota etnangkok apkelieplekama m'a. Koka apmatnamo lhnak Teudas ma'a, apkelhpanmo nhan apkelieplekama, mmaskengvaiakmek na apmopvana Teudas ma'a.

³⁷ Ka netamen nak ma'a nemo lhnak aktemo censo ko Israel, apvai'o lhnak na lhema enenlhet apvesai'a Judas apkeniem'o Galilea. Apmahai'o nhan etnek apkemhama apmanie neten apankek, apentelhek nak na apkelieplekama m'a, ka apmatnamo nhan ma'a, apkelhpanmo nhan apkelieplekama.

³⁸ Ka astak askellano kolhvave nak meliasamo nke lhma enenlhet'avok anak, ka akto la aniem'o apketlhekmosekamok apanko'ok apankave, nkomaskengvomok hata m'a.

³⁹ Koka aniem'o la Eniapom Neten, mankollapvankek enaqtevaksek ma'a hengetlhekmoskama nak ¡Ellaho ta, apkellammelhkek kelha Eniapom Neten ketlhengkap! —lhna aptemak Gamaliel.

⁴⁰ Nkelleklemavek nak apvalho'ok apkelveskai'e aktemakha apkeltennaikama Gamaliel, ka apkellapaskamo lhnak lhema enenlhet eliantementa nema allapaskamo napaqtavek ma'a kakpota eliaqpelhketangkok, meleltemo nhan etlhenek mokhom apvesai'a Jesús, ka apkelpaknemekho nhan ma'a.

⁴¹ Ka apkellenteiapmo lhnak nema alapaskamo napaqtave apkelientalhnakha apkelveskaie, nkelpaihekhek nak apvalho'ok ngkanek apkellengaiangkek nak akmaska aniem'o apketlheianma Apvesai'a m'a.

⁴² Lhamakho aknem nak apketlhekmosekamok aptemakha Jesucristo akieto m'a Eniapom Neten apnemakha kakpota nhan lhamakho apkakhaiangkolha la enenlhet ma'a.