Hebreos 1 - Nuevo Testamento Toba Maskoy

Eniapom Neten apkapaskama apketka apsoiam apaivoma

¹ Lhennenga lhnak nanek Eniapom Neten apkeltakhengveskekho mota apkeleltennaskamo nelieihengka'a lhamakho aktemakha aniem'o nhan apkenmaikama apkeleltennaskamo ania'a apankok kakpota etlhenek ma'a.

² Koka apkaktengaikamok nenvanlha nak, ketse nkaimelhkak aktemongvaianlha ta nnelha aknem lhmankek ham, aplheianmo nhan ma'a aniem'o Apketka apanke', apto lhnak nanek na apmaikama apkelanei'o lhamakho qaselha lhmankek ham, apkellaikokho aptemeskeskamo nhan apanko'ok lhamakho qaselha lhmankek ham.

³ Ka Apketka nak nenganema angvetak ma'a apmopvana kakpota nhan apientalhnemo Eniapom Neten, apnemo pankek nan ma'a, apkeliennakteskai'o nhan lhamakho qaselha aniem'o aknema akmovana apkeliatekama. Hengellalhnaskeskamo lhta nhan engvalho'ok malha akpaiseiam aniem'o nellanekamok ngkollatsekama, netamen ma'a apmeiekho nhan neten, apnekho akiennakha apoktong Eniapom Neten ma'a.

⁴ Apto nhan neten apankek apientalhenmo metlhohok ángeles ngkanek nietnek na apvesai'a neten ankek akiaspommalhka metlhok ma'a ángeles.

Eniapom Neten apketka apto neten apankek metlhok ángeles

⁵ Mang nak nanek na etnemak enianak Eniapom Neten lhema aphapak la ángel hengke'e: «Lheiap apto eietka, astepkeskama lheiap aknem anak», mang nak nanek etnemak ma'a. Mang nak nanek na etnemak mokhom hengke'e: «Atnek hata apiapom ha'e, atnek hata eietka ha'e», man nak etnemak ma'a.

⁶ Neksa apkapaskama lhta apketka apvetai'a apmanie nalhepop anak, lhna aptemak: «Ellasennama ta aplhamakho ángeles apanko'ok anak Eniapom Neten».

⁷ Lhnak nanek na nema aktemo apketlhenammakpo aptaiangkolha ángeles hengke'e: «Eltemeskese ta ángeles apanko'ok ma'a malha alhkaiam, eltemeskesek hata nhan apkellasennaikama apanko'ok malha talha aleivoma», lhna nnema aktemo m'a.

⁸ Koka aptemak aplheianmo aptemakha apketka hengke'e: «Lheiap Eniapom Neten, etnek hata apveske metka akvaiam annelha aliekaikamok iantelhkapa, elanak hata mota akto akpeivomo.

⁹ Lheiap akleklemo apvalhok qaselha altaqmelo, aptaqnongkoma koka qaselha ngkollatsekama nak. Ka nkeniemai'ak apkeliekieskamo Eniapom Neten apto apveske apankok lheiap apieseksek apkeltemo lhemek la'a, apiangkanmo nhan apietseksek aceite akto aikamok akpaihekha apvalhok, koneng ankavek ma'a apkeltemo lheme nak».

¹⁰ Lhnak nanek na aptemak ma'a: «Lheiap apto Apveske, apmanie pankek apiennakteskamo nalhepop anak lhmankek ham, apkellanei'o nhan neten, apmeiok apanko ie'.

¹¹ Koka lhamakho qaselha nak ma'a nkonmaskengvomok hata, memaskengvomek hato ka lheiap ma'a. Nkomaskengvomok hata nhan lhamakho qaselha lhmankek ham malha aptonak ietamopai'a la aptema nak aphapak,

¹² netamen ma'a eliaksasekhak hata lheiap ma'a malha aktonak nengaqlammalhka nak, ieaqmongkasekhak hata po'ok aphalhnankok. Lheiap koka mamma akiaqmoiekha mo'ok aptemakha, mamma nhan akmaskengvaianlha apkaniemhaikama».

¹³ Mang nak nanek na etnemak enianak lhema aphapak la ángel Eniapom Neten hengke'e: «Elhnata neheqha akiennakha akvakmo ta asavho askakheskeskekta koneng apmankok apkelammelhmakha lheiap».

¹⁴ Nkanek ángeles apkellelto malha eniempehek apkellasennaikama Eniapom Neten kakpota ellapaksek elpasmok apkellelto nak apkelvonkasemmap tep.