Apocalipsis 2 - Nuevo Testamento Toba Maskoy

Ania'a apasammalhka iglesia akieto Efeso

¹ —Etalhes no lheiap ania'a nak kakpota eniapaskesek ma'a ángel apno m'a iglesia akieto Efeso, ka ntak ania'a hengke'e: Apto nak apkenmaikama 7 iav'a akiennakha nak apoktong, apiaihema m'a aiseksek 7 alhvo'ok oro alapommatkeskama, ka aptak nan ma'a:

² "Asiave ko lhamakho aptemakha apkelanai'a lheiap, asiavek na akientalhnema apmakmekama metka apiamasangveiam, asiavek na menmamo takha enenlhet meliamolhma, apkeliepkonke lhta nhan lheiap apkeltemakha enenlhet apkeleltammakpo apankave lhta nema allapaskamo, koka have ma'a, apkenmopvanka ania'a lhta m'a.

³ Metka lhta nhan apekheskama lheiap ka nhan apvaskapma neksa akientalhnema aniem'o heiasennaikama, ma lhtoka heiamasangvakmok heieplekama m'a.

⁴ Lhema qaselha koka mankoleklemo evalhok apkelanai'a lheiap, apkelvateskakmek heiamelaiam mangkolhnok ma'a sekhe anke lhta.

⁵ Kolheianvakho no apvalhok sekhek anke lhta avanhek ankek lhta heiamelaiam, eniempangvakho ta mokhom lheiap ma'a, ¡eiaqmongkasekha ta mokhom mo'ok apvalhok lheiap! Koka metno ta heng, anianta ta ham annaktengvatak hata alhva nema apommatkeskamakha nak.

⁶ Koka nleiavek evalhok lheiap aptaqnevo m'a ngkolatsekama nak allanekamo mota Nicolaitas, astaqnevakkek ko lha m'a".

⁷ —¡Eltaqmelkaso no apkellailhemo apaiko'ok anak apmak'akha etnek aplheianma m'a Espíritu aklhamakho nke nak iglesias!: "Apkellelto ta apkeliephongveiakmo, allangkok hata aptekamok akielhna iamet hengaikamok akiennaktema enneniek, amhamo nak ma'a iokhalhma aktaqmanma nkoie' apnemakha nak Eniapom Neten", lhta aptak.

Ania'a apasammalhka iglesia akieto Esmirna

⁸ —Etalhes no mokhom lheiap ania'a kakpota eniapaskesek ángel apno m'a iglesia akieto Esmirna, ka ntak ania'a hengke'e: Apto nak ma'a apmanie nkek kanhan alhaie nkoie, apto lhta apketsepma, netamen koka m'a aplhatekhangvakmek ma'a, ka aptak na m'a:

⁹ "Asiave ko'o aplengaiangko mota lheiap, mamma apketsekama, koka malha aptemak nema la apketsekama. Asiavek na ko'o apkeltaknongkoma lheiap ma'a apkellelto nak apkeleltammakpo pankave nak judios, koka apkellelto ankesekhelha mota Satanas ma'a.

¹⁰ Koka meniaga nkek akmak'o ta nkovak aplengaiangko lheiap. Moklhem'a ta apieseksek anak ketlhengkap ngkolhek hata allaklhengkaso nemmammalhkelha aniem'o aveske keliaqhameio' kakpota nhan ngkolhek aliepkono m'a, ellengangkok hata akvakmo 10 aknem. Ka apvaskapo ta lheiap m'a akvakmo apketsepo niekhe, ko'o ta angvangkok akianmoma apnaksepma akvesai'a akiennaktema apneniek mokhom".

¹¹ —¡Eltaqmelkaso no apkellailhemo apaiko'ok anak apmak'akha etnek aplheianma Espíritu aplhamakho apanke nak iglesias!: "Apkellelto ta apkeliephongveiakmo m'a, mmaskek akto hanet aknaqtevasekha nengetsepma m'a", lhta aptak Espíritu.

Ania'a apasammalhka iglesia akieto Pergamo

¹² —Etalhes no mokhom lheiap ania'a kakpota eniapaskesek ángel apno m'a iglesia akieto Pergamo, ka ntak ania'a hengke'e: Apto nak akietnema pelettav hanet ahanto'ok nema anmalhnongkoma, ka aptak na m'a:

¹³ "Asiave ko'o apnek lheiap akieto akietnemakha nak aktanema aveske Satanas, man koka heieniekhak lheiap, meietnekhok nahan, mang na hei'askeiakmok lheiap neksa apmatnama alhta Antipas apto lhta nhan ma'a apaieskama mota ania'a asvesai'a ko'o, meietnekho lhta nhan ma'a Antipas, lhtoka apmatnamak ma'a akieto aknemakha Satanas.

¹⁴ Koka mankoleklemo evalhok lheiap ketsek ankek qaselha ngkolatsekama apkelanai'a, apkenmaiangko na mota takha enenlhet apkellelto nak mankonmahai'a elvatesangkok hengetlhekmoskama Balaam annenga. Apiateiangko lhnak nanek m'a apkaiangko apaivoma Balac kakpota eliennengkesek ma'a israelitas, eleltennaksek ania'a ellanak etavangkok apkennapekamok apnaqtoskama apkellaikamok qaselha akiokha alanemmalhka nak ma'a, kakpota nhan nelanaktema.

¹⁵ Kanhan mankoleklemok evalhok apkenmamo takha lheiap apkellelto nak mankonmahai'ak elvatesangkok hengetlhekmoskama Nicolaitas, astaqnevakkek ko'o m'a hengetlhekmoskama nak.

¹⁶ ¡Eiaqmongkasekha toka mo'ok apvalhok! Koka melanakho ta heng, avatak hata ham kolhvave nak, annapalhkak hata enenlhet'avok anak akieplomo pelettav akvenaktema akteiapma ehetong anak".

¹⁷ —¡Eltaqmelkaso no apkellailhemo apaiko'ok anak apmak'akha etnek aplheianma m'a Espíritu ka aklhamakho nke nak iglesias!: "Apkellelto ta apkeliephongveiakmo allangkok hata nentoma mana nema alposkama, ka nhan metaimong aktek anmopai'a akietno aktalhesammalhka nenvesai'a alhnankok melioho' mokhom, vanlha koka enenlhet apto aplhevai'a ta apiavek hata m'a", lhta aptak Espíritu.

Ania'a apasammalhka iglesia akieto Tiatira

¹⁸ —Etalhes no mokhom lheiap ania'a nak kakpota eniapaskesek ángel apno m'a iglesia akieto Tiatira, ka ntak ania'a hengke'e: Apto Eniapom Neten apketka, akietno malha talha alapommatema apaqto'ok, kanhan apmanko'ok alapommatema nkoie' malha kto nak tavapak bronce kolhva nema alalhnasekha nak, ka aptak na m'a:

¹⁹ "Asiave ko'o lhamakho qaselha apkelanai'a lheiap, asiavek na mangheiaskeiam ko'o, heiamelaiam nahan, asiavek na nkanantaiangkek apmakmekama, mangkolhnok ma'a sekhek anke lhta, metka nnelha apmakmekama lheiap kakpota eltaqmelkeskesek apkellangiemhaikama po'ok.

²⁰ Koka mankoleklemok evalhok apmamo takha lheiap ngkelvana nak Jezabel, aklhenammalhka nke mota aktema altennasemmalhka ania'a, koka vanlha akteniaikama nkoliennenkesek askellasennaikama nak ko'o, aliateiangko nhan ntasek etavangkok apkennapekamok apnaqtoskama apkellaikamok qaselha akiokha alanemmalhka, kanhan apkellanaktema.

²¹ Askangke lhta ko'o aknem askelailhema nkoiaqmongkasekha mo'ok av'alhok ma'a, koka mankomaskengvaiakmok akmahai'a nkomenso'ok m'a.

²² Angvapaskesek hata akiavai'a akmaska aiempek, kanhan akientalhnemo takhaplhet'ok enenlhet'avok apkellelto la apkelpathetaikamo mota m'a, melvatesanko la nhan apkelvanekamok aktemakha alanaktema m'a.

²³ Annapkesek hata nhan atkak, netamen ma'a aplhamakho iglesias nkotlhenek hata apvalho'ok asto asiekpelkemo alhnakho nkek alietnaikama apaqto'ok kanhan apvalho'ok ma'a, allangkok hata akietemo aktemakha la apkellanekamok akiaqmoiekha ngkolatsekama kanhan aktaqmanma.

²⁴ Koka ketlhengkap ham ko Tiatira apkellelto nak melieplavkeskama atlhekmosekamok ngkelvana nak, meteniaikamok na atlhekmosekamok akvesai'a qaselha akielhammalhka konne ankek aniem'o m'a ankok Satanas, vanlha askeltavek ko allangkok lhema aspaioma.

²⁵ ¡Kolhnamok apkenmaikamok takha asketlhekmosekamo lhta akvakmo asvakta mota mokhom ham!

²⁶ Apkellelto ta apkeliephongveiakmo, apketlhengkaso la nhan askellanemakha etnangkok metka nnelha, allangkok hata aptaikamok apkelientalhnemo apieseksek lhamakho apkellavakha,

²⁷ ka aptemo lhta helanei'o tata heiaiangko lhta asientalhnemo. Etnangkok hata nhan apkelveskai'e apkeliennaktema, enmama ta m'a iaqiopvahek tavapak koka. Elelhpokhaksek hata m'a apkellavakha lhmankek ham, malha ngvenka nak nialpa apkelhpokhammap hata ngkotnek ma'a.

²⁸ Allangkok hata nhan iav'a apteiapma nak mopakmo la konne atsai'a".

²⁹ —¡Eltaqmelkaso no apkellailhemo apaiko'ok anak aktakha aplheianma Espíritu aklhamakho nke nak iglesias!