Hebreos 8 - Nuevo Testamento Toba Maskoy

Apsoiakmo Jesús alhnankok apaivoma apmahai'akha etnek Eniapom Neten ellanhok enenlhet

¹ Nlhaniek ankek qaselha asketlhekmoskama, koka akto neten akiaspommalhka m'a aptemakha apiav'akha nak sacerdote engankok apto nhan neten apankek apiaspommap ma'a. Ka nkeniemai'ak apnekho m'a neten akieto Eniapom Neten akiennakha apoktong apnakha aptanema apveske.

² Aptemengvekho nhan sacerdote m'a apmakmongvekho nhan akieto konne malha niekhe akpaklhenammalhka nak kaselha aiempek, akpokkenammalhka nhan ma'a apkelanai'a Apveske, mok aktema koka akpaklhenammalhka kaselha aiempek anak nalhepop apkelanai'a nak enenlhet.

³ Lhamakho apkellelto apkeliav'akha sacerdotes apkeliekiesammap kakpota ellangkok qaselha nengaikamok anak, kanhan nengaqhema nak nentoskama Eniapom Neten. Ka nkeniemai'ak na aptemo Jesucristo m'a aimommalhko lhta nhan eniangkok lhema qaselha Eniapom Neten.

⁴ Lhta apno la kolhvave nak Jesús hengke'e nalhepop anak, metnek na sacerdote ngkanek apkakhangkek sacerdotes hengke'e apkellaikamo mota Eniapom Neten qaselha nengaikamok anak aniem'o nhan aklheianma ley Moises.

⁵ Koka sacerdotes nalhepop anak apkenmakmema mota apkenmaiangka qaselha iama apkelietkesaikamok alnemo m'a qaselha aknaiangko nak ma'a neten. Nnavek na m'a Moises annenga neksa apmahai'a epaklhenek kaselha aiempek, lhnak nanek aptemak apkanemo Eniapom Neten: «Etaqmelkaso ta apkelanai'a, eietkesamok hata aktakha lhta asvetaskeskama m'a neten nalhma akhaiam», lhna aptema.

⁶ Koka neten ankek aktaqmanma m'a aktemakha apmakmekama sacerdote Jesús aplhevai'a, melhnok ma'a sacerdote nenvanlha nak. Apsoiakmo songke alhnankok annemo mo'ok apvalho'ok apkenmahai'akha etnangkok ntasek ankek ma'a mangkolhnok lhennenga. Apsoiakmo nhan alhnankok apeneskamo aplheianma Eniapom Neten, neten ankek aktaqmanma mangkolhnok na m'a lhennenga.

⁷ Lhta akto la metka aktemengveiakmo lhma m'a amanie lhnak nanek annemo mo'ok apvalho'ok apkenmahai'akha etnangkok, mankaimalhkek na alhnankok ma'a.

⁸ Koka apvetai'ak nak nanek Apveske apkeltemakha enenlhet'avok mankolpeivomo, lhnak nanek aptemak ma'a: «Nkovomok hato ka aknem askelanai'a mokhom alhnankok annemo mo'ok engvalho'ok nemmahai'akha antangkok enenlhet'avok ko Israel kakpota nhan Juda.

⁹ Mo'ok aktemakha m'a annemo mo'ok engvalho'ok lhnak nanek nemmahai'akha antangkok apkelieihengka ketlhengkap neksa aslaqlosengvekha lhta m'a iokhalhma Egipto. Koka melieplavkeskamak ma'a ka ngkeniemai'ak askelieniekho lhta m'a.

¹⁰ Koka alanak hata mokhom alhnankok annemo mo'ok engvalho'ok nenmak'akha ta antangkok enenlhet'avok ko Israel, apekkenek hata ley ehenkok apqatko'ok, kanhan malha asnaktalheskeskama la ley apvalho'ok. Alleltok hata heleltangkok Eniapom Neten apanko'ok, aleltangkok hata nhan askennemolhema m'a.

¹¹ Meniaimakpek hata enenlhet la apketlhekmoskama apaivoma lhema apanke nlho ka la nhan apnemolhema apanke aktemakha asvesai'a nak ko'o, ngkanek eliangvomhok hata asvesai'a aplhamakho pankek, akvakho apketkeietse panke kanhan akvakho metno apketkok.

¹² Alietnahok hata napaqta'ak neksa meleliehekho askellaskamakha, mankolheianvakhek hata nhan evalhok aptaiangkolha ngkollatsekama», lhna aptemak.

¹³ Hai, aplheianme lhta Eniapom Neten elanak hata alhnankok annemo mo'ok apvalho'ok apkenmahai'akha etnangkok, akvaneiam koka ntemak ma'a lhennenga annemo mo'ok apvalho'ok lhnak nanek, koka akvaneiam anak ketsek nkaimelhkak aksepanengvaianlha m'a.