Hechos 1 - Nuevo Testamento Toba Maskoy

Aktemakha apvai'a Espíritu Santo

¹ Lheiap Teofilo, aspeneske lhta ko'o astalheskama lhema vakkahak amanie nkek ma'a aktemakha lhamakho qaselha apkelanai'a lhnak Jesús kakpota nhan apketlhekmoskamo lhnak ma'a apkempai'osekha lhnoka m'a,

² akvakmo m'a aknem aknemo akiantemekho lhnak neten. Koka amanie lhnak ma'a apkellaiangko lhema apaivoma apkellanemakha etnangkok aniem'o Espíritu Santo apkellelto lhnak ma'a apkelikieskama apkelapaskamo apankok.

³ Apketsepmek nak Jesús ma'a koka netamen aplhatekhangveiakmo lhnak mokhom ma'a, 40 knem nak ngvaiakmok apkaniemhaikama mokhom apieseksek apkelapaskamo apanko'ok ma'a. Apkeleltennaseiangka lhna mota aktemakha aptema apveske Eniapom Neten, apkellanei'o nhan nkeskama qaselha kakpota elvetaskesangkok akto have niapak anke aplhatekhangveiakmo mokhom apieseksek apkenmaskengvaiakmo.

⁴ Ka apkeleltennaskamo lhnak lhema apaivoma, lhna aptemak: —Melakta pankek Jerusalen akvakmo ta aknem akvai'a lhema qaselha aplheianmo lhta Eniapom have niapak ankek eniapaksek hata, askeleltennaskangke lhta nhan ko'o lha sekhe lhta m'a.

⁵ Have niapak anke lhta m'a apkellavkesangko lhta konne iemmen enenlhet'avok Juan ma'a, koka ketsek na nkaimelhka knem ngkoitek na ketlhengkap malha aknema allavkeskama la akieplomo Espíritu Santo —lhna aptemak apkellanemo Jesús ma'a.

Nema akiantemekha neten Jesús

⁶ Ka apkelelmalhneiangka lhnak apkellelto apkakhaikamok ma'a, lhna aptaiangkok: —Apveske, ¿kolhva nlho pmak'ak etneskasekhak mokhom apkelveskai'e neten apankavek ko Israel lhmankek ham, he? —lhna aptaiangkok.

⁷ Lhna aptema Jesús apkellatemmoiangka m'a: —Eniapom koka apekkenkek ma'a aknem aniem'o apientalhnemo, mankaimelhkak eliohok ketlhengkap ma'a.

⁸ Koka etlhevangkok hata aknema akmovana aliennakteskama ketlhengkap apvo'o ta Espíritu Santo takhaplhet'ok ma'a. Enmankok hata lhma nkek ham Jerusalen, Judea, Samaria, akvakmo aktakha mokhek ankek avhok lhepop mo'ok apkellavakha. Eleltennasama ta aplhamakho enenlhet'avok aktemakha apkelvetaiangko lhamakho qaselha askelanai'a lhta —lhna aptemak Jesús ma'a.

^9-10 Apkelvetai'o lhnak akpelapkeskama nkek nema akiantemekha neten Jesús ma'a akvakho lhna ntemak allapakho iephopai'a m'a. Nkelpelapkeskangkek nak na apkelenteiapvei'o apqanet enenlhet napaqtavek ma'a, apkenmopai'a lhnak apkelentalhnema m'a, lhna aptaiangkok:

¹¹ —Enenlhet'avok ko Galilea, moliemes apvalho'ok aktakha nak nema akiantemekha neten Jesús, hata ngkotnek na apkelhiakmo ta mokhom —lhna aptaiangkok ma'a.

Apkeliekiesammap apiaqmongkeskama Judas

¹² Ka apkelentepekho lhnak metaimong akhaiam Olivos, apkenmeientamo lhnak Jerusalen, nengaqtek nak amai apketlhengama m'a, nietemavek nak na henganemakha aklheianma aktaqmanma anlhong ma'a neksa aknem sabado nennekhelha la'a.

¹³ Pedro lhnak m'a kakpota nhan Juan, Jacobo, Andres, Felipe, Tomas, Bartolome, Mateo, Jacobo Alfeo apketka, Simon apto celote kakpota nhan Judas Jacobo apketka. Ka apkelvekho lhnak apkakhaiangkolha m'a, apkelkanetvekho lhnak akieto neten pa'at ma'a.

¹⁴ Aptaiangkolha lhna mota apkaqnekho apkelelmalhnongkoma m'a kanhan moklhem'a ngkelvana'ak, kanhan ma'a Jesús angken akvesai'a María kakpota nhan apkelialheng'a m'a.

¹⁵ Lhema knem na ntemak ma'a, apkelpaqmetkeskamo Pedro m'a apkellelto apkelialheng'a m'a, apkaknekhek nak malha 120 enenlhet'avok ma'a, lhna aptemak apkellanemo:

¹⁶ —Elialheng'a, nietavek ankek akvai'a aktemakha aktalhesammalhka vakkahak Eniapom Neten apaivoma, aplheianmo lhnak nanek apiav'akha apveske David aniem'o Espíritu Santo aktemakha Judas apkelanai'a, apto lhta aplaqloiam enenlhet kakpota elpathetek Jesús ma'a.

¹⁷ Koka apto lhta niekhe netlhelhma'ak Judas ma'a, nenmakmekamo lheme lhta nhan.

¹⁸ Koka aptaqnongvakhe lhta Jesús ma'a, ka apmo lhepop patakkom aplhevai'a lhta akianmoma lhta Jesús apiamasma m'a. Ka apteiaiakmo lhnak na Judas ma'a akmeientamo lhnak na koneng apqatek, apketsepmo nhan. Mpaklhemavek nak na apvakmo m'a alenteiapmo nhan apie' m'a.

¹⁹ Lhamakho enenlhet nak na apkellengai'a ania'a m'a Jerusalen, apkeltemeskeskamo nhan akvesai'a lhepop anak ma'a Aceldama, nema altema koka iokhalhma akietnemakha ema.

²⁰ Lhnak na nek na ntemak aktalhesammalhka vakkahak Salmos alientemommalhko aklheianma m'a: «Etnekhak hata metka temma av'alhok pa'at apankok, mamma ta enenlhet elhek ma'a» «Po'ok enenlhet hato ka eiaqmongkesek apmakmeiangkolha m'a» lhna ntemak vakkahak aktalhesammalhka.

²¹ Apkakhangkek enenlhet hengke'e netlhelhma'ak alhta mota neksa apnema lhta apveske Jesús hengke'e.

²² Ampai'o lhta nhan hengelieplekama m'a aplavkeskamakha lhta konne iemmen Juan Jesús ma'a, akvakmo nhan akno akiantemakho neten. Ntasek angeliekiaksek lhema enenlhet la'a kakpota hengelpasmekhak ennengko'o netlheianma aktemakha nelvetaiangko lhta aplhatekhangveiam Jesús apieseksek apkenmaskengvaiakmo —lhna aptemak Pedro.

²³ Koka apqanet nak enenlhet apkeliekiesammap ma'a, lhema apvesai'a José Barsabas mo'ok nemaltema koka apeivomo, po'ok noka apvesai'a Matias.

²⁴ Ka apkelelmalhneskeskamo lhnak na m'a, lhna aptaiangkok: —Apveske, apiekpelkemo lheiap lhamakho aktemakha atlheianma engvalho'ok ennengko'o, nengeltavek hengelvetaskesek lhema phapak hengke'e enenlhet anak apqanet. Sek la enenlhet apkeliekieskama lheiap ke

²⁵ kakpota etneskesek apkapasammap apiaqmongkeskama Judas alhta apieniekha, apmaiangko m'a akietemelha emhangkok aniem'o meihamolhma' m'a —lhna aptaiangkok apkelelmalhnongkoma m'a.

²⁶ Netamen ma'a apkellanei'o lhnak nennaqtevaskama nemmapseive m'a, apiephongvaiakmek nak Matias, ka apalhakvaiakmo lhnak ma'a 11 nema allapaskamo.