Hechos 27 - Nuevo Testamento Toba Maskoy

Nema akiantemekha Pablo akieto Roma

¹ Netamen ma'a, apkellelto apkelemhama apmaniaie apkenmak'o lhta hengellapaksek ma'a akieto Italia lhema loma nemmen akiavai'a. Apkellangkongvakme lhta nhan ma'a Pablo kakpota nhan apnaqtemommap lhemek lhema capitan apvesai'a lhta Julio, apveske lhta nhan ma'a kempokhakme apankok Cesar.

² Ka nelkananto lhta nhan loma nemmen ampo lhta m'a akieto Adramitio, akmeiekha akieto aknangkongvekhelha loma nemmen akieto Asia. Netlhelhma'ak alhta nhan ma'a apvesai'a Aristarco apkeniem'o lhta Tesalonica akieto konne iokhalhma Macedonia.

³ Mo'ok aknem alhta ntak nelvakmo na temma Sidón, koka apveske Julio ntase lhta apkelanei'o Pablo m'a. Apkellangkave lhta nhan etnama amaika'a ma'a apkeliekpelkemelha nengaqte kakpota ellanhok eltaqmelkesek nahan.

⁴ Netamen alhta nempokho mokhom netlhengama nemmen, nkammelhke lhta loma nemmen nelkanantema alhkaiam akiennaktema, ka nelteteskakho lhta nekha iemmen akieto akiakiengveiam lhepop Chipre kakpota angetlhong ma'a metka akientalhnema.

⁵ Netamen netlhengo mokhom neliekangko lhta iokhalhma Cilicia ka nhan Panfilia, nelvakho natemma Mira akieto konne iokhalhma Licia.

⁶ Koka m'a apvet'o lhta capitan lhema loma nemmen akiavai'a ampo'o iokhalhma Alejandria akmeiekha Italia, ka apkelto lhta angelkanetvomok ma'a kakpota angetlhong mokhom.

⁷ Netlhengo lhta metka akpekhai'a aklhamakho aknem ma'a, alhkaiam alhta asongke'. Neksa akientalhnema lhta netlhengama nelvakmo lhta apkammelhakha temma Cnido. Nellempokhe lhta mokhom netlhengama, nelammelhke lhta mokhom alhkaiam m'a, ka nelteteskakho lhta neiava alvata akieto Creta apkammelhakha temma Salmón aniem'o nenteniaikamok metkelha alhkaiam.

⁸ Neiavanke lhta alvata netlhengak ma'a nientelhek anke lhta netlhengama, ka nelvakmo lhta iokhalhma akvesai'a Buenos Puertos, nengaqte lhta natemma Lasea.

⁹ Aholhe lhta netlhengama, nellak'a lhta angetlhong mokhom nemmen ma'a ngkanek nengaqte lhta ieiam apvalhok ma'a, koka apto lhta Pablo

¹⁰ hengke'e: —Mangolatsama telha netlhengama, nkolentek hatelha loma nemmen anak, nkopallemmak na atsekama nemmen, angelletsepok hatelha nhan ennengko'o —lhta aptak apkellano Pablo m'a.

^11-12 Koka apto apankok loma nemmen kakpota nhan apkennengkasekama aplhengkeskama loma nemmen alhta, avanhe lhta apkeleltemo ellempekhok mokhom apketlhengama m'a, lhta aptangkok: —Mangkolatsema angaqhangkok hengke'e iokhalhma nak ngkanek nengaqtek ieiam apvalhok songke', ntasek angetlhong mokhom ma'a akvakmo m'a aknangkongvekhelha loma nemmen Fenice akieto iokhalhma Creta, nenganmelhmo m'a sudoeste kanhan noroeste, ka ntasek angaqhengvakhak ma'a apvalhok apieiam la'a —lhta aptangkok ma'a. Nlekave lhta apvalhok capitan aptangkolha apketlheianma enenlhet'avok ma'a, ma lhtoka eniailhok aktakha aplheianma Pablo m'a.

Alhkaiam iemmen akiennaktema aiseksek alvata

¹³ Ka apkelhkakmo lhta apketketsek pieiam, atlheno lhta nhan apvalho'ok ntasek etlhong mokhom, ka netlhengo lhta neiava alvata.

¹⁴ Ketse lhta mokhom netlhengak emmaniaie aktepo lhta alhkaiam akiennaktema aiseksek aniem'o tep aknem nelhkeiha. Ma lhta nkasak aktengvo'o alhkaiam iemmen loma nemmen,

¹⁵ ma lhta angellapvanak angellammelhek alhkaiam akiennaktema m'a, lheme nellangkavek hengeliengenko alhkaiam akiennaktema.

¹⁶ Ka nelieko'o lhta tep natemma apketkok lhepop akiaqiengveiam akvesai'a Cauda, akmangvo'o lhta ketsek alhkaiam, ka nellakhetangko lhta nelkanantakho loma nemmen atko'ok nengvaiam tep ankok, nientelhe lhta nenmakmekama m'a.

¹⁷ Netamen ma'a apkellakhetangko lhta apnaktetengko nalhet loma nemmen akiavai'a kakpota mankolentek ma'a. Apkellak'a lhta nhan nkasepvomok lhepop akiennaktema akheskaiam akvesai'a Sirtre konne iemmen ma'a. Ka apkeleivesakho lhta nhan carpa apaihema apiavai'a apielhnema neten takhalhet loma nemmen kakpota nkoihengankok alhkaiam akietelha akmangkolha alhkaiam.

¹⁸ Ka akto lhta mo'ok aknem niavengke lhta alhkaiam iemmen ma'a, ka apkellentepkaso apkelhantamo nemmen alpatama loma nemmen kakpota mankovaivankek.

¹⁹ Netamen hanetolhema aknem alhta ntak akiekai'a m'a, apkelieniantamo lhta nhan qaselha anko'ok anmaikama loma nemmen.

²⁰ Lhamakme lhta aknem nellaniemhaikama alvata nelkanantaikama loma nemmen. Mongelvetai'ak aknem, apiav'a nhan aniem'o alhkaiam iemmen akiennaktema, mmaske lhta alel·halhnekama engvalho'ok angelvomok hatelha tep.

²¹ Aholhe lhta aknem montaveikokhak nentekamok ma'a, ka apkenmakho lhta neten Pablo, lhta aptak apkellano aplhamakho: —Ntase lhta niekhe hellasekhok ketlhengkap askelto lhta angaqhangkok sekhek ma'a Creta, mangkolhek lhek aktakha loma nemmen kakpota nhan ennengko'o m'a.

²² Koka askeltavek eliennekhok mokhom ketlhengkap, asiavek ko'o menietsepek hata lhema aphapak la'a, vanlha toka loma nemmen anak nkolentek.

²³ Pelhasep lhek apiephongvo'o lhema ángel apkapaskama Eniapom Neten apto nhan apveske ehenkok ma'a, askasennaikama mota ko'o,

²⁴ lhke ptak heiano: "Menia nkoie' Pablo, Eniapom Neten hata evongkesek tep lheiap kakpota nhan apketlhelhma'ak aniem'o lheiap, ngkanek nkaimelhkek elhong mokhom lheiap napaqtek apnakha apiav'akha apveske Romano", lhke aptak heiano ángel.

²⁵ Ka ngkanek ko'o altok eliennekhok ketlhengkap ma'a, asiavek ko'o ngkotnek hata aptakha lhkek aplheianma Eniapom Neten.

²⁶ Vanlha koka ntasek angelvetangvomok akiakiengveiam la lhepop iemmen nekhav'ak —lhta aptak Pablo m'a.

²⁷ 14 aknem alhta ngvaiakmok neliaihekama nemmen akiavai'a m'a akvesai'a Adriatico, hengeliaseiangke lhta lhma lhkaiam akiennaktema m'a. Netamen malha neplhet pelhasep alhta ntahak ma'a, apkellelto lhta apketlhengkeskama loma nemmen apkelvet'o lhta neiava lhepop nengaqte'.

²⁸ Ka apkelieniantamo lhta tama nemmen apkelietkesangko akvanlha apmaptonne iemmen, 36 alietkesammalhka lhta m'a akmaptonne iemmen ma'a, ka netlhengo ketsek mokhom akieto neiava. Ka nelietkeso mokhom, nelvet'o 27 alietkesammalhka akmaptonne iemmen ma'a.

²⁹ Ka apkelienievo nemmen 4 tavapok aknaktetemmalhka' akieto ataqla' loma nemmen kakpota nkomangvomok ma'a, ngkanek mangkolatsema nkotiengvomok metaimong akietelha neiava'. Avanhe lhta neleltemo niekhe nkotsak ma'a.

³⁰ Koka apkellelto lhta apkenmakmekama loma nemmen apkenmak'a lhta enieniangkok ma'a, ka apkellentepkaso lhta niekhek loma nemmen atkok nengvaiam tep ankok ma'a, apketlheno elienio'ok niekhe' nemmen tavapok aknaktetemmalhka' akieto avahek loma nemmen, apkenmopvana ania'a lhtoka, apkenmahai'a enieniangkok koka niekhe.

³¹ Apvetangke lhta Pablo m'a apkenmak'akha etnangkok niekhe, lhta aptak Pablo apkellano kempokhakme kakpota nhan capitan apankok ma'a, lhta aptak: —Ka apkeniangko la apkenmakmekama nak loma nemmen, melvomek tep ketlhengkap —lhta aptak apkellano.

³² Koka apkeliaqtemenangko lhta kempokhakme tama' m'a aknaktetemmalhka loma nemmen atkok, ka akteiakmo lhta nemmen ma'a, aksavo lhta mokhek iemmen ma'a.

³³ Nkama lhta atsai'a m'a, lhta aptak Pablo apkellano: —14 aknem antak metaveikokha aniem'o meliohok elvetak hata akmak'akha ngkotnek apkellangiemhaikama.

³⁴ Askeltavek ko'o etavangkok aptekamok kolhvave nak kakpota eliennekha, mangkolhek hata aktangkolha apiempeiok niekhe ketse nak apva' apqatek —lhta aptak Pablo.

³⁵ Ka apmo lhta pan Pablo m'a, apto lhta nhan gracias Eniapom Neten, apkennasko nhan, aptavo nhan.

³⁶ Ka apkeliatakho lhta aplhamakho m'a, aptavengko nhan ma'a.

³⁷ 276 enenlhet'avok alhta m'a konne loma nemmen.

³⁸ Ka apkeliapkanmakho lhta m'a, apkelhantamo lhta nemmen alena paktek kakpota nkolhievekhak akpatama loma nemmen ma'a.

Antema loma nemmen kanhan apalleiam nemmen

³⁹ Ka atsak'o lhta m'a, apkellelto apkenmakmekama apkelvet'o lhta lhepop, moka eliamok akietelha iokhalhma m'a, apkelvetai'o nhan aktaqhema alvata nekha, apkenmak'o lhta elteteskamok ma'a.

⁴⁰ Ka nepieseksa nak ma'a apkeliaqtemenangko lhta tama anmaikamok tavapak moklhem'a m'a, napokha nhan apkel·halhievasakho aklhengamakha loma nemmen ma'a, napokha nhan apkelielhnesakho neten carpa apaihema akieto amanie loma nemmen. Ka aktetesangko aklhengo metka akpekhai'a loma nemmen neiava iemmen.

⁴¹ Mpelapkaske lhta asepvakmo m'a lhepop akiennaktema akheskaiam iemmen ma'a, niaqlhakke lhta akieto amanie loma nemmen ma'a, alento nhan aniem'o iemmen alakhaiam akiennaktema.

⁴² Koka kempokhakme apkenmak'o lhta niekhe ennapok apkellelto apkenmammap ma'a kakpota menieniangkek enmankok nemmen ma'a.

⁴³ Koka capitan ma lhta eltok ngkolhek annapo m'a, ngkanek apkeltave lhta evongkesek tep Pablo. Ka apkelto lhta ennelhtong nemmen apmaniaie apkenmopvanka'a la enmankok iemmen, kakpota enmankok akiemak'akha lhma neiava iemmen.

⁴⁴ Lhtoka mankollapvanko la enmankok iemmen, apkelto lhta enmankok iamet akpaihema m'a. Netamen nenlhamakho lhta nelvakmok neiava iemmen ma'a, ntase lhta nelvaiam ma'a.