Efesios 5 - Nuevo Testamento Toba Maskoy

¹ Ntasek elvanangkok ketlhengkap aptemakha nak Eniapom Neten aniem'o apketkak apkellamelaiakmo m'a.

² Ellasekho nhan po'ok ka aptemakha nak Cristo hengellasekhai'avek ennengko'o, apkaiangkave panke lhta nhan kakpota hengeltaqmelkeskesek nellaniemhaikama m'a, malha aptemak ma'a qaselha nengaikamok anak Eniapom Neten, kanhan malha nentoskama nak akvanlhemmalhka aktapeiam anak aimes akleklemelha apvalhok Eniapom Neten.

³ Aptaiangkek ketlhengkap Eniapom Neten apkennemolhema apkelpokkanma, ka nkeniemai'ak ntasek metlhenek aktemakha nenmensangveiam alhma, nelanaktema, nenmeiavkesammalhka engankek qaselha.

⁴ Melpaqmetama nhan apkelpakmeiasma henmankaskama nak, melpaqmetama nke na malha aktaikama nke nak kakpota nhan qaselha ngkolatsekama, akhemo m'a, koka ntasek ma'a etnangkok gracias Eniapom Neten.

⁵ Koka apkellelto nak apkenmensangveiam alhma, apkelanai'a qaselha malha akpaiseiam, apvannaikamok na qaselha apanko'ok apteniai'a, apkeltakneskasekamok na qaselha akiokha allanemmalhka', metnangkek hata m'a apkennemolhema akieto nak aptaiangkelha apkelveskai'e Cristo kakpota nhan Eniapom Neten, have niapak anek astakha nak alheianma.

Aktaqmanma anloka malha atsak'elha lhma

⁶ Mellanko nkek eliennengkeskak enenlhet'avok anak aktaikama nkek ania'a apketsoiam, nkanek Eniapom Neten hata eliaqmongkaskesekhak apkeltemakha meleliehekho m'a.

⁷ Melvanamonkek aptaiangkolha nak ma'a, mollekkasama nkek na apvalho'ok aptangkolha la m'a.

⁸ Lhennenga lhta nhan ketlhengkap apkellomaka ienaqtesakha lhma, kolhva koka apkelloka malha atsak'elha lhma aniem'o apkelpasmekha Apveske. ¡Etnamok hata malha atkak apommatema nak!

⁹ Nkanek apommatema nak ntepkaskek ma'a neniamolhma, akpeivomo kanhan have niapak.

¹⁰ Ellanama ta sekhek aptangkolha la enenlhet, qaselha akleklemelha apvalhok Eniapom Neten kelhaha, nlho ka la mma'.

¹¹ Melvanekho nkek na aptaiangkolha ngkollatsekama enenlhet'avok anak apkellelto nak apkelloma malha ienaqtesakha lhma, ntasek koka etlhenek ma'a aptangkolha la apkellanekamok ma'a.

¹² Apkellaneiangkek ma'a qaselha apkelielhammakpo, avanhek henmankaskama m'a nenlheno la m'a.

¹³ Koka apommatema nak avankek nkolvetaskesek iokhalhmek ankek qaselha ienaqtesakha lhma alposemmalhka.

¹⁴ Ka nkanek nemo nak aktemo henke'e: «Elhatakha lheiap apto apteianma, etnemekha neten apieseksek apkenmaskengvaiakmo kakpota eniapommetek hata takhaplhet Cristo», lhna nnema aktema m'a.

¹⁵ Ka nkeniemai'ak na m'a eltaqmelkasakpok neksa apkellangiemhaikama ketlhengkap ma'a, metnamo nkek aptaiangkelha enenlhet anak metka apqatko'ok, etnamok koka nema apkeliamoho.

¹⁶ Elelientemap apkellanekamok qaselha altaqmelo nenvanlha nak ngkanek nenvet'a ngkolatsekama neksa nellaniemhaikama.

¹⁷ Metnamo nkek na ketlhengkap malha metka apqatko'ok, elienlhanmamok koka eliangvomhok apkanemakha etnangkok Apveske.

¹⁸ Metnamo nkek na akvakmo alieiesolhma vino ngkanek nkoltemeskesek hata malha metka apkelielhnengvaiam ma'a, ntasek koka elleltok ellanangkok apvalho'ok Espíritu.

¹⁹ Ennekmasamok hato ka mota salmos, nennekmaskama kakpota nhan apkellennekmasekama apvalho'ok aniem'o apieseksek ketlhengkap. Hai, ntasek eltakneskasangkok Apveske akvakho konne apvalho'ok.

²⁰ Etnamok hata mota gracias Eniapom Neten apto Eniapom aniem'o nhan apvesai'a Apveske engankok Jesucristo, aniem'o nhan ma'a apkelvetaskeskama lhamakho qaselha altaqmelo.

Nenganemmalhkelha antangkok nema ennakteiangka'a

²¹ Elhneso ta mo'ok apvalho'ok apkeleliehekho po'ok apieseksek la'a aniem'o apkellai'o Cristo.

²² Ketlhengka' ngkelvana'ak ntasek nkoleliehekho ta mota anakteiangka'a, akno aliehekho Apveske,

²³ ngkanek atava' malha apto apqatek lheia' m'a, nnavek na Jesucristo apto nhan malha apqatek iglesia, iglesia nak malha apioha nak Cristo, apto nhan apkelvongkeskama tep ma'a.

²⁴ Ka iglesia nak nkoleliehekho mota Cristo, nnavek na ngkelvana'ak ntasek nkoleliehekho mota anakteiangka'a.

²⁵ Ketlhengkap aknema nak apnaqteiangka'a ntasek ellamelemma mota apnaqteiangka'a, nnavek na Cristo apkamelaiakmek na m'a iglesia nak, apkaiangkave panke lhta m'a kakpota nkotaqmelek ma'a.

²⁶ Kakpota etnek apokkanma apankek ma'a. Malha nhan apkalhnaskama aniem'o apaivoma malha aktonak iemmen akmovana nak nkalhnaksek ma'a.

²⁷ Netamen hata nhan ma'a nkolhek hata akiantengkasakho napaqtek ma'a, alhnai'o nkek ma'a, apommatma nhan, metka ngkolatsekama, aktaqmanma nkoie, metka akpaiseiam.

²⁸ Nnavek na ketlhengkap aknema nak apnaqteiangka'a, ntasek ellamelemmak apnaqteiangka'a ka kto nak apkamelammakpo apanke apiokhoho, enenlhet apto la apkamelaiam aptava, malha ntakhak na apkamelammakpo apanke nak apiokha.

²⁹ Nkanek mamma nhan enenlhet etaknevekhak apiokha apanke nak, apvankek koka etaqmelkesek kakpota nhan eniangkok aktoma. Malha akto nak Cristo apkelanei'o iglesia aptaqmelkeskamo nhan m'a,

³⁰ ngkanek iglesia malha apiokha m'a, ennengko'o koka nentangkok malha nekhatko'ok apiokha nak ma'a Cristo.

³¹ Ka nkeniemai'ak ntasek eieniekhak apiapom kanha ngken kakpota eipetkok aptava, ngkotnekhak na malha lhema apiokha nak.

³² Koka hengke'e asietkeskama lhkek nientelhek aniangvomho, koka alhenak ko'o m'a ania'a aplhenammap Cristo kakpota nhan iglesia.

³³ Hai, ka m'a, ntase anke mota ketlhengkap ellamelemma mota apnaqteiangka'a, ka kto nak apkellamelammakpo apankave'. Ketlhengka' nhan apnema nak anakteiangka'a ntasek na nkollaho mota anakteiangka'a.