Apocalipsis 12 - Nuevo Testamento Toba Maskoy

Ngkelvana neten

¹ Netamen asvet'o mokhom qaselha mongenatkeskama neten. Lhema ngkelvana lhta m'a, nkapommatke lhta malha lhta ntak aknem, kakpota nhan koneng amankok pelten, nietne lhta alhanma apqatek 12 iav'a m'a.

² Nlose lhta m'a, nkeleklhangve lhta aniem'o atka apmahai'a etiemok.

³ Asvet'o lhta nhan mokhom kaselha mongenatkeskama neten, lhema kaselha nevhak akloma akielhvasema lhta m'a. Malha menasma akiavai'a lhta m'a, 7 lhta apqatko'ok ma'a, 10 alhtoka nhan apet'ok, 7 lhta nhan aknaktetema apqatkok.

⁴ Mmakheske lhta nhan aipakiek akpalesakmo nalhepop tercera lhema nekha iav'a neten anak. Ka netamen ma'a akteteskakmo aknakha ngkelvana lhta mmahai'a nkotengkesek atka, kakpota nkotvok apteiakmo ta atka m'a.

⁵ Ngvet'a lhta atka ngkelvana apkennavo lhta m'a kakpota etnek hata apveske apiennaktema takhaplhet'ok lhamakho apkellavakha lhma nkek ham, emama ta m'a iaqiopvahek tavapak koka. Nne lhta akvo'o nematka apietnakha m'a, kno lhta nhan aksakho napaqtek Eniapom Neten, naqtek na aptanema apveske m'a.

⁶ Nkenie lhta nhan ngkelvana lhta akieto m'a metkelha temma, Eniapom Neten alhta apeneskeskamo m'a kakpota ngkolhek aktaqmelkaso m'a, nkolhkak na aktoma akvakmo 1.260 aknem.

⁷ Asvet'o lhta nhan mokhom apkennapommap neten, apveske ángeles apvesai'a Miguel kakpota nhan apketlhelhma'ak apkennapekpe lhta menasma akiavai'a kakpota nhan ángeles anko'ok atlhelhma'ak.

⁸ Ma lhtoka nkoltemeskesentak koneng ma'a, kno nhan alentepkeso m'a neten.

⁹ Nne lhta nhan akieniantamo koneng menasma akiavai'a kanhan ángeles atlhelhma'ak akieto takhalhet lhepop. Tep nak nanek akietnemo m'a menasma nak, akvesai'a nhan aveske keliaqhameiok, mo'ok akvesai'a Satanas, aliennengkaseiangka mota enenlhet'avok alhmankek ham.

¹⁰ Netamen ma'a asleng'o lhta nema aliatekama akiennaktema nkek neten, lhta ntak: —Kolhva ngva'ak nengelvongkasemmalhka tep, ngva'ak na apmopvana kanhan aptema apveske Eniapom Neten enganko'ok. Nengvet'ak na apientalhnemo apto apkapaskama lhta apvesai'a Cristo ngkanek nne lhta aktepkeso neten akto henlheianma ngken, akto lhta mota aklheianma apkelvesai'a engelialheng'a napaqtek Eniapom neten ma'a.

¹¹ Koka apkeleltemeskesakhe lhta koneng ma'a aniem'o lhta akiangkenammalhka ema apankok Nepkesek Apketkok, aniem'o lhta nhan apketlheianma apvesai'a m'a metka apkellai'a, nkaqhok apkenmahai'a etekio'ok

¹² ¡Kopaihekha ta av'alhok neten kanhan apkellelto apkelloma m'a neten! ¡koka ketlhengkap la ie' apkelloma nak takhalhet lhepop kanhan apkelloma nak alvata! Ngkanek ngvaivantaniek aveske keliaqhameiok apkelammelhma ta ketlhengkap ham, mangkasak aknatheskama m'a ngkanek niavek na ketsek nkaimelhka aknem nkotvasalhkak hata m'a —lhta ntak nema aliatekama m'a.

¹³ Netamen ma'a menasma akiavai'a lhta nema akienienta takhalhet lhepop, akiakmasengka lhta ngkelvana akvetai'a lhta atka.

¹⁴ Koka nne lhta allangkok hanet alhempanko'ok ngkelvana, malha lhta ntakhak meivoma apiavai'a kakpota nkomhangkok aknaianlha la'a akieto m'a metkelha temma, aktakha nhan mokhek ankek menasma akiavai'a. Kakpota ngkolhek aktaqmelkaso, nkolhkak nak aktoma m'a akvakmo lhema iantelhkapa, mo'ok iantelhkapa kanhan nalhet iantelhkapa.

¹⁵ Koka ntepkaske lhta iemmen atong menasma akiavai'a nak malha lhta ntakhak alvata akiavai'a la'a kakpota nkosvo niekhe iemmen aniema ngkelvana.

¹⁶ Koka lhepop alhta nhan mpasmak ma'a ngkelvana nak, mmaieske lhta atong aknaqsepo iemmen akteiapma atong menasma akiavai'a.

¹⁷ Ma lhta nkasak ankek aklavo menasma akiavai'a alan'o ngkelvana lhta m'a. Mmeiakhe lhta m'a kakpota nkonnapalhkak aplhamakha atkak netamen ma'a ngkelvana, apkellelto apkelleliehekho mota henganemakha Eniapom Neten, apkellelto nhan apketlhengkeskama apketlheianma apvesai'a Jesucristo.

¹⁸ Netamen alhta m'a akietnakho lhta menasma akiavai'a nekha alvata m'a.