Apocalipsis 21 - Nuevo Testamento Toba Maskoy

Alhnankok neten kanhan nalhepop

¹ Netamen asvet'o lhta alhnankok neten kakpota nhan alhnankok nalhepop nkanek mmaskengvakme lhtoka nenvetai'a m'a amanie lhta akteiapma lhepop kakpota nhan amanie lhta neten, mmaskengvakme lhta nhan alvata.

² Asvet'a lhta nhan akvaivantamo natemma akpokkenammalhka aniem'o neten, akietnemo lhta m'a napokha Eniapom Neten, alhnankok Jerusalen alhto ka akvesai'a m'a. Apkeltase lhta aktalhnema kanhan annatanma malha kto nak ngkelvana alailhema akmahai'akha la'a.

³ Asleng'o lhta nhan nema aliatekama akiennaktema nkek aniem'o m'a neten, lhta ntak: —Ka natemma apankok Eniapom Neten ham, elloka ta lhemek enenlhet'avok ma'a, etnek hata nhan Apveske apanko'ok ma'a, etnangkok hata nhan apkennemolhema.

⁴ El·hatsoskesangkok hata aimen'ok apaqto'ok apkellelto la apiapqalhema, nkomaskok hata nhan apkeletsepma m'a, apkeliapqalhema nhan, nkomaskok hata nhan apkelasnekama kanhan anmaska ngkanek nkomaskengvomok hata aktakha nenvetai'a nak neniava lhmankek ham —lhta ntak nema aliatekama.

⁵ Koka apto lhta apnema aptanema apveske m'a, lhta aptak: —Askelan'ak ko'o alhnankok lhamakho qaselhaha —lhta aptak. Koka lhta aptak na mokhom heiano ko'o m'a: —Etalhes astakha nak aspaioma, akto have niapak ankek, nietavek mei'askamek lheiap —lhta aptak heiano m'a.

⁶ Netamen ma'a, lhta aptak na mokhom heiano: —Mpenesalhkehe, ko'o asto nak alfa kakpota nhan omega, ampakhasekha kakpota nhan aktakha nnelha. Enenlhet akiemak'o la apiaspok, angvangkok hata apiama iemmen akteiapma nalhepop hengaikamok akiennaktema nenganiemhaikama, metka akianmoma.

⁷ Enenlhet apiephongveiakmo la'a, angvangkok hata lhamakho qaselha aktaqmanma, hetnek hata nhan Eniapom Neten apankok, atnek hata nhan eietka.

⁸ Koka enenlhet la ai'a apvalhok, apiaskeiam, aposkama qaselha, apkaqhema po'ok, apkenmensangveiam alhma, aptema apiolhma melatsekama, apiavenkaskesaikama akvesai'a qaselha akiokha alanemmalhka kakpota nhan apmopvana ania'a, ngkolhek hata akiantemakho akieto m'a sanga akietnemakha alaivomakha talha kanhan azufre, koka akvesai'a m'a hanet aktaiekho nengetsepma —lhta aptak heiano m'a.

Aphalhnankok temma apiav'akha Jerusalen

⁹ Asvet'o lhta lhema phapak ángel apkeniem'o m'a apieseksek 7 lhta apnaikamok 7 nohaikok apanko'ok allaneiangko aktakha nnelha 7 qaselha akmovana hentevaksek ma'a, lhta aptak heiano: —Elheng, ateskesek hata apmahai'akha Nepkesek Apketkok kakpota etnek aptava m'a —lhta aptak heiano.

¹⁰ Ngvet'a lhta ehaqtek aniem'o Espíritu hetaskeskama, heiantemakho lhta ángel nalhma akhaiam akiavai'a, netne kankek. Heteskaske lhta ma'a akiav'akha natemma akpokkenammalhka akvesai'a lhta m'a Jerusalen akvaiventamo lhta m'a apkeniem'o napaqtek Eniapom Neten.

¹¹ Nkapommatke lhta natemma nak aniem'o Eniapom neten, malha lhta kto nak metaimong aktek altaqmanma nkoie akvesai'a nak jaspe, alhnakho nke lhta m'a malha lhta kto nak ieiam appok nenvetai'o nak taiep.

^12-13 Nietne lhta m'a aksavhekho nkek akhalhtemommalhka akiavai'a nkoie, netnek ankavek alhta nhan napokhav'ak ma'a. Nietne lhta nhan 12 atno'ok, tres alhta akieto tep aknem, tres na akieto nelhkeiha, tres na akieto ieiam, tres na akieto aktalhnengvanlha knem. 12 lhta nhan ángeles apkellanekama m'a. Nnangke lhta nhan alelkasemmalhka moklhem'a atno'ok apkelvesai'a apkelveskaie lhta 12 aknema apkelpasmekha apketkak neptamen Israel.

¹⁴ Ka akhalhtemommalhka lhta m'a nnangke lhta aliennakteskama 12 metaimong aliavai'a koneng, nnangke lhta nhan ma'a moklhem'a alelqasemmalhka apkelveskai'e 12 apkelapaskamo pankok alhta Nepkesek Apketkok.

^15-16 Apto lhta hepaqmetkeskama ángel nietne lhta iamet alietkesammalhka ankok alienmomo nkek oro. Apmak'a lhta elietkesek na temma lhta m'a, atno'ok kakpota nhan akhalhtemommalhka nepiava m'a. Netamen apkelietkeso lhta na temma m'a, aknemo mo'ok alietkesammalhka akvenaktema, akpaihema kanhan neten, 2.220 kilometro lhta m'a.

¹⁷ Netamen apkelietkeso lhta nhan akhalhtemommalhka m'a, 65 metros alhta m'a, koka ángel apmama lhta apkelietkesaikamok apankave nak enenlhet apankavek.

¹⁸ Akhalhtemommalhka lhtoka alanemmalhka malha aktonak metaimong altakmanma akvesai'a jaspe, kakpota nhan natemma alanemmalhka alienmoma nkoie oro, malha ieiam appok alienmoma.

¹⁹ Kakpota nhan metaimong aliennakteskama avhok akhalhtemommalhka malha annatanma lhamakho aktemakha metaimong aktek altakmanma nkoie. Koka amanie lhta metaimong nietne lhta aknatanma jaspe, hanet aktaiekho lhta nhan metaimong lhtoka zafiro aknatanma, koka hanetolhem'a lhta metaimong agata aknatanma, koka nhan cuarta metaimong esmeralda aknatanma.

²⁰ Koka quinta metaimong onise aknatanma, sexta koka metaimong aknatanma rubi, koka septima metaimong crisolito aknatanma, koka octava metaimong berilo aknatanma. Novena koka topacio aknatanma, decima koka crisoprasa aknatanma, koka undecima metaimong jacinto aknatanma, kakpota nhan duodecima metaimong amatista aknatanma m'a.

²¹ 12 atno'ok alhto ka alanemmalhka perla, moklhem'a atong alanemmalhka lhtoka lhema perla. Koka amai av'alhok natemma alanemmalhka alienmoma oro, alhnakho nkek malha akto nak ieiam appok nenvetangveiakmo taiep.

²² Ma lhtoka ata'ak ma'a pa'at akpokkenammalhka m'a apieseksek natemma nak, ngkanek apveske Eniapom Neten apto vanlha lhema aphapak aknema apmopvana apanke kakpota nhan Nepkesek Apketkok aptangko m'a malha pa'at akpokkenammalhka.

²³ Ma lhta nkaimommalhkak aknem kakpota nhan pelten alapommatema la m'a, ngkanek apkapommatema nak Eniapom Neten apommatma m'a, Nepkesek Apketkok na apto malha talha alhankok.

²⁴ Lhamakho apkellavakha ta eliaihama aniem'o m'a apkapommatema m'a natemma nak, lhamakho apkeliav'akha apkelveskaie ellangkongvakhak hata apkelletsekama m'a.

²⁵ Mamma ta etnek pelhasep ma'a, lhamakho aknem hata ngkotnek anmaihema atno'ok ma'a.

²⁶ Lhamakho apkellavakha ta elletsakhesek qaselha apanko'ok anmennave nkoie' kanhan altaqmanma nkek ma'a.

²⁷ Mankoklhek hata qaselha alpaiseiam ma'a, metlhek na enenlhet melatsekama la'a, apmopvana ania'a la nhan. Vanlha ta elentelhek ma'a aknangko la apkelvesai'a vakkahak ankok akiennaktema enneniek, vakkahak apankok Nepkesek Apketkok.