Hechos 20 - Nuevo Testamento Toba Maskoy

Pablo aplhengama akieto Macedonia kanhan Grecia

¹ Netamen nak ma'a akmaskemo akiennoma lhma' m'a, ka apkellaveiangka lhnak Pablo aplhamakho nema altamesaikamok kakpota eleltennasangkok apkeleltakha ta etnangkok. Netamen nak ma'a apkelpaivesaiangko nhan, aplhengamo lhnak apmeiekho iokhalhma Macedonia.

² Aptaiangka lhnak amaika'a m'a lhamakho apkellavakha akietelha la apmeiekhelha, apkeliatekho lhnak apkelialheng'a m'a, netamen nak ma'a apvakho lhnak Grecia.

³ Ka apnekho lhnak m'a akvakmo apkanetolhem'a pelten, nkaikama lhnak aplhengama mokhom Pablo enianetvomok loma nemmen ma'a kakpota elhong akieto iokhalhma Siria. Ka aplengai'o lhnak ania'a apkellanekha aptangkolha judios apkenmahai'a ennaktevaksek ma'a, aklheianmo lhnak apvalhok etaqhok neptamen nalhepop apmenek eiekangvakhak Macedonia.

⁴ Apketlhelhma'ak nak Sopatro apketka Pirro apkeniem'o natemma Berea, Aristarco kakpota nhan Segundo apkelleniem'o Tesalonica. Gayo apkeniem'o Derbe, Timoteo, Tiquico ka nhan apialheng apvesai'a Trofimo apkelleniem'o koka m'a Asia.

⁵ Apmaniaie lhnak aptaiangkok apkelvekha m'a akieto natemma Troade, hengellelhvekho lhna lhta nhan ennengko'o m'a.

⁶ Ngvakme lhta nnelha aktaqmelaikama lhma m'a pan metka apiepheskama, ka neltokho netlhelhma'ak Pablo m'a nenmeiakho loma nemmen nellempo'o Filipos akvakho natemma Troade. 5 aknem alhta netlhengama m'a, ka neltaniengvakho lhta netlhelhma'ak alhta m'a, nengakhangko nhan ma'a akvakmo 7 knem.

^7-8 Ampakhasekha nke knem semana alhta ntak nengaqnakho m'a akieto mo'ok av'alhok neten pa'at kakpota angellanangkok nentoma aktaqmanma m'a. Nlhanie lhta nhan talha alhankok nema alapommatkeskama m'a, aholhe lhta apketlhekmoskama Pablo m'a meliaskeiam ma'a akvakmo neplhet pelhasep alhta m'a, lhta ngkanek apmak'o elhong mokhom sosekhek ankek ma'a.

⁹ Apkailhengke lhta m'a lhema apketkok apvesai'a Eutico, neten alhta pnak atong atkok, tenn alhta nkaqhak ma'a aniem'o akvenaktema apkeltennaikama songke Pablo. Ka apteiakmo lhta m'a apkempo'o lhta akieto apteiam 3 av'alho'ok neten, ka apkelentepo lhta koneng enenlhet'avok apkenmahai'a elankesekhak neten, koka apkelvetangvakhe lhta apketsepma m'a.

¹⁰ Ka aptepo lhta nhan neten Pablo m'a apatheto lhta apietnakha apketkok alhta m'a, apmo lhta nhan apietnakha, lhta aptak apkellano meliaskeiam ma'a: —Moltama apvalho'ok, menietsepak —lhta aptak.

¹¹ Ka apkanantakho lhta mokhom Pablo neten pa'at, aptavengko nentoma aktaqmanma m'a. Apkempakho lhta mokhom apketlhekmoskama akvakmo atsak'o m'a, netamen aptaqhakho nhan ma'a.

¹² Apkeltaqhakhek lhta nhan enenlhet'avok, apkeletsevasave lhta m'a ngkanek ma lhta enietsepak apketkok alhta m'a.

Pablo aplhengama aptema amaika'a natemma Mileto

¹³ Nalhepop alhta aplhengak Pablo m'a akvakho natemma Aso, ennengko'o lhtoka nelkanantak loma nemmen, nelelhvakho m'a.

¹⁴ Ka apvakho lhta Pablo m'a, nelkananto lhta loma nemmen netlhengo na temma Mitilene.

¹⁵ Lhema aknem lhta ntak netlhengama m'a nelieko'o na temma Quio, mokhom alhta lhema aknem netlhengama nelieko'o lhta natemma Samos, akieto nekha iemmen akiavai'a aknaktetemmalhkelha loma nemmen. Ka nempokho lhta mokhom netlhengama lhema aknem, nelvakho natemma Mileto.

¹⁶ Pekhai'a lhta nentangkok netlhengama m'a ngkanek Pablo ma lhta emak'ak elhek akvangkakho iokhalhma Asia. Ma lhta nhan nkomak'ak etnek amaika'a na temma Efeso ngkanek apekhak'ave lhta niekhe eniakha Jerusalen kakpota epasengvakhak aktaqmelaikama lhma akvesai'a Pentecostes ma'a.

Pablo apkeltennaikama napaqtavek metno apketko'ok akieto Mileto

¹⁷ Nengakhangke lhta m'a na temma Mileto, ka apkelto lhta Pablo ngkolhek aleltennaskakho metnangko apketko'ok iglesia akieto Efeso elelhiemok apnakha m'a.

¹⁸ Ka apkelvakho lhta m'a, lhta aptak apkellano Pablo: —Apkeliavek ketlhengkap asvo'o lhta ko hengke'e iokhalhma Asia, nheklhe mota astaqmelkasemmalhko.

¹⁹ Askasennaikama mota Apveske metka askammalhko nhan, asvenema akpalleiam aimenek ehaqtek nahan neksa aslengaiangkok akientalhnema aniem'o judios.

²⁰ Koka nheklhek alhengkeskama asketlhekmosekamok ketlhengkap napaqtavek enenlhet'avok kakpota nhan apkakhaiangkolha apankavek, kakpota nkoltaqmelek apkellaniemhaikama ketlhengkap ma'a.

²¹ Askeliatengke lhta judios kakpota nhan metnangko nak judios askeltemo eliaqmongkasekhak mo'ok apvalho'ok napaqtek Eniapom Neten kakpota nhan meliaskame Apveske engankok Jesús.

²² Koka kolhvave nak hemama Espíritu aniakhak hata m'a Jerusalen, koka moihok mokhom akmak'akha ngkotnek emanie.

²³ Koka neksa alhengama alhta mota lhamakho apkellavakha lhmankek ham, heltennaskangke lhta mota Espíritu Santo nkolhe ta hetvaso m'a, kakpota nhan ngkolhek hetalhneso nenmammalhkelha.

²⁴ Koka mamma aptaikama evalhok angvetsepok kelhaha, askeltavek ko'o asavhok asmakmekama malha askelpaivasemmalhka aptakha lhta apaivoma Apveske Jesús heiano akieplomo akpaihekha evalhok, apkeltemo lhta apaiaksek ania'a aktaqmanma aplhenammap hengellamelaiam Eniapom Neten.

²⁵ Askeleltennaseiangko lhta mota apieseksek ketlhengkap ania'a aktemakha aptema Apveske Eniapom Neten, koka nkomaskok hata helvetai'ak mokhom ketlhengkap, haveniapak ankek astakha nak alheianma.

^26-27 Koka mankonmak'o la eleliehekhok Eniapom Neten ketlhengkap, apanko'ok apankave, ngkanek asketlhekmoske lhta ko'o lhamakho aktemakha apkelleltemakha etnangkok Eniapom Neten.

²⁸ Pastores aptaiangkok ketlhengkap aniem'o Espíritu Santo apkeltemeskeskama apkelemhama apmaniaie, ¡elel·halhnama ta mota ketlhengkap! Eltaqmelkes hata nhan apkellelto iglesia apankok Apveske, apkellelto lhta nhan apkenmama aniem'o ema apankok.

²⁹ Asiave ko'o asketsepo ta elvak hata enenlhet hengke'e apkenmahai'a enaqtevaksek Jesucristo apkennemolhema, malha aktemo nak vavo akloma.

³⁰ Moklhem'a ta nhan etiepok apieseksek ketlhengkap etlhekmoksek hata aktemakha akmovana ania'a kakpota eleliehekhok na nema altamesaikamok anak ma'a.

³¹ ¡Elel·halhnama toka! Nkotlheianvakho ta mota apvalho'ok astemakha lhta mota asketlhekmosekamok lhamakho aknem akvakmo hanetolhema iantelhkapa neksa akientalhnema lhta niekhe m'a.

³² Kolhva koka askenmalhnema Eniapom Neten eltaqmelkesek ketlhengkap elialheng'a aniem'o ania'a aktaqmanma hengamelaiam altakmelkeskeskama ta apkellaniemhaikama. Nietnek na apmopvana m'a kakpota elvanengkeskesek na apvalho'ok meliaskeiam, hata nhan ellangkok ketlhengkap ma'a aplheianmo lhta apaivoma ellangkok apkelpasmekha nhan apkelpokkanma.

³³ Apkeliavek ketlhengkap metka askelelmalhnekama lhta askeleltalhnema la'a kakpota nhan patakkom.

³⁴ Asmakmekama koka ehenkok ehenkek kakpota atak ko'o aimommalhkelha nak kaselha' ko'o kakpota nhan asketlhelhma'ak.

³⁵ Vanlha mota asketlhekmoskama askeleltemo eleliephekho enmakmama kakpota elpasmok enenlhet metka nak apkelletsekama, aptemakha lhta mota aplheianma Apveske Jesús, lhna aptemak: "Aktaqmelakho nkek apkaikamo nak po'ok qaselhaha, melhnok ma'a apto aplhevai'a qaselhaha".

³⁶ Ka akvakmo lhta nnelha apkeltennaikama Pablo m'a, apkelteklheio lhta aptapno'ok nalhepop, apkenmalhno kanhan aplhamakho enenlhet'avok ma'a.

³⁷ Ka apkeliapqalho lhta nhan enenlhet'avok ma'a, apkelpatheto lhta Pablo m'a, apkelpetseso nhan apmalhempenek ma'a.

³⁸ Aiosak'a lhta ntak na apvalho'ok enenlhet'avok ma'a ngkanek Pablo aplheianmo metka apkelvetekha mokhom. Netamen apkellelto lhta apketlhelhma'ak Pablo akvakho akietnakha loma nemmen nekha alvata' akiavai'a m'a, ka aptaqhakho lhta Pablo m'a.