Hechos 28 - Nuevo Testamento Toba Maskoy

Pablo akieto akiakiengveiam lhepop Malta

¹ Neksa nelvaiam alhta tep ma'a neiava alvata, nellengai'ak alhta mok akvesai'a m'a Malta akiakiengveiam lhepop anak.

² Ntase lhta hengellanei'o enenlhet apkellavakha nak ma'a, hengelvatneskasengko lhta nhan talha m'a, ka hengellavenka lhta apkeleltemo angelelhtangvomok talha m'a, semange lhta, iemmen atko'ok alhta nhan.

³ Apkankesama lhta ientapa Pablo m'a, ka apmak'o lhta elvanlhek ientapa m'a, kolhvavek anke lhta ntepak aiseksek talha menasma, ka aktaklho apmek ma'a.

⁴ Apkelvet'a lhta enenlhet apkellavakha apankavek ma'a akmakhengka apmek menasma m'a, ka apkelpaqmetkesakpo lhta mok apankavek: —Have na niapak apto ntekioma niapom hengke'e enenlhet anak, apvaiakmek tep apketsepma niekhe akvaivekamok loma nemmen, koka nkaqhok niaqmasekama akpeivomo ngken —lhta aptangkok ma'a.

⁵ Koka apmakheske lhta apmek Pablo menasma m'a, ka aktengvakmo lhta natelh menasma m'a.

⁶ Ma lhta elienieskasakhak apaqto'ok enenlhet apkellanekama Pablo m'a, apkelel·halhno lhta kolhvavek hata nkoiephek, enietsepok hatelha nhan Pablo m'a, koka mamma lhta aktakha m'a. Kolhvave lhta niaqmokhak aktakha atlheianma apvalho'ok, ka apketlheno Pablo apto malha dios.

⁷ Nietne lhta m'a akiakiengveiam anak lhepop iemmen nekhav'ak, iokhalhma apankok na lhema enenlhet apto neten apiaspommap ma'a apvesai'a Publio. Hengenme lhta takha m'a, ntase lhta nhan hengellanei'o m'a. Nennaqteno nhan apnemakha m'a akvakmo hanetolhem'a aknem.

⁸ Apiapom Publio apietnengke lhta apietnemakha m'a nemmaskema akmelhanma eniempehek alhta ngkaqhemak kakpota nhan nenianma. Ka apteteskakmo Pablo m'a apkenmalhneskaso lhta, netamen apnengkeno nhan apmeio'ok takhaplhet ma'a, ka aptaqmelakho lhta nhan apiapom alhta m'a.

⁹ Nketkama lhta nhan ania'a aplhenammap Pablo m'a, ka apkenmeiakho lhta anmaska apiempeiok apnai'akha m'a, ka apkeltaqmelkeskaiakmo lhta nhan aplhamakho m'a.

¹⁰ Avanhek anke lhta nha ntemak hengellanei'o m'a, hengellangko lhta nhan qaselha alaimommalhkelha la'a ennengko'o m'a amanie nemmahai'a angellempokhak netlhengama loma nemmen akiavai'a m'a.

Pablo apvaiam Roma

¹¹ Apkanet'olhema pelten alhta nengakhaikamok ma'a akieto akiakiengveiam lhepop iemmen nekhav'ak. Nietnengke lhta nhan ma'a lhema loma nemmen akiavai'a m'a aniem'o Alejandria, ieiam apvalhok alhta apsongke akietnemo nhan m'a. Nietnengke lhta alanemmalhka napaqta'a apkeliokha dioses Castor kakpota nhan Polux akieto avahek loma nemmen alhta m'a. Ka nelkananto lhta loma nemmen alhta akiavai'a m'a,

¹² netlhengo m'a nelvakho natemma Siracusa, nengakhengvakmo lhta m'a akvakmo hanetolhem'a aknem.

¹³ Netamen mokhom nellempokho netlhengama m'a, ka nelvakho lhta natemma nelieko'o Regio. Mo'ok aknem alhta ntak ma'a netlhengo akieplomo pieiam, mo'ok aknem alhta ntak mokhom nelvakmo natemma Pozzuoli.

¹⁴ Ka nelvetangvakho lhta engelialheng'a m'a, apkellelto lhta angaqhangkok na sekhek lheme lhema semana m'a. Netamen nellempokho lhta mokhom netlhengama, nelvakho lhta apiav'akha temma Roma.

¹⁵ Apkelleng'a lhta ania'a apkellelto engelialheng'a m'a nelvaiam ma'a, ka hengellanielhakmo lhta akieto nenmak'akha angelvomok iokhalhma Foro Apio kakpota nhan Tres Tabernas. Mpaihakhek lhta apvalhok Pablo apkelvet'o m'a, ka apto gracias Eniapom Neten, apiennakho nhan ma'a.

¹⁶ Koka apkellelto lhta apkelemhama apmaniaie ko Roma, ma lhta ellaqlhengkeskamak nengaqlhengkasemmalhkelha Pablo m'a, apkellangke lhta lhema pa'at Pablo kakpota elhek ma'a, lhema kempokhakme lhta apkelanekama m'a.

Apkeltennaikama Pablo ania'a aktaqmanma akieto Roma

¹⁷ Hanetolhem'a aknem alhta ntak akiekai'a m'a, ka apkelto lhta Pablo ngkolhek allav'o apkelemhama apmaniaie judios apkellelto apkelloma m'a Roma, lhta aptak apkellano: —Mamma ko'o askammelhaikama nennemolhema judios kanhan apkeltemakha nelieihengka, nkaqhok koka moklhem'a apkelemhama apmaniaie judios akieto m'a na temma Jerusalen hellangkongvakmo lhta m'a apkelemhama apmaniaie romanos apkeleltemo heiaqlhengkesek nenmammalhkelha m'a.

¹⁸ Helelmalhnema lhta nhan ma'a apkenmahai'a elpeivesekhak astemakha m'a, apkelvet'a lhta m'a metka astemengveiakmo lhma kakpota hellaqhek ma'a, ka apkellelto lhta niekhe nhan helpaqnemekhak ma'a.

¹⁹ Koka ma lhta elleltok apkelemhama apmaniaie judios ma'a, ka nkeniem'ak ma'a askeltemo ngkolhek heiantemantamo hengke'e napaqtek apveske Roma kakpota heliekpelkoho. Have asmahai'a alhenek ngkolatsekama askennemolhema napaqtek apveske Roma.

²⁰ Ka ngkanek allavama ketlhengkap kakpota aliekpelkok, alpaqmetkesama nhan, asmalhkek ko'o nnek henakteto knonemaie cadenas ngkanek al·halhnekama evalhok atak hata aktaqmanma, nnavek na askeltemo lhemek israelitas —lhta aptak Pablo apkellano.

²¹ Ka apkellatemmongka lhta m'a, lhta aptangkok: —Mangetlhevai'ak ennengko'o lhema vakkahak ania'a aplhenammap lheiap, mamma lhema phapak engelialheng'a judio apvai'a la hengke'e elhenek lheiap ngkolatsekama apvesai'a.

²² Nengeleltavek angeliohok aklheianma apvalhok lheiap aptaiangkolha m'a secta nak ngkanek lhamakho aiempek apketlhenammap ma'a —lhta aptangkok ma'a.

²³ Ka apkelpekkeno lhta lhema aknem eniaqnekhak hata mokhom ma'a. Ma lhta ntek enenlhet'avok apkenmeioiam apnakha nhan Pablo m'a apkenmahai'a ellailhok ma'a. Sosekhe anke lhta apkempak apkeltennaikama Pablo m'a akvakho ienaqteso ania'a aktemakha aptema apveske Eniapom Neten. Ka apkelpeiveskasakho lhta nhan ley Moises kakpota nhan vakkahak apnaktalheskama apkeleltennasemmap ania'a annenga aktemakha aplhenammap Jesús.

²⁴ Moklhem'a lhta enenlhet'avok nkellekvakmok apvalho'ok, napokha lhtoka apkeliaskakmek ma'a.

²⁵ Ma lhta nhan nkolhok mo'ok apvalho'ok ma'a, ka apkellempo lhta nhan apkelieniekha napokha m'a, koka lhta aptak Pablo apkellano: —Have na niapak aptemakha aplheianma Espíritu Santo aniem'o apmaikama apkeltennasemmap ania'a Isaias aptaiangkolha nelieihengka'a, lhnak nanek aptemak apkanemo m'a:

²⁶ «Eniakha ha'e, eleltennes hata enenlhet'avok ha'e: Nkaqhok hata ellengak, mankovhek hata apkeliangveiakmo, ellanhok hata niekhe, malha melan'o ta nhan etnangkok.

²⁷ Nkolleihak apvalho'ok asongke, malha nhan allapekha apaiko'ok kanhan apaqto'ok kakpota elveta, ellailhoho, eliohok nahan kakpota nhan melpengkamok apvalho'ok akieto m'a apnakha Eniapom neten, altakmelkeskamok neksa anmaska apiempeiok», lhnak nanek aptemak Espíritu Santo apkellanemo m'a.

²⁸ Ka nkeniemai'ak nenvongkasemmalhka nak tep apketlhevangveiakmo m'a metnangko nak judios, ellailhok hata nhan ma'a.

³⁰ Ka apnakho Pablo m'a hanet iantelhkapa akieto Roma, lhema pa'at apmaikama sekhe nema akianmoma, apmangke lhta mota takha enenlhet aptaikama la amaika'a apnakha.

³¹ Ma lhta nhan eniai'ak Pablo apkeltennaiangka mota ania'a aktemakha aptema Apveske Eniapom Neten ma'a kakpota nhan apketlhekmoskamo ania'a apveske Jesucristo, mamma lhta nhan alaptenkaseiangka apkeltennaiangka Pablo m'a.