Apocalipsis 7 - Nuevo Testamento Toba Maskoy

Nema alelkaskama 144.000 enenlhet

¹ Netamen ma'a asvet'a lhta 4 ángeles apkelakno akieto m'a lhema tep aknem, po'ok na nelhkeiha', po'ok na mankolha aknem, po'ok alhta nhan nepieiam. Apkenmangke lha m'a 4 alelhkaianlha alhkaiam kakpota mankolhkame takhalhet lhepop, takhalhet na alvata, takhalhet'ok na iamet.

² Asvet'o lhta nhan lhema ángel mokhom apkeniem'o m'a tep aknem, nietne lhta lhema qaselha hentalheskama ankok Eniapom Neten mangkotnengvaiam annelha apkaniemhaikama apankok ma'a. Apiennakteske lhta nhan apaivoma m'a apkelpaqmetkeso 4 ángeles lhek apkellelto lhta nema allaikamok apkenmopvanka'a kakpota enaqtevaksek lhepop lhmankek ham kakpota nhan alvata, lhta aptak:

³ —¡Ellaielh sekhe! Menaqteves ankek lhepop anak, kanhan alvata, iamet nahan. Nkaimelhkek sekhek annaktalhaksek alpaihakha napaqta'a apkellelto la apkellasennaikama Eniapom Neten engankok —lhta aptak ma'a.

⁴ Ka asleng'o lhta netamen na m'a 144.000 nema alelkaskama enenlhet'avok apieseksek ma'a aplhamakho apkelpasmekha apketkak neptamen Israel.

⁵ 12.000 nema alelqaskama alhta aknema apkelpasmekha apketkak neptamen apkelleniem'o m'a Juda. 12.000 alhta nhan apkelleniem'o Ruben. 12.000 na apkelleniem'o Gad.

⁶ 12.000 na apkelpasmekha apketkak neptamen apkelleniem'o Aser. 12.000 alhta nhan apkelleniem'o m'a Neftali. 12.000 na apkelleniem'o Manasés.

⁷ Kanhan 12.000 nema alelqaskama apkelpasmekha apketkak neptamen apkelleniem'o m'a Simeon, 12.000 alhta nhan apkelleniem'o Levi, 12.000 na apkelleniem'o Isacar.

⁸ 12.000 alhta nhan apkelpasmekha apketkak neptamen apkelleniem'o m'a Zabulon, 12.000 na apkelleniem'o José, kakpota nhan 12.000 apkelleniem'o m'a Benjamin.

Aplhamakma enenlhet apkenmopai'a apkelentalhnema

⁹ Netamen na m'a asvet'o lhta apentalhnema apanke enenlhet lhmankek ham, lhamakho aptemakha apkellavakha, aknema apkelpasmekha apketkak neptamen, natemma kanhan lhamakho aktemakha apkelpaqmeiasma. Aplhanie panke lhta enenlhet ma'a, mammopvana angelietsete lhta m'a, apkelanvakhe lhta m'a akieto naqtek aptanema apveske kanhan napaqtek Nepkesek Apketkok. Apkenmopai'a panke lhta nhan apkelentalhnema, kakpota nhan ietapa'ang apva'a apmeio'ok.

¹⁰ Apkeliennakteske lhta apkelpaqmeiasma m'a, lhta aptangkok: —Nengelvongkasemmalhka tep anak alleniem'o m'a Eniapom Neten apnemo m'a aptanema apveske kakpota nhan Nepkesek Apketkok —lhta aptangkok ma'a.

¹¹ Apkelel·halhiengkakme lhta nhan ángeles aptanema apveske, metno apketko'ok kanhan 4 kaselha allaniemhaiangka m'a. Ka apkelelteklhengko lhta nhan aptapno'ok ma'a akvakmo apkelteklheio napaqta'a lhepop napaqtek Eniapom Neten apnakha aptanema apveske aniem'o apkellai'o m'a, lhta aptangkok ángeles:

¹² —Amen, angeliavenkeskasama ta mota apvesai'a Eniapom Neten engankok, angeltangkok na apiavai'a apankek, apientalhnemo kanhan nema apiamo. Antangkok hata mota gracias, nengellai'o nhan, angeltangkok na nema apmopvana, apiennaktema nhan metka akvaiam annelha aliekaikamok iantelhkapa. Amen —lhta aptangkok ma'a ángeles.

¹³ Netamen ma'a lhema metno apketkok alhta henmalhnema m'a, lhta aptak heiano: —¿Apiave ie lheiap apkenmopai'a nak apkelentalhenma kakpota nhan apkelleniem'akha, he? —lhta aptak heiano.

¹⁴ —Ma', lheiap koka apiave —lhta stak askatemmongka m'a. Koka lhta aptak mokhom heiano: —Koka enenlhet'avok anak hengke'e apkellelto lhta apkelvetaiangko akientalhnema, malha apkelieniesekamok apkelentalhnema kakpota enmopekhak ma'a aniem'o lhta ema apankok Nepkesek Apketkok.

¹⁵ Ka ngkanek elloka mota napaqtek Eniapom Neten apnema aptanema apveske m'a, ellasennama mota nhan knem anke, pelhasep nahan akieto m'a apnemakha. Apto apnema nak aptanema apveske etnangko mota apketlhelhma'ak, eltaqmelkesek nahan.

¹⁶ Mellengankek hata mokhom mek ma'a, aknem annapma kakpota nhan mahat.

¹⁷ Eltaqmelkesek hata mota Nepkesek Apketkok akieto m'a aiseksek aptanema apveske, malha akto nak ma'a apkellanekama nak nepkesek apkeliantemekha akieto akteiapmakha iemmen hengaikamok akiennaktema ennenio'ok, Eniapom Neten hata nhan el·hatsoskasangkok aimen'ok apaqto'ok ma'a —lhta aptak heiano m'a.