2 Tesalonicenses 1 - Nuevo Testamento Toba Maskoy

Aklheianma apvalhok Pablo ko Tesalonica

¹ Ennengko'o Pablo, Silvano kanhan Timoteo nketlhenkek engelvalho'ok iglesias akieto apiav'akha temma Tesalonica apkellelto nhan apkelpasmekha Eniapom Neten eniapma'ak ennengko'o kanhan apveske engankok Jesucristo.

² Nengeltavek na Eniapom Neten kanhan Apveske engankok Jesucristo eltaqmelkeskesek apkellaniemhaikama, ellangkok na altaqmelaikama apvalho'ok ketlhengkap ham.

Pablo aptema gracias Eniapom Neten

³ Ketlhengkap Elialheng'a, nietavek antangko mota gracias Eniapom Neten ngkanek ngvaneniek meliaskeiam anak ketlhengkap lhamakho aknem, ngvaneniek na apkellasekhammakpo apieseksek anak ketlhengkap ham.

⁴ Vanlha mota netlhenaikama aktaqmanma apkelvesai'a ketlhengkap akieto mo'ok la iglesias apankok Eniapom Neten, ngkanek ketlhengkap nheklhek apketlhengkeskama aliennaktema apvalho'ok meliaskeiam neksa nema akmenlhenaikama kanhan apkellengaiangko akientalhnema.

⁵ Ka ngkanek Eniapom Neten apkeliekpelkek akietemo nkek ketlhengkap aniem'o apkelvetai'a apkellengaiangko akientalhnema aniem'o nhan aptemakha nak Apveske Eniapom Neten, nietavek na elentelhek ketlhengkap ma'a.

⁶ Nietavek ellangkok apkellengaiangko akientalhnema Eniapom Neten ma'a enenlhet'avok anak apnaqtevaskama ketlhengkap,

⁷ ellangkok hata nhan apkeliamposammap ketlhengkap apkellelto apkellengaiangko nak akientalhnema, ennengko'o ta nhan ma'a. Hata nkovak ma'a apkelhiakmo ta neten apveske engankok Jesús, apketlhelhma'ak ángeles aknema apkenmopvanka'a aiseksek talha aleivoma.

⁸ Evatak hata kakpota ellangkok akiaqmoiekha apkellelto nak menmaikamok takha Eniapom Neten kanhan meleliehekho lhta ania'a aktaqmanma aplhenammap apveske engankok Jesús.

⁹ Hai, mangkotnengvaiam annelha ta akiaqmoiekha apkeltemakha m'a, elentepkasakpok hata nhan napaqtek Apveske apto apientalhnemo kanhan aknema apmopvana.

¹⁰ Nkotalhkak hata m'a apvaktamo ta Apveske kakpota ellahok ma'a, nkoliemaksek hata nhan apvalho'ok apkelpokkanma apkeliekieskama lhta, apkellelto nhan meliaskeiam ma'a. Hai, ketlhengkap nahan apkellelto napokha apkennemolhema Apveske ngkanek meliaskeiam alhta nenlheianma mota apvesai'a m'a.

¹¹ Eniapom Neten apto apkellavekama ketlhengkap ka ngkanek ntasek eltaqmelkasakpok akietemo nkek, nengelelmalhneskaske mota Eniapom Neten elpasmok eleliehekhok ma'a, ellangkok na apkenmopvanka'a kakpota ellanangkok lhamakho qaselha altaqmelo apkenmak'akha la ellanangkok aniem'o alpekhesaikama meliaskeiam.

¹² Netamen elvetak hata aplhamakho enenlhet'avok ma'a, eliavenkaskesama ta nhan Apvesai'a apveske engankok Jesús kanhan apkelvesai'a ketlhengkap. Ka lhamakho qaselha nak ma'a ngkotnek hata akvetammalhka aniem'o aktaqmanma nkek apkellanei'o Eniapom Neten kanhan Apveske Jesucristo.