Hebreos 5 - Nuevo Testamento Toba Maskoy

¹ Lhema apiav'akha la sacerdote ngkolhek aliekieso m'a apieseksek la apkennemolhema kakpota evakha mota apsekha ania'a apkeltemakha apkennemolhema napaqtek Eniapom Neten, kakpota nhan eniangkok nengaikamok anak, nengaqhema nak nentoskama akiaqmoiekha koka m'a ngkollatsekama apkellanekamok la'a.

² Ka apiav'akha nak sacerdote meienna'ak ma'a ngkanek enenlhet apankek ma'a, apvankek koka nhan elietnahok napaqta'a enenlhet'avok la meliangveiakmo kanhan malha apketlheneiam anak.

³ Ka apiav'akha nak sacerdote apkanke mota Eniapom Neten nentoskama nak nengaqhema aniem'o ngkollatsekama apkellanekamok apkennemolhema. Kakpota nhan ma'a apkankek apkelvanlhema qaselha Eniapom Neten aniem'o nhan ngkolatsekama aptemakha apanke ngkanek meiennak ma'a.

⁴ Mankapvankek enenlhet eliekiesakpo panke kakpota emakmongvomok ma'a aktakmelakha la nenmakmekama aniem'o apmahai'a etnek apiav'akha sacerdote, Eniapom Neten koka apkeliekieskama apankek ma'a, ka aptemakha lhnak nanek apkelanei'o Aarón apkeliekieskamo m'a.

⁵ Cristo nhan meliekiesammakpok apankok apankek la'a kakpota etnek apiav'akha sacerdote, Eniapom Neten koka apkaikamok ma'a aktakmelakha apmakmekama, lhna aptemak apkanemo: «Lheiap apto eietka, astepkeskama ehenkek aknem anak», lhna aptemak.

⁶ Lhnak nanek na aptemak mokhom: «Lheiap apto sacerdote mangkotnengvaiam annelha, aptemo lhnak nanek ma'a Melquisedec», lhna aptemak.

⁷ Neksa apkaniemhaikama lhta Cristo hengke'e nalhepop anak apkenmalhnongkomo lhta akieplomo akiennaktema apkeleklhangvekama apkeltemo eiekakse' niekhe apketsepma. Ka aplengai'o lhta nhan Eniapom Neten ma'a aniem'o apkeliehekho mota m'a.

⁸ Niekhe aptema Apketka apankek ma'a nkaqhok koka aplengaiangkek akientalhnema, ka nkeniemai'ak aptemo apkeliehekho mota Eniapom Neten.

⁹ Ka nhan aptemo apenesammap apmopvanko nhan aptemo apkelvonkeskama tep mankotnengvaianlha nnelha aplhamakho apkellelto la apkelleliehekho m'a.

¹⁰ Netamen Eniapom Neten aptemeskeskama apiav'akha sacerdote apnemo m'a Melquisedec.

Apkellasemmap eliamasangvomok meliaskeiam

¹¹ Nkaimelhkek kelha mokhom anlhenek ania'a nak, nientelhek koka angelpeiveskasekha m'a, ketlhengkap apsongka ie mamma akpekhai'a eliangvomho'.

^12-13 Lhennenga niekhe apkellengai'a ania'a aktaqmanma aplhenammap Eniapom Neten ketlhengkap, apvanka'a nlho lhta niekhe etnangkok hengetlhekmoskama, koka metnaiangkok ma'a. Nkaimommalhkek kelha mokhom ngkolhek atlhekmoso alhievai'a la hengetlhekmoskama aniem'o nkoliennaktema apvalho'ok. Malha aktonak nematka la'a aktoma nak neme nkok ngken la'a, mankapvankek etvok aptoma la aliennaktema, vanlha koka neme. Apkennavek ketlhengkap hengke'e nematka nak, meliehek na eliekpelkok aktakha la akpeivomo.

¹⁴ Koka apkellelto la aliennaktema apvalho'ok, apvanka'ak elioho qaselha aktaqmanma nlho ka la ngkollatsekama aniem'o aleltamekamok apkelvetai'a mota. Malha metno apketkok aptangko songkek ma'a, apvanka'ak etavangkok aptekamok aliennaktema.