Colosenses 2 - Nuevo Testamento Toba Maskoy

¹ Asmak'ak aleltennasama ketlhengkap avanhek ko'o askeliephaiekho asmakmekama aniem'o helasennaikama ketlhengkap kakpota nkoltaqmelek apkellangiemhaikama ham, ka nhan ma'a elialheng'a apkakhangko Laodicea, kakpota nhan aplhamakho apkellelto nak mangheliekpelkemelha nak.

² Avanhek na asteniai'o eiempehek askeliatekhoho aplhamakho m'a askeltemo etlhengkesek apkelpasmommakpo, ellasekhakpoho kakpota nkovak akiokho nkek apkeliekpelkangveiam kanhan apkeliangveiakmo qaselha akielhammalhka nak apeneskamo lhnak nanek Eniapom Neten aplheianmo lhnak nanek eniapaksek Cristo,

³ apto akietnema m'a akiavai'a nak nenianveiakmoho, neniekpelkemo nhan kakpota hengellangkok ma'a.

⁴ Ka astakha lhkek alheianma lhamakho qaselha nak kakpota mangkolhek aliennengkesko'o, ka enenlhet la'a malha nak altakmanma apkelpakmetekamaha, apkenmopvanka'a ania'a koka.

⁵ Kolhva koka molhnemak apieseksek ketlhengkap ham, evalhok koka malha ntemak aknema ham, avanhek akpaihekha evalhok ngkanek avanhek apkeltakmelkeskamo apankavek apkakhaikamok ham, apketlhengkeskangkek na aliennaktema nkek meliaskeiam Cristo.

⁶ Apkenmaiangke lhta takha ketlhengkap kakpota etnangkok apveske apanko'ok Jesucristo, ntasek na eltaqmelkasakpoho apkellanemakha nak etnangkok ma'a.

⁷ Etnamok hata apkeliennaktema aniem'o Cristo, malha aktonak pa'at aliennakteskama avhok anak, eliennaktes hata nhan meliaskeiam anak ka aktemakha lhta mota nema atlhekmoskama, etnamo ta nha mota gracias Eniapom Neten.

⁸ Ellaho ta enenlhet apkenmahai'a la eliennengkesek aniem'o apkeliangveiakmo apanko'ok apankave, apkelelpeiveskasekha nhan qaselha nak apkenmopvanka'a ania'a kanhan henganemakha apanko'ok apankavek, koka have aniem'o Cristo m'a.

⁹ Ka apiokha nak Cristo apnek ma'a Eniapom Neten apiokho panke nak,

¹⁰ ketlhengkap na apsavhommakpo apankavek aptangko apkelpasmekha m'a. Apto nhan ma'a apveske takhalhet'ok kasekapo av'alho'ok aknema nak anmovanka'a ka nhan alientalhnemo nak.

¹¹ Neksa apkelpasmekha Cristo ketlhengkap, Eniapom Neten malha apkeliaqtemenkasekamok nekha tkok apiempeiok meliamolhma aniem'o Cristo, koka mok aktema m'a enenlhet apankave nak judios apkeliaqtemenaikamo nak nekhatkok apkellammelhakha.

¹² Neksa lhta nhan apkellavkesammap konne iemmen ketlhengkap, malha lhta nha ntemak apkelkatonnammakpo lheme la Cristo, netamen apnaklhatekhangveiakmo nhan lhemek ma'a aniem'o meliaskeiam apmopvana Eniapom Neten apto aplhatekhaskeiam ma'a.

¹³ Lhennenga lhta nhan ketlhengkap malha apkeletsepma lhta ntemak aniem'o meliamolhma, aniem'o nhan metka nhan nema aliaqtemanma nekhatkok apiempeiok meliamolhma nak, kolhva koka apkellangkek Eniapom Neten aliennaktema apnenio'ok lheme Cristo, kakpota nhan etneskesama apankek lhamakho apkeltemakha ngkollatsekama aniem'o apkelpasmekha Cristo.

¹⁴ Nietnengkek nak nanek lhennenga lhema vakkahak henganemakha aktalhesammalhka aknaikamok malha neliaqmoikamok la'a, koka Eniapom Neten alhta malha apiaqlhakvekha neten iamet aktenneskama m'a, aptevasekho nhan ma'a.

¹⁵ Apkel·hatsoskeskekho nhan anmovanka'a kanhan alientalhnemo kasekapo' av'alho'ok, akietnema nhan alientalhnemo, aptemeskesekho nhan koneng ankavek napaqtavek enenlhet'avok aniem'o nhan ma'a Cristo, apkeiveseikokho nhan atlhengama napaqtavek enenlhet malha anmammalhka la'a.

¹⁶ Ka nkeniemai'ak na mellammelhek mokhom ketlhengkap apkeliematkesangka la enenlhet'avok aniem'o aptekamok, apienaikamok, melpalhakvaiam na ktaqmelaikama lhma la apanko'ok, kakpota nhan pelten aphalhnankok la'a, aknem sabado nennekhelha nhan.

¹⁷ Koka lhamakho qaselha nak nenvetai'a have iokhalhmek ankek ma'a, malha koka ntak peskeska nkok ma'a qaselha altaqmanma nkek akmo'o ta nkovak emmanie nak, koka Cristo apto have niapak ankek ma'a.

¹⁸ Mellailho nkek enenlhet apkeliematkesaikama la'a ngkanek apkeliavenkaskesama mota apkelvesai'a ángeles ma'a, aptangke niekhe nalhep'avek apvalho'ok ma'a, apkenmopvanka ania'a koka, apketlheno alvetai'a apaqto'ok koka apkeltaikama apankek ma'a, nkeliephesekama mota apkellammakpo atlhenaikama apvalho'ok apanko'ok apankavek ma'a.

¹⁹ Ka enenlhet'avok anak ma'a have apkellelto apkelpasmekha Cristo apto nak malha apqatek, apkellaikamok na aptekamok apiokha apkelvanengkeskama la'a, apkelelto nak apkennemolhema. Cristo apkelpasmekho nhan ma'a apkennemolhema apanke, malha aktonak apiokha nak lhema enenlhet nnankek alpasmekha alietetakha kanhan ahak kakpota nkovanamok ma'a apkeltemakha nhan ngkotnek Eniapom Neten.

Akmaskema hengenmaikama leyes aniem'o enenlhet

²⁰ Neksa malha apkeletsepma lheme lhta Cristo ketlhengkap, apkelpaknengkaskesakhe lhta akmovana henganemakha aniem'o enenlhet. ¿Se kla ktemo aqnaktetemo nak mokhom henganemakha nak, he?

²¹ Ka ntemak aklheianma, ¡menmangvomankek ham! ¡Metavamonkek ham! ¡Menmamonkek ham! Ka ntemak ma'a.

²² Koka lhamakho henganemakha nak enenlhet apankavek apanko'ok ma'a, ka nkovangkak ketsek heng, nkomaskengvomok koka akiennaktema m'a.

²³ Malha niekhe akto neten ankek akiaspommalhka m'a ngkanek nkeltavek antek nalhepek ankek ma'a, anteniok na akiavai'a nkek eniempeiok angeliehekhok ma'a, nkeltavek na nkoiatangkok neniokha nak altemo nkoliehekhok ma'a, koka henganemakha nak mamma aiempehek kakpota nkotneskasekha koneng aliaspongkomakha nak engelvalho'ok.