Hechos 18 - Nuevo Testamento Toba Maskoy

Pablo aptema amaika'a na temma Corinto

¹ Netamen nak ma'a, apteiapmek nak Pablo natemma Atenas apmeiekho lhnak natemma Corinto.

² Apvetangvekho lhnak lhema judio apvesai'a Aquila, apteiaianlha apankek nak ma'a iokhalhma Ponto. Man na nkovenaktemak apvaiam ma'a, aplhelhma lhnak na aptava akvesai'a Priscila, lhna nkeniemai'ak nkolentepok Italia m'a. Apiav'akha apveske lhna apsongkek apvesai'a Claudio apkeleltemo elentepok ma'a lhamakho judios akieto Roma. Ka apmeiekho lhnak Pablo aptema amaika'a m'a akhangkolha,

³ apvetangveiakmo lhnak apmakmeiangkolha m'a apkellanai'akha carpa ntanema. Nietemavek nak na Pablo aptemakha apmakmekama m'a, ka apnaiakmo lhnak Pablo m'a apmakmeiangka lhnak na lhemek ma'a.

⁴ Lhamakho aknem sabado nennekhelha lhnak apmeiekha mota Pablo apkaqnekhelha judios, apkellatemommakpo lhnak judios kakpota nhan griegos apkeltemo lhnak nkollekvomok apvalho'ok ma'a.

⁵ Ka apkelvekho lhnak ma'a Silas kakpota nhan Timoteo, iokhalhma Macedonia lhnak apkeleniektak ma'a. Ka apkempai'akha lhnak Pablo akiokho nkek aplheianma mota ania'a aktaqmanma, apmahai'a elvetaskesek judios aptemakha Jesús apto Cristo.

⁶ Apkellammelhmek noka judios ma'a kakpota nhan apkeltaknongvekha Pablo m'a, ka apalhnelhkaiangka lhnak aptalhnema Pablo apkeltemakha lhna mota judios ma'a, lhna aptemak apkellanemo: —Ema apanko'ok apankavek hata nkopallentak takhalhet apqatko'ok anak ketlhengkap, have ko'o aniemai'a nema aliaqmongkaskesekha nak apkeltemakha, kolhva amhangkok hata m'a atlhekmoskamok apieseksek anak metnangko nak judios —lhna aptemak Pablo.

⁷ Ka apteiapmo lhnak Pablo apkaqnekhelha judios ma'a, apmeiekho lhnak apnemakha lhema enenlhet apvesai'a Ticio Justo, apkai'o lhna mota Eniapom Neten enenlhet nak ma'a, nekha nkek nak na apnemakha nema aknekhelha m'a.

⁸ Apkemhama apmanie nemaknekhelha apvesai'a Crispo kakpota nhan apketkak mang nak na eliaskeiakmok Apveske, kakpota nhan mantek enenlhet'avok ko Corinto, ka aknemo lhnak na allavkesaiangko konne iemmen ma'a.

⁹ Lhema pelhasep na ntemak Pablo apvetai'o apaqtek Apveske, lhna aptemak: —Meniaga nkek Pablo, elhen hata apankek ania'a aktaqmanma hengke'e apieseksek enenlhet anak.

¹⁰ Ka nke'e na temma nak mantek enenlhet ehenkok, ko'o ta atnek alhelhma kakpota menaqtevaksek enenlhet'avok —lhna aptemak Apveske.

¹¹ Lhema iantelhkapa nalhet lhna ntemak apnema Pablo m'a akieto Corinto, apketlhekmoskamo nhan Eniapom Neten apaivoma m'a.

¹² Netamen ma'a aptaiekho lhnak gobernador natemma Acaya lhema enenlhet apvesai'a Galion, apkaqnekho lhnak moklhem'a judios apkellammelhma Pablo, ka apkeliantemekho lhnak akieto aliekpelkammalhkelha nentaiangkolha m'a,

¹³ lhna aptaiangkok apkellanemo gobernador ma'a: —Ka enenlhet anak hengke'e apkeltemo nkollekvomok apvalho'ok enenlhet'avok kakpota ellahok Eniapom Neten mok aktemakha aklheianma ley engankok anak —lhna aptaiangkok ma'a.

^14-15 Nietemavek nak apmahai'o eliata Pablo kakpota eniatemmoma aplhenammap, koka gobernador Galion lhna aptema apmanie: —Have akiav'o qaselha ngkolatsekama apkelanai'a enenlhet anak, mankaimelhkak atnek asiekpelkemo. Vanlha apketlhekmosengko mota mok apkelvesai'a kakpota nhan ley apanko'ok apankave nak ketlhengkap judios, ellanekha ta apankavek ketlhengkap, momak'ak ko atnek ma'a —lhna aptemak.

¹⁶ Ka apkeltemo lhnak gobernador elentepok enenlhet'avok ma'a konne neniekpelkammalhkelha,

¹⁷ koka apkelpathetmo lhnak apto apkemhama apmanie nemaknekhelha m'a apvesai'a Sostenes, apkeltekpoiangka nhan ma'a akieto konne aliekpelkammalhkelha nentaiangkolha, man noka eniammelhmok gobernador Galion ma'a.

Pablo aptaqhemo iokhalhma Antioquia

¹⁸ Nlhaniek nak aknem apnema Pablo m'a akieto Corinto, netamen apkelpaivesaiangko lhnak apkelialheng'a m'a apmahai'a eniakhak iokhalhma Siria. Apketlhelhma'ak noka Aquila kakpota nhan aptava Priscila, apkelvekho natemma Cencreas apiesekho lhnak Pablo m'a alhnai'a nkek nak aptemak apqatek ngkanek apeneskamo apaivoma etnehek napaqtek Eniapom Neten. Netamen apkelkanantemo lhnak loma nemmen apkenmeiekho iokhalhma Siria.

¹⁹ Ka apkelvekho lhnak natemma Efeso m'a, apkelieniekho Pablo apketlhelhma'ak Aquila kakpota nhan Priscila, apmeiekho nhan apkaqnekhelha judios, apkellatemommakpo nhan ma'a.

²⁰ Apkeleltemo lhnak enenlhet'avok elhnekhak sekhek Pablo m'a, man noka eniasekhai'ak ma'a.

²¹ Lhna aptemak Pablo: —Staqhakhek ko'o, avatak hata mokhom apkelto la Eniapom Neten —lhna aptemak. Ka apkanetvekho mokhom loma nemmen, apteiapmo m'a Efeso,

²² apvekho Cesarea. Netamen apmeiekho akieto Jerusalen apmahai'a elpaivesangkok iakvatakho apkellelto iglesia m'a, ka apkempekho mokhom aplhengama akvakho Antioquia.

²³ Iakvatakho lhnak apnema Pablo m'a, ka apkempekho mokhom aplhengama apmeiekho iokhalhma Galacia kakpota nhan Frigia. Ka apkeliatekho lhnak apkellelto nema altamesaikamok kakpota etlhengkesek metka apkelvatesaikamok ma'a.

Apkeltennaikama ania'a aktaqmanma Apolo natemma Efeso

²⁴ Apvekho lhnak na temma Efeso lhema judio apvesai'a Apolo, iokhalhma Alejandria lhnak apkeniemai'ak ma'a. Apvanke pankek nak elpengkamok enenlhet'avok ngkanek avanhek nak apiangveiakmo Vakkahak Eniapom Neten Apaivoma.

²⁵ Apsavhongvaiakmek nak na ania'a aplhenammap Apveske kakpota nhan aklekkasekama apvalhok neksa apkeltennaikama, ka nhan alhnakho nkek apketlhekmoskama aptemakha Apveske. Vanlha lhnoka nhan apiavek aktemakha apkellavkeskama konne iemmen Juan enenlhet'avok.

²⁶ Lhema aknem na ntemak apketlhekmoskamo akleklemo nkek apvalhok akieto apkaqnekhelha judios ma'a, ka allengai'o lhnak Aquila kakpota nhan Priscila, aliantemo mok ankavek ma'a, apkelpeiveskasekho m'a akietemo nke amai apankok Eniapom Neten.

²⁷ Netamen ma'a Apolo apmahai'o lhnak eniakhak iokhalhma Acaya, nkelleklemavek nak apvalho'ok apkelialheng'a m'a akieto Efeso. Ka apkellaiangko lhnak lhema vakkahak apnaqtalheskama kakpota elletsakhesek ma'a nema altamesaikamok akieto Acaya, apkeleltemo eltaqmelkaso apkenmama takha Apolo m'a. Apvaiakmo lhnak Apolo m'a, avanhek nak apkelpasmoma apkellelto meliaskeiam aniem'o aktaqmanma apkellanei'o Eniapom Neten.

²⁸ Nkelammelhmek na mota apaivoma akmovana nkek Apolo judios ma'a, ka apkelietsatmo nhan Vakkahak Eniapom Neten Apaivoma, apkelpeiveskasekho nhan akietemo nkek Jesús apto Cristo aplhenammap eva'.