Filipenses 2 - Nuevo Testamento Toba Maskoy

Nenietkesaikamok aptemakha Cristo

¹ Koka apkellangko la Cristo ketlhengkap apkenmopvanka'a kakpota eliatekhok po'ok, alpekhesangka la nhan apkellasekhai'o kakpota elpaieskeskamok apvalho'ok po'ok, akno la nhan mo'ok apvalho'ok kakpota nhan akiavai'a nkek la apkelietnai'o napa'at po'ok,

² netamen elloka ta m'a metka akmaska apieseksek ketlhengkap ham, ellasekhok na po'ok, aknemo nhan mo'ok apvalho'ok, eteniangkok na aknemo mo'ok qaselha apanko'ok. Ka aptangko la ketlhengkap ma'a, nkopaihekhak hata evalhok ko'o.

³ Metnamo nkek apkelammakpo, mellanamo nkek na qaselha apkelaskesammap ame', eltamok koka nalhep'avek apvalho'ok, eltemeskes hata nhan neten apankavek po'ok la'a have aptangko nak ketlhengkap.

⁴ Melteniamok apanko'ok apankavek qaselhaha kakpota nkotaqmelek apkellangiemhaikama vanlha ketlhengkap ma'a, koka ntasek na elleltok nkoltaqmelek apkellangiemhaikama po'ok.

⁵ Etnamo ta ketlhengkap aptemakha lhta mota Cristo,

⁶ niekhe apnemo lhta Eniapom Neten ma'a, koka ma lhta epathetmak qaselha altaqmelo m'a neten, apieniekhe lhtoka m'a,

⁷ malha lhta nhan aptemak apkel·hatsoskama la apvalhok qaselha apmopvana ma'a, aptemeskesammakpo lhta nhan malha nema asennaikama nema apianmoma, aptaiekho lhta nhan enenlhet apankek ma'a.

⁸ Neksa aptema lhta enenlhet apankek ma'a, koneng apanke lhta nhan aptaikama m'a, apkeliehekho nhan akvakmo apketsepo. ¡Kanhan ma'a apketsepo neten iamet aktenneskama!

⁹ Ka nkeniemai'ak etneskesek Eniapom Neten neten apankek ma'a, apteniaskeskamo nhan apvesai'a neten ankek apiaspommap ma'a apieseksek aplhamakho enenlhet'avok,

¹⁰ netamen apkellelto apkakhaikamok neten kanhan nalhepop kakpota nhan koneng lhepop anak elelteklhengkok aptapno'ok aniem'o apvesai'a Jesús ma'a,

¹¹ etlhenek hata apankavek Jesucristo apto apveske, netamen eltakneskasangkok hata nhan Eniapom Neten apvesai'a aniem'o akietnema akiavai'a apmopvana.

Aktemakha nentaqmelkasemmalhko

¹² Ketlhengkap elialheng'a heleliehekhave lhta mota asnemo lhta apieseksek ham, ntasek na heleliehekhok kolhvave nak neksa asnema mokhe, ellanamok hata lhamakho qaselha aimommalhkelha la'a kakpota ngkolhek alvongkaso tep akieplomo neksa apkellai'a kakpota nhan neksa apkelelpelhiennoma allai'o apnenio'ok ma'a.

¹³ Eniapom Neten hata elpekhesama ellanangkok qaselha altaqmelo, elpasmok hata nhan kakpota ellanangkok ma'a aniem'o apiamolhma.

¹⁴ Ellanamok hata lhamakho qaselha metka apkelmalenioikama, metka nhan apkellatemommap po'ok

¹⁵ kakpota metlhenakpek ketlhengkap, etnangkok na nalhep'avek apvalho'ok, metka alpaiseiam nahan malha Eniapom Neten apketkak apieseksek enenlhet meliamolhma kanhan apkeltemengvekho na lhma. Ntasek etnangkok malha apkelapommatma ketlhengkap apieseksek anak ma'a,

¹⁶ melieniav ankek na ania'a aktaqmanma akto nak hengaikamok neniennaktema, netamen nkaqhama ta evalhok ko'o m'a apvaktamo ta Cristo ngkanek have aqhemo akientalhnema asmakmekama apieseksek ketlhengkap ham.

¹⁷ Meliaskeiam anak ketlhengkap malha niekhe ntak akmatnama nak nentoskama nengaikamok Eniapom Neten, ka asketsepo la ko'o neksa helasennaikama ketlhengkap, ema ehenkok malha ntakhak nema aliangkenaikama nak takhalhet qaselha nema akmeskama Eniapom Neten, hata akto ta askaniemhaikama m'a nkaqhok hato ka ngkotnek ma'a nkopaihekhok ankek hata evalhok lhemek ketlhengkap ma'a.

¹⁸ Hai, eltaqmelkaso ta apvalho'ok ketlhengkap astemakha nak ko'o.

Pablo apkellapaskama Timoteo kanhan Epafrodito

¹⁹ Apkelto la apveske Jesús angvapaksek hata Timoteo ham aptengiaikama la ania'a apieseksek anak ketlhengkap kakpota nkopaiesekhak evalhok ko'o.

²⁰ Vanlha lhema Timoteo aknemo mo'ok mota engvalho'ok apmahai'o panke' elpasmok ketlhengkap ham,

²¹ koka napokha enenlhet'avok anak apteniangke mota apanko'ok apankavek qaselhaha, moka ellanengkok apkellanemakha nak etnangkok Jesucristo.

²² Apkellengai'a ketlhengkap aktaqmanma aptemakha Timoteo, avanhek asmakmekama lheme' aplheianma ania'a aktaqmanma, hepasmek nahan malha apto nak eietka la'a.

²³ Ka akleko nak evalhok angvapaksek hata ham, amanie koka sekhek ko'o hengke'e asmak'ak aihok akmak'akha ta ngkotnek askaniemhaikama.

²⁴ Asiave ko'o have niapak Apveske hepasmok hata kakpota aniantak kolhvavek ankek ham astaikama la amaika'a.

²⁵ Askanek ko'o ataqhesok hata neptamen enialheng Epafrodito mokhom ham, apto hepasmoma mota asmakmekama, alhelhma nhan malha askennapommalhka. Apkellapaskama lhta ketlhengkap kakpota hepasengvatak aimelhkelha la'a ko'o hengke'e,

²⁶ avanhek na aliepvaiam apvalhok hengke'e apmahai'a elvetekhak ketlhengkap ham, avanhek na aktaikama apvalhok apleng'a alhta ania'a anmaiosak'a apvalho'ok ketlhengkap ngkanek nemmaskema lhta ngkaqhemak hengke'e.

²⁷ Have lhta niapak ma'a, avanhe lhta akmaska apiempehek nketlhengkaske lhta enietsepok, koka Eniapom Neten alhta nhan apietnai'avek napa'at ka apvongkaso tep, kakpota nhan ko'o apietnai'avek neha'at ngkanek nkanantangko nlho lhta akmaiose evalhok apketsepo la m'a.

²⁸ Kolhvavek ankek hata angvapaksek Epafrodito ham kakpota nkolpaihekhak apvalho'ok apkelvetakho la mokhom ketlhengkap ham, ko'o toka nhan nkaselhtekha akmaiose evalhok.

²⁹ Enmamok hata takha akieplomo alpaihekha apvalho'ok apkeltemakha na mota etnangkok Apveske, ellaho ta aplhamakho aptemakha na mota m'a.

³⁰ Niekhe atlhengkeskama lhta enietsepok aniem'o apieplavkeskama apkanemakha Cristo, nketlhengkaske lhta nhan enietsepok aniem'o hepasmoma ko'o ngkanek taiepek apkakhaiangkelha ketlhengkap mankollapvankek elpasengvatak hengke'e.