Efesios 1 - Nuevo Testamento Toba Maskoy

Aklheianma apvalhok Pablo apkelialheng'a akieto Efeso

¹ Ko'o Pablo, heiapaskamo apankok Jesucristo aniem'o apkeltemo atnek Eniapom Neten, nlhenkek evalhok apkellelto apkelpokkenammap kanhan apkeleliehekho mota apkakhangko ham Efeso, aptangko nhan apkelpasmekha m'a Cristo Jesús.

² Askeltave ko'o Eniapom Neten kakpota nhan Apveske Jesucristo eltaqmelkeskesek apkellaniemhaikama, ellangkok na altaqmelaikama apvalho'ok ketlhengkap ham.

Pablo apiavenkaskesaikama apvesai'a Eniapom Neten

³ Asiavenkaskesama mota apvesai'a Eniapom Neten apto Apiapom Apveske engankok Jesucristo, ngkanek apkellaiangko ngkeskama qaselha altaqmelo aniem'o Espíritu aniem'o nhan neten kakpota hengeltaqmelkeskesek engvalho'ok aniem'o nelpasmekha mota Cristo.

⁴ Amanie lhnak nanek apkelanai'a lhamakho qaselha lhma nkek ham, hengeliekieskangkek nak nanek na Eniapom Neten ennengko'o aniem'o nhan Cristo kakpota hengeltemeskesek na hengelpokkanma, angelloka metka neltemengveiakmo lhma' napaqtek ma'a. Avanhek ankek hengellamelaiam Eniapom Neten,

⁵ ka nkeniemai'ak na hengeltemeskeskamo apketkak aniem'o Jesucristo. Hai, aptema apankek ma'a nkanek avanhek hengellasekhai'o.

⁶ Kakpota angeltakneskasangko mota apvesai'a m'a aniem'o aktaqmanma nkek hengellanei'o, altakmelkeskamo nhan nellaniemhaikama aniem'o nhan Apketka apkamelaiam.

⁷ Apketsepme lhta Cristo akiangkenammalhko nhan ema apankok kakpota hengel·hatsoskakhak neksa hengenmaikama lhta mongeliamolhma, ka aptemeskesaiangka lhta nha apankek mongeliamolhma nak. Koka m'a apeneskamo lhnak nanek Eniapom Neten apkelanekha aptakha etnek hata aniem'o aktaqmanma nkek hengellanei'o.

⁸ Apkeltakmelkeskamo nhan nellaniemhaikama tep ankek ma'a hengellaiangko akiavai'a neliangveiakmo kakpota nhan neliamo qaselhaha

⁹ kakpota angeliangvomhok ma'a apeneskamo lhnak nanek apmak'akha ta etnek aniem'o apiamolhma hengellanei'o, malha aposkama la qaselha apmahai'akha etneskesek apkelanei'o Cristo.

¹⁰ Apeneskamo lhnak nanek apkelanekha aptakha, nkovak hata aknem akietemo nkek aplheianmakha aptemeskeskama apveske Jesús halhma nkek ham neten kakpota nhan nalhepop anak.

¹¹ Hengeliekieskamo lhnak nanek na Eniapom Neten kakpota hengellangkok hata qaselha apmahai'akha la hengellangkok ma'a, aptemengke ma'a akietnaikama apaqtek nak nanek etnehek, aptemengke mota m'a apmahai'akha la etnek.

¹² Apkeltemavek na Eniapom Neten mongeliaskamek emaniaie engankavek Cristo kakpota angeltakneskasangkok apvesai'a aniem'o akietnema akiavai'a apmopvana m'a.

¹³ Ketlhengkap na apkellailhemave lhta ania'a aktaqmanma akto have niapak ankek aktemakha hengvongkeskama tep, meliaskeiakmo lhta nhan ma'a aniem'o Cristo. Aptemo nhan Eniapom Neten malha apnaqtalheskama lhta nhan qaselha mongenatkeskama apvalho'ok apvesai'a Espíritu Santo kakpota etnangkok malha apanko'ok ma'a, aplheianmo lhnak nanek na Eniapom Neten have niapak ankek ellangkok hata m'a.

¹⁴ Apkelientemongkeskamo apmanie hengellaikamok Espíritu apanke kakpota nkotlheianvakhok hata mota engelvalho'ok have niapak ankek angetlhevangkok lhamakho aktemakha apeneskamo apaivoma aplheianma etnek hata neksa akvai'a ta m'a akiokho nkek nema hengel·hatsoskekha neksa mongeliamolhma, antangkok hata nhan apkennemolhema m'a. Netamen hata m'a, nenlhamakho angeltakneskasangkok apvesai'a aniem'o akietnema akiavai'a nkek apmopvana.

Nenianveiakmo aniem'o Eniapom Neten

¹⁵ Askeliavek ko'o ketlhengkap meliaskeiam apveske engankok Jesús, apkellasekhai'o nhan aplhamakho apkellelto apkelpokkenammap,

¹⁶ ka nkeniemai'ak astemo gracias Eniapom Neten neksa askelelmalhneskeskama mota ketlhengkap ham.

¹⁷ Askelmalhneskaskek Eniapom Neten apto Apveske Jesucristo Apveske engankok, ellanesangkok apvalho'ok nenianveiakmo kakpota m'a nkoveskak aktemongveiam iokhalhmek ankek apkeliangveiakmo aptemakha m'a.

¹⁸ Askelelmalhneskeskangkek na Eniapom Neten kakpota etnek malha apkelapommatkeskeskama alketansema apvalho'ok kakpota nkovak apkeliangveiakmo ketlhengkap apkellelto nak nema aliekieskama kakpota etlhevangkok altakmanma apkellangiemhaikama m'a, elel·halhnek na metka apkeliaskeiam ma'a. Hai, qaselha altaqmanma nkek, akmennave nkek ma'a apneskamo lhta Eniapom Neten kakpota ellangkok hata apkellelto apkelpokkanma m'a.

¹⁹ Askenmalhnema nhan eliangveskeskamhok ketlhengkap akiavai'a nkek apmopvana nak Eniapom Neten nkomakmama apvalho'ok ma'a. Ka apmopvana nak kanhan apiennaktema

²⁰ aklhatekhaskeiakmo lhna lhta nhan Cristo neksa apketsepma, akneskekho nhan neten akieto akiennakha Eniapom Neten.

²¹ Aktemeskeskamo nhan apveske neten apankek takhalhet'ok lhamakho qaselha, kanhan kasekapo av'alho'ok alientalhnemo nke nak, aknema nak anmovanka'a, kanhan alveskaie'. Cristo apto apveske aknem anak kanhan emmanie aklhekmo nak.

²² Hai, Eniapom Neten apkakheskektak lhamakho qaselha koneng apmankok Cristo. Aptemeskeskamo nhan malha apqatek iglesia,

²³ akto nhan malha apiokha m'a Cristo iglesia nak, apkellaiangko nhan lhamakho qaselha la alaimommalhkelha m'a, malha allaneiangko la nhan.