Efesios 2 - Nuevo Testamento Toba Maskoy

Hengelvonkeskama tep Eniapom Neten aniem'o apiamolhma

¹ Malha apkeletsepma lhta ntemak ketlhengkap aniem'o meleliehekho apkellaskamakha Eniapom Neten, qaselha ngkollatsekama apkellanekamok ma'a.

² Apkellaneiangke lhta nhan ngkollatsekama ketlhengkap aptaiangkolha nak enenlhet'avok lhmankek ham, apkeleliehekhave lhta ketlhengkap kasekapo av'alho'ok aveske alloma nak ma'a neten, anmaikama aplhamakho apkellelto nak meleliehekho Eniapom Neten.

³ Nenlhamakho ennengko'o nengeleliehekhavek anmahai'akha nke nak engelvalho'ok angellanangkok qaselha ngkolatsekama. Ngkolatsekama alketansema engelvalho'ok nahan, nengeleliehekhave lhta mota aliaspongkomakha nak engelvalho'ok vanlha mota akteniaikama nkolanak ngkolatsekama, hengelietemave lhta angetlhevangkok nema akiaqmongkasekha nnavek na m'a aplhamakho enenlhet anak meleliehekho.

⁴ Koka avanhek anke lhta apkelietnai'a nengaqta'a Eniapom Neten ma'a, avanhek ankek na hengellamelaiam.

⁵ Niekhe lhta malha nengeletsepma' aniem'o nellanekamok ngkollatsekama, hengellaiangkek koka nentaikamok enhalhnanko'ok ka aptemo lhta nhan apkelanei'o Cristo. Hengelvongkeskangkek na tep Eniapom Neten aniem'o aktaqmanma nkek hengellanei'o.

⁶ Malha neletsepma lhta nentaiangkok ma'a koka nennaklhatekhangveiakmek ma'a ka aptemo lhta nhan apkelanei'o Cristo. Ka hengakheskekho lhta nhan napokha m'a akieto neten

⁷ kakpota elvetak hata aplhamakho enenlhet'avok aktaqmanma nkek apkellanei'o Eniapom Neten, akiavai'a nkek apkelpasmoma apkellelto nak apkelpasmekha Cristo Jesús.

⁸ Aktaqmanma nkek apkellanei'o Eniapom Neten ka nkeniemai'ak apkelvongkeskamo tep, meliaskeiakmo songke ketlhengkap ma'a. Metka akianmoma nhan ma'a, have apteniaiangko apiempeiok apteniaikamok ma'a.

⁹ Mangkollapvankek nkolalhkok apvalho'ok ketlhengkap ma'a aniem'o apketlhevai'a apanke'

¹⁰ Nkanek hengellanai'a ennengko'o Eniapom Neten kakpota angellanangkok qaselha altaqmelo hengelpeneskeskamo Eniapom Neten aktemakha akietnaikama apaqtek hentemeskesangkok ma'a, ka songkek nelpasmekho m'a Cristo Jesús.

Aktaiekha malha lhema neniokha

¹¹ Ketlhengkap apkellelto nak metnangko judios, kotlheianvakho no apvalho'ok apkeleltaiangko lhta judios aknaikamo nak nema aliaqtemanma nak nekha tkok apkellammelhakha aniem'o koka enenlhet, apkeleltaiangko lhta mota metka aliaqtemenammalhka nekha tkok apkellammelhakha ketlhengkap.

¹² Have lhta songkek apkelpasmekha Cristo ketlhengkap lhennenga lhta, ma lhta elpalhaqvaiakmok na ko Israel, mankollapvankek lhta nhan elpasmekhak aknemo mo'ok apvalho'ok lhnak nanek apkenmahai'akha etnangkok ma'a Eniapom Neten kanhan Israel, mankollapvanke lhta nhan etlhevangkok lhema apaivoma apeneskamo Eniapom Neten ellangkok hata nhan ma'a. Apkellomaka lhta nhan metka Eniapom Neten ketlhengkap lhennenga, mamma lhta nhan alel·halhnekama apvalho'ok elvetak aktaqmanma.

¹³ Taiepe kanke lhta nhan ketlhengkap Eniapom Neten, kolhva koka nengaqtoie' aniem'o akiangkenammalhka ema apankok Cristo Jesús.

¹⁴ Koka apiokha nak ma'a malha akleklema akhalhtemommalhka apkelhpankesammap apieseksek ma'a judios kakpota nhan metnangko nak judios aniem'o apkelammelhammap, apiepetkasekho lhta nhan po'ok ma'a aktaiekho malha lhema apkellavakha apasmekha, apkellaiangko nhan altaqmelaikama apvalho'ok ma'a.

¹⁵ Apmaskeskakme lhta nhan henganemakha ankok anak ley, hanet apkellavakha lhta niekhe, aptemeskasakhe lhtoka malha lhema apkellavakha alhnankok apkelpasmekha nhan ma'a Cristo. Apsoiakmo lhta nhan altaqmelaikama apvalho'ok apieseksek anak ma'a.

¹⁶ Apmaskeskakme lhta nhan apkellamelhammap apieseksek anak ma'a hanet apkellavakha nak, apiepetkasekho lhta nhan po'ok aktaiekho lhta malha lhema apkeliokha. Apkeliepetkeskekho lhta nhan Eniapom Neten aniem'o apketsepma neten iamet aktenneskama.

¹⁷ Apvai'o lhta Cristo apaieskai'o ania'a aktaqmanma altaqmelkeskeskai'o nhan apvalho'ok aplhamakho enenlhet'avok, apkellelto lhta taiepe Eniapom Neten, kakpota nhan apkellelto nengaqtek Eniapom Neten.

¹⁸ Kolhva koka judios kakpota nhan metnangko judios nnangkek aknemo mo'ok Espíritu, envanka'ak kolhva antangkok nengaqtek ankek Eniapom nenlhamakho.

¹⁹ Ketlhengkap metnangko nak judios mmaskek aptangko po'ok enenlhet apkelleniemai'a mo'ok apkellavakha, kolhva koka aptangkok apkeltemo lhemek apkelpokkenammap ma'a, aptangko nhan Eniapom Neten apkennemolhema.

²⁰ Ketlhengkap malha pa'at la akiavai'a alanemmalhka takhalhet avhok aliennakteskamahka nak akvesai'a apketlhekmosekamok nema allapaskamo kakpota nhan apkeleltennasemmap ania'a, Jesucristo koka apto malha metaimong aktaqmanma aktaqheskamakha avhak pa'at alanemmalhka.

²¹ Malha aklheikamok neten nema akhesekamok qaselha pa'at la'a aniem'o apkelpasmoma Cristo akvakmo ta akto akpenesalhko alanemmalhka kanhan nkolhek akpokkenkaso Apveske.

²² Apiepetkasekhek po'ok Cristo kakpota ngkovomok aptaikamok malha pa'at akiavai'a Eniapom Neten la apnemakha aniem'o Espíritu apankok ma'a.