2 Timoteo 3 - Nuevo Testamento Toba Maskoy

Aktemakha akvetammalhka ta nnelha aknem

¹ Alhenkesek hata mokhom askeltennaskama lheiap eiho ta nhan, akmak'o ta nkovak nnelha aknem lhmankek ham, nkovak hata nhan anmenammalhka akiavai'a.

² Moklhem'a ta etnangkok apkenmeiavkesammakpo apankavek qaselha apanko'ok, vanlha ta nhan etnangkok nkeskama apteniaikamok patakkom apanko'ok, etnangkok hata nhan apkelammakpo, etlhenakpok hata nhan apankavek aptaikamok neten apankavek melhno po'ok. Eltaknevak hata nhan Eniapom Neten apvesai'a, mellahek hata nhan ngkana'ak, metnangkek hata nhan gracias ellanhok ma'a, eltaknevak hata nhan lhamakho qaselha alleniem'o Eniapom Neten.

³ Mellamelemmek, melietnahek hata nhan napaqta'ak po'ok, elpaiesama ta nhan apvesai'a po'ok, menmangvomek hata nhan apvalho'ok aliatekamok ngkollatsekama ellanangkok, meliamolhma apankavek hata etnangkok ma'a enenlhet'avok anak, apkellammelhma lhamakho aptemakha qaselha altaqmelo.

⁴ Eliennengkasekhak hata nhan apketlhelhma'ak apankave', ellanangkok hata nhan qaselha ngkollatsekama aniem'o aliatekamok apvalho'ok koka metka atlhenaikama apvalho'ok akiaqmoiekha nkovak hata. Nkoliephesama ta nhan apkellammakpo, ellanangkok hata nhan qaselha atlheianmakha la apvalho'ok, meteniankek hata nhan ellanangkok apmahai'akha nak Eniapom Neten.

⁵ Nkovak hata nhan aknem apkeltaikama apankavek apkelleliehekho Eniapom Neten, koka eliekpelkakpo ta m'a apkellelto niekhe meleliehekho m'a. ¡Mepalhakvom ankek lheiap ma'a enenlhet'avok anak!

⁶ Vanlha mota apkenmaikamok akhaiangkolha ngkelvana'ak la nkoliennaktema nak av'alho'ok, nkeskama nhan allanekamok ngkollatsekama, atlhenkeskama nhan aliaspongkomakha nak av'alhok. Avanhek koka niekhe nhan apkenmahai'a eliennengkesek ma'a.

⁷ Anmahai'o niekhe nhan nkoliangvomhok qaselha altaqmelo koka mankovai'ak alianveiakmo m'a akto nak have niapak ankek.

⁸ Ka enenlhet'avok anak meliamolhma alheno lhkek apkellammelhma hengetlhekmoskama akto nak have niapak ankek, ka aptaiangkolha lhnak nanek ma'a enenlhet apkelvesai'a Janes kakpota nhan Jambres, apkellammelhmo lhnak nanek apketlhekmoskama aplheianma Moises, nnavek na m'a enenlhet'avok anak nenvanlha nak aliaseiangko mota lhma alketamekamok apvalho'ok ngkollatsekama, apkeliaskeiakmek na Eniapom Neten.

⁹ Koka nnelha ta nkotnengvomok metlhenkesek hata, elvetakha toka nhan aplhamakho enenlhet'avok aptaikamok metka apqatko'ok ma'a meliamolhma nak, lhnak nanek na ntemak ma'a enenlhet'avok apkellammelhma apketlhekmoskama Moises.

Pablo apkeskama Timoteo elanak mo'ok qaselha nkoietemo

¹⁰ Koka lheiap Timoteo, have aptonak lheiap ma'a ngkanek apieplavkeskangke asketlhekmoskama lhta, heieplongkek na amai, apiavek na lheiap asmak'akha la atnehek, apiavek na moi'askeiam, metka aspekheskama, askasekhai'o, kakpota nhan asiennaktema asvaskapma neksa asvetai'a mota akientalhnema.

¹¹ Apiavek na lheiap aslengaiangko akientalhnema aniem'o nema heiaqmasekama lhta metka nnelha, ka aktemo lhta asvetai'a m'a apiav'akha temma Antioquia, Iconio kanhan Listra, koka Apveske lhtoka hevongkeskama mota tep ma'a.

¹² Have niapak ankek ellengangkok hata nema akmenlhenaikama aplhamakho apkellelto la apkenmahai'a ellanangkok qaselha altaqmelo aniem'o nhan apkelleliehekho Cristo Jesús,

¹³ koka apkellelto nak meliamolhma kanhan apkeliennengkeskama nak po'ok, nkovenke pankok hata apkellanekamok qaselha ngkollatsekama nak, aplhaniek hata etnangkok apkeliennengkeskama enenlhet'avok, koka ngkolhek hata nhan aliennengkasakho m'a.

¹⁴ Lheiap koka elhengkes hata mei'askeiam akiennaktema apiangveiakmo lhta, ngkanek apiavek na lheiap ma'a akto have niapak ankek, ngkanek na enenlhet'avok apkeliamolhma apketlhekmosekamo lhta lheiap.

¹⁵ Ampai'o lhta aptemakha nematka apiangveiakmo lheiap ma'a Vakkahak anak aktaqmanma Eniapom Neten Apaivoma, akmovana nhan nkotlhekmoksek lheiap ma'a aktemakha apvongkasemmap tep aniem'o nhan mei'askeiam Cristo Jesús.

¹⁶ Koka lhamakho konne Vakkahak anak ma'a apvatepnapma Eniapom Neten, akmovana nkotlhekmoksek akto have niapak anke, kakpota nhan alvetaskeskama enenlhet'avok apkellanengko la ngkollatsekama. Akmovana nhan nkonnavaksek apkellanengko la qaselha ngkollatsekama kanhan atlhekmosekamok akto akpeivomo nkek,

¹⁷ kakpota nhan aplhamakho Eniapom Neten apkennemolhema la'a nkoliangveskeskamhok, nkolpenaksek aliangveskeskaiakmo enenlhet'avok kakpota ellanangkok lhamakho aktemakha qaselha altaqmelo.