Galatas 1 - Nuevo Testamento Toba Maskoy

Aklheianma apvalhok Pablo ko Galacia

¹ Ko'o Pablo hetneskeskamo heiapaskama Jesucristo kanhan Eniapom Neten apto nhan aplhatekhaskeiam apieseksek apkenmaskengvaiakmo, have enenlhet apankavek hellapaskama.

² Ko'o kanhan elialheng'a hengke'e nketlhenkek engelvalho'ok aplhamakho iglesias akieto ham Galacia.

³ Askeltavek ko Eniapom Neten kanhan Apveske engankok Jesucristo eltaqmelkeskesek apkellaniemhaikama, ellangkok na altaqmelaikama apvalho'ok ketlhengkap ham.

⁴ Apkaiangkave lhta m'a Jesucristo apmatnama aniem'o mongeleliehekho hengaskamakha Eniapom Neten. Hengelpaqnengkasekho nhan ngkolatsekama hengenmaikamok nenvanlha nak aniem'o nhan Eniapom Neten apkeltema m'a.

⁵ ¡Gloria, ntasek eliavenkasok apvesai'a Eniapom Neten metka akvaiam annelha aliekaikamok iantelhkapa! Amen.

Vanlha nkek lhema ania'a aktaqmanma

⁶ Avanhek akiemaskama evalhok ketlhengkap aslengai'o ania'a apkelvatesaikamok kolhvavek ankek apkelieplavkeskama Eniapom Neten ham, apto lhta apkellavekama, apkelvetaskeskama lhta nhan apkellamelaiam aniem'o m'a apkellapaskeskama Cristo kakpota eltaqmelkeskesek apkellangiemhaikama ketlhengkap ma'a. ¡Koka apkelvatesaiangkek na lhta ania'a aktaqmanma apkelieplavkeskama ketlhengkap, apkelieplekho lhna lhta m'a mo'ok ania'a iama aktaqmanma!

⁷ Vanlha koka niekhe lhema ania'a aktaqmanma akto haveniapak anke, koka moklhem'a enenlhet apkeleltavek eliasangkolhma ketlhengkap, eliaqmongkaskesekhak na mo'ok aktemakha ania'a, have ania'a aniem'o m'a Cristo.

⁸ Ennengko'o ta laie nelletsantamo ta mo'ok aktemakha ania'a mankolhnemo m'a neleltennaskama lhta. Nlho ka la nhan ángel laie apkeniem'o neten esantak mo'ok ania'a. Ntasek ngkolhek akvaivesantamo tekhenlhet'ok aknaqtevaskama la nellaniemhaikama m'a.

⁹ Asmak'ak alhenekhok mokhom alheno lhkek, ka apvo'o la enenlhet apsoiam mo'ok aktemakha ania'a mankolhno m'a neleltennaskamo lhta, ntasek ngkolhek akvaivesantamo takhaplhet aktevaskama la apkaniemhaikama m'a.

Aplhevai'a Pablo ania'a aktaqmanma aniem'o Jesús

¹⁰ Motenia ko'o allekkasekama la apvalho'ok enenlhet hellanhoho, vanlha koka m'a asteniai'o nkollekkasama apvalhok Eniapom Neten. Ka astenio la ko'o nkollekok apvalho'ok enenlhet hellanei'o, nkomaskok hata asto hennenkasekama Cristo.

¹¹ Ketlhengkap elialheng'a, askeltavek ko'o eliangvomho ketlhengkap have aniem'o m'a enenlhet ania'a aktaqmanma asketlhekmoskamo na mota.

¹² Have enenlhet hellaikamok asketlhekmoskama nak, vanlha koka m'a Jesucristo apto lhta nhan apkeltemo aiekpelkok

¹³ Apkeliave ketlhengkap astemakha lhta sekhek anke lhta, asieplavkeskamo lhta apkeltemakha apankavek hengetlhekmoskama judios apanko'ok, asmenlhenaiangka lhta akiennaktema nkek iglesia apankok Eniapom Neten, askelengaskesaiangko lhta akientalhnema nkek na m'a.

¹⁴ Avanhek anke lhta askasekhai'o nellanemmalhkelha nak antangkok aniem'o nelieihengka, koneng alhta m'a asketlhelhma'ak aspaiomo lhema ehenkek judios.

^15-16 Nkaqhok koka m'a Eniapom Neten heliekieskangke panke amanie asmahai'a atiemok av'alhok meme aniem'o aktaqmanma nkek helanei'o, apmahai'ak na heteskesek Apketka kakpota heiapaksek ma'a aleltennasangkok apvesai'a apieseksek metnangko nak Judios. Ma lhta ateniaikama enenlhet hetlhekmoskama la'a,

¹⁷ momhaiangkok na Jerusalen kakpota hetlhekmoksek apkellelto lhta apmaniaie' nema allapaskamo lhta. Vanlha asmaiangko lhta m'a kolhvavek ankek akieto iokhalhma Arabia, netamen astaqhemo mokhom, netamen asmeiekho na temma Damasco.

Apalhakvaiam Pablo aplhamakha nema alapaskamo

¹⁸ Asnengkek akvakmo tres iantelhkapa m'a, netamen asmeiakho lhta Jerusalen kakpota atengvomok Cefas ma'a, ka asnakho lhta lheme 15 knem ma'a.

¹⁹ Asveto lhta nhan ma'a Jacobo, Apveske lhta apialheng ma'a, ma lhtoka alvetak aplhamakha nema allapaskamo,

²⁰ have niapak ankek lhta m'a aktemakha nak astalheskama, napaqtek na Eniapom Neten astakha nak.

²¹ Netamen asmeiakho lhta nhan iokhalhma Siria kakpota nhan Cilicia.

²² Lhtoka mangheliekpelkemak asiokha ehenkek ma'a iglesias apankok anak Cristo akieto m'a iokhalhma Judea,

²³ vanlha lhna lhta mota apkellengai'o mok asvesai'a m'a, lhna lhta mota aptaiangkok hetlheianmo m'a: —Ka enenlhet na lhta m'a apkenmenlhenaiangka lhna lhta nentemo lhemek, apmahai'o lhna lhta emaskeskamok mongeliaskeiam anak, kolhva koka apketlhekmoskek aktemakha mongiaskeiam —lhta aptaiangkok hetlheianmo m'a.

²⁴ Apkeliavenkaskesama nhan apvesai'a Eniapom Neten ma'a aniem'o apiaqmongkasekha astemakha lhennenga.