3 Juan 1 - Nuevo Testamento Toba Maskoy

Nema aklheianma envalhok Gayo

¹ Ko'o asto metno apketkok, nlhenkek evalhok lheiap Gayo apto astema emo'ok, have niapak ankek askasekhai'o lheiap.

² Lheiap askasekhai'o, asiavek ko'o lhamakho aknem akvanekamok aktaikama nengaqtek Eniapom Neten, askeltavek na etak metka akmaska apiempek, nkotakmel·hok na apmangkolha la'a elanak na lhamakho qaselha altaqmanma.

³ Avanhek anke lhta nhan akpaihekha evalhok heleltennaskaktamo engelialheng'a ania'a aktemakha akiennaktema apieplavkeskama lheiap akto nak have niapak anke.

⁴ Avanhek ankek na akpaihekha evalhok neksa aslengai'a ania'a eietkak apkelleliehekho akvesai'a nak akto have niapak anke.

⁵ Eialheng askasekhai'o, ntasek ankek aptemakha nak lheiap apasmoma mota apkelialheng'a, neten aktaqmanma nhan ma'a apasmomo apkelleniem'o mo'ok nekha.

⁶ Ka enenlhet'avok anak apkeleltennangvakhe lhta napaqtavek iglesia akiavai'a apkelpasmoma lheiap ma'a aniem'o apkellasekhai'o. Ntasek ellangkok alaimelhkelha la m'a kakpota ellempekhok kelha mokhom apketlhengama, ngkanek apkellelto Jesucristo apkellasennaikama m'a.

⁷ Apketlhengke mota m'a apkenmak'akha la enmankok kakpota elpaiaksek ania'a aktaqmanma aplhenammap Jesucristo, man koka enmankok takha nema alpasmoma la alleniem'o enenlhet melioho nak Eniapom Neten.

⁸ Ka ngkanek nkaimelhkek ennengko'o nelpasmoma la m'a neksa apkelpaieskama ania'a aktaqmanma akto nak have niapak ankek ma'a.

Diotrefes apkammelhma Gayo

⁹ Askapaske lhta lhema vakkahak asnaktalheskeskama iglesia akieto nak ham, koka ma lhta hengenmaktakha ennengko'o Diotrefes ma'a, kelha nkeniemai'ak na apmahai'avek eientalhnama nhan ma'a.

¹⁰ Ngvakse ta ehetong asvaktamo ta ham ngkanek mangkolatsekama mota hengetlheianma ennengko'o m'a. Apmopvana ania'a m'a, menmamak na takha engelialheng'a amaika'a apkelvaiam la m'a, ma lhta nhan eleltemok enmakpok takha amaika'a la m'a. Lhta apto la enenlhet apkenmama takha m'a, aptepkaske lhta mota enenlhet apieseksek iglesia m'a.

¹¹ Lheiap eialheng askasekhai'o, meieplavkesankek lheiap aptaiangkolha nak meliamolhma, ntasek koka eieplavkesek ma'a aptaiangkolha nak enenlhet apkeliamolhma nak. Enenlhet apkelan'o la qaselha aktaqmelo, koka apto apasmekha Eniapom Neten ma'a. Koka enenlhet apkelan'o la qaselha ngkolatsekama, metak Eniapom Neten.

¹² Lhamakho engelialheng'a apketlhengke mota aptemakha Demetrio, apto lhnak apiamolhma m'a, nelvet'ak na ennengko'o aptemakha have niapak ankek ma'a. Ennengko'o nhan netlhenak apto apiamolhma m'a, apiavek na lheiap nenlhenke mota qaselha have niapak anke mota nentangkok.

Aktakha nnelha nema apaivoma kanhan nema aklheianma envalhok

¹³ Hai', mantek niekhe mokhom asmahai'a altennaksek lheiap, koka mankonmak'ak atalheskesek lhema vakkahak.

¹⁴ Koka ntasek aniantak ham kakpota apaqmetkesama apiokha apankek lheiap.

¹⁵ Hai', askeltavek eniangkok Eniapom Neten aktaqmelaikama apvalhok lheiap, nketlhenkek na apvalho'ok hengke'e apkeltemo lheme nengaqte nak lheiap. Eleltennes hata nhan aklheianma evalhok moklhem'a askeltemo lhemek nengaqtek ham.