Apocalipsis 4 - Nuevo Testamento Toba Maskoy

Nema akiavenkaskesaikama apvesai'a Eniapom Neten akieto neten

¹ Netamen alhta m'a, asvet'o mokhom atong akmaihekha akieto m'a neten, lhta ntak heiano mokhom nema aliatekama lhta akiennaktema nke lhta apaivoma, malha lhta ntak trompeta nak akpaivoma, lhta ntak: —Enianamet halep, ataskesek hata lhamakho qaselha akmak'akha ta ngkotnek netamen ma'a —lhta ntak heiano nema aliatekama.

² Mpelapkaske lhta akvo'o aklanei'o nkek evalhok apmopvana Espíritu, asvet'a lhta aptanema apveske akieto m'a neten, apne lhta m'a lhema enenlhet.

³ Apkelienmave lhta enenlhet malha lhta akto nak metaimong aktek aktaqmanma diamante nlho ka la nhan rubi. Nekhav'ak alhta aptanema apveske m'a apkenme lhta nhan pemhet ma'a, apkapommatave lhta nhan malha metaimong aktek aktaqmanma esmeralda.

⁴ Nnangke lhta nhan 24 apkeltanema apkelveskai'e nema alpeneskeskamo m'a nekhav'ak apnakha m'a aptanema apveske. Apkakhengveiakmo lhta nhan 24 metno apketko'ok ma'a, apkenmopai'a lhta apkelentalhnema, nnaianke lhta nhan apkelelhnekha apqatko'ok oro alanemmalhka.

⁵ Nkelentepke lhta m'a apkelienmoma, apkelhtenioma kakpota nhan nema alpaqmeiasma akieto m'a aiseksek aptanema apveske. Nkellalaive lhta nhan 7 talha alhanko'ok ammelhakha aptanema aktaqmanma m'a, alietkesammalhka lhtoka m'a 7 espíritus aniem'o Eniapom Neten.

⁶ Nietnengke lhta nhan ma'a ammelhakha aptanema apveske malha alvata, alhnai'o nkek iemmen malha lhta alvata akiav'akha nak, malha lhta nhan ieiam appok la'a nenvetai'o konne nak. Kaselha lhta nhan 4 m'a aliaiheiangka m'a nekhav'ak aptanema apveske, nketsavhomavek anke lhta aliokha aqto'ok ma'a.

⁷ Lhema lhta malha iama akmeiva, mo'ok alhta malha buey, mo'ok alhta nhan malha enenlhet, mo'ok na malha alhta meivoma apkenpaikama nak.

⁸ Moklhem'a lhta nhan nnaiangkok 6 alhempanko'ok, nketsavhekhave lhta nhan aqto'ok aiempeiok kanhan av'alho'ok ma'a, nkennekmasengke lhta nhan lhamakho aknem, pelhasep nahan, lhta ntangkok ma'a: —Apokkenammap, Apokkenammap, Apokkenammap apanke memangveiam ngkolatsekama apveske Eniapom Neten apto vanlha lhema aknema apmopvana apanke, apto apnema tep nak nanek, apto nhan apnema kolhvave nak, apto ta nhan apvekta —lhta ntangkok altakneskasengko m'a.

⁹ Neksa aliavenkaskesaikama lhta mota apvesai'a kaselha allaniemhaikama m'a, allai'o lhta nhan, ntanke lhta nhan gracias ma'a apto apnema aptanema apveske, apto nhan apkaniemhaikama metka akvaiam annelha aliekaikamok iantelhkapa.

¹⁰ Apkellelteklhengke lhta nhan aptapno'ok metno apketko'ok, apkelel·halhentamo lhta nhan napaqtek apto apnema aptanema apveske m'a aniem'o apkellai'o apto metka akvaiam annelha aliekaikamok iantelhkapa apkaniemhaikama, apkelhangke lhta mota apkelelhnekha apqatko'ok napaqtek apto apnema aptanema apveske, lhta aptangkok ma'a:

¹¹ —Apveske kanhan Eniapom Neten engankok, nietavek ankek angeliavenkaskesok apvesai'a lheiap, ngkolhek na ak'o mota. Ietavek na elhkak apmopvana lheiap ngkanek apkelentepkeskama lhamakho qaselha aknaiangko nak lhma nkek ham, ngkanek apmahai'akha lhta etnek lheiap ma'a —lhta aptangkok metno apketko'ok ma'a.