Hebreos 2 - Nuevo Testamento Toba Maskoy

Mankolatsekama angvannama ania'a aktemakha henvonkeskama tep

^1-3 Nietnengkek nak nek akientalhnema henganemakha Eniapom Neten apkellaiangko lhnak nanek ángeles kakpota ellangkongvomok ma'a enenlhet'avok. Allelietaskesekho lhnak nanek na aliaqmongkaskesekha apkeltemakha apkellelto la meleliehekho kanhan apkellanekamok la qaselha ngkollatsekama. Ka nkeniemai'ak nkaimelhkek angeltakmelkaso nellailhemo ania'a nak nengelvongkasemmalhka nak tep ngkanek Apveske apankek aplheianma m'a, antakmelkesek nahan kakpota mangel·haivek malha amai la aktaqmanma ngkanek na ennengko'o angetlhevangkok hatelha nhan nema akiaqmongkasekha' mangeliahakho la'a. Hai', apmanie panke lhta aplheianma Apveske ania'a nengelvongkasemmalhka tep, apkellelto lhta nhan apmaniaie apkellengai'a m'a ania'a nak, hengelleltennasakho nhan ennengko'o nenvanlha nak aktema iokhalhmek ankek ma'a ania'a nak.

⁴ Apkelan'a lhta nhan Eniapom Neten qaselha mongenatkeskama, qaselha hempelapkeskama kanhan qaselha aktaqmelo mongvetai'o kakpota nhan apkellaiangko lhta Espíritu Santo apmak'akha la ellangkok kakpota ngkotnek iokhalhmek ma'a ania'a apketlheianma.

Jesús apto aptepkeskama nengelvongkasemmalhka tep

⁵ Meltemok Eniapom Neten etnangkok hata apkelientalhnemo ángeles ma'a alhnankok nengavakha ta,

⁶ koka m'a etnekhak hata po'ok apveske m'a. Nietnengkek na nema aklheianma Vakkahak Eniapom Neten apaivoma, ka nnema aktemo m'a: «¿Neten apanke nlho apientalhnemo aptema enenlhet ha'e kakpota nkolhene mota apvalhok epasmok lheiap ha'e, he?

⁷ Apkelan'a lhta nhan lheiap enenlhet ketsek koneng apientalhnemo metlhok ángeles, koka apkaiangke lhta nhan apientalhenmo m'a, aknemo ai'o nhan.

⁸ Apkaiangke lhta nhan aknema apmopvana kakpota enmama lhamakho qaselha lhmankek ham» nnema aktemo m'a. Hai, apkankek Eniapom Neten apmopvana enenlhet apanke nak kakpota enmama lhamakho qaselha lhmankek ham, apto nhan apveske aiseksek ma'a, neliavek koka mankovakmok mokhom apsavhemelha apkenmaikama m'a.

⁹ Nne lhta nhan aktepkeso Jesús hengke'e ketse lhtoka nhan koneng apientalhnemo melhnemok ángeles, iakvatakho lhtoka m'a. Kolhva koka neliavek ma'a nlanei'avek apientalhnemo kanhan nemo ai'o aniem'o lhta apketsepma. Hai, apkeliekieskek Eniapom Neten kakpota enietsepok ennengko'o hengeliaqmoiekha aniem'o aktaqmanma nkek hengellanei'o.

¹⁰ Koka lhamakho qaselha nelvetai'o nak allomaha, nietnek aliennaktema aniem'o Eniapom Neten apkelentepkeskama, apanko'ok apankavek nahan. Apkeltemavek na Eniapom Neten aplhamakho apketkak elpasmakpo lhamakho qaselha apanko'ok anak altaqmelo. Ka nkeniemai'ak apkeltemo ennangkok akientalhnema Jesucristo aptemo nhan apenesammap, apmopvanko nhan aptemo apkelvonkeskama tep aplhamakho enenlhet'avok ma'a.

¹¹ Aplhamakho apkellelto nak apkelpokkenammap, kanhan apto lhta nhan apkelanai'a apkelpokkanma, vanlha nhan lhema apkeliapom apkelpasmekha, ka ngkanek Eniapom Neten Apketka memangkek eleltangkok apkelialheng'a.

¹² Ka aktemo nak na aktalhesammalhka Vakkahak Eniapom Neten apaivoma hengke'e: «Alhenek hata apvesai'a lheiap napaqtavek ma'a elialheng'a, annekmaksek hata nhan nennekmaskama apieseksek apkaqnekhelha la m'a kakpota eltakneskasangkok apvesai'a lheiap ma'a».

¹³ Ka ntemak na mokhom aktalhesammalhka Eniapom Neten apaivoma hengke'e: «Mangiaskamek hata ha'e». Kanha ntemak mo'ok aktalhesammalhka: «Asnek ko'o hengke'e asketlhelhma'ak eietkak Eniapom Neten hellaikamok», ntemak ma'a.

¹⁴ Ka Eniapom Neten apketkak anak enenlhet apankavek ma'a, nietnek aphapetek kanhan ema apanko'ok ka nkeniemai'ak na aptaiekho lhta enenlhet apankek Jesús ma'a, ka apketsepmo nhan ma'a, aptemeskesekho lhta nhan koneng aveske netsepma akvesai'a nak aveske keliaqhameio'.

¹⁵ Apkelvongkeskamo lhta nhan taiep apkellelto lhta malha allasennaikama nema apkelianmoma ankok ma'a netsepma nak, ngkanek nnaianke lhta mota m'a apkellai'a.

¹⁶ Koka have apvai'a hengke'e apmahai'a elpasmok ángeles, vanlha koka apvai'o kakpota elpasmok aptavana'ak neptamen Abraham annenga.

¹⁷ Nkaimommalhke lhtoka etnekhak sekhek enenlhet apankek elhnesakpok na apkelialheng'a, nkaimommalhke lhta nhan enietsepok apkeliaqmoiekha la m'a kakpota etnek apiav'akha sacerdote. Apkelietnai'o lhta nhan napaqta'a enenlhet'avok, apkeliehekho nhan Eniapom Neten neksa apkasennaikama m'a. Apiephongveiakmo nhan kakpota nkolhek na altemeskesangkankek apkellanekamok ngkollatsekama enenlhet'avok lhmankek ham.

¹⁸ Hai', aplengaiangke lhta nhan akientalhnema hengke'e, apvetai'a lhta nhan akiepkonma. Ka nkeniemai'ak apmopvanko nak elpasmok apkellelto nak apkelvetai'a aliepkonma la'a.