Galatas 5 - Nuevo Testamento Toba Maskoy

Akmaskema nentaikamok nema allasennaikama nema apkelianmoma anko'ok ley

¹ Nne lhta hengelpaqnenkasakho nema hengenmaikama aniem'o lhta m'a Cristo. ¡Elienna toka ketlhengkap kakpota mankolatkeskatanie aiaspo'ok ankok akmahai'a nkolpathetek mokhom!

² Ko'o Pablo ka stak ko askellano mankaimelhkak etnangkok eliaqtemenek nekha tkok apkellammelhakha ketlhengkap apkeltemakha na mota m'a judios, ka aptangko la ketlhengkap ma'a, malha akhemo ngkotnek Cristo apkeltemeskeskama lhta ketlhengkap.

³ Asmak'ak alhenek mokhom, lhema enenlhet la apiaqtemanma nekha tkok apkammelhakha, nkaimelhkek na eieplavkesok lhamakho ley.

⁴ Enenlhet la apmahai'a etnek apeivomo aniem'o ley, apieniakhek na Cristo m'a, aptaqnevakkek na qaselha metka akianmoma apkaikamok alhta m'a aniem'o lhta aktaqmanma apkelanei'o niekhe.

⁵ Ennengko'o koka alel·halhnekama engelvalho'ok aniem'o Espíritu ngkolhek hata hengeltemeskaso nengelpeivomo aniem'o mongiaskeiam, have niapak ma'a.

⁶ Koka apkelpasmakho la Cristo Jesús, mmaskek aktaqmelo m'a akiaqtemenammalhka nak nekhatkok nengammelhakha nlho ka la m'a, vanlha nkaimelhkak nkoitek mongiaskeiam anak kakpota nkotepkesek nengasekhai'o nak emmo'ok ma'a.

⁷ Apkelieplavke lhta ketlhengkap malha amai aktaqmanma ¿Se lhta aliaseiangko lhma m'a kakpota elvatesangkok, he?

⁸ Have koka aniem'o m'a Eniapom Neten apto lhta apkellavekama ketlhengkap.

⁹ ¡Ellaho ta ketlhengkap, ketse niekhe nema angkai'a m'a alena nak apiepheskama nema akiaqhapeskama nak, koka eiephekhak ma'a!

¹⁰ Asiave ko'o Apveske ta elpasmok ketlhengkap kakpota mangkotnek mo'ok aktema aklhenaikama apvalho'ok astemakha ko'o. Koka apto la enenlhet apkeliasekamo mota lhma ketlhengkap, ngkolhek hata akiaqmongkaskesakho aptemakha m'a akmak'akha la nkoietoho.

¹¹ Elialheng'a, nlho lhta askeleltennasengka la eliaqtemenek nekha tkok apkellammelhakha ketlhengkap, manghemenlhenama nlho lhta judios, melleve nlho lhta nhan hellanhoho alheno la ania'a aktemakha iamet aktenneskama.

¹² ¡Nkaimelhkek kelha ngkolhek aksavheso nema aliaqtemenkeskama apkammelhakha m'a apkellelto apkeliasekamo lhma ketlhengkap ham!

¹³ Apkellavekama lhta Eniapom Neten ketlhengkap elialheng'a kakpota etnokhak metka apkenmammap, koka menmamankek metka apkenmammap anak kakpota ellanangkok qaselha ngkollatsekama mokhom, ntasek koka elpasmo mota po'ok la'a aniem'o apkellasekhai'o.

¹⁴ Nkanek lhamakho ley anak aiseksek ma'a nietnek malha alpasmekama m'a ntemak hengke'e: «Eniasekho po'ok ka kto nak apkasekhammakpo apanke nak lheiap», ntemak.

¹⁵ Koka aptaklho la po'ok, aptavo la nhan, ¡eniaho! Apnaqtevasekpe pankavek ketlhengkap ma'a.

Qaselha aptepkeskama Espíritu

¹⁶ Asmak'ak alleltennaksek ketlhengkap mokhom, eleliehekho ta Espíritu kakpota meleliehekhek hata aliaspongkomakha nak apvalho'ok.

¹⁷ Ka qaselha nak aliaspongkomakha nak apvalho'ok ammelhaikama mota m'a qaselha aniem'o Espíritu, vanlha mota alammelhammalhka m'a hanet qaselha nak, ka ngkanek ketlhengkap mankollapvankek ellanangkok qaselha altaqmelo apkenmak'akha la niekhe ellanangkok.

¹⁸ Koka apkellokha la ketlhengkap apkeleltennasekamok anak Espíritu, mmaskek anmangko ley ketlhengkap.

¹⁹ Alhnakho nkek nenvetai'a qaselha aniem'o akiaspongkomakha nak engvalhok, ka kto nak nelanaktema, nenmensangveiam alhma', nelanai'a qaselha ngkolatsekama lhamakho.

²⁰ Neniavenkeskamo akvesai'a qaselha alanemmalhka akiokha, kakpota nhan aknema engvalhok, nentaknongkoma emmo'ok, nennapommalhka emmo'ok, nennathaikama, nenloma, nenteniaikama mota emmo'ok angammelhek, nenmopvana angelhpankesek emmo'ok.

²¹ Neniasepkeskama emmo'ok, nentema anmen ato', nenpasenvaiam enenlhet'avok meliamolhma apienaikamok, melleskama etavangkok aptekamok, nlhaniek ankek qaselha ngkollatsekama alleniem'o m'a aliaspongkomakha nak engelvalho'ok. ¡Ellaho ta ketlhengkap, metlhokiek hata m'a aptemakha nak apveske Eniapom Neten apto la enenlhet apkelanai'a m'a qaselha ngkollatsekama nak!

²² Koka qaselha aptepkeskama Espíritu alvesai'a nengasekhai'o, akpaihekha engvalhok, aktaqmelaikama engvalhok, have nav'a envahek nelloma, antangkok akmomhape engvalhok, neniamolhma, mongiaskeiam,

²³ metka nenientalhnesammalhko, nenmopvana annavaksek engvalhok ¡Mamma nhan ammelhma la ley lhamakho nak, akpasmekha koka!

²⁴ Nenlhamakho nengelelto nelpasmekha Cristo Jesús malha ntemak neliaqhapkeskekha la neten iamet aktenneskama akiaspongkomakha nak engelvalho'ok akteniai'a na mota nkolanak ngkollatsekama.

²⁵ Koka nellaniemhangka la aniem'o Epiritu, ntasek angankoho heniantemama akmak'akha la heniantemok ma'a.

²⁶ Metnamo nkek apkellammakpoho, mongelvankesalhkek nahan emmo'ok kakpota angellammelhalhka, metka nhan neniasepkeskama qaselha apanko'ok emmo'ok la'a.