Hechos 19 - Nuevo Testamento Toba Maskoy

Pablo apmeiekha natemma Efeso

¹ Neksa apnema lhnak Apolo m'a akieto Corinto, Pablo lhnoka apiekai'ak iokhalhma metaimong avhak, apvekho natemma Efeso. Koka m'a apvetangveiakmo lhnak apentalhnema nema altamesaikamok ma'a,

² lhnak aptemak Pablo: —¿Ma nlho etlhevaiangko Espíritu Santo ketlhengkap neksa aptaikamo lhta meliaskeiam, he? —lhna aptemak. Ka apkellatemmoiangka lhnak enenlhet'avok ma'a, lhna aptaiangkok: —Mma', mongellengai'ak ennengko'o aplhenammap Espíritu Santo —lhna aptaiangkok.

³ Lhnak aptemak mokhom Pablo apkellanemo: —¿Ko lhta aktemakha nemo allavkeskamo konne iemmen, nlho ka la mo'ok aktemakha, he? —lhna aptemak Pablo. Ka apkellatemmoiangka lhnak ma'a, lhna aptaiangkok: —Ka aptemakha lhta mota Juan hengellavkeskama konne iemmen —lhna aptaiangkok.

⁴ Koka lhna aptemak mokhom Pablo: —Apkellavkeskangke lhta konne iemmen enenlhet'avok Juan apkeleltemo lhta nhan eliaqmongkasekhak mo'ok apvalho'ok ma'a, apkeltemave lhta nhan meliaskame enenlhet apmahai'o evak ma'a, Jesús alhta m'a —lhna aptemak Pablo apkellanemo enenlhet'avok.

⁵ Apkenmaiangkek nak takha ania'a apkellengai'o m'a, nemo lhnak na allavkeskamo konne iemmen ma'a akieplomo koka apvesai'a Apveske Jesús.

⁶ Ka apnengkanmo lhnak na apmeio'ok apietsekso'ok Pablo m'a, apvai'o lhnak na takhaplhet'ok Espíritu Santo. Ka apkelpaqmeteiangka lhnak nkotnakho apkelpaqmeiasma ania'a kanhan apketlheianmo ania'a aniem'o Eniapom neten,

⁷ 12 apkelennava'ak nak ma'a.

⁸ Hanetolhema pelten nak ngvaiakmok apmeiekha mota apkaqnekhelha judios Pablo m'a, metka apkai'a lhnak na apkellatemommap ma'a aktemakha aptema apveske Eniapom Neten. Apkeliaikama lhnak aptemakha kakpota nkollekvomok apvalho'ok enenlhet'avok, meliaskamek nahan.

⁹ Koka moklhem'a judios nkolleihak ankek nak apvalho'ok, man na nkomahai'ak etnangkok meliaskeiam ma'a. Ka apkelempai'o lhnak apkeliematkesaikama Alhnankok Amai napaqtavek aplhamakho enenlhet'avok ma'a. Netamen Pablo apteiapmo lhnak m'a nemaknekhelha, ka aplaqlekho lhnak na nema altamesaikamok akieto escuela apankok lhema enenlhet apvesai'a Tirano, ka apketlhekmoskamo mota nhan Pablo m'a

¹⁰ akvaiakmo hanet iantelhkapa. Lhamakho enenlhet'avok apkelloma m'a iokhalhma Asia, apkelelto judios kakpota nhan griegos, apkellengai'ak nak ania'a aplhenammap Apveske.

¹¹ Apkaiangkek nak na Eniapom Neten apmopvana Pablo kakpota elanak qaselha hempelapkeskama napaqtavek enenlhet'avok ma'a.

¹² Apkelletsomo nhan ietamopai'a napokha'ak kakpota nhan apkelentalhnema kakpota emangvomok Pablo m'a kakpota elletso'ok apnangkolha la anmaska apiempeiok kakpota enmangvomok ma'a, eltaqmalvomok nahan, nkolentepok na kasekapok av'alho'ok ngkollatsekama apvalho'ok ma'a.

^13-14 Apkellomaka lhnak na 7 enenlhet judios ma'a, sacerdote lhnoka apkeliapom ma'a, Esceva lhnak apvesai'a m'a. Apkenmahai'o lhnak na elienieskasekhak kasekapok av'alhok ngkollatsekama aplhamakho enenlhet'avok ma'a, apkenmahai'o lhnak enmama apmopvana Apveske Jesús ma'a, lhna aptaiangko mota apkellanemo kasekapok av'alho'ok: —Nietnek ennengko'o apmopvana aniem'o Jesús apkeleltennaskamo lhta nha mota Pablo, kolentep ham enenlhet'avok anak —lhna aptaiangkok.

¹⁵ Koka lhema aknem nnak nkatemmoikama kasekapo av'alhok ngkolatsekama, lhna ntemak ma'a: —Asiavek ko'o Jesús kakpota nhan Pablo, ketlhengkap koka moliekpelkak —lhna ntemak ma'a.

¹⁶ Kolhvavek ankek nak apkeltekpoikama enenlhet akmaikama kasekapo av'alhok ngkolatsekama 7 apkelialheng'a m'a. Apnaqtevaskamo nhan, apiempek ankek na nnak ma'a apkeniem'o nhan, apkeniaiangkek nak apkelialheng'a apkelalhnai'o apkeliokhoho kakpota nhan apkeliensema.

¹⁷ Aplhaniek nak judios kakpota nhan griegos ko Efeso apkelvetai'o m'a, apkellai'ak nak na m'a. Niaveiangkek nak aktema neten ankek apvesai'a Apveske Jesús ma'a.

¹⁸ Man nantek na enenlhet'avok aptaikamok meliaskeiam ma'a apketlheianmo nhan apankavek apkellanekamok alhta qaselha ngkolatsekama napaqtavek enenlhet'avok ma'a.

¹⁹ Apkelvatesaiangko nhan aptaikamok apkeliolhma meliamolhma, apkelletsekho nhan vakkahak apanko'ok apkelelvanlhekho napaqtavek enenlhet'avok ma'a. Ngkeskama nkek patakkom aliaqiema vakkahak anak ma'a, malha 50.000 anmopai'a aliaqiema alianmoma lhnak ma'a.

²⁰ Koka m'a akpaihekho lhnak ania'a aktaqmanma aplhenammap Apveske alhma nkek ham, akvetammalhko lhnak aknema akmovana.

²¹ Netamen ma'a, apmahai'o etnek amaika'a Pablo iokhalhma Macedonia kakpota nhan Acaya, netamen mokhom ma'a Jerusalen, ka tep ma'a apmahai'o emhangkok iokhalhma Roma.

²² Koka meniaktemmakpo lhnak ma'a akieto Asia, apkellapaskamo apketlhelhma'ak ma'a Timoteo kakpota nhan Erasto akieto Macedonia.

Akvai'a apkeliamenammap akieto natemma Efeso

²³ Ngvai'ak nak apkeliamenammap akieto m'a na temma Efeso apketlheianma aktemakha Alhnankok Amai.

²⁴ Lhna nkeniemai'ak ma'a apientalhneskama apkelloma lhema enenlhet apvesai'a Demetrio, aniem'o apkellanai'a qaselha akiokha tava apak alienmomo akmopai'a akvesai'a plata, akietkesammalhka lhema diosa ngkelvana akiokha akvesai'a Artemisa. Avanhek ankek nak apkennaksepma mota patakkom kakpota nhan apketlhelhma'ak ma'a.

²⁵ Apkelanai'ak nak apkaqnekha Demetrio, apketlhelhma'ak kakpota nhan po'ok enenlhet aptemo lhemek apkenmakmekama, lhna aptemak apkellanemo: —Apkeliavek ketlhengkap hengaikamok nentoma nenmakmekama nak.

²⁶ Nelleng'ak ennengko'o, nelvet'ak na enenlhet anak apvesai'a Pablo aplheianvei'o kanke'e natemma nak Efeso, kakpota nhan lhamakho iokhalhma Asia, dioses anak nellanekamok anak ennengko'o mankotno haveniapak anke, aqhemo lhnak ma'a. Mante pankek na enenlhet meliaskeiam apketlhekmoskama m'a Pablo.

²⁷ Hennaqtevaskaskek na Pablo nenmakmekama, aptevaskek na pa'at akiavai'a aknemakha diosa Artemisa apkellai'elha mota akieto iokhalhma Asia kakpota nhan lhmankek ham. Nkomaskok hatelha aktema neten ankek akvesai'a m'a, eltaknongvakhak hatelha nhan lhamakho enenlhet'avok akvesai'a m'a aniem'o m'a apketlhekmoskama Pablo —lhna aptema Demetrio.

²⁸ Nkennatheskangkek nak apkellengai'o enenlhet'avok ma'a, ka apkelveneiangka lhnak ma'a, lhna aptaiangkok: —Ntasek ankek Artemisa, ko Efesios diosa apanko'ok —lhna aptaiangkok apiapqalheiangka m'a.

²⁹ Apiennengkeskangkek na lhma enenlhet'avok annatheskama m'a, ka apteniaiangko lhnak apiempeiok apkelketameiangko apkelpathetmo Gayo kakpota nhan Aristarco apkelleniem'o m'a Macedonia, Pablo lhnak apketlhelhma'ak ma'a, apkelienioseikokho av'alhok aknaivommalhkelha.

³⁰ Ka apmahai'o lhnak niekhe Pablo eklhek ma'a kakpota elelpaqmetkeskamok enenlhet'avok ma'a, koka apkellelto nema altamesaikamok meleltemok emhangkok ma'a.

³¹ Moklhem'a lhnak apkelemhama apmaniaie akieto m'a iokhalhma Asia apkellelto apkeltema po'ok Pablo, apkellapaskangkek nak ania'a meleltemo nhan emhangkok ma'a.

³² Mangiamo lhna ntemak ania'a akiennoma lhma aknaivommalhkelha m'a, moklhem'a enenlhet man nak eliamok ma'a aktemakha apkelvetai'a.

³³ Ka apkelpeiveskasekho lhnak judios lhema enenlhet apvesai'a Alejandro aktemakha ania'a m'a, apkeliengeiangkek nak kakpota elhenek napaqtavek enenlhet'avok ma'a. Ka apkeliasekho lhnak neten apmeiok Alejandro apkeltemo elvanmak sekhe' kakpota eliatak ma'a.

³⁴ Koka apkeliekpelkengkek nak enenlhet'avok Alejandro m'a apto judio apanke', akiaveiangko nhan alpaihekama apatno'ok ma'a, malha lhnak 2 hora mokhom ma'a, lhna aptaiangkok: —Ntasek anke niekhe Artemisa, ko Efesios diosa apanko'ok —lhna aptaiangkok apkelveneiangka m'a.

^35-36 Netamen apto aptalhesaikamok ma'a apkelvanmesekho lhnak enenlhet'avok ma'a, lhna aptemak: —¡Enenlhet ko Efeso, eleltaqmelkasakpo, kolietnama apaqto'ok! Mankaimelhkak etnangkok aptangkolha nak, apkeliavek aplhamakho enenlhet'avok lhmankek ham nengelelto nellanekama neltaqmelkeskama pa'at akiavai'a ankok anak diosa Artemisa, kakpota nhan akiokha na'at akvaiventamo lhnak neten.

³⁷ Ka enenlhet anak apkeliantemantamo nak ketlhengkap hengke'e, mamma apkeltemengvekho lhma apkellammelhma akvesai'a diosa Artemisa, kakpota nhan pa'at aknemakha nke nak.

³⁸ Vanlha Demetrio kakpota nhan apkenmakmekamo lheme nak apkellelto apkeltaknongkoma m'a, koka ntase enmeiakhak napaqtavek hengiekpelkemo niapom kakpota ellanekha apankavek ma'a.

³⁹ Koka mangkolatsema etnangkok apkaknekha hengke'e, mamma hengeliekpelkemo niapma'ak hengke'e.

⁴⁰ Mangkolatsema apkeliennengkaso lhke lhma ketlhengkap hengke'e, mamma qaselha akiav'o ngkolatsekama apkellanekamok Gayo kakpota nhan Aristarco, ngkolhek hatelha nhan hengetlheianvakho napaqtavek apkelveskai'e ennengko'o nengelelto nelentepkeskama akiennoma lhma nak, aqhemo koka m'a —lhna aptemak.

⁴¹ Ka apeneskamo lhnak apaivoma, apkeleltemo nhan elentepok aplhamakho enenlhet'avok, eltaqhekhak ma'a.