2 Pedro 1 - Nuevo Testamento Toba Maskoy

Aklheianma apvalhok Pedro

¹ Ko'o Simon Pedro asto heiapaskama kanhan heiasennaikama Jesucristo, nlhenkek evalhok aplhamakho apketlhevai'a nak mangiaskeiam aktaqmanma nke', ka kto nak ennengko'o aniem'o nak Eniapom Neten kanhan Jesucristo apto apeivomo kanhan hengelvongkeskama tep.

² Askeltavek nkanantangkok altaqmanma apkellangiemhaikama kanhan altaqmelaikama apvalho'ok aniem'o apkeliangveiakmo Eniapom Neten kanhan Jesús Apveske engankok.

Nenvanengkeskama qaselha altaqmelo hengaikamok Eniapom Neten

³ Apmopvana nak Eniapom Neten hengeliekpelkeskaskek apto neten apankek nema apmopvana, elanak na qaselha hempelapkeskama, hengellavema lhta kakpota hengellangkok lhamakho qaselha alaimommalhkelha la'a angellanangkok na aktaqmanma.

⁴ Hengeleltennaskamo lhta nhan lhema apaivoma aktaqmanma nkek hengeltemeskesangkok hata nengelnemo Eniapom Neten, envanka'ak hata nhan hengelpaqnemekha qaselha ngkollatsekama nak hengke'e aniem'o aliaspongkomakha nak engelvalho'ok.

^5-7 Nnaiangkek ketlhengkap meliaskeiam, koka nkaimelhkek eteniangkok apiempeiok ellankesangkok lhamakho qaselha altaqmelo ka kto nak nentaqmelkasemmalhko, nenianveiakmoho', nenmopvana anmeiavalhkok enganke', metka nempekheskama, nelanai'a aktaqmanma, nellamelaiam engketkak aniem'o Cristo, nellasekhai'o nhan aplhamakho enenlhet'avok.

⁸ Nkaimelhkek angellanesangkok akiekangveiakmo engelvalho'ok anak qaselha altaqmelo nak kakpota ngkotnekhak malha allentepekha m'a nkollanangkok qaselha altaqmelo. Koka mantangko la m'a, malha aqhemo ta ngkotnek neliangveiakmoho apveske engankok Jesucristo.

⁹ Koka enenlhet mankoietnema la m'a aktonak alheno lhkek, malha ta ngkotnek metka apaqto'ok la'a, nlho ka la nhan nengaqtek la apvetai'a qaselha, apkelvangkaiam nahan nema alhnaskeskama lhta apvalhok malha akpaiseiam aniem'o apkelanai'a ngkollatsekama.

¹⁰ Ketlhengkap elialheng'a, apkellavema lhta Eniapom Neten, apkeliekiesaikamo lhta nhan ma'a, ntasek enmeivo mota m'a qaselha altaqmelo nak apvalho'ok kakpota mepallemmek.

¹¹ Ka nkeniem'ak ma'a ntasek ankek hata ngkotnek apvaiam ma'a iokhalhma akieto nak aptemengvekhelha metka aktemongvaiam annelha Apveske engankok Jesucristo, apto nhan Henvonkeskama tep.

¹² Vanlha mota askeltemo nkotlhengkeskakho apvalho'ok asketlhekmoskama nak akto have niapak ankek, asiave niekhe ko'o apkeliavek ketlhengkap hengetlhekmoskama nak, apkelleliehekhavek nak metka nnelha,

¹³ nkaqhok koka askeltakhengveskakhek askellanemakha etnangkok neksa askaniemhaikama mokhom henke'e.

¹⁴ Apveske engankok Jesucristo apiangveskeskaiakmok evalhok nkanketkek angvetsepok hata aieniekhak hata asiokha nak,

¹⁵ koka kolhvave nak alhenkesek hata mota askeltakhengveskekha asketlhekmoskama kakpota nkotlheianvakho mota apvalho'ok ketlhengkap asketsepo ta.

Apvetaiangko Pedro Cristo aknema apmopvana

¹⁶ Lhamakho netlhekmosekamok anak aktemakha apmopvana apveske engankok Jesucristo, aktemakha nhan apvektanlha ta m'a, have aniem'o m'a nema hengeltennasekama nak malha nkotno iokhalhme, neliokho engankave lhta nelvetai'a ennengko'o m'a apientalhnakha Apveske.

¹⁷ Neksa nellengai'a lhta apaivoma Eniapom Neten apto eniapma'ak, neksa lhta nhan apommatema neten akvaivantamo lhta nhan apaivoma, ai'o lhta m'a, aktemeskeskamo lhta nhan akiavai'a nkek apvesai'a Jesús, lhta ntak: «Ka eietka ham askamelaiam, apto nhan askeliekieskama ko'o», lhta ntak ma'a.

¹⁸ Nelleng'a lhta ennengko'o nema aliatekama nak aniem'o neten neksa nentaikamok alhta netlhelhma'ak apveske akieto m'a nalhma akhaiam akpokkenammalhka,

¹⁹ ka nkeniemai'ak neltemeskeskamo iokhalhmek ankek ania'a apketlheianmo lhnak nanek apkeleltennasemmap ania'a annenga, ntasek na ketlhengkap eltaqmelkasok apkellailhemo ania'a nak ngkanek malha talha alhankok la m'a altetkeskama nak ienaqtesakha lhma akvakmo aptepo malha iav'a apiavai'a apvalho'ok ketlhengkap ma'a.

²⁰ Askeltavek na aleltennaksek qaselha akto neten ankek akiaspommalhka nak, mangkolatsema elpeivesekha apanke lhema enenlhet apketlheianmo lhnak nanek apkeltennasemmap ania'a akietnemo nak ma'a vakkahak Eniapom Neten apaivoma.

²¹ Apkeleltennasemmap ania'a nnenga metlheianmak na apanko'ok apankavek la ania'a, Eniapom Neten koka apkellaikamok apaivoma m'a kakpota etlhenek ma'a, aniem'o nhan apkenmaikama Espíritu Santo.