Galatas 2 - Nuevo Testamento Toba Maskoy

¹ 14 iantelhkapa lhta niekai'ak ma'a, ka asmeiekho lhta mokhom Jerusalen kanhan asketlhelhma'ak alhto ka Bernabe kanhan Tito.

² Eniapom Neten alhta heteskeskama apkeltemo aniakhak ma'a, nengaqnakhe lhta m'a mok engankavek ennengko'o m'a apkelientalhnakha apkelemhama apmaniaie nemakha allai'o m'a, askeleltennasema lhta ania'a aktaqmanma aktemakha askeleltennasekama mota apieseksek ma'a metnangko nak judios kakpota elvetak iokhalhmek ankek ma'a nkotno aqhemo m'a asmakmekama.

³ Nkellekave lhta apvalho'ok ma'a asmakmekama, metka helammelhma m'a, kanhan ma lhta elleltok na ngkolhek akiaqtemenkaso nekha atkok aiempehek apkammelhakha Tito ngkanek apto lhta griego m'a, aptaiangkolha lhta mota m'a judios apankave'.

⁴ Hengelpalhakva'a lhta nhan apkelleltammakpo engelialheng'a, koka have lhta niekhe m'a vanlha lhta apkenmahai'a ellanama nentangkolha metka hengenmaikama nak henganemakha aniem'o Cristo Jesús, koka apkenmahai'a lhta henteskesangkok mokhom malha hengellasennaikama nema nelianmoma henganemakha ankok.

⁵ Koka ma lhta angellasekha apankek ennengko'o m'a ngkanek nenmak'ak alhta angenmeivok ania'a aktaqmanma nemmahai'a angelletsavkesek ketlhengkap.

⁶ Koka apkelientalhnakha apkelemhama apmaniaie nemo allai'o, ma lhta elleltok aiaqmongkasekhak mo'ok asketlhekmoskama, nkaqhok koka nema allai'akha la enenlhet'avok apkelemhama apmaniaie m'a ngkanek nennemo emmo'ok napaqtek Eniapom Neten.

⁷ Apkelvetai'ak apkelemhama apmaniaie nak apto Eniapom Neten heiapaskama kakpota atlhekmoksek ania'a aktaqmanma apieseksek ma'a metka nak aliaqtemenammalhka nekhatko'ok apkellammelhakha, koka Pedro apkapasammap ma'a elhenek apieseksek aknaikamo nak nema aliaqtemenkeskama nekhatko'ok apkellammelhakha.

⁸ Eniapom neten koka aptemeskeskama apkapaskamo mota Pedro kakpota etlhekmoksek apieseksek ma'a nema nak aliaqtemenkeskama nekhatko'ok apkellammelhakha, heiapaskamo nhan ko'o m'a atlhekmoksek metnangko nak judios.

⁹ Jacobo, Cefas kanhan Juan malha apkellelto nak nema alankeskama nak postes aliennakteskama malha anmaikamok ma'a Jesucristo apkennemolhema, nketlheianvakhave lhta nhan apvalho'ok asto Eniapom neten heiaikamok qaselha altaqmanma metka akianmoma heliekieskama, apkenme lhta nhan takha enmeio'ok hengelpaivesangko ko'o kanhan Bernabe, nnave lhta nhan mo'ok engelvalho'ok nemmak'akha antangkok ma'a, angetlhekmosangkok ennengko'o metnangko nak judios, koka m'a etlhekmosangkok apieseksek aknaikamo nak nema aliaqtemenkeskama nekhatko'ok apkellammelhakha.

¹⁰ Vanlha lhtoka hengellangko lhema apaivoma, apkeltemo angelpasmok apkellelto nak metka apkelletsekama, nelienlhanakme mota angellanak akto nak ma'a.

Apiennai'o Pablo apkelanei'o Pedro

¹¹ Neksa apvekta alhta Pedro m'a apiav'akha temma Antioquia, asiennave lhta ko'o askellano m'a ngkanek ma lhta ngkolatsema aptakha m'a.

¹² Aptavokhe lhta Pedro lheme Jesucristo apkennemolhema metnangko nak judios ma'a, koka apkelvateske lhta aptaveikokho lhemek ma'a ngkanek apkelva'a lhta aknaikamo nak nema aliaqtemenkeskama nekhatko'ok apkellammelhakha, apkelapaskama lhta Jacobo, apkak'a alhta songkek Pedro judios aptengiaikamo na mota apkeleltemo nkoiaqtemennalhka nekha atkok apkellammelhakha m'a.

¹³ Apkelvanengke lhta nhan napokha judios Jesucristo apkennemolhema aptakha hanet apvalhok Pedro, akvakho lhta nhan Bernabe apvanekamok ma'a.

¹⁴ Asiennave lhta nhan askellan'o napaqtavek enenlhet'avok ma'a ngkanek ma lhta eieplavkasak ania'a aktaqmanma akto nak haveniapak anke, lhta stak askano m'a: —Judio apanke lheiap, aptakhek koka malha metno judio ¿Se lha kto apkeliatengko nak lheiap metnangko nak judios etnangkokhak malha aptaiangkolha nak judios, he?

Eniapom Neten hengeltemeskeskama nengelpeivomo aniem'o mongiaskeiam

¹⁵ Ennengko'o nengelelto judios apankavek have nellanekamok mota ngkollatsekama, have aptangko nak ma'a metnangko nak judios.

¹⁶ Koka neliavek ennengko'o have hengeltemeskeskama nengelpeivomo m'a aniem'o nelieplavkeskama ley, vanlha koka aniem'o m'a mongeliaskeiam Jesucristo. Ennengko'o nhan mongeliaskakmok Jesucristo ka nkeniemai'ak nemo nak hengeltemeskeskamo nengelpeivomo m'a, have aniem'o m'a nelieplavkeskama ley ngkanek mamma enenlhet aktemeskeskama la apeivomo m'a aniem'o ley anak.

¹⁷ Apnek kelha enenlhet hengetlheianma la nengelto ngkollatsekama nellanekamok ngkanek nengeleltavek hengeltemeskesek nengelpeivomo vanlha apankek aniem'o Cristo, koka mankoietok aptakha aplheianma m'a, have aniem'o Cristo hengeltemeskeskama nellanekamok ngkollatsekama ¡Mamma nkek na m'a!

¹⁸ Astevasekhek ko'o aktemakha lhta mota aklhenaikama evalhok aktemakha m'a henganemakha, koka askempasakho la mokhom ma'a alhenalhkak hata aselhnanemmalhka.

¹⁹ Asielhanmekama lhta mota ley ko'o, kolhva koka askelvateskangkek ma'a, malha asketsepma astemak, kolhva koka neksa askaniemhaikama asielhanmekama m'a Eniapom Neten, malha niekhe nhan askelhnammalhko la lhemek neten iamet aktenneskama Cristo,

²⁰ kolhva koka alhelhma mota Cristo, have ehenkok ehenkek askaniemhaikama nak, ka lhamakho qaselha nak askelanai'a neksa askaniemhaikama aniem'o m'a moi'askeiam Eniapom Neten Apketka, heiasekhai'o nhan, apkaiangko akvakmo apmatno aniem'o ko'o.

²¹ Momahai'ak ataqheso qaselha aktaqmelo metka akianmoma heiaikamo lhta Eniapom Neten, hetneskeskamo nak aspeivomo aniem'o m'a Cristo, have aniem'o nhan ma'a ley apanko'ok anak judios, lhta akto la hetneskeskama aspeivomo aniem'o m'a ley anak, malha akhemo lhta ngkotnek apketsepma Cristo.