Hechos 23 - Nuevo Testamento Toba Maskoy

¹ Apkellanei'avek na lhta Pablo m'a apkelientalhnakha apkelveskaie m'a, lhna lhta aptemak: —Ketlhengkap eliepma'ak, mamma aktakha aklhenaikama evalhok napaqtek Eniapom Neten aniem'o asiamolhma —lhna lhta aptemak Pablo.

² Koka apiav'akha sacerdote apvesai'a Ananias apkeltemo lhna lhta ngkolhek aktekpongo apatong.

³ Koka Pablo lhna lhta aptemak mokhom apkanemo: —¿Se lha ntak apkelto nak hetekpong enenlhet anak, he? Apmak'a niekhe heiekpelkok astemakha lheiap, man koka eieplavkeskamak na ley enganko'ok anak, ¡hengiennengkeskama niapom Lheiap! Eniapom Neten hata nhan etekpong lheiap —lhna lhta aptemak Pablo.

⁴ Koka lhna lhta aptaiangkok na enenlhet'avok ma'a: —Mangkolatsema aptakha nak apaivoma lheiap, aptaqnevakke apiav'akha sacerdote Eniapom Neten apankok —lhna lhta aptaiangkok ma'a.

⁵ Ka apkatemmoiangka lhna lhta Pablo m'a, lhna lhta aptemak: —Ia', moihok ko'o apto apiav'akha sacerdote enenlhet anak, ka ntemak na vakkahak Eniapom Neten apaivoma hengke'e: "Metaqnevankek apveske apankok apnemolhema apanke" —lhna ntemak ma'a.

⁶ Nlheianvekhek na lhta apvalhok Pablo apieseksek apkelemhama apmaniaie' apkakhaiangko m'a moklhem'a saduceos kakpota nhan fariseos. Ka apiennakteskamo lhna lhta apaivoma Pablo m'a akieto apkaknaiankolha apkelientalhnakha apkelveskaie, lhna lhta aptemak: —Elialheng'a, ko'o asto nhan Fariseo akvakho askellokha nemmalhka, apkenmak'a mota hetlhenek aselhnanemmalhka ngkanek al·halhnekama evalhok atak hata nennaklhatekhangveianlha apieseksek apkenmaskengvaiakmo —lhna lhta aptemak.

⁷ Neksa apkellengai'a lhna lhta Fariseos kakpota nhan Saduceos ma'a, apkeliamenammakpek na lhta mok apankavek ma'a, apkelhpankesammakpek na lhta nhan ma'a.

⁸ Koka saduceos apketlheianme mota metka apnaklhatekhangveiam apieseksek apkenmaskengvaiakmo nak, mamma nhan ángeles kakpota nhan mamma eniempehek. Koka fariseos apketlheianmek na akietnema m'a nennaklhatekhangveianlha apieseksek apkenmaskengvaiakmo, apkakhangkek na ángeles, kakpota nhan nietnek eniempehek.

⁹ Aplhamakho enenlhet na lhta apiapqalhekama m'a, ka apkeleltennaiangka lhna lhta moklhem'a hengetlhekmoskama henganemakha apkellelto nhan Fariseos ma'a, lhna lhta aptaiangkok: —Ka enenlhet anak ham mamma apkelanai'a ngkolatsekama, apkeliehekhavek kelhaha akpaivoma eniempehek, nlho ka la lhema ángel —lhna lhta aptaiangkok ma'a.

¹⁰ Koka niaveiangkek na lhta apiennengkeskama lhma enenlhet'avok ma'a, ka apkeltemo lhna lhta apveske soldados ngkolhek aktepkeso Pablo m'a, ngkolhek na akiantemakho apkakhaiangkolha soldados ngkanek nlheianmek na lhta apvalhok ematong kelha Pablo.

¹¹ Po'ok pelhasep na lhta aptemak ma'a, apteiapvei'o lhna lhta Apveske napaqtek Pablo ma'a, lhna lhta aptemak apkanemo: —Eiennekho Pablo, ntasek helheianmo lheiap asvesai'a hengke'e aktemakha lhta nhan hetai'a Jerusalen anak, hata nhan emhangkok ma'a akieto Roma, elheianvomok na asvesai'a m'a —lhna lhta aptemak.

Akpenesammalhka ania'a kakpota ematong Pablo

^12-13 Mo'ok aknem na lhta ntemak ma'a, moklhem'a judios, tep 40 lhna lhta m'a, apkelpeneskamo lhna lhta ania'a kakpota ennapok Pablo. Apkelpeneskamo lhna lhta nhan apkelpaqmeiasma metka aptaveikokha, metka apienaikamok akvaiakmo lhna lhta apkennapo Pablo. Lhna lhta metnangko la aptaiangkolha lhnak ma'a, ntasek na lhta nkovak akientalhnema takhaplhet'ok ma'a.

¹⁴ Ka apkenmeiekho lhna lhta napaqtavek apkelemhama apmaniaie sacerdotes kakpota nhan metno apketko'ok judios, lhna lhta aptaiangkok ma'a: —Nelpeneskek lhek ennengko'o nelpaqmeiasma metka nentekamok nentoma kakpota nhan metka neniama akvakmo ta nengaqho Pablo. Nkolhemmak hata nhan qaselha ngkolatsema tekhenlhet'avok ennengko'o mantangko la m'a.

¹⁵ Ntase ketlhengkap kakpota nhan apketlhelhma'a apkelientalhnakha apkelveskaie ellavama apto apveske soldados romanos kakpota eliantementak Pablo hengke'e sosekha napaqtavek ketlhengkap. Kakpota etnangkok malha apkenmak'o elpeivesekhak qaselhaha ketlhengkap, ennengko'o toka angellailhek nalhet amai kakpota angellaqhek —lhna lhta aptaiangkok ma'a.

¹⁶ Koka apialheng atka apkenno Pablo aplengai'ak na lhta ania'a, apmeiekho lhna lhta apketkekho akieto apkakhaiangkelha soldados kakpota eltennaskakhak ma'a ania'a Pablo.

¹⁷ Netamen Pablo m'a apkaveiangka lhna lhta apto aptetekamok apveske soldados, lhna lhta aptemak: —Eiantemekha ta apketkok anak napaqte apveske apanke, ietnek lhema ania'a aplheianma ma'a —lhna lhta aptemak.

¹⁸ Ka apiantemekho lhna lhta apketkok anak ma'a napaqtek apveske apanke, lhna lhta aptemak: —Apveske, ka enenlhet anak apkaklhengkasemmap Pablo apkeltavek lhek aiantementak hengke'e apketkok anak kakpota eltennaksek lheiap lhema ania'a —lhna lhta aptemak ma'a.

¹⁹ Ka apmamo lhna lhta apmek apveske apanke apketkok ma'a, apiantamo lhna lhta tep apketse, lhna lhta aptemak apkanemo: —¿Se lha ania'a ie, he? —lhna lhta aptemak.

²⁰ Ka apkatemmoiangka lhna lhta apketkok ma'a, lhna lhta aptemak: —Ietnek ko'o lhema ania'a askeltennaskama lheiap, apkellanakhek ania'a judios sosekha ankok kakpota eiantemekhak Pablo lheiap ma'a napaqtavek apkelientalhnakha apkelveskaie kakpota elpeivesekhok akietemo nkek aptemakha m'a.

²¹ Koka apkenmopvanka ania'a m'a, apkenmak'ak lhek ennapok Pablo m'a. Tep 40 enenlhet lhek apkenmak'ak ellailhek nalhet amai ma'a, apketlhenkek lhek have niapak ankek metavankek aptekamok kakpota nhan meinangkek akvakmo apkellaqho Pablo. Lhna lhta mellan'o la m'a, nkovak na lhta akientalhnema takhaplhet'ok ma'a. Apkellailhek eniapaksek Pablo lheiap ma'a —lhna lhta aptemak apketkok.

²² Netamen nak ma'a, lhna lhta aptemak apveske apankek apkanemo apketkok ma'a: —Etaqhekha apnemakha, menietkasamankek ania'a apieseksek enenlhet —lhna lhta aptemak.

Nema akiantemekha Pablo napaqtek gobernador Felix

^23-24 Ka apkellaveiangka lhna lhta apveske apanke apqanet apveske apkeltetekamok ma'a, lhna lhta aptemak: —Elpeneso ta 200 soldados apketlhengama nalhepop, kakpota nhan 70 soldados akieplomo etanlheng apkelkanantema, kakpota nhan 200 soldados heva apmeio'ok. Elpeneskaso ta nhan lhema etanlheng apkanantema Pablo kakpota eliantemekhak ma'a Cesarea napaqtek gobernador Felix. Ellanama ta kakpota menaqtevaksek apkellammelhmakha la m'a, la 9 pelhasep hata etlhong nahan —lhna lhta aptemak ma'a.

²⁵ Aptalheskeskangkek na lhta nhan lhema vakkahak, lhna lhta ntemak akpaivoma:

²⁶ Ko'o Claudio Lisias nlhenkek evalhok lheiap gobernador Felix.

²⁷ Smak'ak altennasama lhema ania'a, apkelemhama apmaniaie judios apkelpathetke lhta ham enenlhet anak apkenmahai'ak ennapok. Aslengangvakhe lhta ania'a apto romano enenlhet anak ham, ka asmeiakho lhta m'a akieplomo soldados ehenko'ok kakpota avongkeskakhak tep ma'a.

²⁸ Netamen alhta nhan asiantemakho akieto konne apkaqnekhelha mota apkelientalhnakha apkelveskaie apanko'ok ma'a kakpota aihok qaselha ngkolatsekama apkelanai'a ham.

²⁹ Koka aklheianvakho lhta evalhok ko'o ham enenlhet anak mamma apkelanai'a ngkolatsekama kakpota angaqlhengkesek nenmammalhkelha, angaqhek nahan. Vanlha koka nkeniem'ak apieseksek judios apkellammelhammap apankave' aniem'o ley apanko'ok apankave'.

³⁰ Asleng'ak lhek na ania'a apkenmahai'a ennapok Pablo m'a moklhem'a judios, ka ngkanek askapaso nak apnakha lheiap kakpota elanhok qaselha akvetammalhka. Askeleltennaskek lhek na judios apkellelto apketlheianma ngkolatsekama apkelanai'a Pablo, enmeiantak nahan napaqtek lheiap kakpota elpaqmetkesek ham. ¡Hai, ntasek hata ngkotnek apnema lheiap ham!

³¹ Ka apkeliantemekho lhna lhta soldados pelhasep Pablo m'a akieto Antipatris aktemakha apkellapaskama apveske apanke'.

³² Mo'ok aknem na lhta ntemak ma'a, apkeltaqhengveiakmo lhna lhta soldados nalhepop apketlhengama akieto apkakhaiangkolha, koka soldados etanlheng apkelkanantema apkelempaikokho lhna lhta mokhom apketlhengama apketlhelhma'ak Pablo.

³³ Ka apkelvaiakmo lhna lhta ma'a na temma Cesarea, apkellangkongvaiakmo nhan Pablo Felix ma'a, apkellaiangko nhan vakkahak aktalhesammalhka.

³⁴ Neksa apeneskama lhna lhta apkelietsatema vakkahak gobernador Felix, lhna lhta aptemak apkenmalhneiangka Pablo: —Ko la akieto apkavakha lheiap —lhna lhta aptemak. —Cilicia ko skeniem'ak —lhna lhta aptemak Pablo.

³⁵ Koka lhna lhta aptemak mokhom Felix: —Hata apkelvaktamo ta apketlheianma ngkolatsekama apkelanai'a lheiap hengke'e, angvavama ta nhan lheiap kakpota angelpaqmetkasalhkak mokhom —lhna lhta aptemak. Ka netamen na lhta m'a apkapaskamo lhna lhta Pablo akieto apnemakha apveske Herodes kakpota elel·halhneskasama soldados ma'a.