2 Timoteo 2 - Nuevo Testamento Toba Maskoy

Nengvaskapma neksa akientalhnema

¹ Lheiap malha eietka, elhengkes hata mota apteniai'o apiempek koka aniemai'o nhan ma'a nengamelaiam anak aniem'o nhan lheiap apasmekha Cristo.

² Aplengai'a mota lheiap asketlhekmoskamo napaqtavek enenlhet'avok apentalhnema, etlhekmosa ta nha mota lheiap ma'a moklhem'a enenlhet apkellelto la apkeltakmelkasemmakpo kakpota nhan ma'a etlhekmosangkok na po'ok.

³ Evaskap hata nhan akvo'o la akientalhnema ngkanek lheiap apto malha soldado nema apiamo apkasennaikama la nhan Cristo Jesús.

⁴ Ka soldado la'a meteniak apankok apankek la apkaniemhaikama, vanlha koka aptenia mota akleklemelha la apvalhok apveske apankok.

⁵ Apkellelto nak apkelpaivasemmap carrera, apkeliahakhe mota aktemakha henganemakha ankok ma'a kakpota elhkak aplhevai'a akianmoma.

⁶ Kanhan enenlhet apmakmekama la akientalhnema aniep apankok, eknek sekhe kakpota alhaiek etak apnaklhema akielhna.

⁷ Etaqmelkaso ta aklheianma apvalhok aktakha nak asketlhekmoskama lheiap, Apveske ta eihangveskeskamho akiokho nkek asketlhekmoskama nak.

⁸ Koietnama ta apaqtek lheiap aktemakha lhta apkaniemhaikama Jesucristo, apto aptaven neptamen David, aplhatekhangveiakmo lhta nhan apieseksek apkenmaskengvaiakmo m'a, ka ania'a aktaqmanma nak alheianmo na mota ko'o,

⁹ asvet'ak nahan akientalhnema akvakmo nhan akno henakteto cadenas akieto nengaqlhengkasemmalhkelha malha aktonak enenlhet la meihamolhma, koka Eniapom Neten apaivoma nak mankaqlhengkasemmalhkak ma'a.

¹⁰ Koka asvaskapmek neksa aslengaiangko akientalhnema kakpota nkoltaqmelek apkellangiemhaikama apkellelto nak apkeliekieskama Eniapom Neten, apkelvonkasemmap hata nhan tep, elvetak hata nhan qaselha altaqmelo m'a metka anmaskengvaiam aniem'o meliaskeiam Cristo Jesús.

¹¹ Have niapak ankek asmak'akha nak atnek aspaioma, ka neletsepo la lheme Cristo, angelloka ta nhan lhemek ma'a.

¹² Ka nengvaskapo la nhan neksa nellengaiangko akientalhnema metka nengai'a nhan, antangkok hata malha apkelveskai'e lhemek ma'a, kanhan nenlheno la mangiamo apvesai'a Cristo, elhenek hata nhan manghengiamo m'a.

¹³ Niekhe mangelieplavkeskama la nentangkolha netlheianma, koka m'a Cristo eieplavkesek hata mota aptemakha aplheianma m'a ngkanek aptemakha apankek ma'a.

Apkellanemmakpelha etnangkok nema allasennaikama apkeliamolhma la'a

¹⁴ Etlhenkeskeskakho ta mota apvalho'ok enenlhet'avok lheiap hengke'e hengetlhekmoskama nak, eleltennasamok hata apkellanemakha etnangkok napaqtek Eniapom Neten metka apkellatemommap apieseksek anak ma'a, koka aqhemo m'a, vanlha koka akmovana nkoveskak aknaqtevaskama apkellelto la apkellailhemo.

¹⁵ Elienlhanmo ta apkelanai'a akpeivomo lheiap kakpota mangkomangkaksek aktemakha apmakmekama, etlhekmos hato ka akietemo nkek ania'a akto iokhalhme kakpota elhenek Eniapom Neten aktaqmanma apmakmekama.

¹⁶ Melhen koka ania'a ngkolatsekama la'a mankoleklemelha nak apvalhok Eniapom Neten, ngkanek apto la aplheianma m'a nkoiavangkok hata m'a meihamolhma.

¹⁷ Nkopaihek hata nhan apaivoma ngkolatsekama nak malha aktonak iama al'ok la'a, ka aptaiangko na mota m'a Himeneo kakpota nhan Fileto,

¹⁸ apketlhekmoseiangko nkoietemo nkek ma'a, apketlheianmo lhnak ntemengkek ma'a nennaklhatekhangveianlha nak apieseksek apkenmaskengvaiakmo, lhna aptaiangkok ma'a, koka ania'a nak alietnokhaskeskamo apvalho'ok neksa aptaikamok meliaskeiam moklhem'a Jesucristo apkennemolhema.

¹⁹ Koka Eniapom Neten hengellaiangkek lhema iamet akiennaktema nkek, malha anengkasemmalhka nenpathetma la'a, akieplomo koka alkasemmalhka ntemak hengke'e: «Apkeliekpelkavek Apveske enenlhet apanko'ok la'a». Ka ntemak na mo'ok hengke'e: «Ntasek elieniekhak ngkolatsekama apkellelto nak apkellasennaikama Apveske».

²⁰ Lhema asietkeskama, pa'at la akiavai'a nnankek konne altakmanma nkek qaselha akmennave nkek oro kakpota nhan plata nema anmaikama la'a akvakhelha aknem aktaqmanma, nnankek na konne qaselha iamet nekha kakpota nhan nialpa alanemmalhka, nema anmaikama na mota lhamakho aknem.

²¹ Ka apmak'o la etnek lheiap malha nema anmaikama aktaqmelo qaselha nak, aktaqmanma nkek, apokkanma koka Apveske m'a kakpota nkolanak altaqmelo qaselha m'a, mevhanengvom na ngkolatsekama nak hengetlhekmoskama ngkanek nkopaisengkese ta apvalhok lheiap ma'a.

²² Koka enienieta lheiap neksa akvai'a apvalhok atsepma apneniek aniem'o apketkok, etenia toka mota akpeivomo qaselhaha, mangiaskeiam anak, nengasekhai'o nhan. Etne ta nhan metka akmaska apkelpasmakho la aplhamakho apkellelto nak apkellasennaikama Apveske akieplomo nhan alalhnai'o apvalho'ok.

²³ Meniailho nkek nema aliamenammalhka la'a, koka aqhemo m'a, vanlha koka mota aktepkeskama nennapommalhka m'a.

²⁴ Lhema apkasennaikama la Apveske mankapvankek eliamenakpok po'ok, ntasek koka etaqmelkasok apaqmetkeskama po'ok la'a, etnek na apmopvana etlhekmoksek kanhan metka apekheskama qaselha,

²⁵ etnek na meientalhnemo ennavaksek apkellelto nak apkellammelhma la apketlhekmoskama, koka Eniapom Neten hatelha enianak eliaqmongkasekhak mo'ok apvalho'ok ma'a kanhan eliangveskeskamhok akvesai'a nak akto have niapak,

²⁶ kakpota nhan ma'a apvanka'ak nkolpaqnemekhak neksa anmama malha al·hanemmalhka la ankok aveske keliaqhameiok aniem'o altemo ellanak akmahai'akha nkek la m'a.