Galatas 6 - Nuevo Testamento Toba Maskoy

¹ Ketlhengkap elialheng'a apkellelto apkenmaikama Espíritu, ntasek ennavakse mota po'ok apkellan'o la qaselha ngkollatsekama, koka have apkeliennai'oho. ¡Ellaho ta nhan ketlhengkap ngkotnek kelha apkeliepkonammap nahan!

² Elpasmakpo ta pankavek elpatmekhak malha apkelpatama apieseksek anak ham, ka aptangko la ketlhengkap ma'a, apkelieplavkaskek ley apankok Cristo.

³ Apto la enenlhet metka neten apiaspommap, koka nkolhenek apvalhok akto neten apankek apiaspommap ma'a, koka apiennengkasekpe pankek na m'a.

⁴ Ntasek koka moklhem'a nkotlhenalhko nkek apvalho'ok apkellanekamok kelha ngkolatsekama, aktaqmanma, netamen hata m'a nkollaqhama kelha apvalhok. Koka mangkolatsema m'a elietkeskamok aptakha la apkelanai'a po'ok,

⁵ ngkanek moklhem'a nnankek metka apkeliekaskama elpatmekhak malha apkelpatmekama.

⁶ Enenlhet apto la nema atlhekmoskama ania'a aktaqmanma, ntasek epasmekhak lhamakho qaselha aimelhkelha la m'a apto apketlhekmoskama m'a.

⁷ Mamma enenlhet eiennengkasama Eniapom Neten, meliennengkasakpo nkek na ketlhengkap ngkanek apkenokho la lhema aktek, enaklhangkok hata nhan akielhna aniem'o m'a aktek lhek apkenaikamok.

⁸ Malha apkenekha apankek apvalhok la aktek akvesai'a akiaspongkomakha nak engvalhok, enaklhek hata akielhna akvesai'a nengetsepma, koka apkenakho la aktek apvesai'a Espíritu, enaklhek hata akielhna akvesai'a akiennaktema enneniek mankotnengvaianlha nnelha.

⁹ Ka ngkanek na ketlhengkap mel·halhiengvomek apkellanekamok qaselha altaqmelo netamen hata m'a akieto la aktaqmelakha aknem avanhek hata ngkotnek apnaklhekamok akielhna altakmanma metko la alvannammalhka apvalho'ok.

¹⁰ Etnamo ta alietakho la mota ellanangkok qaselha altaqmelo aplhamakho pankek enenlhet, koka nhan tep ankek alietemo m'a apkellelto nak apkelialheng'a aknaikamok anak meliaskeiam.

Apkellaskama qaselha Pablo kanhan aktakha nnelha apaivoma

¹¹ Eltaqmelkaso ta apkelietsatekamok alkama nak aliavai'a astalheskama.

¹² Ka enenlhet'avok apkenmahai'o lhta eliatangkok ketlhengkap eliaqtemenkeskesek nekhatkok apkellammelhakha, vanlha koka apkeleltemo nkollekok apvalho'ok enenlhet, mankonmahai'ak ellengangkok akientalhnema neksa apketlheianma ania'a apketsepma lhta neten iamet aktenneskama Cristo m'a.

¹³ Apkelpeneskangkek enenlhet anak apkeliaqtemenaikamok nekhatkok apkellammelhakha m'a, mang koka elieplavkeskama aklhamakha ley Moises. Apkelleltemavek eliaqtemenangkok nekha atkok apkellammelhakha ketlhengkap ma'a kakpota ellakpok aniem'o apkellasekhai'o ketlhengkap ma'a.

¹⁴ Vanlha koka ko'o anmalhko evalhok aniem'o Apveske engankok Jesucristo apto lhta apketsepma neten iamet aktenneskama, ka nkeniemai'ak astaqnongvekho qaselha ngkollatsekama neniava nak, kanhan hetaqnongvekho m'a neniava nak.

¹⁵ Kolhva alhnankok nentaiangkolha nak koka akto neten ankek akiaspommalhka m'a, mangkolhnok aliaqtemenammalhka nak nekhatkok apkellammelhakha, nlho ka la nhan metka nak aliaqtemenammalhka m'a.

¹⁶ Askeltavek ko'o nkovaiventak altaqmelaikama engvalhok kanhan nenietnai'o nenga'at takhaplhet'ok apkellelto apkeleliehekho m'a aspaioma lhkek, kanhan takhaplhet'ok Eniapom Neten apkennemolhema Israel.

¹⁷ Koka kolhvave nak moltok ngkolhek heliasolhma, mantek ko'o eskepok ehenkok eiempek ma'a aniem'o aslengaiangko sekhe lhta akientalhnema aspasmekha apveske Jesús.

¹⁸ Ketlhengkap elialheng'a, askeltavek ko'o Apveske engankok Jesucristo eltaqmelkeskesek apkellaniemhaikama ketlhengkap ham. Amen.