Apocalipsis 18 - Nuevo Testamento Toba Maskoy

Nema aktevaskama apiav'akha temma Babilonia

¹ Netamen asvet'o lhta mokhom lhema ángel aknema apmopvana apanke apvaivantamo lhta nalhepop. Nketsaskesave lhta lhma nalhepop anak aniem'o akiavai'a nkek apommatema apiokha.

² Apiennakteso lhta nhan apaivoma m'a, lhta aptak: —Nnek aktevaso apiav'akha temma Babilonia, ntakhek akhaiangkolha kasekapok av'alho'ok, alielhanmomakha nhan lhamakho aktemakha kasekapok av'alho'ok alpaiseiam, ntangkokhek na alhano'ok anata ngkollatsekama alpaiseiam.

³ Nnek aktevasakho m'a ngkanek nkelieieskangke lhma aplhamakho apkelveskai'e lhmankek ham aniem'o allaikamok vino anmensangveiam alhma ankok ma'a. Lhamakho macatero nhan aptangke nkeskama patakkom apanko'ok ngkanek alanai'a mota allangkemmalhka ankok ma'a ngkolatsekama, ntevaskangkek na patakkom ankok ma'a —lhta aptak apiennakteso apaivoma ángel.

⁴ Netamen asleng'o lhta mokhom nema aliatekama aniem'o neten, lhta ntak ma'a: —Elentep ketlhengkap enenlhet ehenkok apiav'akha temma nak ham, melvanenvom ankek na aktemakha ngkolatsekama nak ham kakpota melvetiek apkellengaiangko qaselha akmovana hentevaksek akvo'o ta ham,

⁵ ngkanek nkenmakhek neten ngkollatsekama, apvet'ak na Eniapom Neten nkoietemo aptaiangkolha m'a.

⁶ Hanet aptaikokho ta nhan etnangkok apkeliaqmongkaskesekha aniem'o lhta nhan aknaktevaskamo ketlhengkap ma'a, ellangkokho ta nhan hanet aptaikokho apkellaikamok vino alanaktema ankok alhta m'a kakpota nkoinek ma'a.

⁷ Avanhek anke lhta anmalhkoho, ntevaskangkek patakkom ankok aniem'o atseskeskama av'alhok aktemengveiakmo lhma. Kolhva koka ketlhengkap ntasek ellengaskesamok hata akiavai'a nkek ma'a kakpota nkovene nkeskama nkek ma'a aniem'o aklengaiangko akmaska. Vanlha lhta nha mota aklheianma av'alhok aktema aveske takhalhet aktanema, aklheianmo lhta nhan av'alhok mankovenek hata, mangkotnek hata nhan lhentampe, lhta ntema mota alketansema av'alhok ma'a.

⁸ Koka lhema aknem hato ka nkovak qaselha akmovana hentevaksek ma'a, mek, akiapqalhemmalhka kakpota nhan netsepma, ngkolhek hata nhan akvanlhakho m'a nkanek Eniapom Neten aknema apmopvana apanke elhenek akselhnanemmalhka m'a.

⁹ Elvetak hata akmeta eten ankok aplhamakho apkelveskai'e apkellelto lhta apkelpasengvaiam amota allangkemmalhka nkok ma'a kanhan apkelvanekamok aktemakha alanaktema, elleklhamong hata, eiapqalhek hata nhan apkelietnai'o na'at ma'a.

¹⁰ Koka melteteskamek hata nhan ma'a aniem'o apkellai'a aktakha aklengaiangko m'a, mokhek hata elaqnek ma'a elammelhok, hata etnangkok na m'a: "¡Ai, mamma nkotneskesek lheia apiav'akha temma Babilonia, nietne lhta niekhe akmovana, koka mpelapkaske akvet'o akientalhnema nkek ham!"

¹¹ Eliapqalhek, elleklhamong hata nhan aplhamakho apkelhaikamo na mota qaselha apanko'ok aliekpelkemelha la'a aniem'o apkelietnai'o na'at ma'a ngkanek mankonmalhkek hata mokhom qaselha apanko'ok apkelhaikamok apkelletsekamaha,

¹² ka kto nak oro, plata alienmomo, metaimong aktek akmennave nkoie, kanhan perlas, ietamopai'a lino apielhvasema purpura apmennave panke, kakpota nhan lhamakho aktemakha iamet nekha'ak anmases aimes, qaselha nhan alanemmalhka marfil, qaselha alanemmalhka ankok iamet nekha'ak akmennave, bronce, tava apak kakpota nhan marmol.

¹³ Kakpota nhan apkelletsekama mota canela, panaktema ava akmases aimes akvesai'a incienso, aimenek akmases aimes, olivano, vino, aceite, alena, trigo, kakpota nhan apnaqtoskama akmovana nkolpatmok qaselhaha, nepkesek, etanlheng, koleto, kakpota nhan apkeletsoiam nema allasennaikama nema apkelianmoma, koka enenlhet apankavek ma'a, lhamakho qaselha nak apkelhaikamok ma'a.

¹⁴ Hata nhan etnangkok ellanak apiav'akha temma nak: "Mamma kolhva akielhna ankok akmases alhta nkotvok, mmaskengvakmek qaselha anko'ok altaqmanma akmennave nke lhta"

¹⁵ Mokhek hato ka elanvak ma'a apkelhaikamo mota qaselha apanko'ok apkellelto altemeskeskama nkeskama patakkom apanko'ok aniem'o mota anmama qaselha apanko'ok ma'a apiav'akha temma nak ma'a, elagak hata nhan ma'a aniem'o nema akiaqmongkasekha aktemakha m'a, eliapqalhek hata, elleklhamong hata nhan,

¹⁶ hata etnangkok heng: "Ai, lheia laie apiav'akha temma, vanlha lhta mota aktalhnekha ietamopai'a akmennave panke lino, ietamopai'a apielhvasema kakpota nhan purpura, annatanma mota oro, metaimong aktek altakmanma kakpota nhan perlas,

¹⁷ mpelapkaskek koka atsepanenvakmo m'a", hata etnangkok ma'a. Ellanama ta nhan mokhek ma'a apkellelto nak apketlhengkeskama loma nemmen akiavai'a, apkenmakmekama loma nemmen, apkenmakmekama nhan nekha alvata apkelhaikamo mota qaselha apanko'ok.

¹⁸ Elvetak hata akmeta eten ankok ma'a apiav'akha temma, elvenama ta nhan ma'a, hata etnangkok: "Koka apiav'akha lhta temma, akto lhta niekhe neten ankek akiaspommalhka melhnok po'ok la temma"

¹⁹ Elelhpakhangkok hata lhepop aktek apqatko'ok aniem'o anmaiosak'a apvalho'ok, apkelleklhangvoma kakpota nhan apkelvenema, hata etnangkok akiennaktema nkek apkelvenema m'a: "¡Ai, lheia la ie apiav'akha temma! Hengeltemeskeskangke nkeskama patakkom enganko'ok aniem'o nelletsavkesaikama qaselha ankok nelhaikama loma nemmen enganko'ok, mpelapkaskek koka akno aktevaso lheia", hata etnangkok neksa apkelvenema m'a.

²⁰ Kolpaihekha toka apvalho'ok ketlhengkap apkakhaikamok neten ngkanek nnek aktevaso apiav'akha temma nak. Kolpaihekha nhan apvalho'ok ketlhengkap apkellelto nak apkelpokkenammap, nema allapaskamo kakpota nhan apkeleltennasemmap ania'a ngkanek Eniapom Neten apiaqmongkasakhek aktemakha ngkolatsekama lhta allanei'o ketlhengkap —lhta ntak nema aliatekama aniem'o neten.

²¹ Netamen asvet'o lhta mokhom po'ok ángel aknema apmopvana apanke, apkenenkasakhe lhta neten lhema metaimong akiavai'a akiaqiema malha lhta akto nak akteklheklhema nak trigo, ka apieniantamo lhta takhalhet alvata iemmen, lhta aptak: —Hata ngkotnek lheia hengke'e apiav'akha temma Babilonia, kno ta akieniantamo koneng akiennaktema nkek koka, mankotalhkek hata mokhom.

²² Mankonnalhkek hata mokhom lheia annekmasemmalhka arpa, iompa'at kakpota nhan trompetas akieto amai av'alhok. Emaskengvomok hata nhan akieto nak lheia apkellelto apkenmakmekama lhamakho aptemakha, nkomaskengvomok hata nhan aliepioma nellengai'a aniem'o akteklhemmalhka.

²³ Ienaqtesa lhma ta nhan ngkotnek akieto nak lheia, nkomaskengvomok hata nhan aklengammalhka apaivoma nema aptava kanhan nema atava aliemhapakha la'a. Nkanek macatero anko lhta lheia' apkellelto neten apankavek ma'a, nkeliennenkeskangkek lheia lhamakho apkellavakha lhmankek ham aniem'o aktema iolhma nkoihamolhma —lhta aptak ángel.

²⁴ Hai', hata ngkotnek ma'a apiav'akha temma nak ngkanek ngvetalhkek ma'a ema apanko'ok apkeleltennasemmap ania'a, kanhan apkellelto apkelpokkenammap, kanhan aplhamakho aptekioma takhalhet lhepop lhmankek ham.