Filemon 1 - Nuevo Testamento Toba Maskoy

Pablo aklheianma apvalhok Filemon

¹ Ko'o Pablo askaqlhengkasemmalhkek aniem'o heiasennaikama Jesucristo, alhelhma nhan hengke'e stema eialheng Timoteo, nketlhenkek engelvalho'ok lheiap Filemon apto nentemo lhemek nellamelammalhko mota nenmakmekama,

² nketlhenkek na engelvalho'ok iglesia apkaqnekha na mota apnemakha lheiap, enialheng ngkelvana Apia kanha Arquipo apto lhta netlhelhma'ak amota neksa malha nennapommalhka.

³ Askeltavek Eniapom Neten ka nhan Apveske Jesucristo eltaqmelkeskesek apkellaniemhaikama, ellangkok na altaqmelaikama apvalho'ok ketlhengkap ham.

Pablo aptema gracias Eniapom Neten

⁴ Lhamakho aknem amota nhan neksa askenmalhnongkoma la'a nlhenke mota evalhok lheiap, astek na gracias Eniapom Neten

⁵ ngkanek asleng'a lhta apvesai'a lheiap avanhek na lhta apkasekhai'o, mei'askeiam nahan apveske engankok Jesús, kanhan apkellasekhai'o lhna lhta nhan apkellelto nak apkelpokkenammap

⁶ Askenmalhneskaskek na Eniapom Neten lheiap mei'askeiam anak nkotlhekmosekhak hata nkek lheiap ma'a lhamakho qaselha nak altaqmelo nenmopvanka nak angellanangkok aniem'o nengamelaiam Cristo.

⁷ Stema eialheng, avanhek apaiesekha evalhok kanhan aptaqmelkeskaiam evalhok lheiap, ngkanek apkeliatekho lhta apkellelto nak apkelpokkenammap aniem'o apkellasekhai'o m'a.

Apkeltemo Pablo emekhok mokhom takha Filemon Onesimo

^8-9 Ka ngkanek angvapiosalhkok altok almalhnama lheiap lhema qaselha, evanke niekhe aiennahok alanhok lheiap ngkanek heietave niekhe atnek aniem'o alhelhma mota Jesucristo, koka angvapiosalhkok hata ehenkek alanhok lheiap, vanlha koka askeltavek heiasekho la'a aniem'o heiamelaiam lheiap ngkanek ko'o Pablo asvaneiam, askaklhengkasemmalhkek nahan aniem'o heiasennaikama Cristo Jesús.

¹⁰ Hai, askapiosalhkek mokhom askeltemo alhenek Onesimo, ngkanek malha eietka ko'o hengke'e, alhenkek ko'o nhan ania'a aktaqmanma hengke'e akieto nak nellaqlhengkasemmalhkelha, ko'o nhan asto malha apiapom hengke'e.

¹¹ Mang na lhta ngkolatsekama apmakmesaiangka lheiap ham, kolhva koka aptase pankek askasennaiangka mota hengke'e, hatelha nhan aptasek hata etnek apkasennangka ta mokhom lheiap ham.

¹² Angvapaskesekhok hata mokhom Onesimo lheiap ham kakpota eniasennama mokhom, evalhok na ko'o Onesimo, ema ta takha ngkanek malha nhan asvekta la ko'o ham.

¹³ Askeltavek niekhe elhek mokhom hengke'e kakpota angvasennama mota neksa askaklhengkasemmalhka aniem'o aspaieskama ania'a aktaqmanma. Askeltavek na niekhe etnek malha apkapaskama la mota lheiap hengke'e kakpota hepasengvata mota,

¹⁴ koka nkaimelhkek na eiho pankek lheiap, momak'ak aiennaho, vanlha koka askeltavek apmak'akha la etne pankek lheiap.

¹⁵ Apieniekhek kelha iakvatakho lheiap hengke'e, koka apvaktamo ta ham ntasek elhek akvangkakho ham,

¹⁶ elvataksek kelha nhan aptema nema asennaikama nema apianmoma, etnekhak kelha nhan apkellanei'o lheiap malha apialheng la'a apkamelaiakmo, ntasek ankek enialheng la'a melhnok nema apianmoma nak. Avanhek ko'o askamelaiam hengke'e, lheiap koka ntasek hata nhan etnek neten ankek apkamelaiam, etneskes hata nhan enenlhet apankek ham, apialheng na lheiap aniem'o Apveske.

¹⁷ Ka heiamelakmo la lheiap aniem'o stema eialheng mongiaskeiam anak, ntasek na emok takha hengke'e malha asto nak ko'o.

¹⁸ Koka akietno la aptevaskamo lheiap sekhe lhta, nlho ka la nhan apkeliaqmoma la'a, ntasek henmalhnenvata akianmoma asianmongkeskama la'a.

¹⁹ Ko'o Pablo ai'anmongkesek hata, have niapak ankek astakha anak, astalheskaskek akieplomo firma ehenkok vakkahak anak. Koka ntasek kelha niekhe manghenmalhnama akianmoma ngkanek lhamakho qaselha apanko'ok anak alleniem'o aspasmoma lhta mota ko'o.

²⁰ Eialheng, ntasek eliehekhok askeltakha etnek lheiap kakpota aiennekhok mokhom hengke'e, etne ta aniem'o apkamelaiakmo Cristo lheiap, aniem'o nhan engelialheng'a.

²¹ Astalheskaskek ko'o lheiap asiavek heliehekhok hata, neten ankek hata etnek lheiap apkellanai'a qaselha askeltakha nak etnehek.

²² Hepeneskaso ta nhan lheiap asnemakha la'a, avatak hatelha ham astema la amaika'a, eniatemmohok hatelha Eniapom Neten apkelelmalhnongkoma mota ketlhengkap asmeiakho ta ko'o ham.

Aktakha nnelha apaivoma Pablo kanhan aklheianma apvalhok

²³ Hai, ntasek ma'a, nlhenkek na apvalhok lheiap hengke'e askelaqlhengkasemmalhko nak lhemek Epafras aniem'o nellasennaikama Cristo Jesús,

²⁴ nketlhenkek na apvalho'ok lheiap hengke'e Marcos, Aristarco, Demas kakpota nhan Lucas apkellelto askenmakmekama lhemek.

²⁵ Askeltavek na Apveske engankok Jesucristo eltaqmelkeskesek apkellaniemhaikama ketlhengkap ham.