Colosenses 3 - Nuevo Testamento Toba Maskoy

¹ Malha lhta nha ntemak apnaqlhatekhangveiakmo la lhemek Cristo ketlhengkap, ka nkeniemai'ak na ntasek eteniangkok qaselha alleniem'o neten, koka m'a apnek Cristo akieto akiennakha Eniapom Neten.

² Hai, ntasek nkolketamangko mota apvalho'ok qaselha alleniem'o nak neten, have aknaiangko nak hengke'e nalhepop anak.

³ Malha lhta ntema niekhe apkeletsepma ketlhengkap, apkelpokkenke lhta Eniapom Neten ketlhengkap kakpota elloka lhemek Cristo.

⁴ Hai, Cristo apto apkeliennakteskama apnenio'ok ketlhengkap, hata apvaktamo ta mokhom hengke'e nkoieplevhok hata apkapommatema, apientalhnemo, ellangkongvatak hata nhan ketlhengkap ma'a.

Neleltammalhka angelieplavkesek kakpota angellanangkok qaselha akpeivomo

⁵ Ennapekha' ngkollatsekama anmahai'o apvalho'ok, elvatesamok apkenmensangveiam alhma, mellanamok qaselha malha alpaisengkeskama nak apvalho'ok, mellanko nkek nkoliatangkok apvalho'ok allapelhkasekama apnenio'ok ellanangkok qaselha ngkollatsekama, meleliehekho nkek na aliaspongkomakha nak apvalho'ok, metnamo nkek na apkenmeiavkesammakpo qaselhaha ngkanek malha apkeltakneskasekamok qaselha akiokha la alanemmalhka m'a.

⁶ Nkanek eiaqmongkasekhak hata Eniapom Neten takhaplhet'ok meleliehekho nak,

⁷ lhennenga lhta nhan ketlhengkap apkellaneiangkek ma'a.

⁸ Kolhva koka ntasek elvatesangkok lhamakho qaselha ngkollatsekama nak ma'a, ka aktonak nenloma, mangkeskama hennatheskama, ngkollatsekama, nentaknongkoma, ngkolatsekama engatong.

⁹ Elvatesamok hata apkenmopvanka ania'a apieseksek anak ketlhengkap ngkanek apkelieniavke lhta apkeltemakha lhennenga apkellanekamok alhta qaselha ngkollatsekama.

¹⁰ Kolhva koka alhnankok apvalho'ok nlhenkek na akvanekamok lhamakho aknem akvaiakmo aknakho aptaiangkolha Eniapom Neten apto lhta apkelanai'a enenlhet, nlhenkek na akvakmo apkeliekpelkangvakmo ta apiokho nkek ma'a.

¹¹ Apnemo po'ok enenlhet napaqtek Eniapom Neten metka apkeliekammap, ka aktonak judio, griego, mankolhnaikamo nak aliaqtemenammalhka nekhatko'ok apkellammelhakha, metka nak aliaqtemenammalhka nekhatko'ok apkellammelhakha, niekhe apiav'akha la temma aptaqmanma, nlho ka la temma apketkok akmaselhte qaselha apankok, niekhe nhan nema allasennaikama nema apkelianmoma, metnangko nema apkelianmoma, apkennemo po'ok koka m'a ngkanek Cristo apkakhangkek nengaqtek ma'a aplhamakho m'a, apto nhan neten apankek apiaspommap ma'a.

¹² Apkellamelaiam Eniapom Neten ketlhengkap kakpota nhan apkeliekieskangkek kakpota etneskesangkok na apkelpokkanma, ka ngkanek na ntasek elietnaho mota napaqta'a po'ok, etnangkok na apkeliamolhma, anmomhapak'a apvalho'ok, metka apkelloma, metka apkelpekheskama nhan.

¹³ Meltaqneva' pankek apieseksek anak ketlhengkap, eltemeskesama ta nhan apankavek apnaqtevasekpo la ketlhengkap, ka kto nak Apveske aptaiangka na apankek meliamolhma ketlhengkap.

¹⁴ Koka akto neten ankek akiaspommalhka m'a ellasekho mota po'ok ngkanek nkotsantengkesek hata apkelpasmommakpo pankavek ma'a.

¹⁵ Eniapom Neten apkeliekieskama ketlhengkap kakpota nkotnangkokhak malha lhema apiokha, nkolhnangkok na altaqmelaikama apvalho'ok, etnamo ta mota nhan gracias ma'a.

¹⁶ Melieniekha nkek na ania'a aktaqmanma aniem'o Cristo, etlhekmosakpo ta apieseksek anak ketlhengkap, ennavesap nahan akieplomo apkeliangveiakmo. Etnamo ta nhan gracias Eniapom Neten, ennekmasamok hata nhan salmos, himnos kakpota nhan nennekmaskama aniem'o apvalho'ok apankave nak.

¹⁷ Neksa apkellanai'a la lhema qaselha, nlho la nhan etlhenek apkenmak'akha la etlhenek, enmama ta nhan apvesai'a Apveske Jesús. Etnamok hata nhan gracias eniapma'ak anak apvesai'a Eniapom Neten aniem'o nhan Jesús.

Neltammalhkelha antangkok mongeliaskeiam anak

¹⁸ Ketlhengka nema nak anakteiangka'a, koleliehekho ta mota anakteiangka'a, ngkanek allanemmalhkelha mota nkotnangkok allelto nak nkoliaskeiam Apveske.

¹⁹ Ketlhengkap nahan nema apnaqteiangka'a ellamelemma ta apnaqteiangka'a kakpota nhan metka apkeliennai'o apkellanei'o nhan.

²⁰ Ketlhengkap nahan apketko'ok eleliehekho ta ngkana'ak ngkanek akto apiaspongkomakha antehek Apveske m'a.

²¹ Ketlhengkap apkellelto apiapma'ak meliatamonkek apketkak apkellanengko la qaselha kakpota mankovhe mankoliakvaiam ma'a.

²² Ketlhengkap apkellelto nak nema allasennaikama nema apkelianmoma eleliehekho ta mota apkelveskaie apanko'ok neksa apkenmakmekama hengke'e nalhepop anak, have vanlha apkellanengka la apkenmakmekama napaqtavek ma'a apkeleltemo nkolkama apvalho'ok apveske apanko'ok, etnamok hata nhan have niapak ankek metka apkeliennengkeskama aniem'o nhan apkellai'o Eniapom Neten.

²³ Ellanamok hata nhan qaselha alleklemo nkek apvalho'ok apkenmakmengka la'a malha aktonak apkellasennangka la Eniapom Neten, have akto nak enenlhet apanke nak.

²⁴ Apkeliavek ketlhengkap ellangkok hata Eniapom Neten lhema qaselha apeneskamo akianmoma m'a ngkanek ketlhengkap apkellelto apkellasennaikama Cristo apto apveske.

²⁵ Koka apkellanengko la nkoietemo, etlhevangkok hata nhan akiaqmoiekha ngkolatsekama apkeltemakha, moklhem'a ta nhan etlhevangkok aktakha la akietemo nkoie ngkanek Eniapom Neten apto apneskamo mo'ok hengellanei'o ennengko'o lhmankek ham.